هل ازالة اسم السودان من قائمة الارهاب تحل مشاكل السودان؟

05:23 PM October, 18 2020

سودانيز اون لاين
Gafar Bashir-
مكتبتى
رابط مختصر

سؤال طالما كان مطروح، وضعت حكومة حمدوك كل ثقلها علي مسالة قائمة الارهاب بل وصارت هي المعيار والمبرر لكل ما يحدث في السودان ، اذا افترضنا جدلاً ان موضوع الاقتصاد مرتبط بقائمة الارهاب
الإعلام؟ هل يمثل الاعلام الحالي الثورة؟ هل تمثل توجهاته توجهات الثورة؟ وماهو علاقته بقائمة الارهاب
القضاء وقضايا الثورة والثوار وقضايا المال العام وقضايا القتل ومحاكمة رموز الجبهة الاسلامية، ما علاقته بقائمة الارهاب؟
السلام؟ الاتفاقية الموقعة والفصائل التي لم توقع بعد ما علاقتها بقائمة الارهاب؟
اتخذا القرار؟ من الذي يدير السودان؟ وكيف تعمل حكومة بدون وزراء ؟

والاقتصاد مرة اخري:
الشركات والمؤسسات الحكومية المستولي عليها من قبل الجيش
التهريب للذهب وغيره الذي يتم خارج النظام المصرفي
تجارة العملة من قبل الافراد والشركات والمؤسسات الحكومية نفسها
الاموال السودانية المنهوبة بواسطة منسوبي الجبهة الاسلامية والموجودة في بنوك العالم


كيف سيغير ازالة اسم السودان من قائمة الارهاب كل ذلك
اتمني ازالة اسم السودان من قائمة الارهاب لنري ثم ماذا بعد
واتمني ان تكون حلا فعليا لكل مشاكلنا ،

لا ....

الجواب بكلمة واحدة على سؤالك:
لا.......

يا جعفر مليارات البترول ما حلت مشاكل السودان..
مشكلة السودان مؤسسية وليست إقتصادية.

يا جعفر اخوي هناك مليارات الدولارات تقف علي الحدود تنتظر رفع اسم السودان من القائمة لتدخل وتحل مشاكل السودان.
دي بقت شماعة للفشل.

سلام عليكم
الاجابه فى اتجاهين وجهين لعمله واجده
اولا الموضوع دا زى مايكون فصل من فصول مسرحيه (فى انتظار جودو) رفع اسم السودان من قائمه الارهاب وتطبيع مع اسرائيل وكذلك الجرى المتواصل للشحده ومد اليد طلبا للقروض باسم الثوره وسودان مابعد الثوره ....الخ كله دى فارغه مابتقدم ولاتاخر وانت كحاضنه سياسيه واحزاب (الاحزاب والقيادات المنحازه فعلا لجانب الثوره والشعب) مش الاحزاب والقيادات العميله كان للكيزان او للمحاور الخارجيه .ومخلين الناس منتظرين فرج موهوم من الخارج قمح وبترول ودولار وحتى الشركاتلما تجى هل الشعب والدوله على قدر التحدى تسهيل (الحكومه) ومشاركه وامتساب خبره (الشعب) ولا القصه بس شغل اعلام والبلد يجو يشتغلو فيها الاجانب زى ماحصل ايام البترول (قبل الانفصال) الحبش والمصريين يجو يغتربو عندناونحنا بنمارس فى الانشطه الطفيليه سمسره وتجاره شنطه ورمتله من بنبر ست شاى لحفله غربان الفن ....الخ لكن مافى انتاج حقيقى.
ثانيا الشعب المفروض ثار وملا الشوارع وعصيان مدنى وواتكومو فى القياده شهور ...وين الناس دى هسى ؟ والبلد مليانه ازمات وثقوب وعراقيل ضمن حرب الفلول لاجهاض الثوره .
شعب الا تسوقو سواقه قطيع بمليونيات وهتاف وشعر وهلمجرا لكن الفعل الحقيقى اليومى فى المؤسسات وفى الاحياء لتثبيت الثوره والتغيير سواء اجتماعيا او اقتصاديا او حتى جانب ثقافى ينشر وعى والحكومه والحاضنه السياسيه فشلت انها تستنفر وتنظم وتوجه طاقات قواعدها (على الاقل) للمهمه دى ولو كلن فعلا عندنا احزاب متماسكين فى حاضنه سياسيه بحد ادنى من العمل على المستويات دى مان بيحصل الشايفنو هسى البلد لاعمل لا انتاج حقيقى والناس غرقانه فى ازمات - تؤدى لتعقيد الوضع السياسى -هى جزء منها بسلبيتها وعجزها .
مافى ازاله لاسم السودان من قائمه الارهاب اوةتطبيع مع اسرائيل او مال قارون يتكطب فى السودان حيعمل شىء غير يزيد الوضع سوء والفساد لافسد طالما نحنا لسه فى قبيتى وقبيلتك وصراع كراسى حكم وعدم حياء وخجل من العماله المكشوفه للمحاور الخارجيه .وشعب لسانو فاق دقن زيدان الكسلان فى ارتياد مساحات واحلام انجاز فى العد وهو مسترخى فى انتظار جودو

