|
Re: الشاعر اسامة الخواض في قندهار يستمع لي كي (Re: خضر الطيب)
|
Quote: طول دي الغربة في امريكا ما حصل اتقابلنا انا واسامة |
قالها الشاعر قيس ابن الملوح ( وَقَد يَجمَعُ اللَهُ الشَتيتَينِ بَعدَما يَظُنّانِ كُلَّ الظَنِّ أَن لا تَلاقِيا ) سعيد انا بملاقاتكم دي كت آوت : و بعدين يا ودموسى انت قاعد تشرب في الخواض الموية دي لمتين خروفكم دا ما عاوز ينجض و لا الحاصل شنو ؟ ههههههه
| |
|
|
|
|
|
|
Re: الشاعر اسامة الخواض في قندهار يستمع لي كي (Re: خضر الطيب)
|
في الصورة دي شاعرنا سارح في عوالم بعيدة . لكن عطرابة الحمري و دخان الصندل المحروق في مباخر قندهار جرجرو نواحي النيل .. في اللحظة دي الكلام البتسمعو البجيك من جاي وجاي كلو حديث عن الخروف السمين والاعجف . وضحكنا لمان بت الابيض قالت : من صوت الخروف بتحدد كان سمين كان اعجف . ومن امسك لحمتو بعرف كان رباع كان جدعة كان سديس . وفي الضلمة بفرز الخروف الحمري من الكباشي . الزولة حيرتليك اسامة لامن بقي يتمتم .
| |
|
|
|
|
|
|
Re: الشاعر اسامة الخواض في قندهار يستمع لي كي (Re: Osman Musa)
|
Quote: وينك يا استاذ اسامة |
اهلا عثمان
لقد توافق رفع البوست مع وصول طالبان القندهارية الى الحكم
هههههههه
مازال في معيتي الكتابة عن "لقاء خريجي مدرسة كبوشية المتوسطة \الثانوية العامة"،
الذي دبّره صديقي الحميم : تاج الأسرار ، وللقبه قصة،
والاماني التي لم تتحقق في القاء الشعر ،
ولقاء الاصدقاء .
سأعود وبالصور كمان وكمان
ههه
| |
|
|
|
|
|
|
Re: الشاعر اسامة الخواض في قندهار يستمع لي كي (Re: أبوذر بابكر)
|
يا اب ذر ياخ والله خاتنك لي رحلة بطانة اب سن . في اليومين الجايات ماشين نقيف في كولمبيا ومكان نشلوا الجثث من نيل الجنة . وماشين نترحم علي ابطال المتاريس . البلد يا اب ذر مليانة مقابر جميلة ولابد من الترحم عليهم واكيد قبة شيخك الطيب صالح ما داير ازيدك عارفك بتدمع ياخ .
| |
|
|
|
|
|
|
Re: الشاعر اسامة الخواض في قندهار يستمع لي كي (Re: Osman Musa)
|
الحاجة المحيراني أن البوست كاتبه عثمان موسى وهو المشى قندهار مع اسامة، ،لكن الصور نزلها خضر ،،كيف يعني !!،وهو ما كان معاهم ... والحاجة الثانية :جوعتونا...بالشية دي، ،،مع اننا قربت ابقى نباتية ،،،ناكل خضروات فقط بعد بوست النصري .... وكل سنة وانتو طيبين..
| |
|
|
|
|
|
|
Re: الشاعر اسامة الخواض في قندهار يستمع لي كي (Re: Osman Musa)
|
والحاجة المضحكة لمن بت عطبرة قرت كلمة ام عطرابة،،،قرأتها عطبراية ،،وطبعا هي عندها حساسية عن أي شئ بتمس عطبرة...وفجأة قالت ...سيرة عطبرة دي جايبنها لييه شنو ... وطبعا انا الكنت بقرأ ليها البوست...وقلت ليها ومنو الجاب سيرة عطبراية هنا ..انا قلت عطرابة...وسالت سؤال ما قدرت اجاوب عليه ..سالت عطرابة يعني شنو!؟ اها ردوا على السؤال ده ...
