Quote: الخرطوم: السوداني فوجىء رواد مواقع التواصل في السودان صباح اليوم الإثنين، بادعاء سودانيين بمدينة الدمازين جنوب شرق السودان “حي اركويت” بظهور الكعبة المشرفة داخل أحد المنازل.
ولاقى بث مباشر للحدث تهكم منصات التواصل، والذي أظهر رجال ونساء وأطفال يطوفون ويؤدون تكبيرات الحج.
فيما تردد عن دفع تذكرة مالية قدرها مائة جنيه مقابل الدخول للمنزل وأداء الطواف.
ودعا البعض السلطات للتدخل لإيقاف هذا العبث واستغلال العاطفة الدينية للبسطاء والاحتيال عليهم.
يتبع ،،،،
Post: #2 Title: Re: قصة الكعبة المشـرفة الظهرت في الدمازيـن ش Author: muntasir Date: 06-08-2020, 10:04 AM Parent: #1
واحد حبرتجي قال للجماعة الكعبة ظهرت في أوضتي ودور البيزنس غايتو لو عمل فرانشايز بنقدم
Post: #5 Title: Re: قصة الكعبة المشـرفة الظهرت في الدمازيـن ش Author: يحي قباني Date: 06-08-2020, 10:19 AM Parent: #2
Quote: واحد حبرتجي قال للجماعة الكعبة ظهرت في أوضتي ودور البيزنس غايتو لو عمل فرانشايز بنقدم
مونتا ،،، كلما اقرا كلمة فرانشايز اتذكر اول التسعينات واحد من الاخوان كان شغال في السكة حديد في كندا و حصلت ليه اصابة عمل فقبض تعويض محترم لما سالوه حترجع شغلك تاني ؟ خلف كراعه جادي جدا و قال .. ابدا .. انا بفكر اشوف لي اي (فرنش فرايز) و ادخل عالم التجاره ...
Post: #3 Title: Re: قصة الكعبة المشـرفة الظهرت في الدمازيـن ش Author: walid taha Date: 06-08-2020, 10:15 AM Parent: #1
من واقع المشاهدات اليومية الكعبة قااعدة فى محلها لم تتحرك شبرا !! حسب المنطق لا يمكن تواجد شئ واحد فى مكانين مختلفين فى نفس الوقت !
يبدو أن الهواء (عليل جدا) فى الروصيرص :)
Post: #4 Title: Re: قصة الكعبة المشـرفة الظهرت في الدمازيـن ش Author: muntasir Date: 06-08-2020, 10:18 AM Parent: #3
يا وليد ده اسمه الزمكان انت ما قاعد تحضر ستار تراك ما تخليك متشكك الزنديق ده قال قبل كده في البرق شاف قبة الشيخ يوسف أب شرا وهو في العين ولا دبي وودالبشرى ما جا غالتو معناتها ممكن تحصل
Post: #6 Title: Re: قصة الكعبة المشـرفة الظهرت في الدمازيـن ش Author: أحمد محمد عمر Date: 06-08-2020, 10:27 AM Parent: #3
Quote: حسب المنطق لا يمكن تواجد شئ واحد فى مكانين مختلفين فى نفس الوقت !
