فرق كبير من لما تكون شغال لتعمل قروش لي بلدك وتفيد فقراءها من لما تعملها بانانية وعبط لنفسك ...!!!

11:15 PM July, 19 2020

سودانيز اون لاين
توفيق عيسى مكي-
مكتبتى
رابط مختصر

زي لما ناس مساكين من كترة همهم نصهم سكر ونصهم هرب
من واقعه ببنقوية العاقل منهم اعتكف في الجامع وعملوا فيها فكي
يغشو نسوان الحلة والباقين اتلموا عملوا حفلة رقيص وهجيج وانت جيت
تحاول تقنعهم ما يستسلموا وقلت ليهم ارح نشتغل ننتج ده حلنا
الوحيد وقعدت تقول الرسول قال وافلاطون قال وديك الحواشة
جاهزة ساعدوني بس نشق جدول للموية الباقي بتمه ليكم ولو زراعتي نجحت
بوهبة ليكم بس ساعدوني بضربة البداية وهم في نشوة هجيجهم
والفنانة تهز مؤخرتها وحرامي الحلة يخت في جبينها النقطة ردم ردم
ولسان حالهم يقول قوم فكنا طش مننا دي مؤخرة بتنفات كان فيك نفاع احمينا من حرامية حلتنا عليك الله الشغل بعد داك بنقدر عليه هسي خلينا وما تقرفنا قرفك بلا
وما هاميهم شي الزنق شغال وهم حاتنو حت وانت بس زول غياظ يجي يقطع ليهم ما هم عليه

الإنسان ....
هل هو قيمة مادية
هل هو قيمة روحية
هل يقاس بالمال
بالانجاز
بالمبادئ والقيم والمثل والأخلاق
ولا عبد مأمور لا أكثر وفي ذلك يتمرد

شنو يعني لو امتلكت كل مال بلدك هل بلغت الجنة مثلا ؟؟؟
بلدك حا تفقد كل الخدمات الضرورية وانت بالذات حا تكون اتعس
انسان في الدنيا لأنك محتاج للخدمات والباقين بقت ما فارقة معاهم
شنو يعني بقيت ما زي الناس وامتلكت القصور الخدم والحشم والمال
وغيرك لا يملك تمرة أليس هذا بعبط وهبل

كل إنسان يسعى لنفسه فقط انسان جشع واناني ووضيع
كل إنسان يسعى لرفع قيمة مجتمعه وذيادة موارده هو المستفيد الأول
في سوداننا ده أسهل حاجة تعمل قروش بس تكون انتهازي أناني حرامي
واصعب حاجة تعمل مشروع يفيد كل الناس
الكل يسعى يفشلوا ليك أمكن عشان يضحك فيك ويشمت ويلقى تبرير لنفسه
يكون أناني ويقدر يسرق وينهب أو يبقى عاطل

حقيقة مرة عايشنها نحن سودانيي الداخل
انو مهاجرننا لا يريدون حقيقة أن ننهض ونتحاوز مراراتنا
ليجدوا المبرر لهجرتهم فلا يقدمون أي دعم أو نقل فكرة يمكن
أن تفيد فهم يروا أنفسهم بميزة لا يريدون أن يفقدوها
كذلك الحال لرجال الدين فبهذا الذي امتلكوه من بضع عبارات وخطب
تجعلهم أيضا بميزة أن توكل إليهم أمور المال فينهبوها
وكذلك الوافدين لهذا البلد باعتبار أنها فرصة ذهبية بغياب امتلاك الناس
لزمام أمرهم في مسألة الوجود بحقيقتها أنها فرصة ذهبية لا تعوض فقبل
أهل البلد يستفيقوا من سكرتهم ينهبوا نهيبتهم

تعمل قروش لبلدك يعني تعمل أعمال تدر دولارات لخزينة بلدك
مشاريع استثمارية ذات بنية تحتية واضحة طويلة الأجل
تصحي الناس يكون عندها هدف واحد هو أن يكون السودان بموارده دي
أكبر مارد اقتصادي ويتفق كل لخطة واحدة تحقق هذا الهدف ويقوم الشعب
كله من صغاره لكباره ينفذ الحاجة دي
زي ايام نميري الخلانا نحن طلبة ابتدائي ونحن في مشروع الجزيرة شيئ أساسي
كل يوم البصات تجي الصباح تسوقنا نلقط القطن حصتين والقروض ونرجع نواصل
باقي يومنا الدراسي عادي

