و لجنــة التفكيك.. فضيحــــة على الهـــــواء مباشــــرة

07:39 PM June, 09 2020

سودانيز اون لاين
Abureesh-أمريكا
مكتبتى
رابط مختصر

السيد العضو الذى قرأ قرارات اللجنة.. و أعتقد أنه قانونى.. ولا يعرف أن الجنيه القديم غير قانونى و غير مبرئ للذمة.. و رغم ذلك جهجه باكاتنا و هى ينطق نفس الرقم بقيمة عملتين..

مية مليون يعنى مية ألف.. مية مليون يعنى مية مليار.. و نحن راسنا إلا الواحد يمسكه صار مثل مروحة الترابيزة بين الألف و المليون و المليار.. و هذا مؤتمر يشاهده كل العرب، فبالله بس
واحد يجاوب ما ذا سيفهم العرب من هذه الأرقام؟ الف و اللا مليون و اللا مليار؟ و كيف سيتعلم الأطفال قيمة هذه المبالغ و كيف سيعبرون عنها؟ الغريبة قالوا كفاءات!!! مسؤول درجة اولى
لا يعرف العملة المبرئة للذمة و يتحدث مثل اى شخص غير متعلم و يلخبط الأرقام.. عيب و الله.

سلام أبوالريش انا معاك القصة دي جهجتني لكن الفضيحة بشة ٢٠ مليون دولار والطاهر التوم وطيارة وجت ون ياخ عصابة القناع الأسود

هل هناك إمكانية لتحويل المبالغ الي دولار عشان تكون واضحة أكثر بدل الجهجهة الواقعين فيها.

غايتو يا ابو الريش انا بفتش لي على شاعر جهبز
ينجض لي قصيدة كاربة باسم وا شريرى المابقيت رئيس واتقاضى راتب
20 مليون دولار .

غايتو يا ابوالريش مع احترامي ليك لكن الموضوع دا ما بستحق عنوان لهذه الدرجة
الموضوع بسيط جدا
كل الشعب السوداني خاصة في المبالغ الكبيرة بقول
المبالغ الكبيرة بالعملة المحلية بالرقمين
مثلا تلاتة مليون لقطعة ارض بعد شوية بقولك بتلاتة مليار
هكذا يتحدث الشعب
تحياتي

نعم يستحق عنوان زي دا. كلنا، منذ عشرين سنة أو أكتر، بقينا ما عارفين عملتنا الوطنية بتعني شنو أصلاً. موضوع العملة وصّلنا حد الجوطة الحقيقية السائدة في السودان. ودا فقط وجه من أوجه الفوضى وانعدام مفهوم الدولة في السودان.

ما أنجزته اللجنة
يتجاوز كل الأخطاء اللغوية
والارقام
يستحقون الإشادة والدعم
أكثر من الخصم من رصيد انجازهم
بمثل هذا العنوان
تحياتي

ملخص مؤتمر لجنة ازالة التمكين 9 يونيو 2020

حجز اموال المخلوع الذي كانت له نثرية وصلت من 20 مليون دولار الى 3 مليون دولار حتى في اواخر أيام حكمه الحالكة
انهاء خدمة بعض العاملين ب
98 مستشار بوزارة العدل
26 من العاملين بالتأمين الصحي
21 من العاملين بوزارة العمل والتنمية الاجتماعية
16 من العاملين بالصندوق القومي للمعاشات
انهاء خدمة 230 من العاملين بديوان الزكاة
148 من العاملين بالوحدات التابعة لشئون مجلس الوزراء
7 من العاملين بالمجلس القومي للسكان
مفوضية العون الانساني 42
الامانة العامة لمجلس الوزراء 56
انهاء خدمة عدد 7 من العاملين بالامانة العامة بمجلس السيادة
مع طرح جميع الوظائف أعلاه لابناء الشعب السوداني

وضع اليد وحجز اموال وحسابات واسترداد اسهم واموال ومنقولات وعقارات بعض الشركات والصرافات المملوكة والتي كانت تعمل على تمويل الزحف الاخضر والنظام البائد
صرافات
شركة اليمامة
الهجرة
ارجين
الفجر
ديرة
الرازي
باب المندب
الافريقية

الشركات التي كانت تمول الحساب التجميعي في شركة منتجات البترول لتمويل المؤتمر الوطني والحركة الاسلامية والامن الشعبي وانشطتهم ومنسوبيهم

لازوتين للتنمية والاستثمار المحدودة
شركة بتروباش
المملوكة لشركة النيل وكانت واجهة لتحويل الاموال من القطاع العام للخاص (بشير حسن بشير ) من قيادات الاسلاميين
شركة امان للبترول
شركة حريص العالمية التي استوردت باصات معطلة لولاية الخرطوم
شركة عقاركو الدولية للخمات المحدودة
شركة منتجات البترول المحدودة مع استمرار عملها وادارتها تحت اشراف وزارة الطاقة والتعدين
شركة جت ون للطيران والحجز على الطائرة