يا زول دة كلام شنو! الدين كمان فوقه منطق؟ ماهو دة عمر بن الخطاب قاعد في المدينة المنورة صوته وصل لحدي نهاوند لا موبايل لا ثريا وكمان سارية المحاصر من كل الجهات لما جاهو صوت أمير المؤمنين يقول ليه يا سارية الجبل طوالي جرى اتدسى هناك ونجا المؤمنون يا زول إن دخلت المنطق الحج كلو بمرق كيت والله جد بدءً من اللبس العريان لحدي فليق الشيطان :)
_______ لكن يا اخوانا الدمازين بعيدة لو فتحوا لينا واحدة في مدني ولا حتى الخرطوم وتكون هادئة ومكيفة ما بطال
Post: #7 Title: Re: قصة الكعبة المشـرفة الظهرت في الدمازيـن ش Author: يحي قباني Date: 06-08-2020, 11:01 AM Parent: #6
Quote: لكن يا اخوانا الدمازين بعيدة لو فتحوا لينا واحدة في مدني ولا حتى الخرطوم وتكون هادئة ومكيفة ما بطال
يا ابوحميد .. زمان واحده مصرية مشت الحج و كان شهر ٨ و مكة مولعة نار بعد طواف القدوم قربت تدوخ ... قالت لي جارتها .. هو سيدنا ابراهيم ما شافش هوا و طراوة اسكندرية في الصيف ؟
Post: #8 Title: Re: قصة الكعبة المشـرفة الظهرت في الدمازيـن ش Author: MOHAMMED ELSHEIKH Date: 06-08-2020, 11:06 AM Parent: #7
Quote: لكن يا اخوانا الدمازين بعيدة لو فتحوا لينا واحدة في مدني ولا حتى الخرطوم وتكون هادئة ومكيفة ما بطال
تستاهل والله . بس خلصوا الكعبات ,
عندنا ليك واحد رمضان مظبوط ينفع؟؟؟
Post: #9 Title: Re: قصة الكعبة المشـرفة الظهرت في الدمازيـن ش Author: HAIDER ALZAIN Date: 06-08-2020, 11:22 AM Parent: #8
يعني كلكم عاوزين تفهموني انه الناس ديل غلطانيين والا داقسين !
ما اظن .. لانه الحديث بيقول لا تجتمع امتي على ضلالة دا من ناحية
من ناحية تانية الماتع شنو يعني الكعبة تظهر بالدمازين عندكم شك في قدرة ومشيئة الله !
الناس طالما إنداحت ودفعت قروش وجبجبت معناها الموضوع يستاهل .. لو 2010 دا ختف كراعه ومشي هناك عسى ولعل العليـهو دا ينزل ..
عموماً عندي كم قصة كدة بمشي وأجي احكيهن .. باقي الأيام دي لامي في طبقات ود ضيف الله هههههههه
الشيخ إدريس ود الأرباب كما يثحكى عنه في الطبقات قال بحرمة التنباك وأفتى انه لا يجوز وإستند في دعواه وفتواه على إنه الرسول صلى الله عليه وسلم جاءه في المنام وأفتى ليهو بحرمة التمباك .. الجماعة الحللو التمباك وأباحوهو لم يقتنعو واشتكوهو للسلطان .. بعد مداولات ختو واحد من القضاة حكم .. القاضي مشى مسافة أخد نومة وجاهم بتأييد تحريم التنباك قال في النومة جاهو الرسول ( ص ) واخبره انه فعلاً جاء لإدريس ود الأرباب وقال ليهو قلت ليهو التمباك حرام ..
المهم قبل ما تخلص القصة قوم يا واحد من حوار الارباب رسلوهو بواسطة السلطان مصر عشان ينشر فتوى تحريم التمباك الفيهم جماعة اباحوهو منهم على الاجهوري حوار الارباب جاء للاجهوري في الجامع شايل منشور الأرباب كاتب فيهو : سمعت رسول الله صلى الله عليـه وسلم يقول ..... قال ليك الاجهوري رمى للحوار كتاب الارباب وقال ليهو ..
يابربري شيخك كان صحابي ؟؟!
