توقيع السلام... والجيش السوداني في فتيل!!!

Quote: ماهو الشئ المميز في دارفور ولا يوجد في الشمال او الشرق او كردفان؟؟ كل بقاع السودان كانت تعاني من التهميش من جانب المركز ..فكان من الأجدر والأفضل إعلاء قيمة المساواة بين كل مكونات الشعب السوداني عبر توزيع متساوي لا يميز احدآ على الآخر. ولماذا يدفع باقي السودان 750 مليون دولار لمدة عشر سنوات؟؟

كردفان ودارفور والشرق بيدفعوا من قبل الاستقلال، دلوقت دا أوان رد حقوقهم على أساس التعويض وجبر الضرر الاتسببوا فيهو
القاعدين منذ الاستقلال في كراسي المركز الأنت بتتكلم عنه كأنو في المكسيك، مين المتسلط في كراسي المركز يا (الشيخ)؟
ياخي لو بس حسبنا ليك الناس الاسمهم (شيخ) في القيادة العليا والمؤسسات الإعلامية والاقتصادية والبنوك والوزارات والسفارات بتتملي صفحات!

Quote: ترى ماهو مصير من ظلوا في قراهم ولم تلتفت إليهم نظرات حكومة المركز؟؟ سيأتي أحدهم ويقول ان الحرب هي ما دفعهم للنزوح ...السؤال يا حاتم هل شمال السودان او وسط السودان أو شرق السودان او كردفان هم اشعلوا فتيل الحرب؟؟ ما ذنب باقي الاقاليم في سداد فاتورة لم يكونوا من المعنيين بمسبباتها؟؟

جاي تتاجر بمصيرهم؟
أصلو دي ما شغلتك، حقهم يصلهم في مكانهم وفي أي بقعة يسكنوا فيها مواطنين كرام أعزاء ليهم كل الحقوق زي غيرهم
بعد داك هم بيعرفوا يدبروا أمرهم، أنت ما وصي عليهم، خليك في الكوراك العنصري بتاعك، دارفور تاخد حقها والشرق ياخد حقه وكردفان تاخد حقها،
وأي إقليم أو (بقعة) استأثرت أو أخدت أكتر من حقها تتحمل الفاتورة لحين تساوي الكفتين، دا كدة اسمو العدل.
مش أنت داير العدل ولا داير شنو بالضبط أنت؟

Quote: ولماذا يمنح طلاب دارفور 15 من مقاعد الدراسة دن غيرهم من طلاب السودان؟؟ هذه ساحة تنافس تربوي...المتميز هو من ينال حظه في الفرصة..لكن ان تحدد لفئة محددة الدحول الى كليات محددة وبنسبة محددة فهذا شئ غير مقبول. كان الاجدى ان يدعوهم ينافسوا بجهدهم ومثابرتهم واصرارهم على النجاح والتفوق.

مقبول ونص، والنسبة دي ذاتها شوية عليهم! لو علي أديهم 50% على استحياء واعتذر ليهم!
وأيوة يمنح طلاب دارفور الكانت الحكومة في (المركز) بتطردهم من جامعات دخلوها بمثابرتهم وتمنع حتى أصحاب الحافلات ينقلوهم لعاصمة بلدهم!

من هو الشيخ الياقوت؟ صاحب الوقفة المشرفة مع طلاب دارفورمن هو الشيخ الياقوت؟ صاحب الوقفة المشرفة مع طلاب دارفور

وعشان أخوانهم القاعدين على الأرض الفوق ديل يشعروا بالكرامة وبأنهم بشر ويشوفوا الدنيا زي ما بيشوفها ولد فلان البيقرأ في كمبوني وعلان في سان فرانسيس،
عايز القاعدين على الأرض ديل ينافسوا واحد أمو جايبة ليهو أستاذ خصوصي في العصر وواحد تاني بعد المغرب وعمه قنصل وخاله فريق؟
ومال غسيل العدة وبيع الليمون والجندية وعمال الكنابي يشتغلهم منو؟ مش دي رؤيتك ولا أنا غلطان يا المخلوع بالمنقة؟

Quote: انا رافض للمبدأ في توزيع الوظائف... ليه؟؟

ما سألناك عن رفضك، طلبنا منك تفسر لينا بالأرقام، الاتفاق مشين وغير عادل ليه؟

Quote: انا رافض للمبدأ في توزيع الوظائف... ليه؟؟ لأننا سنكون اشبه ب "لبنان"...والتجربة اثبتت فشلها هناك .. فلماذا نعيدها هنا. نفس كلامي القبيل...كل واحد يجتهد والانسب والافضل ينال الوظيفة..ان شاء الله كلهم يكونو من دارفور ما عندنا مانع طالما نالوها بجهدهم.

التوزيع بقى حار هسع؟
ما كانت بتتوزع من زمن الاستقلال، المبدأ دا أنت عرفتو أمس؟
من جملة 800 وظيفة نال الجنوب 2 فقط لغاية ما انفصل، مروراً بتشريف الفوراوية بالاغتصاب
وظل التوزيع مدور لغاية اليوم الشفنا فيهو كيف الميت واحد تاني بيخت البوت فوق صدره، محتاج إثبات؟

شنو المشين وغير عادل في نظرك، إنو أهل دارفور يتمتعوا بسلطة تحمي نساؤهم وثروة توفر ليهم ولابناؤهم يعيشوا بكرامة
وفرص في التعليم والتوظيف عشان ما تتكرر السيناريوهات الفوق دي؟ ولا خايف على كومك ينقص؟
ورينا بالله لو سمحت.

وبعدين مالنا نحنا ومال لبنان؟
لبنان مشكلته طائفية ومشكلة السودان عنصرية وطمع وجشع وحقد و(فهلوة)، في علاقة؟
كلمناك إنو حتى الاجتهد طردوهوا من الكلية وحرموهوا من السفر جوة بلده بقروشه عايزو ينال وظيفة كيف؟
ما هي دي (الفهلوة) البسببها الناس قعدت عشان تكتب الوثيقة الجابت أحقاد أمثالك بارزة للعلن لا يسترها شيء يا (الشيخ)
وواضح إنو كل مشكلتك دارفور وأي خير يصلها، فلو بطنك فايرة أخير تشوف السبب الحقيقي.

Quote: ياخي طيب اذا مافي زول مؤهل في ذلك التوقيت لأي سبب من الاسباب لوظيفة محددة..الفهم ح يكون شنو؟؟ تكون الوظيفة شاغرة حتى يتاهل أحدهم؟؟

تنتظر لمن صاحب النصيب يجي.
أيوة تقعد فاضية، أخير من يملأها فاسد وفاشل ومستجد نعمة.
لأنو لو جابوا ليها (المؤهل الفي بالك) حيحرم مستحقينها للأبد.

ما ياها الفوارغ منتظرة بالسنوات ما ظهرت إلا في الشهور الأخيرة وتم الإعلان عنها، داك ما كان فهم غريب في نظرك؟

____
الله يكفينا شر الطمع والحقد والحسد.


========================

ولبنان دي قصتها شنو الناس دي بتهاجر ليها في الفارغة والمقدودة؟
الأفريقي العامل فيها شاعر يكورك لبنان والعامل فيها بتاع لغات يكورك لبنان والمستعرب منكسر للبنان
أهلكم ولا نسايبكم؟

(عدل بواسطة حاتم إبراهيم on 10-09-2020, 07:13 AM)