♧ نخليها..كلّ يَوْمٍ تُرذَلونَ £

آسف ليك جدن صديقي الحبيب المرهف خالدعباس
ما تقول علي: "ساعدناه في قبر أبوه قام دس المحافير"
لكن هدا جيتك بحاجة لعلها تليق و تنال استحسانكم:-
《5》
استراحة الجمعة :
●نحكيها على لسان صويحبتها كما جاءتتي و الذمة على الراوية:
توقفت لشراء (نبق) ...ولا اذيعكم سرا ..انا من عشاق النبق .. لا بأس
فالناس أحرارٌ في مذاهب خبهم لما يأكلون و ؤبدلبسون . فالبعض مسلن
يحب الشوكولاتة ...والبعض الكراميل ..وبعضهم يعشق المياه الغازية ..اها أنا
من كبار معجبي (النبق النبق ) .. مةس على كيف كيفي؟!! ..وقد كنت سعيدة
أيما سعادة ..ان النبق صديق طفولتي منذ تعومة أزفاري، ظل صامداً في وجه
موجات الغلاء ..جبل(الرجاف) الما بنشاف و الذي لا يهزه ريح..هو و الأقاشي
قدس الله سره ..الأسعار ترتفع ..والدولار يعلو ولا يهبط ..والذهب (باع فينا
واشترى ) ..اما صديقاي الثنائي المرح (نبق+قاشي) ..فهمم على العهد
باقون ..في متناول اليد ..و تاكل تشبع و تمد للجنبك تديه كمان .

●》أها بالامس الغريب ..توقفت لشراء نبق ..فتحت المحفظة وتناولت
ورقة أم خمسين جنيه ..قلت يا بت عزي روحك و شيلي الكيس الكبير داك..
تقعدي بيهو في فيلم الساعة عشرة إن شاء الله ..قلت لها بعد التحية والسلام ..
( عليك الله أديني الكيس الفوق دا ..أيوة النبق بتاعو احمر .. شكلو جديد ) ..
ابتسمت كاشفة عن أسنان لؤلؤيٍّ جميل و منتظم (أيوة نبق جديد جاني امس
دي والله) .. مدد يا كردفان الغرة أم خيرن جوة و برة .. أها مددت لها ورقة أم
خمسين جنيهاً يطقش الجنيه ..واخذت الكيس وقلبته فرحة وقد سرح بالي في
قعدة المساء .. و فيلم السهرة .. لكن صوتها انتشلني من أضغاث أحلام ظلوط
السعيدة و قالت لي بنبرةٍ خفيضٍةٍ غلب عليها الأسى :(الكيس دا ب300 جنيه) ..

●》ألحقو يا ناس الحلة .. الليلة كتل راجل(النبق ركب الكركابة..لكن ما ودانا
لأم روابة) ..ليه كدا بس؟..لماذا حطمت قزازة سمن أحلامي بجملة واحدة ..300
جنيه عديل كدا ..ليه كدا بس ؟ قلت لها (متين النبق بقى بي 300؟ انا قبل كم يوم
اشترتيو بي 50 ) ..رفعت حاجبيها دهشة (خمسين ؟ دا متين دا ؟ ووين ) و فجأة
"حسيت معاني الفرقة حسيت.. بالوجود من حنتي) اني قادمة من الفضاء ..لا أذكر
بالضبط لكنه كان وكت قريب..قبل الدولار ما يبقى 200 جنيه ..ضحكت ولم تعلق!!
●》بس يا جماعة الخير .. اشرحوا لي وروني العلاقة بين الدولار و(النبق ) ؟ هل هو
تعريفة الترحيل؟ بيجي من وين النبق؟ لو من واغ الواغ يعني أصلو بحاسبو بالنبقة؟
يبدو أنو الامور المرة جارة لأخطر مما نتصور ..الفيضان كسر كل الحواجز ....الشغلانة
وصلت النبق والقونقليز ..و الفول المدمس والتسالي ..نأكل شنو نحن بقية الشعب الفضل؟
..تذكرت جارتي وهي تحكي لي بحثها الدؤوب عن (أكياس الكيلو ) ..أكياس الساندوتشات ..
قالت ان احد الشباب الذين يبيعون الأكياس في الاشارات قال لها (والله في ازمة في أكياس
الكيلو الايام دي ) ضحكت جارتي وهي تحكي لي (بالله الازمات حصلت اكياس الكيلو ..لسة
ماخلصنا من ازمة الوقود ..والغاز والعيش ..بقى في ازمة اكياس الكيلو) ..شاركتها الضحك
وقلت لها (عندنا مثل باللغة النوبية بيقول تلي قون ترسي فكلا ..اي ترسا ملي) ..المعني
الحرفي له ( الابرة وسط الحديد ..برضو بتقول انا حديدة) ..

●》يعني بقت على أكياس الكيلو؟ ليه ما تختفي؟ و أهو النبق كمان عايز يقول أنا
حديدة .. و الأمر ينطبق على كل الاشياء التي كنا نأخذها كمسلمات موجودة في حياتنا
..يبدو ان شبح الغلاء قد القى بظلاله عليها ..ودونكم الفول ..حبيب الشعب ..الطلب منز
فات ال120 جنيها..مما حدا بالغلابة بتوليف وجبة تنوب عنه مكونة من البليلة العدسي
مع شرائح البصل ويضاف اليها الزيت والشمار..اطلقوا عليها اسم (زمني الصعب ) ..

●》والله الزمن بقى صعب فعلا ..ونحن قلنا الروووب عديل ..اذكر انني قبل مدة كنت
قد طلبت من وزارة المالية عدم صرف راتبي ..وانما في المقابل طلبت منهم منحي مواد
تموينية وكهرباء وغاز ووقود ..اعتقد ان طلبي هذا تعجيزي في الزمن الحالي ..لذلك اسحبه
واطالب وزير التجارة فقط ان يضبط اسعار الفول والتسالي والنبق ...لأنه على ما يبدو لو
استمر الامر على كدا ..الدولار (يتحدانا يوم يزعل ..تقول اقدارنا في ايدو ) والسلع الاساسية
ترتفع جرائه ولا تنزل بتاتا ..لو استمر هذا الامر ..فالنبق و التسالي و الفول الواحد ستصبح
وجبات أساسية لغالب الشعب السوداني..وعما قريب ..سنسمع بساندوتش النبق ..ووجبة
تسالي الكارجقل بالباشميل ..في الختام و على غرار شر البلية ما يضحك..كتب صديقٌ
سفير ...ساخراً(بقينا زي أهل الكهف ..نمنا وصحينا لقينا قروشنا ما بتجيب حاجة).
☆ ود ال ح ي ش ا ن ال ت ل ا ت ة
مؤذنٌ محجورٌ منزلباً بجزيرة مالطا