وجودنا في القائمة معيب ومعيق ، ولكن خروجنا منها لا يعني الرفاهية والسؤدد ، هناك الكثير من الدول التي تمتلك مثل مورادنا ولم تفكر امريكا في وضعها في اي قائمة وبالرغم من ذلك غارقة في الفساد والفقر والجهل والتشرذم .
علينا ان نتحد ونجتهد في استثمار مواردنا الهائلة ، في بناء دولتنا في انفسنا اولا ، في قبول بعضنا البعض وان نجعل من تعدد ألواننا وألسنتنا وثقافاتنا مصدر ثراء وقوة لا مصدر تفرق وتمزق ...
علينا بالتعايش السلمي وان نعمل للمصلحة العامة ، ان نحارب الفساد بالتربية قبل القاقون ، وان نحارب الجهل بإقتلاعه لا بدفنه في الظلام ، علينا ان نقطع مشوارا طويلا قطعته قبلنا دول كانت افقر منا واليوم في مقدمة ركب البشرية ، ولا اذكر سوى سنغافورة مثالا ، تلك المدينة ، الدولة ، الجزيرة الفقيرة من الموارد الطبيعية والثرية جدا بالمورد الذهني البشري والتفكير السليم ، سنغافورة بها ثلاثة عرقيات كبيرة لا يجمعها سوى حب وطنهم ، اطول طرقها لا يعدو ال 50 كيلو متر ، وبالرغم من ذلك يعد جوازها الأول في العالم مناصفة مع اليابان ...
فهل نعي الدرس ام سنبحث عن شماعات أخرى اراها تتجهز وهي الدولة العميقة ، واليسار ............
ونبقى زي هلال مريخ ...
اليسار يقولوا فساد الكيزان يحتاج 30 سنة لتنظيفه ، ثم يأتي من يقول لنا ان فاد اليسار محتاج كمان تاني 30 سنة وهكذا ، تحرق شماعة لتصنع غيرها ....
تحياتي ومبروك للسودان

استاذ جعفر و الاخوة المتداخلين
سؤالك ممتاز و الاجابات فيها وعي اقتصادي محترم
لكن يجب تحديد ماهي مشاكل السودان اولا

سلام يا جعفر
رفع اسم السودان من قائمة الارهاب ح تساعد فى حل
مشاكل السودان الاقتصادية والسياسية .
يعنى ح نكون احرار ما مكبلين ويمكننا التفاوض والاتفاق
مع من شئنا بخصوص المشاريع الاستثماريه دون عراقيل "قائمة الارهاب "
والتى كانت تحول دون ارسال الاموال والاجهزة "الدقيقة " والتقنية الى السودان
وايضاً عدم امكانية اخراج الاموال من السودانية بالطرق الرسمية المعلومة .