| |
|
|
|
|
|
|
Re: الشاعر اسامة الخواض في قندهار يستمع لي كي (Re: أبوبكر عباس)
|
شكرا يا عثمان وخضر، بس لاحظت يا عثمان إنك جايي من مكان البرد الصاح نيويورك ولابس لبس شتاء في السودان، والمفارقة أسامة جايي من مكان الحر كالفورنيا وما لابس لبس برد في برد السودان دا. ياريت يا عثمان كان تعلنوها علشان بورداب الخرطوم يلاقوكم
| |
|
|
|
|
|
|
Re: الشاعر اسامة الخواض في قندهار يستمع لي كي (Re: ترهاقا)
|
امنتوبالله يعني الجزارة من يوم ما الإنجليز والفرنسيين خلو استعمار الخلق ومسكونا العربان والأمريكان أدي الحالة
زمان كان تجئ يعزموك القراندهوتيل وعصير ليمون أو برتقال . وشاي ب كيكة إنجليزي . وقدامك النيل وزول تريدو وبريدك
الورد ده ما بعرفوا يا ابكرونا 😂😂😂😂😂 غايتو
| |
|
|
|
|
|
|
Re: الشاعر اسامة الخواض في قندهار يستمع لي كي (Re: اخلاص عبدالرحمن المشرف)
|
يا اخلاص انتي قاعدة وين يازولة ؟ ما سمعتي بي الطوفان ؟ يازولة في ال 30 سنة الفاتت البلد طاحت . القراند هوتيل زينة نزلات الدنيا اتشالت من جدارو جدارية الملكة فكتوريا . والمطعم الفكتوري ماسكو واحد باكستاني بي الواسطة . القراند مصيف السمحات من بنات الانجليز . و الاتكتبت فيه عشرات الروايات الانجليزية اصبح زي سوق ام دفسو . والحرامية من سماسرة قطع الاراضي معسكرين فيه . الناس بتهرب الي القندهار من شدة الاحباط . تحياتي وربنا يعوضك في ليمون القراند .
| |
|
|
|
|
|
|
Re: الشاعر اسامة الخواض في قندهار يستمع لي كي (Re: Osman Musa)
|
الأخ عثمان تحياتي لك و للأخ أسامة الخواض
احتفاء جميل بالرجل الأديب القامة
ليتنا كنا حضور ...قندهار و إن طال المسير...
هل تصدق للآن لم أشوف قندهار.....و شايفها بعيدة في آخر الدنيا..
أتمنى إقامة سعيدة للأخ الخواض..
إنت يا عثمان إجازة في السودان؟
تحياتي للجميع
| |
|
|
|
|
|
|
Re: الشاعر اسامة الخواض في قندهار يستمع لي كي (Re: خضر الطيب)
|
طبعا يا اخ خضر صاحبة المطعم تشرف فقط وبي هناك الترتيبات شغالة . الجزار عارف دي لحمة منو ودي لحمة منو . والطربيزة الععيدة ديك عشان تحضر الشطوط والسلطة والروب . اللحوم السودانية يا خضر من احسن اللحوم في العالم . و القصة بقت سياحة . واتعرفت في بعض من البلدان العربية
| |
|
|
|
|
|
|
Re: الشاعر اسامة الخواض في قندهار يستمع لي كي (Re: Osman Musa)
|
دي جلسة ما منظور مثيلا جلسة ما منظور مثيلا .... حمدا لله على سلامة وصولكم الاثنين للسودان ويا ليتنا كنا هناك حتى نحتفي بكم فانتما قمران ساطعان ... كدي يا عثمان اختف كراعك وزور ابوك الشيخ ادريس راجل العيلفون البسبق التيلفون باقي انا عارفك زول مسيد وكده وسلم لي علي كل الاهل والاحباب ... إجازة سعيدة وربنا يجمعنا جميعا في ساعة خير ان شاء الله ... منور استاذنا واديبنا أسامة الخواض .. غايتو يا عثمان اتلومت لوم الخلا والشدر كان تدينا خبر كان هسة ضربنا معاكم الشية دي ورجعنا الرياض الصباح .. التحية أيضا موصولة للأستاذ خضر في الإخراج ...
