♧ ناس عايشة و ناس دايشة £

《 صباع المعجون في فتيل》
●عندنا بينتهي صباع المعجون الوااااحد دا، في عز
نخبه الأول عادةً خلال اسبوعين تلاتةبالكتير عند الناس
البحكوها شديد ثم يصمد ل4 شهور و عشرة أخري!!

● بعد انقضاء العدة ح نمر بمراحل التِّجِضم و اللِوْلَيو ثم العِصَّير
لامن يجيب الزيت ظاطو.، و من ثم الكرفيس و الشفط بالهوفر، حتين
بعداك يجي الكرش و اللطيش والفجيخ و الظِّميط فالشِّريط و النخر
بإدخال فرشة الاسنان في كناكينه و نخشو بالأعواد والماني عارف
شنو داك؛ إلي أن نصل مرحلة القطّيع و المدغ ساي راسو عديييل
ثم التلاشي غير مأسوفٍعلى شبابه لأنو فعلن (غلتان المرحوم) .

● و صباع المعجون الفارغ ( إن وُجد) فيعتبر من النفاياتالنادرة
جدن التي لا يمكن أن يُعمل ليها (Recycling) أي: نظام إعادة
تدوير وكدة! و قلما نجده مرمياً في كوشة و هو (سالمٌ)!!

●و العجيبة أنو طيلة هذه الأربعة أشهرٍ و عشرة، و هي
مظبوطة على(عدة حبس الأرملة) موش عارف ليه؟علا يمكن
لرمزية إكرام الميت؛ رغم إنو سمعنا قالو: إكرام الميت دفنو؛ موش
يبهدلوه جنسى كدا زي سواة جزاء الباشنهمس/ سنمارعلى يد الملك
النعمان بن اامنذر رماه ليلقى حتفه من سطوح قصر الخورنق الذي
صممم عمارته و بناه له بنفسه. ياخي لبه كدا" خيرن تفعلشرن تلقى"

● الشاهدأنو، و رغم تيقنك تمامن بنا لا يظع مجالاً لمحاواات اللَّت
و(العجن) بأن المعجون قد انتهي بفعل عوامل التعرية؛الاي تعرض ليها
على يديك أخخخ منك إتا يا سفاح يا وحش يا ماسر!! علا أنو النتيجة
النهائية انك في نهبة النفق المظام بتتسوك منو يعني بتسوك منو سيك
سيك معلق فيك، و باتباع أي من السبل و الحيَل المتخلفة المبتكرة
المذكورة، حسب وصفات الخلطة السحرية حسبىالعنوان اعلاه.

● أما مرحلة الغسيل فهي مرحلة متأخرة شديد و حديثة جدن لم تخطر
من ذي قبل على قلب بشر و لا أي ذي كبد رطب؛ و لم أكن شخصياً علي أية
درايةٍ بها إلا بعدما قابلت صاحبنا (كوتش) بالامس وجبنا سيرة المرحوم. قاللي:
إتا عارف يا دفعة انا اخر مرة دي لمن قمتا اتسوك الصباح وشفتا حالة صباع
المعجون بصراحة تحنن فعلن حنيت عليو لانو ما فيو أي حاجة تدل علي انو
كان هناك أثرٌ بعد عينٍ رضا كليلةٍ لوجود أيتها دعكة معجون .

● المهم قمت مسكتو بي يدي العِسرا نفختو ليك نفخ خروف العيد بالكُنُش ،
وكبيت فيه موية و مسكت الفرشاة بيدي اليمنا يلا خجيت الموية ديك شوية
و كتحتها ليك في خشمي عامل زي الود بشرب لي في سفن أب نظام حاجة
باردة و كدي ، و بلا لحقتها ليك سريع بالفرشاة و بلا هاك يا برط نضيف!!

● قت ليو، بعد ان كدت أشرق من الضحكعلا بس " أنا ماشرقتا.. (أنا جيت أعاين"
في محن و بلاوي آخر زمان : قت ليو تعرف يابو الكواتش إتا دايناصور شبه منقرض
السلالة و شكلك جايبنا ناطي من غباعب العصر الجيري؛ فا شنو، مفروض يودوك يتربسوك
جوة مع الخرافيات المحنطة في متحف الشمع الأحمر في لندن؛ و ما تدبرس بتلقى شلتك
قدامةطى المخاربين هناك ناس الغول و العنقاء و الخل الوفي. و لا قول ليك حاجة يابو
الكواتش ، ياخي تيمح لي أقولك : تبن لك و ثكتك أمك و أخواتك من الرضاعة! يعني لو
ما كان حنيت عليو كان أكلتو موش بس قوللي. بالله عليكم دي أمة يشفعو ليها؟!!

كسرة:
● صباع المعجون تجاوز سعرو حاجز ال( مليون م/ج أي:( ميل / جنيه)
وما زال (العِصَّير) مستمراً و كمان ما بتصدقو صباع الجن زاتو قايلني شمتان
فوقو فرفع رويسو صرلي إصيبعاو المكنكشات الخمسة و قاللي شنو: " اسنع هوي،
كدي خلوني أنا ترا البقت فينب بقت خلاس. عاا اصبرو أنتو اصبرو إنتو زاتكن كدي
أرجو الجاييكم بس؛ و هو إنتو لسة شفتو جنس "عَّصَّير" أنا اتخصباتا منو و قت
ليو " يا كافي البلا و ياوحايد المحن . والله تراهو يا ما تحت السواهي دواهي"