|
Re: ما نسيناك...جاي تعمل ايه معانا؟؟؟؟؟؟ (Re: محمد عبد الله الحسين)
|
وجدت إنه الشاعر أبو آمنة حامد..
من كلمات القصيدة يترآى صدق المشاعر.. يبدو أنها تجربة حقيقية..
كلمات الأغنية تفيض بالشاعرية و التصوير البديع للمشاعر...
طبعا في نهاية القصيدة أو منتصفها هناك ما يشبه الاستعطاف أو شبه التوسل.. ****************************************************************************** يا ريت واحد من المتابعين الفنانين الظريفين ينزل لينا فيديو الأغنية.
سوف أنزل القصيدة لاحقاً.
| |
|
|
|
|
|
|
Re: ما نسيناك...جاي تعمل ايه معانا؟؟؟؟؟؟ (Re: محمد عبد الله الحسين)
|
مانسيناك جاي تعمل إيه معانا
بعد ما بدلتنا
وماسقيناك أحلي ما في عمرنا
من عواطف ومالقيناك
جاي تعمل أيه؟
الرهيف قلبو بعيش في شكه اكثر من يقينو
تستبيهو نظرة جارحة وتحترق بالحب سنينو
قلبو عايش في العيون الشاربة من حبو وحنينو
وناكرة حتي إنو إنسان يسعي لي قلبا يعينو ***** ماكفاهو العذاب الهو فيهو
ليه تزيد آلامه أكتر
وليه عينو العمرها ماخانتك
تبكي تسهر
وليه توشح فجرو بالأحزان
بعد ماقلبو نور
اضحي جرح الفرقة في قلبو الحزين
من حبو أكبر ************************************
قلبي غافر ليك ذنوبك
سيبو بس تنشف جراحو
سيبو مرة يغسل احزانو بالأمل يشرق صباحو
وكيف يطير لعشو عصفور منكسر مكسور جناحو
مانسيناك جاي تعمل إيه معانا
بعد ما بدلتنا
| |
|
|
|
|
|
|
Re: ما نسيناك...جاي تعمل ايه معانا؟؟؟؟؟؟ (Re: حيدر حسن ميرغني)
|
استاذ حيدر صباحك خير وعافية ومساك
Quote: حلوة برضو بصوت عمار السنوسي شكرا محمد على الاغنية الحلوة |
ما سمعتها بصوت عمار السنوسي.
تتخيل أنا كنت قايل القصيدة بتقول( بعد ما ودرتنا)؟ حكايتنا بعد ما بدلتنا دي يادوب عرفتها لما قريت كلمات القصيدة..
اتاري الموضوع فيه تبديل وأنا ما عارف ههههههههه...
لكن بعد ما ودرتنا أجمل أعتقد ذلك.ز
ودي لك يا عزيزي
| |
|
|
|
|
|
|
Re: ما نسيناك...جاي تعمل ايه معانا؟؟؟؟؟؟ (Re: محمد عبد الله الحسين)
|
تمشي تزور الجابري في البيت يفتح الباب و لابس جلابية بعد الترحيب بابتساماته المعروفة ممكن يمسك العود و يضعه على صدره ويعزف وهو راقد..ويدندن بى " مانسيناك " ويطول في العزف انت تتمنى انو يستمر يدندن وبعزف كدة حتى يوم القيامة. طبعا هم تلاتة اصوات لا ليها مثيل لا بديل لا شبيه لا بتتقلد اعجاز صوتي من شدة حلاوتو .. هبة ربانية ... خليل اسماعيل - الجابري - ابو داؤد. بعدين نرجع لى.. علي حامد علي ايلا آدم الشهير ب( ابوآمنة حامد ) المرهف الرومانسي المتواضع... الطردو منصور خالد من وزارة الخارجية بسبب؟
| |
|
|
|
|
|
|
Re: ما نسيناك...جاي تعمل ايه معانا؟؟؟؟؟؟ (Re: Ahmed Yassin)
|
الرائع ود ياسين
واصل شوية في سرد ذكريات الرائعين:
Quote: تمشي تزور الجابري في البيت يفتح الباب و لابس جلابية بعد الترحيب بابتساماته المعروفة
ممكن يمسك العود و يضعه على صدره ويعزف وهو راقد..ويدندن بى " مانسيناك " ويطول في العزف
انت تتمنى انو يستمر يدندن وبعزف كدة حتى يوم القيامة. طبعا هم تلاتة اصوات لا ليها مثيل لا بديل لا شبيه لا بتتقلد اعجاز صوتي من شدة حلاوتو .. هبة ربانية ...
خليل اسماعيل - الجابري - ابو داؤد.
