♧ عرضُ حالٍ عاجلٍ للجنة إطالةِ التَّمْكينِ £

●》 المهم ظل السادة المغتربون في السعودية و الخليج
في حالة ترقبٍ حذرٍ كالذي يسبق غضبة الهبباي. والليامات
ديك كل زول عامل فيها شخشية هامة وعندو قريبو أو صاحبو
الروح بالروح في السفارة أو في القنصلية والتلفونات شغالة
تحت تحت والواسطات مدورة كل زول مجهز ريالات. منهم
ظبط أموره فقضى( وطره ) و منهم من لا يزال ينتظر .

●》 فجأة كدا أعلنو عن وصول اللجنة في قنصلية جدة
وتعال شوف من جميع مدن المملكة ومن كل فج عميق الأعمي
جا شايل المكسر و تعال شوف المكابسة القبقبة و كطيع الزراير
وهاك يا دا محلي وأنا حاجزو بي طوبة والعلالة واقفة في السما
ويا زول ما تدفرني بقبل عليك و الله بخربوشم ؛ بعدين علا يفرزونا
بالباسات و لا يوجد مكان لموطئ قدم وانتظم الطابور من دغش.

• يا جماعة نظمو لينا الناس ديل بالطريقة دي نحنا ما بنقدر نشتغل
(جدية ما عادية ومعاها صرة لزوم المكنة وكدا 😂😂😂 ) .
• هاااا أنت اسمك منو ؟
• عشان نكسب الزمن يا جماعة جوازك ولازم يكون ساري المفعول
( لزوم الوهمة ) و٩ ألف ريال ، سرعة ياجماعة نحنا من الصباح ما أكلنا.
• هااااا سرعة يا جماعة البعدو.
●》 لمو ليك في المعطربين(من عطرابة الشواء)على رواية صاحبي
ود التهامي) طقطقوهم في فرد ضحوية وأدوهم شهادات البحث الفي
الصورة أدناه وكمان اعتذرو للباقين إنو العقود إنتهت وفي واحدين
رجعو حانفين وشوشم زعلانين ؛ دايرين ينشقو. لكن هم الناجون.