الشكر لاخونا بكري الذي سهل طريق الرجعة لسودانيز اونلاين .. الرحمة و المغفرة لكل الذين فارقونا الى الضفة الأخرى .. و هم كثر. سلام و تحايا لكل قبيلة سودانيز اونلاين
Post: #2 Title: Re: سلام علي الحبان في كل بكان .. Author: muntasir Date: 02-26-2020, 03:49 AM Parent: #1
وعليك السلام ومرحب بيك كان ما لي أي سبب بس عشان خور جهنم دي شكلي بعد إذنك حأغير اسم تلفوني بعد لطشت من دكين ربنا يذكروا بالخير فزع البكورك 😊
Post: #4 Title: Re: سلام علي الحبان في كل بكان .. Author: احمد يوسف (خور جهنم) Date: 02-26-2020, 04:30 AM Parent: #2
سلام منتصر و حبابك الوووف .. حبابك عشرة و انت اول المستقبلين .. عارف يا منتصر .. (خور جهنم) دي ح تكون ولعت نار الحنين عند مولانا محمد المرتضى حامد .. و التحايا لاخونا دكين .. و الكتابة الطاعمة
Post: #3 Title: Re: سلام علي الحبان في كل بكان .. Author: Kabar Date: 02-26-2020, 04:25 AM Parent: #1
خور جهنم.. تلل..تللل..تلللللللل.. البلا ما جاك.. والفقر ما حباك.. ماك طيب يا ول ابا.. جيتا جيت يا صديقي ، دارك خلا..سرحت فيها ام سيحان..اما ارنب الكنيته..اسكت ساكت خليها يا قريبي..
هاك البياض..
كزيمة زايمة..وكزيمة مناك..وكزيمة زي منقو الحــُباك..جنة هنا وجنة هناك.. زولي قال لي: الزومة وسط الدارة بتجيب اللوم والكلام..! قلت ليهو : وين يا عمك..ده اسمو استغراق..وشرحو:جمال حرية التعبير..! قال لي: دمع ، كل ما انحلب درّ.. قلت ليهو: كن ما الضلوع ، كان الشوق طلع برّه.. شديرتين يا صديقي ، طورتين هادات ليهن في عود..!
كبر
Post: #6 Title: Re: سلام علي الحبان في كل بكان .. Author: احمد يوسف (خور جهنم) Date: 02-26-2020, 04:59 AM Parent: #3
كبر .. حبابك يا الزين .. و عساك طيب و زين .. آزوول أمانة ما كتلتني تب .. شكلك بتدورني نلقط هديماتي و علي المطار تووووش .. يا اخي نوعية الفيديوهات دي مفترض يتم حظرها و ممنوع تطلع من السودان .. في ناس واقفة علي الهبشة .. تسلم يا زعيم ..
Post: #5 Title: Re: سلام علي الحبان في كل بكان .. Author: Kabar Date: 02-26-2020, 04:57 AM Parent: #1
وده التني يا عم..
بنات ابا، بنات الجوامعة..اصواتهن رخيمة تربط الشياطين في فيافي الكون او..! اصواتهن ، مجرد سماعهن ، يوديك دار ام نعيم من غير حساب ذاتو..!! عارف يا خور جهنم.. في نواحي السعاتة الزرقا..اخونا قال لصاحبو: ود المصطفى..! وبتعرف اهلنا ومفرداتهم وطريقة تعبيرهم ، فقام صاحبو قال ليهو (بي نهرة): دُلنق..! قال ليهو: ما حلاة ربّه..! اها .. خور جهنم..ما حلاة ربّه..! دهب الشبيكة..يا حبايبي.. يا ود الناس ، ما حرام عليكا.. رسل لي تلفون ربيكا يا حبايبي.. قربت اعمل ثورة ، وامسك مسئول تعليم وافرضها مقرر لناس كلية الآداب جامعة الخرطوم..حقارة كده بس..! باقي ليك يا خور جهنم..ده دهر تاني بتلحق لينا ، بأخوي واخوك..! لا تعرف تزعل ولا تعرف تعرض..!! كتر خير ول ابا بريمة..لسع عندو القدرة يتنبر..اول امسات داك..عاط جاااااااااااااك وقال: أنا الشدرة الصلبا الغلبت المناقو*..وكان الناس هنا شافت شدرة دليب ولا شدرة صهب..! وده كلو هين.. بنات ابا بنات الخوي..قالن: يمه ، عيال البسكويت..! قربنا ننقطع من الرفقة يا صاحب..!
بالجد سعيد بي شوفتك يا ول ابا احمد يوسف..!
حبابك يا صديقي
كبر
ـــــــــــــــــــــــــــــــــــ * الشدرة الصلبا: أي الشجرة ذات الساق الطويل الأملس (مثل الدليب او الصهب) ، غلبت: اعجزت..المناقو: المفرد منقو ، نوع من القرود خضراء اللون (وهي غالبية انواع القرود المستأنسة التي نراها كثيرا) ، وقرود المناقو تتميز بانها ذات خبرة في تسلق الأشجار ، ولكن ليس كل الأشجار..وبريمة اراد ان يقول انه صعب المراس ويهزم الناس بصبره واصراره..!