♧ يا حَمْدَكَة .. لسة شُغْلُكَ مَعانا حَنْدَكةٌ في حَنْدَكَةٍ£

▪ممتن للنخاع لنزولك ساحتنا سهلاً و حلولك مهلاً
أخوي عمر عيسى محمد أحمد، بوجهٍ صبوح و منور
و لكَم وددت أن يكون لي معك خيط رفيع للأخذ و الرد .
و رغم أنه لا يزال لديَّ في كنانة سهامي مزيدٌ من القنا
لأطلقه في هذا الاتجاه . و لكن دعنا نحتفل بك ضيفاً كريماً.
خاصة و أن ما تفضلتَ به من خذلان إبليس ، ليس بعيداًعما
رمينا إليه منذ افتىعنا لبوست بهكذا " عنوانٍ صادمٍ " .

● إذن ، حي الله مجدداً أخوي عمر و بياك . طبعن لعله ليس
خافياً عليك أننا هناعنقالة ساي من(حزب الكنبة الورانية ؛ ما
لينا كبير غرض في أولئك و لانا عارفين من وين أتانا "هؤلاء".
ولا هامينا البنا و لا البناول الطين عشان كدا لاقيين راحتنا تب ،
نقول راينا بمزاج . غلا خوفٌ علينا و لا هم يحزنون فكدي
عندي ليك واحدة مماثلةٌ تعال تقزقز بيها نتأمل فيها سوا
و نقول شلوووووم و نعبد شلووووم على نيل بلادنا!!

● جماعة عزابة ساكنيين سوا و حصل نقاشٌ حادٌ كاد أحدهم،
على إثره ؛ يفتح راس أخيه بكراع طربيظة عرجاء فقدت إحدى
سيقانها في عراكٍ عبثي ببن ثمالى في حانة للصيادين. لكن واحد
محضر خير قال ليهم : يا أخوانا قولوا بسم الله ؛ ألعنوا الشيطان
و باركوها خلاس . قام نطَّ واحد تاني ملقوف عامل فيها أبو عرام
قال ليهم : انتو هسي إبليس دا ذنبو شنو؟ ناس بتاعين شبك بس.

● الشاهد أنو بالليل لامن صاحبنا دا أوى إلى فراشه و جر بطانيتوو راح
في سابع نومة قام جاهو إبليس اللعين في حلمة طويلة طقمعاه حنك صاح؛
قال ليه : ياخ أنا مبسوط منك بجنس بسطة شديدة بلحيل؛ طبعن لأنك دافعت
عني عن ظهر غيب و نصرت أخاك مظلوماً. ظلم الحسن و الحسين !!

● فشنو ؛ هسي أنا عايز أكافيك لرد جميلك الصاع بصاعين. فدحين
فكدي تعال اركب في ضهري دا أعملني بساط ريح و حأطير بيك أحوِّم
بيك الدنيا دي من أدناها إلى أقصاها. فقال ليك إبليس اللعين طاير بالبني آدم
دا يفرَّج فيه : دي منارة النور و العطور و البخور باريس؛ و دي مدينة لندن
التي لا ينقشع عنها الضباب ؛ و أمبراطورية كانت لا تغرب عنها شعاعاعات
الشمش، قبل كشة (البريكزيت) طبعن ؛ و هدا بجاي سور برلين المنهار بعد
عودة شطري ألمانيا إلى دفء حضنيهما ؛و هداك بغادي سور الصين الكان
العظيم وقفلوه حولوها لبيوت أشباح بعد تفشي الكرونة و هلم جرى !!

●الشاهد و المهم، الله يعزكم ، زولنا من طول السفر بطنو كركبت
و شعر بحوجةٍ (ماصَّة) جدن للحمام قال لإبليس: ياخ نزلني سريع
أنا داير أمشي الحمام.الشيطان سأله: ياخينا الشيء بول موية ساي
خفيف و لا سيوبر متقلات (Heavy Duty ). داك قال ليه: و الله ياخ
دا شكلو (هُورار) مهلبية راسو عديل (مخرجات حُومار وتني و كدي) .
ياخ اامن إبليس زاتو صر وشو؛ لكن أهو الضرورات تبيح المحظورات
فقال ليه: يا زول ما مشكلة أخُد راحتك تب في ضهري دا عادي ؛ لأنو
حالتنا بقت واحدة ملح و ملاح و جُزلانا واحد؛ ثم إتا ظاتك ياخ ما قصرت
معاي. و كمان لو فصلت معانا كويس و بحلحتها أكتر طبَّعنا سوا و سمحت
لطياراتنا يعبرن بأجوائكم ، أها ليك علي ، بعد شوية بجيب ليك ( بتي )
المجننة العزابة دي نعرسا ليك و إتا نايم تشخر في سُباتك العميق دا.

● قال ليك عمك دا نزَّل متقلاتو و أخد راحتو للطيش لامن دعا قال :
الحمد الله الذي أذهب عني الأذى و عافاني أها عاد إبليس جنو كمان و
جن الأدعية و الأذكار النبوية الشريفة ديل مما يسمعن بيرفعن نكثافتو
يهرب لا يلوي على شيء بالازقة و النفافيج و تُسمع له فرقعات ضراط.

● فشنو ، فجأتن زولنا كدا صحا لقي الدنيا تحتو مطمبجة
و الريحة دي مبننة ، ضبانو يوِن و العزابة متلميين يضحكو
عليه يقولو : قررر. يلا بعداك براكم اتخيلوا باقى المقلب.

● و زولنا دا خجلان لامن مو عارف يودي وشو وين.
و تاني عاد توبة يا حبوبة من التحشر.

♤ أها العملوا الشيطان فى زولنا دا هو نفس
السيناريو اللي نفذو العلج النتن ياهو في تيس
حلبتنا أبو برنيطة ، السيد/ (بُلهان) الدين.