بعدين نرجع لى.. علي حامد علي ايلا آدم الشهير ب( ابوآمنة حامد )
المرهف الرومانسي المتواضع... الطردو منصور خالد من وزارة الخارجية بسبب؟ |
يا سلام على الجابري المرهف ربنا يرحمه ويغفر له..
أبو آمنة حامد كما نقصة أخرى حزينة لأديب مرهف لم ينصفه الزمان ولا التاريخ...
كل مرة اكتشف له قصيدة تكشف عن موهبته الأدبية الصادقة..
زيدنا من أخبار الفنانين ديل يا فنان انت يا أبوحميد..
مع تحياتي
| |
|
|
|
|
|
|
Re: ما نسيناك...جاي تعمل ايه معانا؟؟؟؟؟؟ (Re: محمد عبد الله الحسين)
|
جمال عبدالناصر لم يصفق لام كلثوم ولا محمد فوزي ولا لعبدالحليم حافظ او احمد رامي ولكنه صفق بحرارة لابي امنة حامد...الذي انشد بحماس امامه:- ولبيك لبيك ناصر باسمك *** تنفلت العاصفة تروى دما حقن المغتصب *** وتغسل باللهب جبل الغضب وحين نعود ننفض عنا الحكايا القديمة ونرمى على الشاطىء المحترق بقايا الجريمة تموت قرونا من الاتكال*** ونمشى الى المعركة ملايين تهدر باسم العرب فدى جمال. كان شغال في وزارة الخارجية ..جاي راكب بوكس بى ورا من بحري للخرطوم ( مع انه وهو طالب في مدرسة الخرطوم القديمة كان بركب مع عبدالله خليل رئيس الوزراء وبجي من امدرمان للخرطوم مع الووير لانه كان ساكن في بيت عبدالله خليل في البوكس وهو لابس قميص مكرفس وكرفتة قصيرة يادوب لاحقة صدره...على حظه الكعب وزير الخارجية منصور خالد بى عربينه كان وراء البوكس .. ابوامنة شافو طوالي رفع الجريدة الكان شايلها وغطى وشو كانه بقرأ .. وعلى حظه الاكعب الحركة وقفت لحادث او تعطل سيارة في كبري النيل الازرق... الوقفة طالت وتغطية الجريدة للوش طالت.. خلت ووير الخارحية ينتبه ليهو دقق فيهو عرفو من قميصو المكرفس ان دا ابوامنة حامد.. فاستشاط غضبا.
| |
|
|
|
|
|
|
Re: ما نسيناك...جاي تعمل ايه معانا؟؟؟؟؟؟ (Re: Ahmed Yassin)
|
عرف انه سعادة الوزير شافو ... وصلتو الوزارة طوالي قالوا ليه سعادة الوزير عايزك هسي عاين لى جزمته لقاها مغبرة واخير منها القميص .. قال احسن اضربها ورنيش سريع على الاقل تلمع قدام سعادة الوزير وتخفف عذابات الضني او حاجة تنفع. مشى قعد فوق مصطبة سور قدام الوزارة وفرش الجريدة تحتو ..وعلى حظو الاكعب من الاكعب الوزير شافو ... وكانت النهاية بقرار فوري.
| |
|
|
|
|
|
|
Re: ما نسيناك...جاي تعمل ايه معانا؟؟؟؟؟؟ (Re: ترهاقا)
|
بالله شوفوا واسمعوا ترهاقا الشهير بى احمد ساطور وهو الفنان الاستاذ والموسيقار وانامله يلفوها بماء الذهب يقول شنو؟ قال عني "الاستاذ" وهو عارف انو نحن جنب قامته السامقة .. نحن اقزام. وياما درسنا طربقته وبراعته في العزف وحاولنا نجحنا قليلا وفشلنا كثيرا .لانه كما قلت استاذة البيانو ان الاستاذ ساطور " يعزف باحساسه العالي المرهف ويحب نغماته" وهو عارف ان عمر: العين مابتعلا على الحاجب.. وعزيز الروح مابتعالا لو نحن بكينا "في حب ساطور" سامح دمعتنا المعذورة شهادة الاستاذ عندي اعلى وامتع من الشهادات الاكاديمية
| |
|
|
|
|
|
|
Re: ما نسيناك...جاي تعمل ايه معانا؟؟؟؟؟؟ (Re: walid taha)
|
الإخوة الكرماء الذين ما بخلوا علينا بسرد ذكرياتهم...
البوست يتشرف بلقاء القمتين في الفن و الذوق ...والتواضع.
التحية لك أخ أحمد ياسين الفنان وترهاقا الفنان.. والتحية لك الأخ وليد..
ياخ قصة ابو آمنة دي قصة ولا في الخيال...ياخ الراجل ده أصله ما محظوظ...و تعب واتشلهت كتير في حياته رغم
رومانسيته وصفاء سريرته وحبه للحياة..
