|
|
 Re: * معتصم الاقرع: مؤتمر المانحين البرليني وس (Re: Yasir Elsharif)
|
حباً وكرامة
علي الكوباني
أبشروا يا أحباب 😍❤
يا سلااام على حنة السودان..ودعم الاخوان الحنان..وتدافعت الدول الكانت بتعاين لينا كأرهابيين(الله يلعن الكيزان)..تدافعوا لدعمنا (ان شاء الله حتى لو بالكضب😉)..بس المهم بداية عودتنا للعالمية ..والاستعداد لبناء علاقات متميزة مع كل دول العالم..وفتح الاسواق امامنا لاستيراد التكنولوجيا الزراعية والصناعية والطبية..ولتصدير منتجاتنا بعد عودة الروح ان شاء الله للزراعة وتصنيع منتجاتها وللميناء بعد تأهيله..
نعم… الغرض الاساسي هو العودة للاخاء والمصالح المشتركة مع دول العالم وكمان الاهم منها اعفاء الديون التي نهبها الكيزان لجيوبهم وحريمهم..ولازالة اسمنا الاصيل من لائحة الارهاب التي ادخلنا فيها ناس الدمورية الوسخانة بتاعين (امريكا روسيا قد دنا عذابها) الله لا عادهم..ايوا يا أحباب لو جانا دعم مادي عيني حبابو ..وبساعدنا في زنقتنا دي..لكن الاهم كان هو ان تساعدنا دول العالم في استرداد المليارات المنهوبة من الكيزان في بنوك ماليزيا وباقي العالم..بس يرجعوا لينا حقنا الانسرق..وعلي النعمة قروش دعهم دي لو ادونا ليها نكرمهم بيها ضبايح سااااكت..(وهسه ممكن نضبح ليهم..علا البهايم سارحات..🤪😂)..
ورغم حملات الكيزان ومن لف لفهم على حمدكه..ورغم ان حال البلد لا يسر ابدا..ورغم ان هناك وزراء قاعدين سااكت في السهلة ..لكن حمدكه والاصيلة زنيب بدوي (او زيناب بداوي كم يقول الفرنجة😅)..مثلونا خير تمثيل وكانوا فخر لنا..😍
جدعات جانبية:
* ياااخ انا استمتعت بهجلبة وجقلبة الكيزان من ما حدث من دعم متعدد للسودان..ياااخ بكوا زي (امينة رزق في فلم البؤساء..وصرخوا وااااي😭) وشبكونا دي شحدة..وعيب كده..ورجعوا للوهم بتاع (فلنأكل من ما نزرع).. أجي يااا الكضابه ونسايه..🙊..نسيتوا انو رئيسكم فضحكم..وقال بعضمة لسانو(دي كم مليون دولار ويورو غمتا لي الامير قال لي اتصرف بيها🙊🙈)
يخس..نسيتوا انكم كنتوا لافين بقرعتكم في كل الدول العربية لمن بقوا يتضايروا منكم وبقوا يخلوا معاكم الاطفال عشان كان بالغ يديك بلاي استيشن🙊🙈😂
* في بعض الدول الاخوانية غلبهم حتى يختوا بالكضب في حنة السودان لمن لقوا العريس ما ياهو😉😂
* ياااخ حقو ما نسمع لاحقاد الكيزان.. ونذكر اننا شعب اصيل وكريم وشهم وكل السمات السمحةدي جارية في دمنا..واتذكر يوم في المشرحة في الخرطوم في واحد ابوه اتوفى في حادث سير وجوا اهل الزول الصادم والزول شال معاهم الفاتحة وقال ليهم حرم خلاص تمشوا وانا كتبت تنازلنا كولي الدم وعفينا لوجه الله تعالى..وما دايرين دية واتوكلوا وربنا يرحم ابونا ويجعله في الجنة..حرم زول ينتظر هنا ما في..😲.. المهم جيت راجع المشرحة بعد ساعتين لقيت الزول لسه قاعد تحت النخلة وقلت ليهو انت لهسه ما شلت جثمان ابوك..؟ بعد تلتله جد ..عرفت انو رسل لاهله في قريتهم ولسه ما جوا ..وبالتعب عرفت انو فقير جدا ما عندو قروش لايجار بوكس لنقل الجثمان😰..لكن اهلو بجوا هسه.. وقال لي امش يا دكتور شوف شغلك..ودي كانت من المرات البسيطة النزلت مني دمعة في المشرحة😰… ياااخ معقول في شهامة وكرم واصالة قدر ده… المهم بعد خلصت شغل..سقتوا معاي المكتب واكلنا من بوفيه صحبي حسين نصر الدين الله يديهو العافية..وسويت اتصالات ببعض الناس الاصيلين..ومنها ترتبت كل الامور لمن القروش فاضت شدي وممكن تعمل ليها بيت سمح من اساسو..حتى حسين بتاع البوفية خت مبلغ محترم الله يكرمو.. اها وواحد من اصحابي الضكرانين جاب بوكس وادى مفتاحو لولد المرحوم وقال ليهو ..على الطلاق انت ضكران خلاص لكن وحات الله ما اضكر مننا..حرم ما تشيل البوكس ده ويكون حقك علا اولع فيهو نار قدام الحوادث دي😲..
نعم يا أحباب ديل ياهم نحن وده السودان الاصيل وناسو السمحين البكسروا الباب وبخوضوا النار لنجدة اسرة واطفال في الوقت الكانت فيهو باقي الجنسيات واقفة منتظرة حضور الشرطة والدفاع المدني..☺
ايوا ديل اهل الحاره وده حمدوك ودي بت البت البدوي وديل انتوا يا احبابي السمحين...وما بهمنا مؤتمر دولي وللا غيرو بس يختونا الكيزان واذنابهم...ولا عزاء للخنزيرة ولا للانجاس..😡
*يا بنوت الحله العامره ابشرن بينا عديلة وزين😍😍
|
|
  
|
|
|
|
|
| |
Yasir Elsharif
فيس بوك
تويتر
انستقرام
يوتيوب
بنتيريست