فعلم الله واسع يا إخواننا ما تضيقوها ساي
Post: #10 Title: Re: قصة الكعبة المشـرفة الظهرت في الدمازيـن ش Author: Hafiz Bashir Date: 06-08-2020, 11:29 AM Parent: #9
الكعبة أصلاً موجودة في كل مكان وفي كل الأوقات المشكلة في الناس المابتقدر تشوفها إلا يمشوا مكة
Post: #11 Title: Re: قصة الكعبة المشـرفة الظهرت في الدمازيـن ش Author: Arif Nashed Date: 06-08-2020, 11:34 AM Parent: #9
ذكرتني عجلة سيدنا ادم في جدة😅😅 قال واحد باكستاني سواق ليموزين باقي ليهو زي عشرين ريال عشان يكمل الإيراد اليومي قدر ما لف ما لقي ليهو زبون. شاف ليك معتمرين اسيويين وقف بالقرب منهم وقال ليهم. صديق انتا شوف عجلة سيدنا ادم قالوا ليهو لا. قال ليهم لازم شوف وسوس طواف. المهم اقنعهم وركبوا معاهو وداهم دوار العجلة في شمال جدة عبارة عن مجسم عجلة ضخم جدا ونزلهم هناك وقبض العشرين ريال والجماعة نزلوا يشوفوا. 😅😅😅😅😅
Post: #13 Title: Re: قصة الكعبة المشـرفة الظهرت في الدمازيـن ش Author: أحمد محمد عمر Date: 06-08-2020, 11:43 AM Parent: #11
Quote: هو سيدنا ابراهيم ما شافش هوا و طراوة اسكندرية في الصيف
Quote: عندنا ليك واحد رمضان مظبوط ينفع؟؟؟
زمان عزام فرح قال يوم عرفة ما 9 ذو الحجة وممكن يكون أي يوم في أشهر الحج اللي هم 116 يوم هسة كان الناس خلتو لاجتهاداته دي كان اتصرف لينا في رمضان
Post: #12 Title: Re: قصة الكعبة المشـرفة الظهرت في الدمازيـن ش Author: عبدالمنعم الطيب حسن Date: 06-08-2020, 11:41 AM Parent: #9
هلا حيدر طبعا شيخ ادريس ودالارباب دي جدي وجد كل ناس واوسي بعدين اهلنا بقول مولود بفركة من بطن امه حتى لا ترى النساء عورته وهو بعد طفل عشان كدة اسمو الشيخ ادريس ابوفركة طبعا انا كمثقف بنيوي حكاية الفركة ما مقتنع بيها ولكن ذكرتها ليك عشان اهلنا بقولوا كدة ومقتنعين ولده جدنا الشيخ عبدالقادر يُقال في طبقات ضيف الله دي انه رفض ان ياكل في بيت ابوهو باعتبار الوالد ياكل من مائدة السلطان وذهب بعدها من واوسي نحو الجزيرة اسلانج والجزيرة والغرب ولكنه عاد اخيرا ومات ودفن واوسي في قبة عظيمة هناك حلتنا اسمها واوسي الشيخ عبدالقادر وهي واحدة من ستة قرى تكون منطقة واوسي الكبرى طبعا حكاية انو جدنا الشيخ عبدالقادر معارضة قاعدين نقول لابناء عمومتنا ابناء الشيخ محمد انو نحن المعارضة دي تجري في دمنا وراثة عديل وجينات منذ السلطنة الزرقاء من جدنا المناضل الثوري الرافض لمائدة الحكام اصالة ووراثة معارضة منذ الازل هههه
Post: #14 Title: Re: قصة الكعبة المشـرفة الظهرت في الدمازيـن ش Author: عبدالمنعم الطيب حسن Date: 06-08-2020, 11:57 AM Parent: #12
Quote: كان اتصرف لينا في رمضان
السنة دي يا هندسة مع الحظر دا رمضان امنقة شيء تصحى المغييييرب تاكل وتشبع وبعدها تتذكر انو في رمضان تقوم تشرب موية وشاي اما لو الظرف تغير والشغل في الدهب او الزراعة فهنالك فتوى لصديقي خلف المزارع انو مع الزراعة دي ولاحقا الدهب الصيام صعب ويفتي قائلا:- الله ما مر بالهلاك
Post: #15 Title: Re: قصة الكعبة المشـرفة الظهرت في الدمازيـن ش Author: محمد على طه الملك Date: 06-08-2020, 12:56 PM Parent: #14
Quote: واحد حبرتجي قال للجماعة الكعبة ظهرت في أوضتي
يمكن من جماعة اسامة الخواض البنقل منهم أو صاحبك الزنديق.
Post: #16 Title: Re: قصة الكعبة المشـرفة الظهرت في الدمازيـن ش Author: نادر الفضلى Date: 06-08-2020, 01:09 PM Parent: #15
يعنى نشوف لينا تصديق تنقيب بترول فى منطقة الدمازين؟
إحتمال الكعبة 2 تحمى الدمازين وتصد عن السودان طوافان سد النهضة الأثيوبى!