تحياتي : ياسر العيلفون ......
| |
|
|
|
|
|
|
Re: الشاعر اسامة الخواض في قندهار يستمع لي كي (Re: osama elkhawad)
|
هههههها حباب اخونا الشاعر اسامة الخواض الحمد لله علي سلامة الظهور في المنبر بعد تدشين الشريحة السودانية . قالوا واقف في صف zain ساعتين ومارق علي صف الرغيف . الف مبروك الشريحة الجديدة وعقبالك الجلاكسي اب زمبارة . وقصة الجلاكسي اب زمبارة دي قصة طويلة . رحم الله الحاجة سكينة العودلابية . اول حاجة جابت الجلاكسي اب زمبارة .
| |
|
|
|
|
|
|
Re: الشاعر اسامة الخواض في قندهار يستمع لي كي (Re: Osman Musa)
|
التحية خالصة لشعرائنا زملاء المنبر الشاعر اسامة الخواض ( المحتفى به ) و الشاعر عثمان عبدالرحيم موسي ( صاحب البوست )
للشاعر الخواض ديوان لاهوت الوردة
https://www.0zz0.com
و للشاعر عثمان ود موسى ديوان فجر الفرح والذي تمت طباعته في العام 1981 بالقاهرة
https://www.0zz0.com
| |
|
|
|
|
|
|
Re: الشاعر اسامة الخواض في قندهار يستمع لي كي (Re: خضر الطيب)
|
يا خواض، داير أوصيك والوصيّة في الذمة، لو استضافتك سهير الرشيد في النيل الأزرق، عليك الله، بأي طريقة جيب اسمي في الكلام مثلاً لو سألوك عن الغربة؟ ممكن تلف الكلام وتقول: الونسات الأدبية بالمنتديات كان بتنقلنا للوطن في ساعات وسنها، ودي فرصة أحيي الصديق الأديب المستنير أبوبكر عباس الذي طالما روّح علينا ضنك الغربة، له التحيّة هو أسرته بنورث كارولاينا، وكدا
| |
|
|
|
|
|
|
Re: الشاعر اسامة الخواض في قندهار يستمع لي كي (Re: أبوبكر عباس)
|
موضوع الشية دا عذبتني فيهو عذاب يا ودموسى ياخ لما طلعت شيتكم دي انا جعان لي يومين دي شية خروف حمري و لا شية ديناصور البتنجض في يومين دي؟ آمنت بالله يا جميل ما بصح ليك تعمل كده :) هاك ياخ .. تجيب صور الشية و لا ناكل باسطتكم ؟
https://www.0zz0.com
| |
|
|
|
|
|
|
Re: الشاعر اسامة الخواض في قندهار يستمع لي كي (Re: خضر الطيب)
|
Quote: البلد يا اب ذر مليانة مقابر جميلة |
رميت الجملة دي ببسااااطة... ومشيت يا عُسمان. وأنا خانقاني العبرة لحدّ نهاية البوست. أجمل عبارة أسمعها في العام الجديد... وأكثرها إيلاماً. تمنيت أن تجد مكانها في عمل أدبي أو فني. ............. وهو بوست غريبُ المتن.. قريبُه. مختلفٌ ألوانه. متعدد الأبعاد. أحاديّ المزاج. صحّي. مضمّخ بدخان الشواءات ومشبّع بالحاجات السودانية.. زي ما خلقَهَا الله. شكراً لاستضافتنا في قندهار.. شكراً للأحباب الذين تقاطروا من كل فج.. وأعطوا البوست رونقه. ............. ومرحباً بالشاعر الجميل أسامة الخواض.
| |
|
|
|
|
|
|
Re: الشاعر اسامة الخواض في قندهار يستمع لي كي (Re: محجوب البيلي)
|
تعرف يا عثمان إفترقنا والصديق أسامه ألخواض في عام ١٩٨٧ تقريباً وكان ذلك في حفلة وداعه بمنزل صديقنا بحيري وكان من بين الحضور محمد خلف و منعم رحمه وبشري الفاضل و عميري ومأمون عجيمي ومريم محمد الطيب وأم الخير كمبال وسلوي صيام وكانت آخر وصاياه أن نكتب له عن تكوين الحكومه الجديده بعد أن أخرج الصادق المهدي ألوزير أبو حريره ! وظللت منتظراً تكوين الحكومه والتي كانت تقوم وتقع حتي وقعت كلها ونثرتنا مروي جميعاً للفضاءات بذور إغتراب ولم تكتمل الرسالة حتي الآن !