الإنقاذ ربت أجيال تكون أنانية وجشعة ما تحب إلا نفسها
آخر حاجة حاجة اسمها السودان
أتت بفقه التمكين والعياذ بالله منه
علمت الناس أن المال والشهادات الجامعية هي أساس الحياة
عشان كده خلفت لينا تركة ثقيلة لإصلاح ذلك

اليوم ست الشاي بتدخل في اليوم أربعة أو خمسة الف في اليوم
غسال العربية ما أقل من كده
غسيل العربة الواحدة ما أقل من 200 جنيه والأغلبية بقت 300 جنيه
في غسال اسمه آدم الغسال راسماله قرب يصل مليار دولار كان معانا في
سجن أمدرمان أيام الإنقاذ كان بتفطس فيني عنده خيمة وتلفزيون وتلاجة فيها
كتير كنت بحضر المباريات عنده في خيمته
الداير أقوله أسهل حاجة تعمل في سوداننا ده قروش
واصعب حاجة تعمل لسوداننا ده قروش الف من يحاول يكسرك مقاديفك ومليون
يستفذوك وينتظروا منك خطأ واحد ليسحقوك
ووالله وبإذن الله نقاتل فيه حتى يكون أغنى بلاد العالم
ولو لوحدي

رسالة أخيرة لشعبي
اتركوا السياسة وتوجهوا للإنتاج
فلاح الإنتاج الوفير يقتل كل أسباب تناحرنا
يقتل كل انانيتنا وجشعنا
يقتل كل أسباب قيام الجيوش المسلحة السودانية المتمردة
ممكن نعدد الف حاجة
الف فايدة

شخصيا برد دين لبلدي حقا لها علينا من خلال مؤسستي المتواضعة
مال فاق ال 4 مليون جنيه بالجديد أي أربعة مليار صرفتهم في حب بلادي بنشوة
وتفرغت تماما حتى قرب أنسى أسرتي في سبيل نشر التوعية
وقيام الثورة الاقتصادية السودانية
وانام وانا سعيد وراضي بكل ما عملت وما صاواصل عمله

وهل من احد يسمع رايك هذا ايها الامير الواعي لما يحتاجه السودان؟
السودان يحتاج لعمل منتج
ولو عنزة في البيت تحلب لبنا
مع دجاج ناكل بيضو
امور صغيرة ولكنها رمز لأن يتحول الانسان السوداني لمنتج وليس مستهلك فسحب
كلنا اصبحنا سماسرة ووسطاء
والقليل منا ينتج
لن ينصلح حالنا ألا اذا انصلح حال انسان السودان
وهو (أًسُ) المشكلة
على انسان السودان ان يطور نفسه بالتعليم والتثقيف وان يصبح انسان منتج وبيئي
اذا اجتمعت فيه هذه الخصال الاربعة
تعليم، ثقافة انتاج ، بيئة
يومها سيكون لنا شأن في هذه الدينا واي شأن
لك ودي الاخ الامير توفيق

Quote: وهل من احد يسمع رايك هذا ايها الامير الواعي لما يحتاجه السودان؟

اكيد نادر يا علي الكنزي يا اخوي
قبيل ضربت مثل في مطلع البوست الناس شغالين هجيج ساي وكضب وخيال وسواقة بالخلاء
نحن العلينا بنعمله
نحاول نوعي الناس لمصالحها الحقيقية وين
عشان الناس ما تغلط ويقوموا يعملوا حفلة رابة في بيت بكاء السودان
مهما انعدمت مشاعرها
نحاول نصحيها
طال الزمن أو قصر مصير الناس تسمعنا
ومصيرهم يشتغلوا معانا
ومصيرهم يطلقوا السياسة طلاق تلاتة
معقول شعب كامل كلو سياسيين
العوارة ولعبط والهبل ده شنو !!!!

Quote: لن ينصلح حالنا ألا اذا انصلح حال انسان السودان وهو (أًسُ) المشكلة

فعلا دي الحقيقة

بوست شيق ..
بصراحه العايشين داخل السودان رغم الضنك الشايفنو الا انهم يملكون رصيد محترم من التصالح مع النفس
فقط علينا تبييض النيه و ونشر الوعي وبث الحماس وألهمه في الآخرين
رساله للمغتربين : البلد لن تسير للأمام بدونكم
مصيرك ترجع لبلدك واهلك
ارجع قبل ما الزمن يسرقك ..
شكرًا جزيلا استاذ توفيق علي البوست الجميل
تحياتي