Post: #1
Title: أربعة محسيات، ماشات من بحري للدَّروشاب.. ركبن حافلة هايس - هدية للاخ على عبدالوهاب
Author: Hassan Farah
Date: 06-30-2020, 02:07 PM
Parent: #0
02:07 PM June, 30 2020 سودانيز اون لاين
Hassan Farah-جمهورية استونيا
مكتبتى
رابط مختصر
وقعدن جنب الباب..
وفي محطة البعدها، وقفت الحافلة، وجاء راجل ضخم جدًا، بكرش كبيرة جدًا 😑 وبدأ في الصعود للحافلة..
وطبعا من شدة ماسمين، أخد أكتر من ربع ساعة عشان يركب.
وطوالي الحريم الأربعة بدوا الكلام، والقطيعة...
واحدة تقول: (كمسولا دافي) يعني: "حامل الشهر الرابع!!".
والتانية ترد: (لا برسا)... "ده حامل تيمان!!".
واحدة تزيد: (بري اساكا هونى).. يعنى: "هسى يلد في الطريق!!".
وأخرى تضيف: (ان شهر تنلي).. يعني: "دا شهرو!!!"
صاحبنا طلع، وقعد وراء الحريم الاربعة.
وبعد مسافة بدأ الكمساري "يطقطق" للأجرة.
وابتدأ من آخر الحافلة، ووصل الحريم، وكل وحدة تقول للتانية: "اي هدفييل".. يعني (أنا بدفع)..
الكمساري قال ليهم: "في شنو؟؟ انتو خلاص دفعوا ليكم".
وحدة قالت: "سجمي.. منو الدفع لينا"!!.
دا الكمساري اشر علي الراجل السمين..
وحدة قالت: "سجمنا، (ان هدتون اوق ايربجي)..
"الراجل دا بيعرفنا من وين"؟؟!!.
ورد الراجل: (#ايين_اونيكيقة جلا كر ايقه حمدننى.. سونيقون قمتاديننى)..
.
.
#يعنى: "لمن ألد، ما تنسونى.. اتذكروني، وتعالوا تحمدوا لي السلامة.. وأغمتو لي حق اللَّبن"!!!
|
Post: #2
Title: Re: أربعة محسيات، ماشات من بحري للدَّروشاب.. �
Author: علي عبدالوهاب عثمان
Date: 06-30-2020, 02:40 PM
Parent: #1
الحبيب حسن .. تحياتي ياجميل
يا سلام يا رائع .. خليتني أضحك وانسى التقارب والكورونا كمان
دي مشكلتنا نحن ناس ضواحي الدنيا سريعي التعليق خاصة إذا كنا مجموعة
صدقني حقيقة أحياناً مثل هذه الامور يمكن أن تحدث
=================
اذكر في السبعينات كنت في تدريب المعلمين في أمدرمان
وفي المواصلات اشتبك معي الكمساري وقال لي ( بالله شوف الايتري دا)
ايامها الارتيرين كانوا لاجئين وبكثرة في العاصمة .. طبعاً حسب اللغة
أنا قلت ليهو يا زول أنا ما اريتري انا سيد بلد من دنقلا
هنا تدخلت واحدة ( حاجة ) اللهم أرحمها إن كانت على قيد الحياة أو متوفية
وكانت تجيد العربية ما شاء الله وهي كمان من دنقلا كما عرفت لاحقاً
قالت للكمساري (( اسمع يا ولد الاسد القاعد في قصر داك نميري دنقلاوي
كمان سيدكم المهدي صاحب القبة هنا دنقلاوي ))
المهم قدمت محاضرة للكمساري ..
وأنا من اليوم داك بقيت أعمل ألف حساب للكمساري اتحاشى أي كلام معه
إلى قضيت فترة التدريب في العاصمة ورجعت ضواحي الدنيا
لكن الحاجة ما شاء الله عليها ..
الحبيب حسن العامية السودانية مهمة جداً جداً وخاصة في العاصمة
حتى في المساومات ( بيع وشراء ) إذا لغتك ما عاصمية مصيبة
الكل يضاعف السعر في أي شيء ..