بالله واصلوا ..ولا تحرمونا من أحاديث الفن والفنانين..
أنا فتحت البوست كمعجب بالجابري و بالأغنية و بكلمة ما نسيناك....وهي بس ككلمة تحمل الكثير من المعاني و الإشارات..
ربنا يرحمهم جميعا...
واصلوا يا أحبابنا الغاليين.
| |
|
|
|
|
|
|
Re: ما نسيناك...جاي تعمل ايه معانا؟؟؟؟؟؟ (Re: محمد عبد الله الحسين)
|
طبعا كان شاطر جدا ...لكن عنيد في عام الاستقلال سنة1956 اترفد وطردوهو من مدرسة وادي سيدنا لانه كان مهندس وقائد مظاهرة جوة المدرسة سلاحها المعالق في رواية اخرى( ملاعق) ابوهو سمع الخبر طوالي جا من الشرق اداهو كلمتين وساقوا من يده لبيت عبدالله خليل باعتبار انه عمك حامد حزب امة قاطع عشان يتوسط و يرجعوا المدرسة ... عبدالله خليل قال ليهو دا يستحيل يرجعوهو وكلم واحد يشوف ليهو مدرسة تانية. لقوا ليهو مدرسة الخرطوم القديمة الثانوية... عمك حامد قال لعبدالله خليل و( هق المواسلات من وين نجيب؟) عبدالله خليل قال ليهو يسكن معاي ويمشي ويجي معاي.... جهزوا ليهو غرفة كانت قراش. وللصدف في حاجة الناس ماعارفنها انه منصور خالد سكن في نفس الغرفة مع ابوامنة حامد في بيت عبدالله خليل.. هم الاتنين في اوضة واحدة والايام لفت... ومنصور خالد طرد ابوامنة حامد من وزارة الخارجية بسبب هندامه ( المعولق) وشعره المنكوش.
| |
|
|
|
|
|
|
Re: ما نسيناك...جاي تعمل ايه معانا؟؟؟؟؟؟ (Re: محمد عبد الله الحسين)
|
عارف يا محمد عبدالله حتى اللحظة لم يفهم احد شخصية ابوامنة حامد فهما عميقا كان عفوي لابعد درجات العفوية...وكان سريع الرد حاضر البديهة اتخرج سنة 1962 ضابط شرطة (لرغبة ابوه).. اﻻ انه كان رقيق القلب مبتسما كان اول بداية عمله في مدني..وانار ليالي مدني الجميلة شعرا . بعد سنتين كان صراعا رهيبا يدور بداخله بين الشرطي والشاعر واخيرا تغلب الشاعر على الشرطي.. وفاز عليه بالتثبيت والانسحاب مرة ادوهو اوامر صارمة بتفريق مظاهرة حاشدة في مدني ابان ثورة اكتوبر 64 المظاهرة جات ماشة وفيها بنات سمحات ..الضابك ابو امنة حامد ضابط الشرطة لابس رسمي لقى نفسه جوة المظاهرة ويعتف باعلى صوت رافعا يده اليمنى مع الهتاف " تسقط .. تسقط حكومة ال(........ )يسقط .يسقط عبود" طبعا اترفد وتم تعيينه مدرسا للغة الانجليزية بمدرسة دنقلا الثانوية ولكن كحال المبدعين جميعا كان انسانا غير مستقر... كان قلقا ولايستمر في وظيفة كان يكره القيود و التقييد..عمل بالاذاعة... وهنا له قصة طريفة مع مديرها ومع وزير الثقافة والاعلام
| |
|
|
|
|
|
|
Re: ما نسيناك...جاي تعمل ايه معانا؟؟؟؟؟؟ (Re: Ahmed Yassin)
|
أبو حميد صباح الخير يا عزيزي
بالله كل المعلومات دي ونحن ما عارفينها؟
Quote: عارف يا محمد عبدالله حتى اللحظة لم يفهم احد شخصية ابوامنة حامد فهما عميقا كان عفوي لابعد درجات العفوية...وكان سريع الرد حاضر البديهة اتخرج سنة 1962 ضابط شرطة (لرغبة ابوه).. اﻻ انه كان رقيق القلب مبتسما كان اول بداية عمله في مدني..وانار ليالي مدني الجميلة شعرا . بعد سنتين كان صراعا رهيبا يدور بداخله بين الشرطي والشاعر واخيرا تغلب الشاعر على الشرطي.. وفاز عليه بالتثبيت والانسحاب مرة ادوهو اوامر صارمة بتفريق مظاهرة حاشدة في مدني ابان ثورة اكتوبر 64 المظاهرة جات ماشة وفيها بنات سمحات ..الضابك ابو امنة حامد ضابط الشرطة لابس رسمي لقى نفسه جوة المظاهرة ويعتف باعلى صوت رافعا يده اليمنى مع الهتاف " تسقط .. تسقط حكومة ال(........ )يسقط .يسقط عبود" |
ده راجل رومانسي لأبعد الحدود ....ايه البوديه الشرطة؟ تعرف الراجل ده بيجي عندنا في المزاد كتير بشارعنا في بحري.. اعتقد صديقه كان مين كده مطر لعله والد الشهيد محمد مطر...