تفعيل لجان إزالة التمكين بالولايات

خلوا الحكومة الانتقالية الفاشلة دي تورينا عملتنا شنو أصلاً. مليون مليار جنيه دينار ... دا بلد دا؟

الكيزان عملوها وفاتو

بعد جر الساعه كان تحديدالزمن يقول ليك بالقديم ولا الجديد لفتره طويله والحمدلله رجعوها عشان نرتاح من الجهجهه وهسى الجنيه قديم وديد برضو لسه مشكله عند ناس كتار

لو عملوا حاجة كويسة فهذه مهمتهم اساسا التى تشكلت لجنتهم من أجلها.. هل تعتقد أن هذا موضوع خلاف؟
الكتابة دائما عن المطلوب و ليس عن الإنجاز.. من الدروس الاولى فى الصحافة انه لو عض كلب إنساناً فهذا ليس خبر، ولكن الخبر لو عض إنسان كلباً.

بس خايف تقصد نقعد نطبل للجنة و نتغاضى عن عثراتها.. أو تقصد أن عضو اللجنة الموقر مصنوع من زجاج و ممكن يتكسر لو ما كتبنا عليه قابل للكسر.
و لم أكتب كلمة فضيحة عبثا، بل لأن المؤتمر يشاهده العرب.. بل الغرب الذى يحتاج مترجمين.. بالله عليك كيف سيترجم خواجة درس اللعة العربية عبارة
(بقيمة مية الف جنيه اى مئة مليون جنيه)؟ سيترجمها كالاتى:
ًWe have confiscated a property with the value of a hundred pounds which means a hundred million pounds

بعدين أسوأ من كدا.. هذا الحديث عن عملتين يعتبر ترويج لعملة غير قانونية مما يعرض صاحبه للمحاكمة.

سلام ابوريش

كان في رفض شعبي جماعي لقرار المخلوع بسحب 3أصفار من العملة

بدلاً عن الإنتاج و رفع قيمة الجنيه. لأن تغيير أسم الألف جنيه إلى جنيه

واحد كان معناه تقنين التضخم بدلاً عن محاربته و ضبط الأسعار.

لذلك أزعم ان اللخبطة كانت عفوية في البداية كدفاع عن النفس بطريقة

غير مباشرة ثم لاحقاً أصبح التخلص منها صعب.

كلامك تحليل نفسى ممتاز و صحيح.. لكن ما بال مسؤولين على اعلى مستوى فى الدولة ..
يعنى عبارات زى:
استولينا على عقار قيمته 6 مليار جنيه.. يعنى 6 مليون.. و كذلك عدة بصات قيمتها 200 مليون يعنى 200 مليار..😁
انا متاكد لو الخليجيون سمعوا المؤتمر الأخير ح يجوا السودان و يفتشوا (للنوع دا) ههههه

Quote: استولينا على عقار قيمته 6 مليار جنيه.. يعنى 6 مليون.. و كذلك عدة بصات قيمتها 200 مليون يعنى 200 مليار..😁 انا متاكد لو الخليجيون سمعوا المؤتمر الأخير ح يجوا السودان و يفتشوا (للنوع دا) ههههه

اللجنة تخاطب السودانيين وليس الخليجيين
والمعلومات في خطاب اللجنة مستهدفين بيها السودانيين
ونحن في السودان لو ما قالوها لينا كدا ما بنفهم المقصود
يعني لو واحد قال 6 مليون جنيه طوالي بنسألوا "6 مليون جنيه بالجديد ول بالقديم؟"
عشان كدا حسناً فعلت اللجنة ووفرت علينا السؤال.

لو داير تترجم بالإنجليزي الجنيه القديم يرمز له بSDP أما الجديد فرمزه SDG
يعني لو كتبت
We have confiscated a property with the value of a hundred SDG
مافي زول حيسألك يقول ليك بالقديم ول الجديد

Quote: اللجنة تخاطب السودانيين وليس الخليجيين

بذلت مجهود جبار فى التبرير..

فى جنيه واحد فى السودان.. هو اللى الناس قاعدة تسحبه من البنك و تشترى بيه. اتهى البيان.. بالجديد و بالقديم دا كلام ما عنده أى معنى.. و على الحكومة توعية الشعب
بدل مجاراتهم.. زمان فى المدرسة كنا ممنوعين نتكلم بالرطانة.. المانع شنو الحكومة تمنع الحساب بعملة ما موجودة أصلاً.. الجنيه القديم دا مافى زاتو..
بعدين أنا ما قلت اللجنة قاعدة تخاطب العالم، لكن قلت العالم يشاهد لأن هذا تلفزيون يشاهده كل العالم العربى و الدولى.. فلو شاهدوا هذا المسؤول يتحدث بهذه الطريقة الغريبة جدا سيكون منهم من سيعتقد أنه مسطول..
فعلا لزول ما بيعرفه شكلو يقول كلام مساطيل. بعدين ال SDP دا وين.. هل اشتريت بيه قريب دا أى شئ؟

يا أبو ريش عندما اتي قذافي للحكم عام 1969 قام بتغيير الجنيه الليبي لدينار

تتصور حتى اليوم مافي ليبي بقول الف دينار او عشرة دينار
حتى اليوم ماسكين في الجنيه القبل خمسين سنة !