تحياتي الحبيب حسن وشكرا على الاهداء الجميل
عندي أهلي كثيرين جداً في الدروشاب ..
|
Post: #3
Title: Re: أربعة محسيات، ماشات من بحري للدَّروشاب.. �
Author: Ahmed Yassin
Date: 06-30-2020, 02:47 PM
Parent: #1
حلييييللللوي يا ابو الحسن .... حيلوي
طبعا عمك علي ماشاءالله زي انا بعرف يرطن الدنقلاوية والمحسية
اها
واحدة من ارتقاشا بلد عمك علي .. ماشة بحري المزاد ..بقت تسأل
وصلت الموقف .. في واحد قال ليها المزاد المقفول يا خالة؟
دقت صدرها وقالت( سجمي إلمزااااد قفلو !!!؟؟؟ وناس مهمد صاليك بى جوة ؟ ) !!!
|
Post: #4
Title: Re: أربعة محسيات، ماشات من بحري للدَّروشاب.. �
Author: علي عبدالوهاب عثمان
Date: 06-30-2020, 06:55 PM
Parent: #3
حبيبنا الفنان احمد .. سيرناقمي
البناوي الجميل
المزاد .. ذكرتنا النكتة
طبعا النطق عندنا ( مساد ) بدون ( ال) وكما بدون (ز)
اختنا كانت في المزاد ( الله يرحمها ) والدة ( رحمها الله )
كانت تستغرب من الاسم ( مساد )
مساد بالدنقلاوية ( اللبن المر ) ( إجي مساد egi masad )
تحياتي حبيبنا احمد حسن
|
Post: #5
Title: Re: أربعة محسيات، ماشات من بحري للدَّروشاب.. �
Author: ولياب
Date: 07-01-2020, 07:54 AM
Parent: #4
التحية للجميع وربي يحفظكم من كل سوء ومرض ، جداتي رحمهن الله ، حضرن للخرطوم أيام الموقف في الخرطوم ثلاثة وعندما نزلن من البص السريع ، وجدن صاحب تاكسي عرفهن وهن لم يعرفنه ، قالتا متوجهين للحلة الجديدة (الشاب حسن عرف مقصدهن والبيت أيضا) وركبن مع الشاب ودون كلمة منه إنطلق وفي طريق بدأن يوسوسن ( إن هلانقي) إلى أين ،،، ( ولا أووق إسقجميني نووكا) ولا يسال عن إتجاه المنزل ،،، وإزدادت مخاوفهن مع أزدحام الطريق ومحاولة الشاب للذهاب بطرق أقل إزدحاماً ،،، وبدأن يرفعن أصواتهن يا ولدي إنت مودين وين ؟؟؟ وصاحبنا صامت وفجأة وصل أمام المنزل المقصود وقال : إنين بسكووا سُكنّا !!! ( أنزلنا يا خالاتي وصلتن !!! وهنا تفاجأنا وقالن ( أنقا تو أوون بجنمي إرين أووق أربجكا) يا ولدي ما تكلمنا أنك بتعرفنا ،،،،
|
Post: #6
Title: Re: أربعة محسيات، ماشات من بحري للدَّروشاب.. �
Author: امتثال عبدالله
Date: 07-01-2020, 12:29 PM
Parent: #5
ولياب
انت اهم مقطع في القصة ما ترجمته وهو مفتاح فهم النكتة وهو قول سواق التاكسي لمن وصلن
البيت : " انين بسكووا سكنا" "..
|
Post: #7
Title: Re: أربعة محسيات، ماشات من بحري للدَّروشاب.. �
Author: امتثال عبدالله
Date: 07-01-2020, 12:30 PM
Parent: #5
ولياب
انت اهم مقطع في القصة ما ترجمته وهو مفتاح فهم النكتة وهو قول سواق التاكسي لمن وصلن
البيت : " انين بسكووا سكنا" "..
|
Post: #8
Title: Re: أربعة محسيات، ماشات من بحري للدَّروشاب.. �
Author: اخلاص عبدالرحمن المشرف
Date: 07-01-2020, 12:58 PM
Parent: #7
السلام عليكم
يترجموا الدايرنو ويدغمسو الدايرينو
ويشيلوما القفه.
