♧ ناس عايشة و ناس دايشة £

《خلي الإنسولين مطرح ما يسري يمري》
● نحن شعب الله المحتار الوحيد حتى المهاجرين منا بعيشوا غرباء طول حياتهم في مهاجرهم
عارفين ليه؟ لأنو السوداني بيصعب عليه التواؤم مع البيئة الجديدة ويوم نزوله في المطار بيمشي
يكوس السودانيين وين والبيوت البتسوي القراصة والكسرة... وفي رمضان ما بيصوم كان ما رسلو
ليه كرتونة الآبري والرقاق. طيب ..ظروف مسقط راسم خياراتك فرضت عليك اغتراباً أو لجوءاً؟
فياخ عليك الله ما تخرب الموت بالرفسي ساكت ياخ...حاول اتعلم كيف تندمج مع مجتمعك الجديد
وعيش اليوم لأنو اليوم البفوت ما قلنا للزمان ارجع يا زمان موش حايرجع تاني!!! ما تعيش كأنو
ربنا كاتب ليك حياتين.. واحدة للغربة... وحياة تانية بعد ما ترجع السودان... وبالله لو كنت
مهاجر في دول أوربا او امريكا ما تعمل خططك كلها انو اولادك راجعين يعيشو في السودان.

● عشان كدة ما تفكر تبني بيت كبير ... (لو فكرت) ما تكتر الساس تحت عشان اولادك
بعدين يجو يبنو فوق....لانها دي احلام سعيدة ما بتتحقق...عارف ليه ... لانك هتموت بجاي
و ببيعوا البيت تاني سنة طوالي وكل واحد بمشي يسكن براه ... لانو حريم الاولاد ما متفقات.
ياما شفنا بيوت اتاسست لخمسة طوابق واعمدتها وقفت فوق.. وفي النهاية ما كملت وسيدا
مات قبل ما يضرب جير في البيت من برة... ونص الاغتراب ضاع طوب وخرسانة وحديد
تحت الأرض عشان الساس الكبير ،،، وضاع عمر صاحبها و اندفن مع الساس عشان كدة تاكد
من أنك تعمل بيت قدرك انت وام العيال بس... واعمل حساب اوضتك والحمام الداخلي
واهم حاجة المزلقان عشان الكرسي المتحرك تقدر تحوم بيه بسهولة. وخلال فترة
الإغتراب ..استمتع وسافر قدر ما تقدر .. وشوف الدنيا...وعلم
الاولاد وابنيهم وثقفهم واستثمر معظم وقتك معاهم ..
*يعني باختصار* :
●ابنو ابنائكم ... لا تبنو لهم ... وما تخلي حلمك زي الأحلام
التقليدية السودانية، وهي اهداف وثوابت الشعب السوداني،
(البيت ، و العربية، الاردن للعلاج ، والدفن احمد شرفي )..
و الورثةجاهزين للنهش والتور هن وقع تكتر سكاكينو.
● عزيزي المهاجر..استمتع، وتصدق* قدر ما تقدر،
وحلحل مشاكل الناس. قد تكون هذه اخر ايامك
في الدنيا...
●اعزائي المغتربين عيشوا دنيتكم العمر
مرة واحدة بطلوا اللهغدفة وشلهتة وجلد الذات،
و بطلوا التفكير في بكرة كتير...و استلقي أرخي
جسمك عسان الإنسولين مطرح ما يسري يمري.