الشكر لاخونا بكري الذي سهل طريق الرجعة لسودانيز اونلاين .. الرحمة و المغفرة لكل الذين فارقونا الى الضفة الأخرى .. و هم كثر. سلام و تحايا لكل قبيلة سودانيز اونلاين
سلام منتصر و حبابك الوووف .. حبابك عشرة و انت اول المستقبلين .. عارف يا منتصر .. (خور جهنم) دي ح تكون ولعت نار الحنين عند مولانا محمد المرتضى حامد .. و التحايا لاخونا دكين .. و الكتابة الطاعمة
02-26-2020, 04:25 AM
Kabar Kabar
تاريخ التسجيل: 11-26-2002
مجموع المشاركات: 18537
خور جهنم.. تلل..تللل..تلللللللل.. البلا ما جاك.. والفقر ما حباك.. ماك طيب يا ول ابا.. جيتا جيت يا صديقي ، دارك خلا..سرحت فيها ام سيحان..اما ارنب الكنيته..اسكت ساكت خليها يا قريبي..
هاك البياض..
كزيمة زايمة..وكزيمة مناك..وكزيمة زي منقو الحــُباك..جنة هنا وجنة هناك.. زولي قال لي: الزومة وسط الدارة بتجيب اللوم والكلام..! قلت ليهو : وين يا عمك..ده اسمو استغراق..وشرحو:جمال حرية التعبير..! قال لي: دمع ، كل ما انحلب درّ.. قلت ليهو: كن ما الضلوع ، كان الشوق طلع برّه.. شديرتين يا صديقي ، طورتين هادات ليهن في عود..!
كبر
02-26-2020, 04:59 AM
احمد يوسف (خور جهنم) احمد يوسف (خور جهنم)
تاريخ التسجيل: 02-21-2020
مجموع المشاركات: 42
كبر .. حبابك يا الزين .. و عساك طيب و زين .. آزوول أمانة ما كتلتني تب .. شكلك بتدورني نلقط هديماتي و علي المطار تووووش .. يا اخي نوعية الفيديوهات دي مفترض يتم حظرها و ممنوع تطلع من السودان .. في ناس واقفة علي الهبشة .. تسلم يا زعيم ..
02-26-2020, 04:57 AM
Kabar Kabar
تاريخ التسجيل: 11-26-2002
مجموع المشاركات: 18537
بنات ابا، بنات الجوامعة..اصواتهن رخيمة تربط الشياطين في فيافي الكون او..! اصواتهن ، مجرد سماعهن ، يوديك دار ام نعيم من غير حساب ذاتو..!! عارف يا خور جهنم.. في نواحي السعاتة الزرقا..اخونا قال لصاحبو: ود المصطفى..! وبتعرف اهلنا ومفرداتهم وطريقة تعبيرهم ، فقام صاحبو قال ليهو (بي نهرة): دُلنق..! قال ليهو: ما حلاة ربّه..! اها .. خور جهنم..ما حلاة ربّه..! دهب الشبيكة..يا حبايبي.. يا ود الناس ، ما حرام عليكا.. رسل لي تلفون ربيكا يا حبايبي.. قربت اعمل ثورة ، وامسك مسئول تعليم وافرضها مقرر لناس كلية الآداب جامعة الخرطوم..حقارة كده بس..! باقي ليك يا خور جهنم..ده دهر تاني بتلحق لينا ، بأخوي واخوك..! لا تعرف تزعل ولا تعرف تعرض..!! كتر خير ول ابا بريمة..لسع عندو القدرة يتنبر..اول امسات داك..عاط جاااااااااااااك وقال: أنا الشدرة الصلبا الغلبت المناقو*..وكان الناس هنا شافت شدرة دليب ولا شدرة صهب..! وده كلو هين.. بنات ابا بنات الخوي..قالن: يمه ، عيال البسكويت..! قربنا ننقطع من الرفقة يا صاحب..!
بالجد سعيد بي شوفتك يا ول ابا احمد يوسف..!
حبابك يا صديقي
كبر
ـــــــــــــــــــــــــــــــــــ * الشدرة الصلبا: أي الشجرة ذات الساق الطويل الأملس (مثل الدليب او الصهب) ، غلبت: اعجزت..المناقو: المفرد منقو ، نوع من القرود خضراء اللون (وهي غالبية انواع القرود المستأنسة التي نراها كثيرا) ، وقرود المناقو تتميز بانها ذات خبرة في تسلق الأشجار ، ولكن ليس كل الأشجار..وبريمة اراد ان يقول انه صعب المراس ويهزم الناس بصبره واصراره..!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
احمد يوسف (خور جهنم)
Kabar
فيس بوك
تويتر
انستقرام
يوتيوب
بنتيريست