مرة حلفاوي ودنقلاوي يتفاخرون
الحلفاوي يعدد في المشاهير والناجحين
داوود عبداللطيف اشطر تاجر مننا وردي
فنان افريقيا الاول مننا جمال محمد احمد
ابو الدبلوماسية واحسن اديب مننا ، الدنقلاوي
زهج قال له اوود الله ساليي (....) بتاع السودان
كله مننا .
تحياتي لاحلي السودانيين
|
Post: #11
Title: Re: أربعة محسيات، ماشات من بحري للدَّروشاب.. �
Author: علي عبدالوهاب عثمان
Date: 07-01-2020, 01:33 PM
Parent: #8
د. اخلاص .. تحياتي
أهلنا في حلفا كانوا مدخل الحداثة والحضارة والتعليم
وناجحين ما شاء الله .. ناس داؤود عبداللطيف ، وجدي ميرغني
المليادير في بريطانيا ( مو ) كما أهلنا الدناقلة برضو ما مقصرين
بس جنهم الحكم .. المهدي ، نميري ، ومعظم الكيزان في الحكومة الفاتت
وكمان عبدالله خليل ( حلفا)
تعرفي يا دكتورة أول مرة حكومة بدون دنقلاوي من زمن المهدي
هي الحكومة الانتقالية .. (ههههه )
عشاني أنا اتحدث النوبية بشقيها .. أنتمى الى الجميع ..
وردي وخليل فرح ناس السكوت وهناك كمان أهلنا المحس .. ولكن اللغة واحدة
تقريبا من حلفا الى كرمة عاصمة كوش ( النوبية المحسية )
ومنها حتى القولد ( النوبية الدنقلاوية )
أنا بالنسبة لي ما في مشكلة اتحدث النوبية كاملة
تحياتي الدكتورة
|
Post: #30
Title: Re: أربعة محسيات، ماشات من بحري للدَّروشاب.. �
Author: ولياب
Date: 07-05-2020, 11:54 AM
Parent: #8
تمت الترجمة يا أختنا إخلاص ، حقيقة هي دقسة ولكنها ليست دغمسة ...
|
Post: #9
Title: Re: أربعة محسيات، ماشات من بحري للدَّروشاب.. �
Author: علي عبدالوهاب عثمان
Date: 07-01-2020, 01:24 PM
Parent: #7
الابنة امتثال تحياتي الاميرة
الترجمة هي ( انزلوا خلاص وصلتوا البيت )
تحياتي
|
Post: #10
Title: Re: أربعة محسيات، ماشات من بحري للدَّروشاب.. �
Author: اخلاص عبدالرحمن المشرف
Date: 07-01-2020, 01:31 PM
Parent: #9
يشيلونا *
الاخطأ كثرت 😹😹😹
|
Post: #12
Title: Re: أربعة محسيات، ماشات من بحري للدَّروشاب.. �
Author: ابو جهينة
Date: 07-01-2020, 07:37 PM
Parent: #10
سلام حسن فرح والمتداخلون الكرام
***
في جلسة اسرية صمت بعض الشباب والشيبان
كان النقاش عن التزمت والتعصب لبعض الاسلاميين
وطال النقاش
واشترك فيه الجميع ، عدا كبير في العمر ظل صامتا
فسألوه عن رأيه
فقال لا فض فوه :
يا جماعة، الدين دة نزل لسيدنا محمد بسيط وساهل
ولكن قعدوا الصهابة يقولوا ليهو : ثم ماذا يارسول الله، ثم ماذا يارسول الله، لغاية ما مطوووه
|
Post: #13
Title: Re: أربعة محسيات، ماشات من بحري للدَّروشاب.. �
Author: علي عبدالوهاب عثمان
Date: 07-01-2020, 08:14 PM
Parent: #12
حبيبنا حسن تحياتي بوست حلور
الترابلة عندنا أهم مواعيد بالنسبة ليهم وقت العصر لازم يكون في الساقية ( عشا البهائم )
جدنا سعيد جاء من مصر وبدأ يصلي بيهم العصر في المسجد ( المسيد )
اذكر ما كان في صلاة جماعة زمان إلا يوم الجمعة في الجامع .. المسجد كان
فقط في رمضان وفراش الموتي ..
