....الرجرجة....

Quote: غايتو كاتب المقال ده باااالغ بوليغ عدييييل كدة #الصادق_المهدي_اكبر_خازوق_في_السودان الصادق المهدي الما بنقدر، أقدم ثابت وخازوق في تاريخ السودان! * الصادق العجيب.. الغلب الدوا والطبيب!😂 * عاصر الإنجليز، وواكب حريق المك، وزامل كتشنر وسلاطين، والمستر كلارك واللورد كرومر، وعايش لحظات رفع العلم وثورة أكتوبر واستشهاد القرشي والديمقراطيات الثلاث!😂 * الصادق العنيد، قاتل مع قوة دفاع السودان، وتطوع مع سلاح الهجانة، وحضر الأزهري وعبود والنميري والصادق المهدى نفسه وزروق.. وما راضي يروق! *😂 حضر استفتاء الوحدة أو الانفصال، وصوّت للوحدة.. مع الجنوب! * حتى الانقلابات ما فاتها، خالد الكد وهاشم العطا وحسن حسين ومحمد نور سعد! *😂 وفي زمن الإنقاذ.. رفض أي إنقاذ! * الصادق المهدي أقدم من الكسرة، وقاعد من زمن (الزمام أب رشمة)!😂 * حضر زمن الكركار، ودق الشلوفة، والرحط.. وشهد زمن البوتكس والسيلكون والتاتو! 😂* الصادق المهدي متحكر من زمن البرش بي قرش.. والدقة بلاش! * غنى مع زنقار.. وكمل حقيبة الفن مع كرومة وسرور وعوض شمبات.. والصادق ما فات! *😂 عاصر زمن أم بلينة السنوسي وعشة الفلاتية ومهلة العبادية، وغنى مع ريماز ونانسي وشموس! *😂 حضر العبادي وود الرضي وود البنا وود القرشي والسر قدور، وغنى في (أغاني وأغاني) مع فرفور! * كرومة لعب وفتر.. وسرور غنى وما قصر.. والصادق لسه محكّر! *😂 حضر زمن الأنادي والدلوكة والرايات.. وعاصر زمن الشريعة والكشات! * عايش من زمن الناس بتضبط ساعاتها بالقطر.. وتركب المفتخر! * حضر زمن اللحمة بالوقّة، والعيش بالملوة، وجوز الحمام 3 فردات! * 😂الصادق العنيد.. قدل في الطريق الشاقي الترام، وباع واشترى بالمليم والفريني والشلن والريال والطرادة، وحضر زمن اليورو والدينار والدولار الحار! * اتعالج بحبوب السلفة في الشفخانة، وحكمة الله لي هسة قاعد معانا!😂 * حلق الكاري والخنفس، وشق شعرو مع إبراهيم عوض، وحضر المارينز والراستا، وأكل المديدة والباسطة! * كتب عنه كوركين أسكندريان وعمر علي حسن وأبو آمنة حامد، وحضر زمن شمائل النور وسهير عبدالرحيم ! 😂* الصادق حضر ولادة ابراهيم شمس الدين، وكان ما أخاف الكضب أقول قاعد معانا لي يوم الدين! * 😂في مصر.. الصادق عاصر الخديوي توفيق والملك فؤاد والملك فاروق ومحمد نجيب وعبد الناصر والسادات ومبارك وطنطاوي ومرسي وعدلي منصور.. وفي تتويج السيسي كان حضور!! * 😂في إفريقيا حضر زمن هيلاسيلاسي وتمبلباي وحسين هبري وجكوني عويدي وعيدي أمين وموسفيني وإدريس ديبي.. ولسه (يدبي)! *😂 عاش مع الملك الحسن وشهد خلافة ابنه في المغرب، وحضر زمن الملك حسين وابنه الملك عبد الله، وعاصر عهود الملك عبد العزيز، والملك سعود، والملك فيصل، والملك خالد، والملك عبد الله، والملك سلمان.. وقاعد معانا للآن! *😂 في السودان عاصر زمن الناس بتسمي خشم الموس، والكجم وتور القوز واللدر والدود وعشا البايتات! * وحضر زمن مهند وهيثم ورامي والراستات!! * 😂الصادق شاف سعدية الداية، وتخرج في كلية غردون التذكارية.. وبعد الاستقلال درس في الأهلية والنيلين والأحفاد.. وحضر زمن مأمون حميدة والمشرق والرباط! * الصادق الخطير حضر زمن فاطنية وعشوشة والسُرة وأم ضيفان، وعاصر زمن نانسي وسوسو وناريمان! * عاصر بوكاسا.. ولعب (الرمة وحراسها)! *😂 الصادق عايش من زمن الدوم بالطبق، وقراصة النبق! * أكل البيتزا واللازانيا والهوت دوغ والكرانشي بيرغر! * اتطبب بالجردقة والمحريب والقرض والحرجل، ومشى لي بت بتي الحجل بالرجل! * اتعالج بالبنسلين والتتراسيكيلين والإمبسلين، وحضر زمن العلاج بالليزر! *😂 صادق الجن.. حضر الضلام والدمبعلو والبعاتي وحجى الحبوبات! * حضر زمن الحمام الزاجل