| |
|
|
|
|
|
|
Re: الشاعر اسامة الخواض في قندهار يستمع لي كي (Re: abdalla elshaikh)
|
مش كان يا خضر تفتح ديوان لاهوت الوردة ، وديوان فجر الفرح وتنثر علينا هنا شيئا من ازهار الديوانين .... فنحن لا نمل من قراءة الشعر ....فالشعر والموسيقى غذاء للروح ورفع للمعنويات عندما تكاد ان تنهار بسبب مصائب وكوارث وهموم الدنيا ،،، ... ابوبكر عباس ، المستنير الله يجازي محنك ، اضحكتنا وجبال الهموم تحيط بنا ....اضحك الله سنك وجعل ايامك كلها بسمات وضحكات ،،
| |
|
|
|
|
|
|
Re: الشاعر اسامة الخواض في قندهار يستمع لي كي (Re: امتثال عبدالله)
|
مرحب الراكزة امتثال
Quote: مش كان يا خضر تفتح ديوان لاهوت الوردة ، وديوان فجر الفرح وتنثر علينا هنا شيئا من ازهار الديوانين .... فنحن لا نمل من قراءة الشعر ....فالشعر والموسيقى غذاء للروح ورفع للمعنويات عندما تكاد ان تنهار بسبب مصائب وكوارث وهموم الدنيا ،،، ... |
طلبك رائع جداَ و اتفق معك و نحن في حضرة الشاعرين انا على يقين بأنهم سيتحدثون عن دواوينهم بطريقة ستشجينا جميعاَ فالمايك معهم
| |
|
|
|
|
|
|
Re: الشاعر اسامة الخواض في قندهار يستمع لي كي (Re: abdalla elshaikh)
|
اخونا الشاعر الجميل عبدالله الشيخ سلامات نعم يازول . مروي نثرتكم بذور وشتول وعروق اغتراب بين اليمن والشام ودينفر كلورادو . الا يا اخوي الحمد لله شتل القنديل ما انتج الا نفس القنديلة مع شوية اختلاف في الاكسنت . اهو الاقدار . والمكتوب . واهو بندافس ونعارك من اجل حياة مسالمة ومتمدنة في عزة . طال عمرك يا عبدالله .
| |
|
|
|
|
|
|
Re: الشاعر اسامة الخواض في قندهار يستمع لي كي (Re: محجوب البيلي)
|
مرحبتين حباب اخونا الفنان الجميل محجوب البيلي ياخ ليك جزيل الشكر علي النظرة الفنانة لناصية قندهار وتكريم مها بت الابيض للشاعر اسامة بي عود صندل عاكل من ساعة دخل لامن ودع . زولة كريمة وحنينة . عرفتها سمعت حديثنا عن الراحلة والدة اسامة . وعن ظروف العمل المنعت اسامة من الحضور للعزاء . عرفتها . بعد ما رفضت تستلم حق الوليمة القدمتها لينا في كرام اهلها الكبابيش . ياخ دي امة عجيبة . امة حايطاها المصاعب من الجهات الاربعة . لاكنها بتتبرع بي البتقدر عليه بلا تردد . هسع زي بت الابيض دي الزول يقول فيها شنو ؟
| |
|
|
|
|
|
|
Re: الشاعر اسامة الخواض في قندهار يستمع لي كي (Re: Osman Musa)
|
ما قام به صديقنا عثمان من احتفاء بالطعام فريد في بابه فثقافتنا حذرة تجاه الاحتفاظ بالأكل وان كانت كثقافات كثيرة تبذل الكثير من الطعام الشهي الغالي الثمن كعلامة على الترحيب والتقدير من أمثلة التقليل من شان الطعام المقولة الشهيرة السمح مو اكال
وتعتبر المبادرة بتناول الطعام من صفات الأتيكيت غير الحميد فالناس يتعازمون على من يفتتح الاكل حين اقترب موعد سفري للسودان سالت ببراءة عن المطاعم الجيدة في ﺍﻟﺨﺮﻃﻮﻡ فاستنكر البعض سوالي
