جمال المعتق بعيد الكورونا تشرب لما يلغبك تقوم تتدهن بيهم -فارغة#

08:10 PM May, 25 2020

سودانيز اون لاين
زهير عثمان حمد-السودان الخرطوم
مكتبتى
رابط مختصر

تعرفوا أخوكم العبد لله من سنوات ما تاب توبة نصوحة وأتجاه للعبادة والايمان جانئ بالجد شيطان اصلي أقعني بأنو الحياة زايلة وانت تقعد بس كدا ما ممكن حسي حي أنت ومانزلت المعاش ذاتو دي ممارسات كومارت عفي عليهم الحركة في عذاب
ما تنكسر للخوف أستمتع بأخر لحظة من عمرك الفاني وما تكون باتع فرجة نضمي فارغ أتحرك أعمل حاجة حسي أن كنت في موقع علي بابا شفت الويسكي المعتق والمشروبات بتاعت الجنة يا زول كدي أدخل شوف الرخيص الممكن يكون معك ليلة
الوافقة طولي دخلت الموقع مكان أم الكبائر ليقت ياناس حاجة قالوا هي سبب الفرحة والبهجة لكل حزين This drink brings joy and pleasure within twenty minutes
Mellowed for years since 1971
المهم طلبت قاروة منو قلت يازول ما تبقي عليك كمان عيد و حبسة كورونا وجرسة من الغربة خلاص أحتفل بنفسك وأصلو عندي لحمة ضأن أتذكرت السودان لكين دا ضأن أسترالي المهم قطعت البصل وبدات في أجراءات شد الحله وثم قعدت للمبهج
المولد سنة 1971 جبت التلج والصودا ويا سلام مزتي مكسرات يا حليل أيام بيروت كانت المزة فواكه ومكسرات ويا سلام علي رفاق الجلسة أيام كانت لكين يا زول قالوا قازازتي دي بتبقي كل شيء وجبت من المكتبة الدولية في للفيديو أغاني عبد العزيز داود
و من النخب الرابع عشان المثقفاتيه ما يزعل من اللغة بديت أرقص نسيت الحلة والنار وعوالم الشقة الكئيبة دي لكين الحمدلله زي كدا أنا كنت عارف ح أغرق من البدايات القربية كنت عملتها القطر قام يعني كلو مع بعضو فهمت يا ود المدير
المهم بعد الجرعة الخامسة خلاض بقيت لا صاحي ولا نايم والفنان بعيد بغني المهم الحمدلله موية الحلة كانت كويسه يعني علي زمن النومة كان صحيت لكم لكين فيني جوع خرافي وأتذكرت الحلة جرت علي المطبخ الحمدلله ما حرقت لكين أسبكت
المهم ماقدرت أنتطر العيش بحالوعلي الصحن وكبيت عليهوالحله أكلت زي الانسان الاول اكل معاي قمصي وكل الموجودة حتي كنبة الصالة المهم بعدها قلت أنت حسي كدا تمام محتاج لكاس النوم ودخلت في كاس النوم تعرفوا شدة كان فيني طمع
وشفقة للشراب الباقي كلو أتمسحت بيهو من راسي لوشي والصدر اليدان والباقي للراس قلت يا عبقري بيسرب للعقل ويدهشك
صحت الصباح ليقت روحي ممدد في وسط الصالة لا وصلت محل نومي ولا نمت في الكنبه حقتي
قلت بصوت عالي للمسوح فوائد كتيرة

