الكباشي نوباوي يعنى إنسان حر .. وهنا الحقيقة يا جلابة؟

Quote: يا جلاّبة كلمات : السِّر عثمان الطيِّب أداء: محمَّد جبارة يا جلاّبة الله .. يا جلاّبة الله .. الله يا جلاَّبة الله .. يا جلاّبة جيداً جيتو .. ما شفتو لى زول يا أخوانى ساعة للرِّحال شدّيتو .. جيداً جيتو .. قُولو لِى .. ما شفتوهو لَىْ زولى .. مستينهو لا حُولى .. قاعد راجى ، ضاع عمرى .. لو بى حالى كان يدرى .. كان صدَّالى من بدرى .. ما شفتوهو لَىْ بالمرّة .. فى عُش فاضى .. فوق راس تمرة .. طار جوز قمرى منِّو و فَرَّ .. ما شفتوهو لَىْ يا اخوانى فى حِسْ طار وِلاد الماحى .. فى دمع الحجيج ينجارَى بلَّ الدّارة سال صبّاحى .. ما شفتوهو لَىْ يا أخوانى فى همس الحبيب و حبيبتو ساعة فى القمر يتلاقو .. مِن كُتر الغرام و الريدة لا عِند الصباح ما فاقو .. ما شفتوهو لَىْ يا أخوانى فى حُزن القرير وأفراحو .. فى دمع المسافرين بالعتامير راحو .. رَوِّحو فى البلاد .. تُوهو .. صُدُّو .. وتانى كوسوهو .. يمكن لىَّ تلقوهو .. عرِّجو وأمشو لى عبقر .. وأسألو ملهمى الأكبر .. شِق ايش زولى قام سافر .. يمكن تلقو مِندسِّى .. بين الروح .. وسط نفسى .. فى مستقبلى و أمسِى .. يمكن تلقو فى جنّة .. طنبوراً حنين رَنَّ .. حِسْ زغريته فى حِنَّة .. فى خُدرة شَدر غابة .. فُرهد زهرة جذَّابة .. عانقت الربيع دَابة .. فى مزمار مع الراعى .. بين أنفاسو أوجاعى زادت .. َكَبَّ دمَّاعى .. فى بيُّوضة .. بين رِيما .. جَمْ عُربان ، وسط خيمة .. مِنْشَرْ فوقا ضُل غيمة .. كان فى رعدة كان فى غيم نزل نقناقو .. فوق نُوَّار بِريسيم .. رَشَّ .. بَلَّ أشواقو .. كوسو معايا يا جلاّبة ممكون قلبى .. شابَا و شابَا .. داير أعرف بكان محبوبى .. إنْ بِقَى فى التُراب زى لُوبِى .. جيبو عروقو سوُوهِن وِسادتى و تُوبِى .. يمكن تلقو يا اخوانى .. فى آهاتى و احزانى .. عايش جُوَّه وجدانى .. فى آهاتى .. فى نَمِّى .. يجرى و ينزل بين دمِّى .. فى روعة حنان ضُمى .. بى دوبو الوحيح والانى .. ما شفتوهو لى يا اخوانى .. فى صوت السواقى النايحة .. فى شوق القواديس التقالد الموية غادية و رايحة .. يا جلاّبة دِلونى .. ساكتين ليش .. دحين دِلُّونى .. فى بلد الحبيب دَلُّونى .. وإنْ بِقى ما لقيتُو اخوانى .. الله كمان يكون فى عونى ..