| |
|
|
|
|
|
|
Re: الشاعر اسامة الخواض في قندهار يستمع لي كي (Re: خضر الطيب)
|
يا خضر دي صينية زي الصينية . شايف صاحبك اليمين عامل جهجهات للدكوة . لو ما اخاف الكضب اقول اليد دي يا يد اخونا عمر الخواض يا يد سعد الكباشي . ومع عطسيبة حرارة الشطوط الواحد ما فارز صحن لحمة الحاشي من صحن الحمري . سامع واحد في الديوانية بعد ما جبد نفس طويل كورك لي بت الابيض يازولة دي شطة ولا حقنة سعر ؟ غايتو الحبشة دي بتودرنا يا بي الشطة يا بي سد النهضة هههههها شييييييت
| |
|
|
|
|
|
|
Re: الشاعر اسامة الخواض في قندهار يستمع لي كي (Re: محمد الأمين موسى)
|
اخونا محمد الامين سلامات اخونا خضر يا اخ محمد حكر ليك صينية الشية الما خمج في محكر الديوانية . بوخ الشية لاوي . وبوخ الصندل لاوي . والحاشي في الزريبة القريبة يلاوي . مسكين الحاشي . والرادي يلعلع بي اغنية ماهو عارف قدمو المفارق . قالوا يا اخ محمد الجمال بتفهم كل شي . حتي كلمات الغناء . وقالوا الفرق بين الانسان و الجمال بس النضم . الحاشي عارف خاتنو في الزريبة الانفرادية ليه دموع الحاشي تبكي الحجر . الاغنية انطلقت صدفة . والحاشي مرق من براري اماتو الكباشيات صدفة . واي مهاجر هاجر صدفة . علي كل حال الشية يهديك تلمع . والجرجير الجرجيراية الواحدة قدر اضان الارنب . والليمون ليمون الكاملين قطع اليوم . ياخ السودان ده بلد تصليحو ساهل .
| |
|
|
|
|
|
|
Re: الشاعر اسامة الخواض في قندهار يستمع لي كي (Re: اخلاص عبدالرحمن المشرف)
|
اخلاص كل سنة وانت طيبة ... شكرا للزجل الرفيع ...ويوم بعزمك في قندهار، لكن المواصلات عليكي لاني سمعت انها بعيدة من ام درمان... وبمناسبة الشيف الفرنسي ، يوم قريت في محلة أمريكية أن أعلى مرتب يتقاضاه موظف حكومي في العالم هو طباخ قصر الإليزيه في فرنسا وان مرتبه السنوي أعلى من مرتب الرئيس الأمريكي وهو المقصود بالشيف الفرنسي..
| |
|
|
|
|
|
|
Re: الشاعر اسامة الخواض في قندهار يستمع لي كي (Re: امتثال عبدالله)
|
باشمهندس ود الشيخ كيفنك يا الحبيب تعرف يا ود الشيخ هم صورو كل شئ ذي ما شايف ما عدا الصينية بعد نجضت في يومين الصينية لما جات ما صوروها اي واحد جدع موبايلو و تداعوا عليها كما تتداعى الأكلة على قصعتها :) قلت لي ود موسى بعد ما خلصتو كان ممكن تصوروها عشان نشوف حطام الطائرة دا هههههه برضو ما صوروها غسلو ايدينم و بقو مارقين لكن اتخيلتها كده جبتا ليهم واحده بتشبها من نفس البكان
| |
|
|
|
|
|
|
Re: الشاعر اسامة الخواض في قندهار يستمع لي كي (Re: Osman Musa)
|
اسف للتأخير لوعكة بسيطة ولصعوبة الكتابة في الموبايل لذا كتابتي لاتمثلني تماما
هل ظهرت ثقافة أخذ فضلة الطعام في السودان؟ لا لاننا عندما انتهينا من الاكل في مطعم لذيذ لم يقترح علينا النادل احضار كيس لحمل ما تبقى من طعام
طبعا في قندهار لم ينجح احد اَي لم تتبقى فضلة هههه