Quote: تتصور حتى اليوم مافي ليبي بقول الف دينار او عشرة دينار حتى اليوم ماسكين في الجنيه القبل خمسين سنة !

كلامنا يا هندسة عندنا هنا فى السودان.. مالنا و مال الليبيين.. الجابهم شنو هنا؟ و هل هم حجة علينا؟

تحياتي الحبيب محمد عثمان ، نحن مجهجهين ثلاثين سنة ما نتحمل جهجهة ثلاثون دقيقة ، ربما خلط الأرقام ناتج عن المسيمات في فترة الحكم وعن الأصفار التي أضيفت أو أزيلت .

ولكن أذكر في أحدى إجازاتي كان هناك تغيير في في مسمى العملة ، المهم أخوك شايل أمانات ناس بقيت أوزع بالزيادة وفجأة إكتشفت أن القروش نقصت ، بس الحمد لله الناس طلعوا

أمينين جو راجعين وقال لي رجعنا لوالدنا وقال المبلغ كذا ولذا عدنا لك بالمبلغ الزائد ،،، شخصيا لا أرى فضيحة أن خلط الأمر لدى الرجل ولكن المصيبة ما تم إعلانه عن مخصصات

كان يستلمها رأس الدولة ونحن كنا في حالة (General anesthesia) .

الجديد دة بتكتب في الأوراق الرسمية فقط
لكن مافي زول في عامة الشعب بتعامل بيه
لسة الناس بتقول مليون

اللجنة عاوزة تفهم الشعب .. الأوراق الرسمية بتتقدم براها ما في المؤتمر
يعني لو قالوا لي الطاهر التوم شال 5 مليون في شهر واحد بقول مبلغ بسيط ما بستاهل كمية التعريض العملها أيام الثورة
لكن لما يقولوا لي 5 مليار بفهم إنه الموضوع بستحق

يا أبو ريش انا اقصد انو ترسخ بعض المفاهيم في اذهان الشعوب من الصعب تبديلها في يوم وليلة
وضربت لك مثل بالشعب الليبي الذي عجز عن استيعاب التغيير الدينار 50 سنة فكيف يفهم لك شعب السودان
الموضوع في سنوات قليلة وكما ذكر لك الاخوان اللجنة لاتتعامل مع جهات رسمية بل تقرب المفاهيم لشعبها
البسيط الذي لايعرف الا حساب الجنيه القديم .

ياخي طوال تعاملنا بالدينار أيام تنزيل الخرمجة الحضارية سمعت سوداني يقول دينار؟
الناس طوالي تضرب في 10

هسي الصاح شنو المليون ولا المليار والجديد ياتو والقديم ياتو والطفى النور منو ولو غلبهم يعملوا زي اللبنانيين ويتكلموا بالدولار واحنا نضرب ونخت الصفر ونطلع بالواحد

Quote: انا اقصد انو ترسخ بعض المفاهيم في اذهان الشعوب من الصعب تبديلها في يوم وليلة وضربت لك مثل بالشعب الليبي الذي عجز عن استيعاب التغيير الدينار 50 سنة فكيف يفهم لك شعب السودان

متفقين يا ود الشيخ، و الشعب الليبى له الحق يسمى الدينار جنه.. و حتى لو السودانيين سموا الجنية الجديد بشه الكضاب ما عندى مانع.. لكن الكلام بتاعى عن إسمين يذكروا فى وقت واحد.
ما أظن الليبيين يقولوا هاك المية دينار اللهى مية جنيه دى خليها معاك.. ولكن يقولون هاك المية جنيه دى.. لو الحكومة ما معترفة بالجنيه الجديد يرجعوا الأصفار ما عندى مانع.
تجى عاوز تشترى حاجة يقول ليك بمية الف.. تسأله بالجديد و اللا بالقديم؟ ونسـة فارغة و مضيعة للوقت . لو حسبت وقت ممثل اللجنة يا باشمهندس الذى قضاه فى البيان و كان 10 دقائق، فلو
ذكر عملة واحدة لأختصر الوقت الكلى الى 7 دقائق أو على الأقل 8 دقائق.. هسى قول صحفى عربى يتابع البيان و عاوز يكتب تقرير لجريدته.. حيكتب شنو؟ مليون واللا مليار؟

فوق من أجل نشر الوعى