♧ عرضُ حالٍ عاجلٍ للجنة إطالةِ التَّمْكينِ £

●》واحد كرستلاوي ساكن الديوم الشرقية و كل يوم يساسق بالمواصلات يكابس
لحد الكبري عشان يمشي يطشم في أمبدة دار السلام ناس كرور و أب نيران و كل
مرة لجان المقاومة يقرعوه يرجعوه منقلب حانف وشو بسبة كرونة و حظر التبول.

●》ففي يوم غيمة كدي و الجو فول ، قال النوبة دي موش منعوني لو كطعوا إضنيني
ديل عديييل ما بنقرع سجن سجن غرامة غرامة. فهو طالع يملأ قرنو ؛ و كان اليوم دا يوم
جمعة و اللِّمَّة مجتمعة ؛ قال كدي نغشى نصلي الجمعة في جامع الحلة ده ؛ نعمل شوية حسنات
لعلها تجب لنا ما بعدها. بعداك نمشي القدم ليه رافع نواصل نجازف نضرب السنة بمزاج..

●》يلا الإمام في الخطبة هايج ليك يرغي و يزبد و يكورك و هو يتلو قول عز من قائ :
{ظَهَرَ الْفَسَادُ فِي الْبَرِّ وَالْبَحْرِ بِمَا كَسَبَتْ أَيْدِي النَّاسِ لِيُذِيقَهُم بَعْضَ الَّذِي عَمِلُوا لَعَلَّهُمْ يَرْجِعُونَ} :
عباد الله ، يعني كيف دايرين ربنا يكشف عننا جوائح الأوبئة و الكرونيات ،رضي الله عنها و أرضاها
( دا نظام كسير تلج)و ما هي إلا جنودٌ مجندةٌ من عنده. ياخ البلد دي انتهت خلاس البلد فيها فسوق.. البلد
فيها المنكر البلد أخلاق فسدت. و أقرب مثال لما يؤكد كلامي دهأهو البيت الشمال الجامع البيت الفيهو المزيرة
و قدامو لساتك مدفونات ده ساكناه ست إنداية اسمها (علوية عرقي ) هديك شادة (بوصتا) علي عينك يا تاجر
في جوار بيتٍ من بيوت الله. لكن هو ما كرستال نصاح، دا بلح أصل بلادو عصير موز كارب و عسلية
دُخُن الدخدخاني أكل الحمار والعاني. ترمي في الشوق المشيت ليهو و كمان عندها كوارع عجالي ،
دي تمعط شنيباتك وراها. أقول ما تسمعون و أستفغر الله لي و لكم.

[} يلا زولنا الكرستلاوي الكلام وقع ليهو في {جرح جرحي براي منو البقاسي معاي} بعد الصلاة
أصلو ما كضب و لا لف جاي لا جاي. من حيسو فللي فووو مشى ليك راسو عديل دق للمرة الباب؛ جاتو
قال ليها: معقوولة بس يا علوية يكلمني اللمام؟ ياخي إعلامك قوي لكن، ما ينقشك إل زول غبي ولمَّاح! علوية
قالت ليهو: تصدق يا دا ، و تراكا ماك طالبني حليفة؛ شفت كلمتين الدعاية البسيطة العاملا لي عمك مولانا اللمام
ديل إتا ظنيتك قايلن ملحوتي، بري ياي يمة كلو بي بتمو و يمكن زاتن طالعات معاي بالخسارة كل يوم بشيل
لروحو فيها عبّار (بقنية) مسحة شنب سايمع الفطور و يطبق معاه نص عرقي و كورية كوارع نظام (برتيتة).
ماك شايفو متل كديس اللكوندة رقبتو غليدة السيف ما يدليها. كانو مولانات الكيزان محرتحينها علينا ؛ الله
لا طراهم و لا جاب عقابمعلا لاكين داراجل (قحاطي) طلع تفتيحة و ما عندو أي أ قشة مرة و عديم
ضمير خالس. لكنبرضك نقول شنو:"بارك الله في من نفع استنفع" أها و إتا كمان طلبك شنو؟!