اول مرة أتعلم ثقافة أخذ الفضلة كان في بلغاريا ولهذه المعلومة قصة طريفة لا تسمح بها الكتابة الموبايلية
في امريكا توجد ثقافة أخذ اللفت اوفر الطعامي
في الثقافة السودانية من العيب أخذ فضلة طعامك حتى لو دافع فيهو دم قلبك
وهذه ثقافة تجب محاربتها حتى تنتصر ثقافة أخذ الفضلة
| |
|
|
|
|
|
|
Re: الشاعر اسامة الخواض في قندهار يستمع لي كي (Re: النذير حجازي)
|
مرحب حباب اخونا النذير فرشنالك الرملة من نهاية سوق ليبيا ولاحدي ديوانية مها وفتحتلينا . علي كل حال فاتتك الشطة ماركة ( بحر دار ) واحد قال اكل شطة في سوق الناقة سنة 1988 وبعدها سافر كندا وفي سنة 1998 يعني بعد عشرة سنة عمل صورة موجات صوتية . تخيل يا النذير الشطة ظهرت في الصورة . حتي الدكتور الكندي سالو . قالو حصل قبل زمن سفيت ليك يورانيوم ؟
| |
|
|
|
|
|
|
Re: الشاعر اسامة الخواض في قندهار يستمع لي كي (Re: Osman Musa)
|
ازيك يا ابو عفان
الغربة بروفة تافهة جدا طبعا للموت
مع الإعتذار للموت
انا ما عارف عندى قناعة انه الموت ده أو بالأحرى ما بعد الموت بكون شى كويس و مليان مفاجآت
المهم الغربة المره دى بختلف كتير عن الغربة الأولى
حآليا عندى مشروع محدد جدا بحاول انتهى منه وأخلصه بأسرع وقت وارجع السودان
ما بقدر أعيش تانى بره السودان
قريب جدا بإذن واحد احد
| |
|
|
|
|
|
|
Re: الشاعر اسامة الخواض في قندهار يستمع لي كي (Re: Osman Musa)
|
مرحب بالأخوان المشاء وعثمان موسى في وطنهم ووسط أحبائهن ..
اتحسر في هذه اللحظات على غياب بورداب الخرطوم من هذا الاحتفاء .. كانو يعرفون بقدوم الضيف قبل حضوره ويجهزون له الاحتفالات والبرامج .. تشتتو وتفرقو بين العواصم وأخرون شغلتهم المعايش وصعوبتها في ارض النيلين ..
اعذرونا ان ام نكن معكم هناك ..
علمت ان ضيوفا كثر موجودون بالخرطوم هذه الأيام ولكن ,, يا للحسرة !!
| |
|
|
|
|
|
|
Re: الشاعر اسامة الخواض في قندهار يستمع لي كي (Re: ناذر محمد الخليفة)
|
اخونا المك ناذر الخليفة سلامات ياخ كل الاماكن في القندهار تفتقدك . حتي بنت الابيض بتسال عنك في زرايب المرحات . عارفنك زول ملمات وكان ليك صولات في عمودية بورداب الخرطوم . والله اذكر وليمتك ديك في ذلك المطعم الشامخ في العمارات سنة 2009 . اتمنيناك كان ياخ تكون حاضر . سالت يا ناذر صاحبة المضيفة عن سر عدم الذباب في ناحية المضيفة . قالت كل يومين الصباح بدري صلاح الصبح بتطلق بخور شطة ناشفة . وتقفل الديوانية لاحدي الساعة 7 صباح . بعد داك مافي ولا ضبانة بتزازي في الناحية . قالت زمان الضبابين كانت ضبابين مفترسة . العالم تطور هههههها
| |
|
|
|
|
|
|
Re: الشاعر اسامة الخواض في قندهار يستمع لي كي (Re: Osman Musa)
|
أسباب كثيرة منعتنا من حضور مباراة الهلال والنجم الساحلي رغم انني مريخابي.
وقد استغرب اخي نزار الهلالابي من إصراري على حضور المباراة.