جدنا سعيد الله يرحمه مرطب جاي من مصر ( فاضي ) .. أطال في السجود في صلاة العصر
عمنا محمد بعد الصلاة قال ( يا سعيد نحن ناس أكلنا بليلة ما نقدر ننزل راسنا ونرفع مؤخرتنا وإلا ضاعت الصلاة )
( انت زول فاضي ما عندك شغل صلي على كفيك وانا ماشي لعشا البهائم )
رحمهم الله رحمة واسعة وغفر لهم ..
تحياتي الاحباب في البوست
|
Post: #14
Title: Re: أربعة محسيات، ماشات من بحري للدَّروشاب.. �
Author: Ahmed Yassin
Date: 07-01-2020, 08:32 PM
Parent: #13
اهههههههههه
شيخ علي دي كان تكتبها زي ما قالها جدك سعيد
| Quote: ( انت زول فاضي ما عندك شغل صلي على كفيك وانا ماشي لعشا البهائم ) |
وبالرطانة بتطلع رهيبة وفظيعة
|
Post: #15
Title: Re: أربعة محسيات، ماشات من بحري للدَّروشاب.. �
Author: يحي قباني
Date: 07-01-2020, 08:42 PM
Parent: #14
جماعه من اندينا...قرايب عمك علي عربيتم باظت في طريق مقطوع
و الاتنين ما بفهموا في الحديد ...
ربك رب الخير جا واحد ماري وقف يساعدهم .. اشتغل شوية في المكنه
و قال لي السايق .. كدي دور .. و قول يا نبي الله داؤود ... (سيدنا داؤود كان يفل الحديد)
عمك نقر و قال يا نبي الله داؤود .. العربية دورت ...
نص ساعة تاني وقفت بيهم ... المرة دي زول ساكت ما جا ماري .
قام التاني قال ليو ما تهاول انت يا مهمد هير ...
قالو .. رح نهاول ... بس انت متذكر النبي الميكانيكي ده كان اسمو ايه ؟
|
Post: #16
Title: Re: أربعة محسيات، ماشات من بحري للدَّروشاب.. �
Author: يحي قباني
Date: 07-01-2020, 08:48 PM
Parent: #15
نديكم واحده اقدم من الفوق ...
مهمد صالح عنده بقره مرضت مرض شديد ...
و هو معتمد عليها اعتماد كلي ...
المهم واحد قال ليو لازم تدعو ربنا انه يشفيها و تعمل ندر لو بقت كويسه
تضبح خروف و تصوم ٣ يوم شكر ...
بعد يومين البقره وقفت حيلها ...
مهمد صالح ضبح الكرامة .. و صام ٣ يوم ...
اليوم الرابع البقره ماتت ...
عمك مهمد ... زعل زعل شديد ..و رفع راسو للسما و قال ...
على اي هال شكرا ...
بس البهيمة اللي دبهناها رح تكون بدل بهيمة العيد ...
و التلاته ايام رح نهسموا من رمضان اللي جاي ...
|
Post: #17
Title: Re: أربعة محسيات، ماشات من بحري للدَّروشاب.. �
Author: يحي قباني
Date: 07-01-2020, 08:49 PM
Parent: #16
ثم ... سامحونا ....🙂🙂🙂
|
Post: #18
Title: Re: أربعة محسيات، ماشات من بحري للدَّروشاب.. �
Author: امتثال عبدالله
Date: 07-01-2020, 08:58 PM
Parent: #17
الله يجازي محنك يا ود قباني...