حلوة يا أبو الزهور أوعك تقول لي ده إتــــــــــــا بس ..ههههههههههه
أحكي ليك دي فيها حالتك حالة الزول الاتمسح بالويسكي
ود خالي جاني زيارة في بلد زي ما قال دي بلد الله راضي عليها
مشى خما الويسكي والبيرة وما خلا شي كذا نوع
ملص هدومو وبقى بالملابس الداخلية وجاب المزة والذي منو ..
جيت من بره هلكان شفت منظر قزازو الراصيهو قدامو ..
قلت ليهو لا حول الله ده شنو يازول شن قدرك تشرب ده كلو
قال لي أنا بشربو انا شرفان وداير انتقم والعرقي نشّف مصاريني
وحاة الله كان ما رويت لامن دشرت بي خشمي مابرتاح
خليتو ومشيت نمت لاني جيت من بره فتران والدنيا بقت ليل
جاتني صحية مزنوق ماشي الحمام لقيتو راقد في نص الصالة
وراقد سلطة ومالي الحتة كلها ومتمسح لامن فنلتو ذاتا شربانه ..
ولا نايم عينو مفتحات لكن ما تفهم منو كلام بيلغلغ وما قادر يرفع يدو ..
حاولت احركو أو اشيلو اوديهو السرير لانه الصالة باردة ما قدرت
الزول سمين وتقيل قمت جريتو من كرعينو وهو ينبز فيني نبز شين ..
دخلتو الاوضة ولا فكرت ارفعوا في السرير خليتو قبلو ورجعت نمت ..
وحاتك اسبوع قريبي ده سكران وكل ما تفك منو يربطا بي كاسات ملانة ..
بعد كم يوم دسيت منو القزاز الجايبو قام زعل مني ونبذني ما خلى لي حاجة ..
بعد داك خليتو وما اشتغلت بيهو قلت ليهو البتسويهو ده شناة طبع منك
لامن سافر ووديتو المطار هو طاشم ومغبّي هسه نتونس ..
ونتذكر سكرتو ديك نقعد نضحك سوا
قال لي انا الاسبوع داك جيتك مخصوص عشان انتقم لنفسي الأمارة بالسوء ..
غايتو كان بقيت زي قريبي ده يكون شيطانك ماكن وليهو قروون
نحن نوبة الشمال مافي زول بلحقنا في الطشمة واظن جذورك من إندينا
فعشان كده عاذرنك .. هههههههههههههههههه
ناسنا يتمثّلوا قول الشاعر :
رمضان ولى هاتها ياساقي - مشتاقة تسعى إلى مشتاقِ
تقبل الله الصيام وعيدك مبارك يا ابو الزوز
صراحة اضحكتني واعدت لي ذكرى قريبي الشرفان الاتمسح واستحمى


ماتجي تقول لي ده ما أنا ده قريبي بزعل منك ها ..

غايتو انت لو خليت عتالة المواضيع و بقيت تكتب حاجاتك بس, حتدخل ليستة العشرة المبشرين بالكتابات الادبية.

الاخ محجوب
عيدك سعيد
العتالة الزعلان منها دي والله في ناس ما عندهم الاخبار كان فطيرة ولا حقيقة وكمان أخوك ما مجبور عليها مزاج بس والمنبر محتاج ليها
شكرا الفال الطيب
لك كل الود

جمال ودالقوز أخي
عيدك سعيد وأنشالله من المعتوقين من النار أنشالله
قصتك سمحه بس فيها قولان !!
المهم لك تحياتي وودي

Quote: قصتك سمحه بس فيها قولان !!

قولان زي قولان قصتك .. ههههههههههه
يازول وحاة الله ده ما انا

Quote: جمال المعتق بعيد الكورونا

جابني اسمي الفي عنوانك ده
لكن لقيتك راصي قزازك ومحتفل بالعيد ..


ربنا يتجاوز عنا جميعا ويعتقنا برحمته من النار
وعيد مبارك عليك

زي ما قال ليك أخوي المحجوب
كان كتّرت لينا من النوع ده تكون ما قصرت
صراحة فلتاتك الزي دي حلوة وتلقائية
وبترفه عن الزول مع الكتمة دي ..

غايتو يا ابو الزهور قصتك مصدقنها و عجبتنا شديد .....
لكن حلة شاديها من قبل ما يصلك السكر و تشرب و تنوم و تصحى و ما تحرق دي إلا بتنقط فيها ماسورة ... 😂😂😂😂
دي حلة اي كلام يا ابو الزهور ياخ .... 😂😂😂😂😂

أبوحسين
انت قايل المساله كلها ما أخدت خمسه عشرين وأخوك كان شهيد المعتق
لك ودي