لكن في المقابل وفقنا في الحج الى احد مقاصد الثقافة الا وهي مكتبة المصورات وكانت زيارة استكشافية كانت ثمرتها تحديد الكتب التي ينبغي ان اشتريها اعتمادا على الوزن وظفرت بنسخة من رواية لليلى ابو العلا عنوانها متاهة كل صيف.
كما خططنا لحضور ندوة في مركز عبدالكريم ميرغني في يوم الاثنين حول كتاب اصدره المركز الثقافي عن التعليم والمدنية.
يشارك في الندوة الدكتوران حيدر ابراهيم علي واحمد الصادق القادم من السعودية في اجازة.
| |
|
|
|
|
|
|
Re: الشاعر اسامة الخواض في قندهار يستمع لي كي (Re: Osman Musa)
|
قبل بداية الندوة وامام ثلاجة مشروبات البقالة المواجهة تماما لمركز عبدالكريم ميرغني كان هنالك شخص امام الثلاجة ربما يبحث عن مشروب ما . بدا لي مالوفا وبعد قليل من التركيز عرفت انه دكتور عمر القراي ، لم يعرفني حتى عرفته بنفسي ، ثم قلت له ممازحامن يرى صورتك البسيطة هذه لن يصدق كل ذلك الكم الكبير من الجدال المثار حولك!!!
| |
|
|
|
|
|
|
Re: الشاعر اسامة الخواض في قندهار يستمع لي كي (Re: osama elkhawad)
|
الازدحام المروري في العاصمة المثلثة في أوقات الذروة يعيق التواصل ويهدر الوقت، لذلك تحركنا من الرميلة قبل ثلاث ساعات بالضبط اَي في الثالثة والنصف ظهرا.
بعد اكثر من نصف ساعة من الانتظار ، عطف علينا شاب شيوعي كما اتضح لنا لاحقا من حديثه عن التعذيب البشع الذي تعرض له تحت إشراف ضابط امن هارب الى الامارات.
ركبنا انا ونزار شقيقي الدفار مع نغمات عقد الجلاد وتحدثنا عن الثورة وحدثنا الشاب الشيوعي عن حميد ومحجوب شريف ووالدة الشاعر ابي ذر الغفاري،
ثم كلمنا عن حفل احياء ذكرى مصطفى سيد احمد التي سيحضرها احدى أيقونات المرحلة الانتقالية : حمدوك.
وابلغنا كذلك ان بصا سيتحرك يوم الجمعة للمشاركة في الذكرى السنوية لرحيل مصطفى سيد احمد، فاستأذنه نزار في ان يكتب رقم تليفونه اذا قررنا الانضمام الى البص ، فلبى الشاب الشيوعي طلبه بوافر الأريحية والأدب الجم.
نزلنا من الدفار شاكرين حامدين وذهبنا لقراءة تفاصيل ملصق لحفل نهاري قادم، لمن؟؟؟
للمفاجأة السعيدة كان الحفل النهاري لمجموعة عقد الجلاد !!!!
| |
|
|
|
|
|
|
Re: الشاعر اسامة الخواض في قندهار يستمع لي كي (Re: osama elkhawad)
|
حفل عقد الجلاد النهاري سيكون غدا الاربعاء في المكتبة القبطية والتي تذكرنا بخرطوم وليم أندريا وازدهار فرق الجاز الموسيقية في السبعينيات.
سيبدا الحفل في الثالثة ظهرا.
رسم الدخول ٢٠٠ جنيه غير القطع هههه
فقط ٢٠٠ جنيه وسنكون من حضوره باذنه تعالى.
كيف ستكون عقد الجلاد بدون عثمان النو؟؟
نواصل مع بقية رحلتنا ذات المراحل المتعددة الى مركز عبدالكريم ميرغني الثقافي.
| |
|
|
|
|
|
|
Re: الشاعر اسامة الخواض في قندهار يستمع لي كي (Re: osama elkhawad)
|
أتمنى الا يتسبب القتال ببن الدعم السريع والأمن في إلغاء حفل عقد الجلاد النهاري.
كما قلنا ساهم الازدحام المروري في تحجيم علاقات وجه لوجه، لذا ازدهرت العلاقات الهاتفية والواتسابية،
وربما ان الحفلات النهارية هي نتاج ذلك الازدحام المروري،
بل ان ندوة المركز قد اختصر زمنها كما قال مدير الندوة بسبب المواصلات.
| |
|
|
|
|
|
|
Re: الشاعر اسامة الخواض في قندهار يستمع لي كي (Re: Osman Musa)
|
زمن طويل في الغربة كان الواحد محروم من زي دي ملمات . مركز عبدالكريم ميرغني الرحيب ضاق بي حضور المهتمين والمهتمات بالتعليم وبالثقافة . في مناسبة تدشين الكتاب الجديد للدكتور احمد عوض احمد البشير . الكتاب بعنوان (الدولة المدنية السودانية تحدي الوعي ورهان التعليم )
| |
|
|
|
|
|
|
Re: الشاعر اسامة الخواض في قندهار يستمع لي كي (Re: Osman Musa)
|
انتهت المرحلة الاولى لبلوغ م ع م الثقافي عند جامعة النيلين حينما غادرنا الشاب الشيوعي ورمى في سلال ذاكرتنا تداعياته الموجعة: تم اعتقالي ٨ مرات، حين كنت أقوم بتعليق ملصقات على تدعو الشعب الى الاعتصام امام القيادة اصر رجل ستيني على المشاركة في تعليق الملصقات، فحاولت أثناءه عن ذلك بحجج كثيرة لكنه اصر على القيام بواجبه الثوري، وانتهى عملنا ونحن نقترب من الغروب وشارع النيل، وحين نشدنا قسطا من الراحة، التف حولنا رجال امن يبدو انهم قد نما الى علمهم حديث الملصقات، فأرسلوا جسدينا الى عربتهم وقاموا بعصب اعيننا وانطلقت بنا العربة الى جهة مجهولة، بعد فترة سمعت صوت طيارة فهمست لرفيقي اننا في مطار ﺍﻟﺨﺮﻃﻮﻡ.
تم إنزالنا واقتيادنا الى حجرة ثم بدا الضرب، من خبرتي مع الضرب حاولت حماية راسي وكليتي، اما رفيقي الستيني فقد اوجعه الضرب المبرح وصرخ مستغيثا عليكم الرسول، عليكم النبي، عليكم البشير؛ فانفجرت ضاحكا ونسيت المي، فصرخ الستيني مبررا: الرسول مش اسمو البشير برضو؟
في مرة ثانية تم تجريدي من كل ملابسي ماعدا سروالي وبعد ذلك تم اجلاسي على كرسي حديد وربط يدي وتقييد ساقي برجلي الكرسي مع عصب عيني وربط جسمي بجهاز ما يقيس ضغطي بعدتوجيه صدمات كهربية لجمجمتي. جعلتني تلك الصدمات بعد فترة افقد القدرة على تكوين ابسط الجمل، فانا اعرف ما ينبغي قوله لكنني اعجز عن انتاج الكلمات التي تعبر عن ذلك المعنى.
وفي مرة ثالثة حاولت مقاومة رجال امن قدموا لاعتقالي بان وجهت بونية لأحدهم، فأصر بعد اعتقالي بان ينتقم لتلك اللكمة بعد ان قيدوني وعصبوا عينيي وقام بلكمي الى ان كسر انفي وأحدث شجا مازالت ندوبه واضحة، ثم قام بركلي مع اخرين بشكل همجي جعلت احدهم يتدخل صارخا: ثابت ياملازم ، ثابت ياجندي، فتوقف الركل وأزيلت العصابة عن وجهي، لاكتشف ان جارنا هو صاحب الصرخة، وأنه عقيد في جهاز الامن !!!
| |
|
|
|
|
|
|
Re: الشاعر اسامة الخواض في قندهار يستمع لي كي (Re: osama elkhawad)
|
احتفالية تدشين كتاب الدكتور احمد عوض احمد البشير الدولة المدنية السودانية - تحدي الوعي و رهان التعليم بحضور الدكتور احمد الصادق و الدكتور حيدر ابراهيم و الشاعرين زملاء المنبر اسامة الخواض و عثمان موسى و بعض الحضور الكريم بمركز عبد الكريم ميرغني
https://www.0zz0.com
| |
|
|
|
|
|
|
|