Post: #17 Title: Re: قصة الكعبة المشـرفة الظهرت في الدمازيـن ش Author: أحمد محمد عمر Date: 06-08-2020, 01:30 PM Parent: #16
Quote: الله ما مر بالهلاك
أيام الماجستير قلت رمضان دة ولا بقعد في الخرطوم ولا حاجة بقيت أجي المحاضرات المهمة بس أحضرها وارجع مدني في نفس اليوم وطبعاً أخوك رخصة الإفطار دي ولاااااا بفرط فيها :) بكون شايل معاي باغة الموية الساقطة أول ما البص يتعدى تفتيش مدني بكتحها ليك مرة طلعنا من المحاضرة لصلاة العصر وانا في الوضاية جمبي سلفي قااااطع من النوع الما بتفاهم داك بقيت بشيل حبة موية بي يدي من الماسورة أبلعها وامرر يدي في وشي وأقول ليه والله صحي زي ما قال العربي لو ما جغيمات الوضوء دي كنا متنا :) صاحبك يعاين فيني يلقاني ببلع يقول لي يا زول دة افطار عمد أعمل حسابك وانا أقول ليه هو وينو الفطور؟ دي جغيمات ساي ما فوكا حاجة صاحبك وشه حمر وبقى يرجف من الزعل الجماعة يهدوا فيه ويقولوا لي الدنيا سخانة وأي حاجة لكن أعمل حسابك في المضمضمة وانا أقول ليهم يا اخوانا انتو أول مرة تسمعوا بي جغيمات الوضوء ولا شنو؟ في النهاية السلفي خلى الوضوء وطلع في المسطبة عمل مخاطبة في الحمامات عن المجاهر بالمعصية وتكفيره https://sudaneseonline.com/db/attention/010_Smile.gif وانا أضحك سااااي لحدي ما واحد صاحبي طرشق علي المتعة قال ليهم يا اخوانا أحمد دة فاطر برخصة السفر :)
Post: #18 Title: Re: قصة الكعبة المشـرفة الظهرت في الدمازيـن ش Author: أحمد محمد عمر Date: 06-08-2020, 01:39 PM Parent: #17
Quote: لو 2010 دا ختف كراعه ومشي هناك عسى ولعل العليـهو دا ينزل
يا زول نحن لينا كم يوم بناقش مع الشباب موضوع كعبة مدني قلنا ليهم مارنجان ما بتجيب دخل كلفنا واحد يشيك لينا على مبنى سينما الزمالك فاضي ولا مشغول ياخي دي كان ظبطت معانا أمانة ما نعمل ليكم حج بتقنيات عالية أولها مزلقانية الطواف تطلع بالسلم وتتزحلق السبعة أشواط .. دة غير السعي بالركشة
Post: #19 Title: Re: قصة الكعبة المشـرفة الظهرت في الدمازيـن ش Author: عبدالمنعم الطيب حسن Date: 06-08-2020, 01:41 PM Parent: #17
صاحبنا يا احمد عمر عرس في رمضان والحنة العصريات ولانو صاحبي شديد قاعد متحنن معاهو وصايمين نفك الحنة ونفطر فطور رمضان يوم العرس الحفلة مدورة بالليل واحد قاعد فوق الحوش قال يا جماعة رمضاااااان رد عليهو واحد من جوة الدارة رمضان منو رمضان زايد صاحبنا شهر عسلو في كسلا الصباح فاطر وماشين على كسلا واستمر في كسلا اسبوع وجاء الخرطوم وبرضو نزل في الفندق اسبوع كلو فطور المهم الفطور جاب نتيجة الان تدرس في اولى جامعة النتيجة دي ههههههههها
Post: #20 Title: Re: قصة الكعبة المشـرفة الظهرت في الدمازيـن ش Author: محمد على طه الملك Date: 06-08-2020, 02:00 PM Parent: #19
Quote: النتيجة دي
البروفايل مش ؟ الله يحفظها ويغتيها من عين الكفار ديل.
Post: #21 Title: Re: قصة الكعبة المشـرفة الظهرت في الدمازيـن ش Author: أحمد محمد عمر Date: 06-08-2020, 02:08 PM Parent: #20
ههههههه لا لا ديك نتيجة صاحبه ما نتيجته
زمان عندنا شيخ كان بتكلم عن مسافة الإفطار قال ابن حزم قال إذا اختفت الديار صاحبنا شبك ليك في ابن حزم دة ولا شيكنا ذاتو على كلامه صاح ولا غلط كلما ما اليوم يسخن يقول عربيتي برة أرحكم نصل السوار بس نفطر ونجي راجعين غايتو الحمد لله لحدي ما انتهى رمضان ما عملناها رغم إنه ما هاين علينا نخالف ابن حزم
Post: #22 Title: Re: قصة الكعبة المشـرفة الظهرت في الدمازيـن ش Author: نعمات عماد Date: 06-08-2020, 02:16 PM Parent: #21
سلام
يا حيدر و ضيوفك،
و الصلاة برضو إتجاه الكعبة الجديدة؟ 😂
Post: #23 Title: Re: قصة الكعبة المشـرفة الظهرت في الدمازيـن ش Author: محمد على طه الملك Date: 06-08-2020, 02:21 PM Parent: #21
غايتو يا احمد محمد لقيت (برودك ) اضرع ساى لغير الناطقين بها ( البر ود ) بفتح الباء والواو فضاء واسع من الأرض المسطحة خالية من النباتات صقيعة.
Post: #24 Title: Re: قصة الكعبة المشـرفة الظهرت في الدمازيـن ش Author: أحمد محمد عمر Date: 06-08-2020, 02:31 PM Parent: #23
مدنياااااااااااو شكراً بكروك
هسة البوست دة لو اتكتب في غابر الأزمان كان عارف الركابي فسحك في المقالات وعماد موسى وعماد حسين شتحوا فيك عشرة بوستات والمسلمي يملأ بوستاتك بالمعلقات المقتبسة والهادي الشغيل يسكك من بوست لي بوست بس تعال نتباهل
Post: #25 Title: Re: قصة الكعبة المشـرفة الظهرت في الدمازيـن ش Author: أحمد محمد عمر Date: 06-08-2020, 02:48 PM Parent: #24
لا لا كدة ظلومة يا عاطف عمر تديني أنا رد ونص وحافظ بشير ردين؟ هو حافظ كاتب ليه سطرين بس!! عليك دينك بعد اللخبطة السويتها دي كلها بنبزوني في رد ونص بس؟ هو البوست الما بكتب فيه حرف ذاتو بلقاك منبزني بي تحت هسة بعد سواطتي دي كلها تديني شتمة ونص؟
Post: #26 Title: Re: قصة الكعبة المشـرفة الظهرت في الدمازيـن ش Author: عبدالمنعم الطيب حسن Date: 06-08-2020, 03:18 PM Parent: #25
مولانا الملك منور يا باشا داك صاحبي وبكرو كبيرة دخلت السنة دي الجامعة خلصت الكورس الاول ورجعت لمكة في اخر طيارة تهبط جدة جاية من الخرطوم بت بركة ورمضانية ... الفي البروفايل دي فطومة القصب اللحمر تبع حضروتونا على وشك الدخول لمتوسطتها طموحة وحلاتا تحياتي يا ملك ......
Post: #27 Title: Re: قصة الكعبة المشـرفة الظهرت في الدمازيـن ش Author: يحي قباني Date: 06-08-2020, 03:27 PM Parent: #26
Quote: هلا حيدر طبعا شيخ ادريس ودالارباب دي جدي وجد كل ناس واوسي بعدين اهلنا بقول مولود بفركة من بطن امه
حيدرنا ازيك ...
يا منعم ... ياخ جدك ابو فركة ادريس ود الارباب ده انشد فيهو سيدنا مبارك حسن بركات بجمال غير عادي .. بالله انت من العيلفون ..
