Quote: ما وقت عتاب لكن بس عشان تاني ماتتكرر كلام حااااااااار لكن ببكيك وبصلحك ما بفرق بيك وبضحكك انتو قايلين ربنا دا بنسى شي ..... البحصل دا نضافة من رب العباد لانو غضينا الطرف عن حرام كتييييير في حياتنا وكانو ما بعنينا
عربات ليبيا الكنا بنشتريها وبتتقنن عادي من الحكومة وبركبها الشعب اسي عرباتنا في دولة جاره تباع واسمها ( بوكو حلال ) اولادنا الكان بصدرهم الجيش يهجرو المدن والقرى اليمنية وقبلها اهلنا في دارفور وبي سكوتنا اتجرعنا نفس الكاس من جيشنا زاااتو ( بالمكونين) هجرونا وبشتنونا وبقينا يا لاجئين يا نازحين !! الرِبى الواااااااضح وبَيّن ....أغلب تجار العربات وتجار البضايع ببيعو بالفايدة ياخ بنكك مقابل كاش و بي الزيادة .... رصيد ... كهرباء كلو بي الزايد ١٠٠ بي ١٣٠ كمان دين الدهب ودين الدولار البرضو بالفايدة ياخ دورة مالية كاااااملة في السودان خاشيها الحرام ، ربنا سلط عليها مؤجورين حرقو الاسواق ونهبوها وسرقت البنوك والوزارات وغيرها الرشوة الرشوة في اي مكان وزمان دي كمان محقت القروش محق اعوذ بالله... بقت حلالا واي زول خاتيها دخل اضافي كان حكومة ولا شرطة ولا مواطن حتى الان
الكيزان .... الكيزان اااااخ انا من هذا السرطان الاشعلو الحرب واشعلو الفتنة والقبيلة والجهوية وسبب بلاوي البلد دي من ١٩٨٩
المجون والغناء والفنانين ونقيط القروش في الحفلات والايفنتات الكلها عري وعروض ازياء . البلد كلها فنانين وقونات وبتاعين إيفنتات
الغل والكره والحسد .... الحسد دي اهم حاجة اغلب الشعب حاسد وحاقد ممكن تحقد علي اخوك وجارك وود عمك!!! البوبار والتبطر علي النعمة ودعاة كل السودان( ياخ انعل ابو السودان والله يمرقنا منو )... اها مرقكم منو مبسوطين!!! وتجارة المخدرات والايس والدعارة جوة وتصديرها برة كمان ناس ( الريمبو )البقو اكتر من مشاة الجيش الان !!! الاستغلال وتجار الازمات حتى في الحروب وعلي مستوى السودان كلو عاصمتو واقاليمو... غرفة زنك بي مكيف موية وحمام حفرة ويور الماري بالشارع كلو يتفرج فيك بي ٢٠٠٠$ اتقوالله ياخ والكلام دا في حلفا وعطبرة ومدني وبورتسودان ، كانو الناس الجوهم ديل مغتربين وبصرفو بالدولار !!!
ودا قليل من كثير
دي سنة النضافة زي ما بقول صحبي حسام مسمار نضافة مال ونضافة نفوس ونضافة ديون قديمة والمسلسل دا اجلاً ام عاجلاً حينتهي لانو دي حرب عبثية جداً جيش ماسك غرب الكبري وجيش ماسك شرق الكبري جيش يخش ينضف بحري بعد ساعتين يرجع سكناتو يجي الجيش الطردو راجع ويرتكز جيش همو يحرس ثكناتو فقط ويحميها وجيش همو يسرق وينهب بيوت المواطنين
اقعدو إتفقو لانو الخرطوم ما السودان انت ماسك المركز واللب والتاني ماسك كل الولايات ... عبث شديد حرب حيرت العالم كلو ... كل الناس مستغربة فيها وغضو الطرف عنها لانو دا لعب عيال ساي معقولة ياخ !!!؟؟؟ اقعدو في الواطة دي واتفقو وعوضو الناس الخسرت نهااااايتو :-
انا متأكد انو بعد المسلسل البايخ دا ينتهي حيكون في سودان جميل وعمران وقبلة العجم والعرب
الكلام حار لكن نحن لي اسي ما بنتعظ من الشايفنو نهاية السودان ، وهو في البداية ابتلاء من ربنا من البنعملو ولسه في شريحة كبيرة من اهلنا المشو مصر في الغناء والقعدات والاسواق والكافيهات والكوفيرات والبازارات والقطيعة واكل لحم الناس كانهم مشو اجازة وجايين راجعين يا لاجئين 😡
اتقو الله في انفسكم وفي دينكم وبلدكم عشان ربنا دا يزيل الغمة ويرجع لينا سودانا من تاني وحتى لو نبدأ من الصفر سودانا لازم يستمر
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة