بقلوب مليئه بالحزن والاسى ارسل لى الان الاخ فضلى السيد البكرى الرثاء الذى ارسله له الاخ طلال دفع الله على روح الاخ الرائع صلاح النصرى
صلاح الصلاح الراح طلال دفع الله السبت 26 نوفمبر 2022
يا رحمن يا أرحم الراحمين ياااا ربي تغفر ليه و ينزل في حواك يا رب، مع زمرة الخالدين، قلبي انفجع فالموت وجع رغم حلاوة الإيمان مالياهو قلبي يقين،، فاديني مفتاح الطريق برقاً يكون يا رب رحيلي إليهم الراحلين. نعمنو ماالزول البتزعل منو، دون إنقطاع تلقاهو يسأل عنك، حت لو ما بتسأل عنو، زول خير عقلو إنشغل علي طول و دايماً يِهِم بالغير، إن قلتَ تتحراهو; فتش دواخل الناس تلقى القلوب أحضان بى كل وداد ضامِّنوا، في نفسو ما سائل أحوال الخلوق هامنوا،
دا ال لو مرة كالمتو تحس بالحروف جاياك عبير من وراهو عبير، منساب الكلام دفاق ما بيغلبو التعبير كِتَر الكلام أو كان حِتين مجرد هِين. صلاح يا ال آه حنانو علي كان زي حُنُو الوالدين; رحيلك.. زي التقول جواي في قلبي انغرز إسفين، فبعدك يا حبيب الروح أراسل مين .. و اهاتف مين؟؟!! بعد حسيتو الزمن غدار و دايماً عليَّ ضنين، آخر مكالمة معاك كان قولي ليك بيقين: قدامكم نكون ماشين، و كان ردك: قبلك أريتني ياخي أكون عشان منك يا أب كلاماً زين يَنعَنَِي بجميل القول بيت شعري، أو كان تجود بيتين. عارفك ما بخيل و ضنين، بتقول لي في الكلام; ياأناي فخليك عليَّ حنين في نفسو ما سائل أحوال الخلوق هامنوا، نعمنو الجميل نعمنو ماالزول البتزعل منو، دون إنقطاع; تلفاهو يسأل عنك، حت لو ما بتسأل عنو، زول خير; عقلو إنشغل علي طول دايماً دوام بالغير، إن قلتَ تتحراهو تلقاهو الطرير و أمير; فتش دواخل الناس تلقى القلوب صادقات بى كل وداد ضامِّنوا. أرجع و اعيد القول: ياااا ربي تغفر ليه و ينزل في حواك يا رب، مع زمرة الخالدين، و ارجع و أعيد القول: آمين سميع يا رب من غير وقوف آمين. و ارجع و اعيد القول: ياااا ربي تغفر ليه و ينزل في حواك يا رب، مع زمرة الخالدين، و ارجع و أعيد القول: آمين سميع يا رب من غير وقوف آمين.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة