الثورة بقت زرزورة وطملها كِمِل!! وربنا يرحمنا بسارية ليها جبجاب قال شاعرهم: (البارِح وأوَّل البارح أمِس واللّيلي نيران حبَّك آآآ ماتَرْبِي ديل فوق ديلي ستَّات اللَّكيك البِمشن الرِّتيلي) خلن قلبي روح زرزور وماسكاه عِويلي ماتربي دي أني بسميها مدح السمحة الدرفونة ، مثلها مثل آآآمفقوعة (وكان كيف زرزورة عمنا الشاعر الفحل ودسعيد،قطع شك بتنعدل وبتلحق الميس: الزرزورة رحلت وطلّقت عشَّاشها بغلى تبرها لسَّع ما أنقطف دوشاشها علي بلد البِزم الكبدة من قرّاشها جاتك شايلة مصّووْي الهسيس في راسها) مع أنني بعيد عن الإعلام مرئي ومقروء ،لكن علي قدر مشاهدتي البسيطة أري ربكة في سير الحكومة،وعدم وضوح، بل(هولة عديل) والدليل ،تأخر المجلس التشريعي،وإختيارالولاة،وتصريحات من هنا وهناك تنبئ بالطمع والعجلة والخِفَّة إذا تم إختيار ولاة الولايات من الأحزاب،فقولوا:(الثورة عِترت) ووقعت في "بَيَّة التشتّت والتفرقة" وربما يتكايت سرجها وعفشها فوق حكومتها ومجلسها العسكري. يجب إختيار الولاة من مستقليين ثوّار،أهل رأي و حزم وعزم وأصحاب بصيرة ، لا أحزاب لهم،مع الإبتعاد من دوداوة البعثيين والشويعيين،والناصريين ،وأم قُمتّي الإتحاديين ،ومعاينة عرب الدقيير ب الطوّالة،وطمع السيّد الإمام الداير يجيبك الثورة، (يارُومي يا أكسر قَرْنِك) وعلي قول الراحل المقيم عمنا آدم وسعيد: (الناس كبُّوا الناس كبوا جازهما يا يسقوا ليك ياتمشي) وإذا لم يتوفق ناس الحرية والتغيير،في إختيار ولاة مستقليين الولاة العسكريين،أضمن للثورة من الأحزاب،وأقصد العسكريين ماقبل الإنقاذ المعاشيين الضمان في ولاة مدنيين مستقليين،وإن عُدموا العسكريين أخير من لولوة الأحزاب وطمعها،لهشاشة وضع الفترة الإنتقالية،وتعرجات دروب كتائب الظل الوعرة مادام الفترة إنتقالية،فيجب أن تبتعد الأحزاب من إختيار وتعيين الولاة والمحاصصات إختيار الولاة من الأحزاب هو البداية لتعثر الثورة لأن القبلية تكمن في الأحزاب وأختيار الولاة منها يعني ذلك لا أهتم بالسياسة ،واعترف أنني "أضهب" كثيرا في منعرجاتها الناظر بإنتباه ونباهة، يلاحظ وجود قوة خفية لإدخال السودان في فتنة ظاهرها ديني،لتفريق أهل الثورة وتشتيت شملهم،ولعب لعبة "الغميدة/أم لبيده"،لدق إسفين بينهم وبين المواطن الذي بلغ به الكُره مبلغا لحكومة الكيزان. الهدف فتنة عميقة لإستهداف الثورة،ودي خفية جدا ومن قراءة ب الطوّالة لحادث هيئة العمليات بجهاز الأمن يمكن لنا أن نقول مادام الأمن الشعبي موجود،إذن نحّالة جهاز الأمن الوطني،أو المخابرات بإسمه الجديد بتصب فيه، وتصبح اسرار الدولة في التنقرارة،والله يستر من هى دَق.... وقالت دَق. بَرق الثورة يومض متراكن!!! لاغفى ولا خلّا المشاشي يهجع!! ومابين الثورة وحكومتها ،كالذي بين البدوية وأم ضروة: (أم ضروة البرق ماهَجع سغيرا حاس ب الوجَع) شكيتك علي الله وخليتك.... ياخ عجيبة هذه الشاعرة ،أو بت المصايد كما ذكر الأستاذ الأمين الدلال!! وعميقة مخاطبتها للناقة:(أم ضروة البرق ماهجع!!) نعم البرق رفّاس بعيد تحت ولارعد له... والصغير الحاس بالوجع يترفس،وأبكم لايشتكي!! ثم العميق أن الأم تراقب طفلها في وجعه(لاحظوا عاطفة الأم) والشاعرة تراقب البرق،وتشومه وتعرف مظان هطله، وقلبها مع النشوغ ورحلة الجزو،والبعد عن رهق المدامر،فالمدامر مرض عندها، والنشوغ وحركة الترحال والظعن عافيةوحرية لأهل البادية،و(الحُريّة) لا بمعناها (الأفندي) ولكن حريّة إنعتاق من بُخل الصيف الذي ينعكس علي حياته كلّها، إلي حرية الخريف وكرمه وجود تضاريسه،فتنعتق الفرقان من المدامر وينفك (قيدها) إلي نشوغ الخريف والفرح بالحياة ،الطيور تغني والمياه تغني والوديان يالبهائها،ياسيدي كل صوت له دلاله جمالية وقت هذه التضاريس،وكل صوت للثورة له مدلول ومحمول عميق جمالي وإجتماعي وإنساني. والجميل مخاطبتها للناقة:(ام ضروة)كأنها صديقتها الحميمة وهي كذلك. تجدني مفتون بمثل هذه الصورالشعرية. وكذا الصغير يحس بالألم في صمت وبدون بوح!! يترفس، ثم يهجع يطوّل، ثم يترفس وبرق الثورة رفّاس،ومظانه الوطن وجمال المخاطبة في :(أم ضروة) معزة عجيبة.... أها دي عاطفتنا إتجاه وطنّا..... وحمدوك دليلنا،ومازال راكب دور للوطن!! (دورك جَق مارجَع) ولقد وصل إلي جادول الحرية ،وأشواقنا مع الرخاء والسلام والعدالة، وأمامنا محلاية ممتدة ونحتاج لدربة الدليل الأعرج الكباشي النورابي،وإعلام رقيب،في نباهة شاعرة غنا الجراري بت الحاج كاروشة: خيْ الدغسة وكَحلِي شكرك بتلامَحْلِي اصبح طابق الرّحلي وقال قِدّامهِن مَحلِي ومادام حققنا واحدة"الحرية"،وتبقت أثنتان(سلام وعدالة)،يلزمنا الصبر،لأن خبيرنا يعرف ،ثورتنا لايقف سيرها، ولأننا نعلم أنَّ خريتنا حمدوك،بشفافية الدليل فرج الله ودعبدالرحمن،وبراعته وعاطفته،وهمته وإن أعترضته جبال المحن : مابتنقرعي ياشَرَمَيْ بلا الإتنين كمَّلتي المراديخ والمترَّك زين الجبل المِدقِّن قالوا:ممحول شين وفكرك آآآ أم غراديف ننجدع بي وين!؟ نحتاج لسؤال االمعزةهذا ياحمدوك،لأنه يمثل أشواق الوطن: (فِكرك يا أم غراديف ننجدع ب وين!!؟) إجابة السؤال،عند هذه الكباشية: ناس الحمّى سبحتُو بَهْديك من رِبِعتُو الهَدَجي اللّتَّ سِمعتُو أرتِج مِلحَك تِحتو أها الهَدجي،دي دلالة صوتية عميقة،يجب أن تسمعها بقلبك ياحمدوك وعندي تمثل شعار الثورة... نزل الدليل الخريت حمدوك بسهل الحرية المنبسط،وأحكم عقال إبله،ولمع لناظره برقٌ شمالي،وشامه،أن تكون أمطاره، هطلت علي تلال الوطن،وعرف أنه يحتاج لرحلتين(سلام/عدالة)،فخاطب شعبه كما فعل الدليل طه الأزرق ودالسراج: جادول مقلج الحَدبي المكانو سِهيلي مرحلتين يا الحَدْبي أم دِقون لا اللِّيلي القُطب القلج سيلو وحبس في الهيلي بدِّجيبو يا أم دَرَّدار عروس القَيلي نعم حمدوك يُريد شعب حُدب وفي روعة أهل الشاعر الفلتة حفيد الشيخ الساني أُمحمّد ودفضل الله"القوقاي": البارِح شوف عيني لاقيت أهل زيني حُدُب مافيهُن فينِي ولِضاض ل الكلمي الشّيني لذا دليلنا حمدوك،كان طروبا،لأنه واثق بشعبه،فبشره بالمستقبل: (القُطب القلج سيلو وحبس في الهيلي بدِّجيبو يا أم دَرَّدار عروس القَيلي) ونحن في الغربة ... لاندري إلي اين !؟ وكلنا الشاعر الفلتة عبدالوهاب ود السميتاوي: أنحنادليلنا مو الحَرَس البنات لي الوَرْدِي لفح أم بُهيا فوق ضهر أب سبيبتَن قَرْدِي بِلّي رماها جادول !عند زِريدْة البردي!؟ ولاَّ تكاها مِن كنتوش وعاني التُّردِي!!؟ (دورك جق مارجع) والقومة ليك ياوطن ومعاك ياحمدوك ،لكن خط في بالك ،الوطن رَحَلْ والرّحل بتربعوه،ل زول واحد مابنرَّاز... أها البتربعوا الرّحل معاك ديل.... لازم تنقيهم تب ..."قاف معطشة" والبنفزر،قولّو:(الفرق مالم) ،ولازم تكون دقيق في رباعتك،لأنهم سيساعدونك في الوصول لمبتغانا جمعا، ومهما وجدت من المتاريس ،ليتك تتمثل بالشاعرة الكباشية،وهي تحرض أهلها لكسر غارب المفتش الإنجليزي مور: (عَسَاكر مور يا أم فرعة بقولك شربة وجرعة الحنَّت مابية القرعة فوق مُدَّاغتك ترعى) المفتش مور أستاذنا الأديب حسن نجيلة سمّاه(مور طاغية كُتم) اللهم أحفظ الوطن من كورونا،ومن أم كواك وناس جوكن جوكن معاك ومن القيمان وطقّت الكوراك.... *أخشى علي وطنا من(القيمان) ومن القيمان ،قديما بت الفزاري،زوجة الفارس المكلوب حمدودشتهان(السلطنة الزرقاء) إستهلت مناحتها بترقب وحسرة بائنة: (سيد الخيول الجَنْ وين سيد بهانا!!؟ ثم ختمت مناحته بمعزة ومدح ويقين: (حنطير ؤكير خلفات، وجّب زمانه) هذا من بدائع أهل البادية!!! وأتذكر قبل سنين وفي بوست بصفحتي، أتداخل الأديب والشاعر الشفيف الأستاذ موسي مروح،فيما معناه: (توجّب الناقة الحلوب لتدر المزيد الكثير... وهذا الفارس:(وجّب زمانه) من بديع الكلام!!! ومازال الشعب يترقب،وأشواقه لدورك ياحمدوك،وعُفنا الحويل والعاول،ونتمثل بالشاعر الرائع ودمضعن الهواري وهو يخاطب إبله: قشّك في العريد غنّامو سادر ووارد نفاع مو فيهو عيل بسقيهن ألْمِي البارد ياطرّاده ل الشالو الرِّهاب متزارِد شرفك كلّو للعقرو أبجناحن شارد *أبرا منهنا الشرف كتلنا!!! والشرف دي وقود الثورة،إن سكن تاني ببقى هبود!! حكومة العسكر وحكومة قحّت،كيف عرس العيطبونة للمدرّس الكيفنا كدي والفكي الكيف داكا!! البدوية المفوهة، قالت: اللّفندي والفقُّور كُلُّو القليب مابدور عيل سيد البِعلّي الكور ونازْل العُلُو الممطور اللَفندي والفكي مِقاشرو القليب مابي سيد البِزوم ب تِني وعافْس البِهتِّف مي حكومة قحّت ,وتحديدا الأحزاب دي أولا نَجَهت الثورة ثم حنَّفت ليها ولولوت طريقها وضهّبت دليلها الخبير الخرّيت ضهاب (حمدوك)) حكومة قحّت مع المجلس العسكري ،بقّت لينا زي بلّة صاحب العمدة حمد يقولوا ليك:(بلّة كَتَل الحُبارة كتل الحبارة أها دي قِصة بلّة الكتل الحبارة!! صالح ودالدِّحيش،غَشتو فاطنة وقالتلو: اللّخضر دي بوصلِك دكّة علي" أها التخرب بطّلبو في السّكّي،وقال" (ماقُتّيلي مشّايَن مشيهو جكيك وماقُتِّيلِي ل دكّة علي بودّيك دَعيتِك ب النّبي يا اللّخضر البَلِي فيك وتمّش ريحة التاني البجيب طاريك) وكمان أنحنا الشعب ذاتنا مسكنا ضَهَل وجشَع عجيب والمحيرني ومهولني يقولوا: ليك التهريب..التهريب طيب الدعم السريع الكل يوم تخريج دفعة،خباروا ماأوقف التهريب!!؟ والولاة العسكريين،خبارهن ماأوقفوا التهريب!؟ حدودنا البتهرب ليها دقيقة الفيني وسكر كع والوقود معروفة غايتو ضاقت تب ، لكن فراجها فوق، اللهم فرج علي عبادك اللهم انّك تعلم أن الكفوف تضام والجيوب تضام والقلوب تضام هدية لرباعتي كان مالقوا القوت المقوت، أخير يلقوا قوت الغنا الشاعر الرائع جدا الدّليل محمدعلي ودالسراج ودطه ودحاج السراج: فوق أُم فاقة حيضانِك دَوَم مابجفِّن ديل فوق ديلا ها ديلاكا دوبهِن قفَّن نشَّالِك كِمِل ديري وإيدينو إتحفِّن قدحكن داكو مخطوط ل المهايمات سفِّن بيرنا أم فاقة يوت مزرودة في اللِّقْحَن بَدَارى وطقَّن المفرودة الناس اليوم ضُماهُم بِرْكَبُوا المكرودة مابلاقونا فوق عِد السِّليم وارُودة قطعت بَدْرِي مامدَّت معاها سَعِّيّي ماسْكِي الرِّيع تشلِّع في القِشيشتُو عَضِّيي جادول العتيعتة القُطْبَتُو نِعاميّي ديمة مشلّقابُو أم شُقرَتَن وحشيّي كونِيبِك عَمَر جاب قُجّتَن مفتولة من شوفت العرب سيدك حسب مِن طولة فرّارة النعاميي أم قويز عاقولة ديمة مِشَلّقابو وداجِّي ياهمبولة ب الزّحّافا والهبَّاك أبوتخليص ماشفتي العِقال نامن بقيتي سديس دوب ياخاطرة ل بلد الرِّغام والسيس لوغنّام ولو مقروع معاكي حبيس إكْل القَوّى وأم ماسْليلِي لو هَو لو مَراد حكم الدّهر يا أم ميلي حِس حنّانْها جرّاسَن مَسَكلُو مِحيلِي بتمارالْها جادول الغرود لا اللّيلي قلبِك كجّن البلد الكتير حلّالْها والدروةالبِغُلِّك في الشراب عجّالها عاجِّي أم شامي بتدور النجيع ب عقالها جادول الغِرود لا الليلي بتمارالها شاحدين الكريم ياأم قُجِّي نرجع تاني نلقى الخير عَقب فوق شِقَّناالسُّفلاني القش البقوم درمة ونصب صلياني بخلنبُو المِحول يا أم قُجّتَن ربياني ياصاحب الفَضُل تتفضَّل بعد عَوج اللّيام تاني الزمان يتعدّل علي السّافِل نِصُد نلقى المقامُو جودّل لِبابو القوز قطب صليانو ليهو قندّل الليلي ام شنيط شابح البَكُر ممدادها قعدت في السدور بتمد بعيد ب اسيادها كجرت فوق لباب القوز نزل عدّادها كسرت ريش نعام عاسْ السَّنام لبادها الليلي ام شنيط سوّتلهن شحّاطا قعدت بينا قِدّام في السدور تتناطا كسرت لبّدَت صوفتها ماها معاطا عروسَن روب قرونها مِعبّلاه المشّاطا عَسَجيب أم شنيط إنقيبها يبّس ريقو وكل مشيها بتلاقي الحَمَار ب رفيقو طول البال سَمِح مِن السهر ماإتضيقو مابتضلي حال بعدالتعب بتريقو الرِّق الفيهو من تالا اللّمين حشّاشا بيهومفيِّلي الرّضاعة مابتتماشا كسرت لبّدت صوفتها ماها دِراشا ولابسي عِقُودْها ماشافت سنين فتّاشا ياطير كان مشيت قول ل الدّميستو غزيري أنحنا ربحنا في القبّة السراتها كبيري مرَّاً ساربي ومرّة مهجّرابنا هجيري وكل مايوم بتنزل ب اللّاخالي خضيري الحاضَّة المِتِل زنك الخواجات هيلها عامساها أم عمود شنَّت مدالِق سيلها قفاها اتعلَّى شال عبس العروس في ضيلها ودعكيب العِتال تتراغا شالت ليلها *غنا ودالسراج تسجيل صوتي بصوت الشاعر،أكرمني به إبن أخ الشاعر الشاب الحبوب صدام الحاج مصطفي السراج
العنوان
الكاتب
Date
برق الثورة يومض متراكن...لاهجع ولا خلا المشاشي يهجع
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عبيد الطيب
فيس بوك
تويتر
انستقرام
يوتيوب
بنتيريست