يعني خليتنا نضحك ونحن في هم وغم وإحباط من تصرفات الحكومة الانتقالية اللسع بتقتل في شباب المظاهرات حيث قتلت بالأمس القريب شاب في ام درمان خلال المظاهرات السلمية ...ووزير الداخلية ما زال وزير حتى الآن...
|
Post: #19
Title: Re: أربعة محسيات، ماشات من بحري للدَّروشاب.. �
Author: علي عبدالوهاب عثمان
Date: 07-01-2020, 09:00 PM
Parent: #14
احمد امبس
نعم بالنوبية تكون جميلة جداً
انت زول فاضي ما عندك شغل صلي على كفيك وانا ماشي لعشا البهائم
الترجمة :
( اير جلي كومو اير دولنكر سقيدي أي بهايمي اشر نوقبوري )
احمد امبس .. أهلنا التربالة ديل كانوا عندهم اعمال العقل وكأنهم علمانيين
رغم عمق ايمانهم بس كانوا عندهم دراسة جدوى للزمن والمجهود
والربح والخسارة المادية
|
Post: #20
Title: Re: أربعة محسيات، ماشات من بحري للدَّروشاب.. �
Author: بدر الدين الأمير
Date: 07-01-2020, 09:35 PM
ويش الدخل كلمة اربجى
فى مدخل الرطانة اعلاه
|
Post: #21
Title: Re: أربعة محسيات، ماشات من بحري للدَّروشاب.. �
Author: MOHAMMED ELSHEIKH
Date: 07-02-2020, 06:05 AM
Parent: #20
اهو ماشاء الله انتو مبسوطين وتضحكوا
يجيكم واحد ناطي حسي يقول لكم التنميط وما ادراك ما التنميط
والله انا ما بعرف الفرق بين الحلفاوي والسكوتي والمحسي
بل صديقي الأول في الجامعة وبعدها والى اليوم وبعد اكثر من 30 سنة من التخرج
اكتشفت انو شايقي بعد ما شفت والدته المشلخة !
غايتو بعد كلامي دا اكان جاء ذنبو على جنبو
|
Post: #22
Title: Re: أربعة محسيات، ماشات من بحري للدَّروشاب.. �
Author: Ahmed Yassin
Date: 07-02-2020, 07:49 AM
Parent: #21
| Quote: محمد صالح عنده بقرة مرضت |
محمد صالح دا بعد بقرتو ماتت ولده ساقه الخرطوم واشترى ليهو بوكس
يوم سايق البوكس ماشي الكلاكلة صنقعت،اشر ليهو واحد قام وقف
وشالو .. قايلو حينزل قدام شوية ..او في المنطقة الصناعية.. المهم لمن وصل الشجرة
قال للراجل: انت اسمك ايه
الراجل قال :اسمي صالح محمد
عمك وقف على جنب وقال ليهو .. انزل .. محمد صالح يا شيخ .انت الظاهر عليك واحد بتاع لخبطة
|
Post: #23
Title: Re: أربعة محسيات، ماشات من بحري للدَّروشاب.. �
Author: ABUHUSSEIN
Date: 07-02-2020, 05:10 PM
Parent: #22
الجماعة جاهم إمام جديد
كلموه قالو ليه فلان داك ما بحب الامام البقرأ سور طويلة (قل هو الله أحد) عندو فيها رأي 😂
الامام قال ليهم ما تشيلو هم ....
اقامو الصلاة
الله اكبر
الفاتحة
(مدهامتان)
الله اكبر ...
بعد الصلاة زولنا جاء للإمام و قال ليه :-
ليه إتنين(✌) واااااحدة كفاية ...