Post: #28 Title: Re: قصة الكعبة المشـرفة الظهرت في الدمازيـن ش Author: ABUHUSSEIN Date: 06-08-2020, 03:35 PM Parent: #26
البوست دا بتاع الطريفي و ل بتاع العواليق الزنديق .....؟؟؟؟؟؟
Post: #29 Title: Re: قصة الكعبة المشـرفة الظهرت في الدمازيـن ش Author: أحمد محمد عمر Date: 06-08-2020, 04:31 PM Parent: #28
Quote: البوست دا بتاع الطريفي و ل بتاع العواليق الزنديق .....؟؟؟؟؟؟
ياهو بتاع عارف ناشد القلتو دة
Post: #30 Title: Re: قصة الكعبة المشـرفة الظهرت في الدمازيـن ش Author: كمال عباس Date: 06-08-2020, 04:47 PM Parent: #29
ظهرت جنبها آبار بترول واللا لا-وكعبة مفلسة ساي ؟
Post: #31 Title: Re: قصة الكعبة المشـرفة الظهرت في الدمازيـن ش Author: أحمد محمد عمر Date: 06-08-2020, 04:52 PM Parent: #30
أيوة دة كلام صاح يا عاطف أول ما الشتائم تنزل رب رب كدة بمعدل 3 شتمات في الدقيقة بعرف إني صاح
بالمناسبة إنت قريت المقتبس دة ولا بتهضرب ساي كالعادة؟
Quote: ابن حزم دة ولا شيكنا ذاتو على كلامه صاح ولا غلط
Post: #32 Title: Re: قصة الكعبة المشـرفة الظهرت في الدمازيـن ش Author: عبدالمنعم الطيب حسن Date: 06-08-2020, 04:54 PM Parent: #29
Quote: يا منعم ... ياخ جدك ابو فركة ادريس ود الارباب ده انشد فيهو سيدنا مبارك حسن بركات بجمال غير عادي .. بالله انت من العيلفون ..
مرحب استاذنا يحيى قباني كيفك يا زعيم انا من واوسي ولكن اهل واوسي والعيلفون وامضوبان ابناء عمومة للشيخ ادريس ود الارباب ولدين بواوسي والبقية بالعيلفون والجديد الثورة وهكذا معظم اهل اسرتنا من جهة ابوي ما زالوا يقيمون شرق ام ضوابان وبعضهم بواوسي ................. ابدعت في تسمية مبارك حسن بركات بسيدنا بالفعل هو كذلك صوت وحضور لاغاني الحقيبة مبالغة ظللت لسنين عندي شريط واحد في العربية لسيدنا مبارك حسن بركات .............. تحياتي يا زول يا نيل
Post: #33 Title: Re: قصة الكعبة المشـرفة الظهرت في الدمازيـن ش Author: Mahjob Abdalla Date: 06-08-2020, 05:17 PM Parent: #32
معقولة ما في زول كان شايل معاهو موبايلو عشان يجيب الخبر مصور؟
Post: #34 Title: Re: قصة الكعبة المشـرفة الظهرت في الدمازيـن ش Author: عبدالمنعم الطيب حسن Date: 06-08-2020, 05:24 PM Parent: #33
محجوب كبفك امكن التصوير حرام في الكعبة دي.
Post: #35 Title: Re: قصة الكعبة المشـرفة الظهرت في الدمازيـن ش Author: muntasir Date: 06-08-2020, 05:29 PM Parent: #34
الهبيب محجوب في فيديو لكن سئيلك الله ضلمة لا ما شفت كعبة ولا عيوني كعبة
Post: #36 Title: Re: قصة الكعبة المشـرفة الظهرت في الدمازيـن ش Author: Asim Ali Date: 06-08-2020, 05:33 PM Parent: #35
الفيديو ماتفهم منو حاجه
Post: #37 Title: Re: قصة الكعبة المشـرفة الظهرت في الدمازيـن ش Author: محمد على طه الملك Date: 06-08-2020, 07:56 PM Parent: #36
اتادبوا يا هوي رسالة ثورتنا دي انطلق دعوتها من الحتة دي.