والجواب والتلغراف، وقعد لي زمن زمن الموبايل والنت واللاب توب والياهوو والهوت ميل والفيس بوك والواتساب! *😂 الصادق حضر زمن الخوسة والسيف والسفروق! * وحضر زمن الليزر والقنابل العنقودية والأسلحة النووية! * عاصر الحربين العالميتين، وحضر تشييد وسقوط حائط برلين، وشارك في بناء سور الصين! *😂 الصادق قاعد من زمن كتلة عدم الانحياز والاتحاد السوفيتي وحلف وارسو والحرب الباردة! * الصادق الصداح.. غنى مع كابلي لناصر وجومو وسوكارنو ونهرو وتيتو! * وشارك في حرب فيتنام، وتابع أزمة خليج الخنازير، وشهد مقتل كيندي، ونضال جيفارا، وثورة كاسترو، وعاصر ثورة ماو في الصين! * شهد زمن الكلبة لايكا، وتابع صعود الأمريكان للقمر، ووثق انفجار تشيرنوبل وهيروشيما وناجازاكي! * عاصر زمن الهمباتة، وغنى مع خلف الله حمد (الكنداكة سيدي سيد الأراكة)! * 😂الصادق ركب مع طه الضرير وود ضحوية في جمل واحد، وحضر زمن (بكرة الهمر جاية)! * قاعد من زمن القراية أم لوح، وما بعيد يكون ركب سفينة نوح! *😂 الصادق نده سيدي الحسن أب قبة لبنية، وزار الشيخ حسن ود حسونة طباب المجنونة، وعاش معانا عهود ريماز وندى القلعة وستونة! *😂 هز مع الدلوكة والشتم، ورقص التوتيستي، ولبس الشارلستون، والساعة الرومر، والنضارة البيرسول! * حضر زمن توب الزراق الجابوهو النقادة، والقنجة، وأب قجيجة، ورسالة لندن، وجكسا في خط ستة، وتحرمني منك، وعاش لي زمن الكارينا والبودي والسيستم! *😂 90 سنة.. والصادق الثقيل ما راضي يستقيل! * الصادق الدولي أعرق من الطابية المقابلة النيل، وأقدم من بوابة عبد القيوم، وأشهر من دهليز صالح جبريل، وأقدم من سبيل خلف الله! *😂 جلدو أتخن من سور سجن أم درمان! * حضر زمن السحارة والدواليب.. وعاصر الديب فريزر والمشلعيب! * الصادق قاعد من زمن دار الضلمة، وقهوة جورج مشرقي، وسان جيمس، والسينما المتجولة والعيادة المحولة! * دخل سينما برمبل وكلوزيوم والوطنية! * يا زوووول، الصادق حضر افتتاح (عفراء مول)! *😂 الصادق مشى في سوق أم دفسو، وفرش في سوق أم سويقا، وباع في سوق خمسة دقايق، واشترى من (مليون صنف)! * وعمرو طال لغاية ما شاف المول والأسواق الحرة والتجارة الإلكترونية! *😂 الصادق حضر زمن صفرجت وسكج مكج والسيجة وشليل وينو! * ولعب بلاي ستيشن وأتاري، * عاصر زمن الهيلمان والهينو والكندة والهنتر وكومر الكشة.. وركب الأمجاد والركشة!! *😂 الصادق الخازوق الدولي الخطير.. ركب الترماي واتحكر في باصات أبو رجيلة، وحضر زمن بيع التمر بالكيلة! * الصادق قاعد من زمن (الشّدة) و(تموت تخلي)، والسودان ما راضي يخلي! *😂 خازوق معمر، لعب مع منزول وممي وقاقا والدحيش وجكسا وباكمبا، * الصادق لعب ورا وقدام.. ! * المريخ فاز بكأس مانديلا.. والصادق الخازوق العالمي ما اتدلى! * الصادق شاف مانديلا ودبي وسيكافا، وقال النجمة قيافة!! * الصادق شهد تهجير الفلاشا، وقعد من التركية لي نيفاشا! * شهد مجاعة سنة ستة، وحضر زمن بيع الباسطة بالحتة! * الصادق حضر حربي سوريا واليمن، وشارك في (عاصفة الحزم) وحضر مجزرة رابعة وسقوط الرافعة! *الصادق عاصر بابكر ود الجبل وحسبو نسوان وما راضي يفك السودان! * 😂 آخر خبر: مش من حقو يقول: خاااازوق وكج.. وأفتخر؟ منقول ‏‫Adil amin

https://top4top.io/
مش احسن بعد ده يا سيد الصادق المهدي تمشي الجزيرة ابا قبل يوم 24 مارس 2020 تحتفل بي السيد عبدالرحمن المهدي وحزب الامة والمهدية والانصارية والراتب والرؤية الجديدة للسودان الجديد عشان ترجع قواعد حزب الامة في كل السودان الي المسار الوطني النظيف الارساه الامام المهدي 1885 والسيد عبدالرحمن المهدي 1956
وتفكنا من ق ح ت ومصر والعرب ديل
والمتاهة بتاعة نداء السودان وق ح ت الما جايبة حقها ؟؟؟