😂😂😂😂😂😂😂😂😂😂😂
|
Post: #24
Title: Re: أربعة محسيات، ماشات من بحري للدَّروشاب.. �
Author: Ahmed Yassin
Date: 07-02-2020, 06:57 PM
Parent: #23
عمك علي عبدالوهاب جارهم حلفاوي ولده اختفى في الجنوب واعتبروهو استشهد
الجماعة جو وجايبين في بوكس شوال فحم وكيس دقيق وصفيحة زيت وعملوا عرسهم
وكبير الجماعة خطب فيهم وقال ليهو ولدك ما مات ولدك حي في الجنة ووالله انه لفي الجنة
حيث يرفل فيها .. وحيشفع ليك يوم القيامة، عمك صدق واول حاجة ساب الصلاة
بعد فترة وهو نايم بالليل الباب دق .. مشى فتح الباب لقى ولده قدامه مغبر وشعره منكوش
قال ليهو مين ؟؟ ..صالح ؟!! اوع تقول لي اكلت من الشجرة
|
Post: #25
Title: Re: أربعة محسيات، ماشات من بحري للدَّروشاب.. �
Author: يحي قباني
Date: 07-03-2020, 00:59 AM
Parent: #24
Quote: الله اكبر
الفاتحة
(مدهامتان)
الله اكبر ...
بعد الصلاة زولنا جاء للإمام و قال ليه :-
ليه إتنين(✌) واااااحدة كفاية |
مش قال ليو
الجماعة قدموني للصلاه
و لو ستر ربُنا و كنت هافظ قل هو الله احد و طلع البدر علينا
مكنتش اقدر اصلي بيهم العشا ...
|
Post: #26
Title: Re: أربعة محسيات، ماشات من بحري للدَّروشاب.. �
Author: ABUHUSSEIN
Date: 07-03-2020, 01:44 AM
Parent: #25
Quote: مش قال ليو
الجماعة قدموني للصلاه
و لو ستر ربُنا و كنت هافظ قل هو الله احد و طلع البدر علينا
مكنتش اقدر اصلي بيهم العشا ... |
الولد طلع من الحمام لقى ابوه في باب الحمام و شايل ليه خرطوش ...
يا ود في قرآن بقروه في الحمام محل النجاسة ؟؟؟
قرآن شنو يا ابوي !!!!!!!
يا ود انا سامعك ....
يا ابوي كنت بقول في نشيد
يا ود طلع البدر علينا نشيد ؟؟؟؟
آي يا ابوي
متأكد ؟؟؟؟
يا ابوي و الله نشيد ما قرآن
و الله انا عمري دا كلو بصلي بيها
😂😂😂😂😂😂😂😂😂
|
Post: #27
Title: Re: أربعة محسيات، ماشات من بحري للدَّروشاب.. �
Author: Biraima M Adam
Date: 07-03-2020, 07:01 AM
Parent: #26
.. إجي بنات أمي! ..
بريمة
|
Post: #28
Title: Re: أربعة محسيات، ماشات من بحري للدَّروشاب.. �
Author: مهدي صلاح
Date: 07-04-2020, 08:29 AM
Parent: #27
Quote: الحبيب حسن العامية السودانية مهمة جداً جداً وخاصة في العاصمة
حتى في المساومات ( بيع وشراء ) إذا لغتك ما عاصمية مصيبة
الكل يضاعف السعر في أي شيء ..
|
قالو واحد نزل من السعودية الخرطوم لاخوهو منتويا شراء قطعة ارض ...تاني يوم ماشين يشوفوا موضوع الارض ..بيسال اخوهو
-السيارة الحنمشي بيها وين ؟
-من حسي داير اوريك اعمل حسابك لو هنا عرفوك جايي من برة بيغشوك ما تقعد تتكلم لي سعودي
-كيف ؟
-ما تقول سيارة
-طيب اقول شنو ؟
-عربية
اخوهو المغترب قال ليهو:
أون عربيي رطانامني
لكن عربية رطانة
|
Post: #29
Title: Re: أربعة محسيات، ماشات من بحري للدَّروشاب.. �
Author: ولياب
Date: 07-05-2020, 11:51 AM
Parent: #7
معلش دقست يا إمتثال والبقية الكرام ، تم التعديل وتمت الترجمة بمعامل (أنيس ولياب) ...
|
|