♧ تراثيات و كنوز من سحارة حبوبة عجوز π

(37)
《بوبار حبوبات حناكيش من الألفية الخامسة》

● سامحونا يا جماعة الخير و الله لو لا خشية الملل و ضيق
ذات البين مع قرب الاربحة و عقاب الشهر لأوساعناكم عسفاً
ذهنياً بالناصية؛ ربقي و شمارات عن حبوباتنا في الأزمنة الغابرة
و لكن قلنا لا بأس بمرور كرام سريع (خم رماد) قبل أن نشد رحالنا.

● فتعالو هذه المرة نخترق جدار الزمن باتجاه المستقبل .
لنعيش يوماً من حياة حنكوشات الأزمنة السحيقة القادمة
بعد سنين ضوئية إلى أن يرث الأاله الأرض و من عليها .

● كحبوبات الألفية الخامسة مثلاً و الألفيات التي سوف
تليها، ثم التي تليها، حبوبات آخر زمن ، كلام عجيب ! في
ذلك الزمان حتماً سوف يتغير كل شيء. سوف تبلغ حبوباتنا
درجة عالية من التشرب بمعطيات تقنرتت العصور الذكية

● فهيا ندخل في عالم حبوبات الألفية بعد الجاية.
حيث قالت حبوبة (نانسي) مخاطبة خالتو/ "شاهيناز"
التي كانت منهمكة في فرك البامية المحورة وراثياً!
- و الله يا شاهيناز ياختي أنا ماني عارفاك زاتو بتفركي
كيف بمفراكة ( الليزر ) التقيلة دي. الناس ياخية بقو
يعوسو و يفركو بالمفراكة الكهرومغناطيسية .
فقام ردت عليها حبوبة شاهيناز و هي تطفئ البوتجاز الذي
يعمل بنظرية أوتار العصب السابع فائق التوهج:نسوي شنو عاد
يا بت أمي؛ نحنا لسة ما دخلنا في عصر الصرخة العلمية عاا اسكتي
ساي ما وريتك أمس حاجة هيام بت هيثم ود لؤي عملت شنو؟! ..
نططت حاجة شاهيناز عيونها تهيؤاً لاستقبال الشمار وقالت:

- مالادي كمان أنا عارفاها زولة عندها نوبات (ضلالات عدمية)
تلقاها سوت ليها عملة كبيرة!! أجابتها حبوبة نانسي بكل أريخيى:
- أمس مشيت ليها البيت كنت دايرة لي (ثالث كرومات السايكوبالتيك)
عشان ألون الخبيز ..هييي نان ما لقيتا ليكي ماسكة (اللاب توب) بتاعا
و فاتحة غرفة (شات) مغلقة مع واحد عجوز من (هضبة التبت) .. آخر
رومانسيات. قبضتهم يضاحكو سوا يقولو قرر تصوري يا دي المرة الكهنة
الشمطاء المتصابية الما تختشي على دمها دي. ثم إمعاناً منهن في عشرة
( النميمة الإلكترونية) المسترسلة دي ، قالت حاجة شاهيناز لي نانسي
أنا زاتي ااجلكبنة دي بقيت مكجناها؛ مما سوت لينا القهوة في الجبنة
الصانعنها من (معدن التيتانوم ) ،يعني المتخلفة أصلاةما سمعت بي
جبنة كروموسومات ضكر اللوبيا بالألياف الضوئية؟ و لا شنو يعني؟!

● أضافت حاجة نانسي في استهجان بعد أن صعرت خدها الأيسر:
و الله صحي (الماوس و الكيلورد ما بزيلن بلم) .. با خيتيى العالم
ماش متطور و ديل لسة في التخلف الجيني، لكن إنتي صحيى أمس مالك
ما مشيتي معانا لي الاحتفال بالذكرى السنوية لـ (جولدن غلاشو)
عالم الفيزياء المشهور؟أجابتها حاجة شاهيناز: أمس بعيد عنك مشيت
غشيت طبيب أسرتنا أفحص (DNA) بتاعي .. أصلو عندي زي ما تقولي
طفيرة (جينية) كدا باقي شعيتة و مغلباني بلحيلقلت أقلعا أرتاح منها
مرة واحدة .. و بالمرة غشيت الصائغ بتاعي غيرت غوايشي بي معدن
نفيس جديد اسمو (الزرانكلينيوم) جابوه من قالو من ( جبل عامر)
دا قالو واقع في كوكب تاني ماني متذكراهو لكن بدور حول نجم
اسمو (لالاند) مننا ما بعيد فركة قدم زي تمانية سنين ضوئية بس!

● هزت حبوبة نانسي رأسها و كتافبتا و قالت: و الله بقيتي خطيرة
عديييل كدا .. غوايش البتاع القلتي عليهو ده أنا زاتي ما سمعت بيها
يلا كدي وريني واحدة! قالت لها حبوبة نانسي: ديل يابت أمي للمناسبات
بس ما بطلعو بيهن ساي ثم رفعت حاجبها الأيمن بنوع من الغنج و دهاء
مصطنع أصلو لمان موبالغة ثم أضافت: وبعدين إنت الظاهر عليكي برضك
ما سمعتي بي شنطة اليد الجديدة العاملنها من (رقائق السيلكون المخصب)؟

●تنشقت حاجة شاهيناز الصعداء نفساً عميقاً و هي تجهز عبارات مكافئة
لترد بيها هذه الهجمة الشرسة لترد لها البوبار بمثله بوبارين ثم قالت:حاجاتك
القلتيها دي أنا صاح ما نقشتها .. لكن إنتي ظنيتك ما سمعتي بي الكفتيرات
الجديدة البتعمل بي (ألترا ساوند) و (موجات ألفا و الفور جي )و لا كمان
بـ (الكمشة الاستقطابية) .. و دي كمشة بتغرف الملاح براها وبتكبو في
الصحن ..و عندك كمان (الحلة الفوتونية) و دي عاد ما شفتي بتنجض
ليك الملاح براها في جزء من الثاني بـ (الطاقة القمرية.....) الحارقة.

● في هذه الأثناء دخل عليهن (حاج رامي) عمك جلكين كدا غلباوي
متلقي حجج، زوج حبوبة نانسي و هو يناهز في الثمانمائة و دقداقة
من عمره (قضاها في البَّر و التقوِّي).. و توقف مشدوهاً و البابى متاما
و ركب مجسات السونار ليتنصت على هذا الفاصلةمنة ( البوباريشن )
المعتق . سمع حاجة شاهيناز تستطرد في حديثها لزوجته حبوبة نانسي
و هي تقول: و بعدين أنا ولدي المغترب في (كوكب نبتون) جاب ليهو
(شويفع آلي ) صغيروني يساعد مرتوفي تقطيع السلطة وغسيل العـدة.
وفي هذه اللحظة دخل حاج رامي و قال: قومن يا نسوان سون لينا الغدا
وخلن (الفشخرة) الفاضية دي .. وأضاف في سره بغضب وان شاء الله
تقوم بيكن قنبلة ( بوزوترونية ) . تريحنا من نقتكن الكتيرة دي.

● غايتو ،تعيش كتير تشوف كتير إن شاء الله عمرا طويل
يحضرنا زمان ناس حبوبة نانسي وشاهيناز و جدو رامي و
عمو هيثم وحاجة تغريد وعماتو ناس غريتا و سندريلا.
دمتم سالمين، و إلى لقاءٍ قريب بالألفية السابعة.