| |
|
|
|
|
|
|
Re: ما نسيناك...جاي تعمل ايه معانا؟؟؟؟؟؟ (Re: Ahmed Yassin)
|
ناس الاستقبال في وزارة الخارجية اول ما دخل ابو امنة بعد ضرب جزمته المغبرة ورنيش خارج (سور الوزارة) عسى ولعل لمعانها يشفع له عند الوزير الانيق .. وكان مشهورا باناقته طلبوا منه التوجه فورا لمكتب الوزير فوق..وهو متوجه لسعادتو .. قعد ينفض قميصه المكرمش ويرقد شعره المنكوش الذي ليس له اي علاقة من قريب او بعيد بذلك الشعر الذهبي الذي عبثت بخصله النسائم فماج واضطرب وسال منه الذهب.. وهو ماشي كان لقول بصوت خفيض "دا عاوز شنو هسي .. العلة دا"!!! دخل على وزير الخارجية ...الزعلان والمستشيط غضبا ... انتهت المقابلة العاصفة بتوجه ابو امنة حامد مباشرة الى جورج الترزي " ترزي وزارة الخارجية" لتفصيل عدد ( 3 ) بدل معتبرة للسيد ابو امنة بعد فترة... برضو سعادة الوزير قبضو للمرة التانية راكب بوكسي ولابس قميص.. اخير منو قميص البوكسي الاول طبعا دي كانت نهاية علاقته بالخارجية...
| |
|
|
|
|
|
|
Re: ما نسيناك...جاي تعمل ايه معانا؟؟؟؟؟؟ (Re: Ahmed Yassin)
|
بعد ما الوزير طردو .. ابو امنة قام بتاليف قصيدة يقول فيها في سور وداخل سور قالوا الوزير منصور شافني من بوكسي لي حنطور قضى احلى فتراته بعد ما عينوه ملحق ثقافي في سفارة السودان بالقاهرة وليهو قصة طريفة جدا مع عمنا السر قدور.. قصة مشهورة ومعروفة للجميع لمن وقع من سلم العمارة.
| |
|
|
|
|
|
|
Re: ما نسيناك...جاي تعمل ايه معانا؟؟؟؟؟؟ (Re: محمد عبد الله الحسين)
|
سيرة هذا الرجل ما بتنتهي ..فيها المضحك وفيها المبكي كان يحمل طفل بداخله ... كان برىء وعفوي جدا... قبل كدة طلعت شائعة قوية انه مات.. لدرجة ان التلفزيون قطع برامجه واعلن خبر وهو الوحيد الما سمع بخبر موته...اول ما عرف مشى التلفزيون وقال ليهم عشان سجلت مع"الجزلي يعني خلاص موتا" وطلع على الهواء وقال( انا حي) ومرة قال هو ماشي في الشارع الناس خافوا منو وقالوا ( البعاتي )
| |
|
|
|
|
|
|
Re: ما نسيناك...جاي تعمل ايه معانا؟؟؟؟؟؟ (Re: Ahmed Yassin)
|
في القاهرة سكن مع صديق عمره وصحبه والاتي من الشرق بكل جمال اهل الشرق فيهم محنة ومحبة وحنية ..وبساطة الانسان .... ابو امنة" الزاهد" سكن في شقة واحدة مع صالح الضي.... شاعر ومغني.. واي شاعر واي مغني !!! شعر يسكنك يهزك يصيبك بالشوق تعرف انك بتحن لامك... ولبلدك ومحبوبك لاصحبك واحبابك.. صوت صالح الضي الفنان الدارس الصوت الفريد في صفاهو وبهاهو ووضوحو وجمالو وقوته.. .. كتب لصحبه اجمل الاغنيات زي ما كتب لوردي: "بنحب من بلدنا" و "بين الريد والهوى عشنا ايامنا سوا ما قاسينا النوى ما أحلاك يا هوى" محمد الامين" رجع البلد" هاشم ميرغني" امدرمان" ابن البادية "وشوشني العبير" و " سال من شعرها الذهب" أحمد المصطفى"غريب" سيد خليفة "جاري وأنا جارو" سمعتو " نحن ما ناسك"؟ كتبها لصالح الضي؟ لو بتلقى زول بحبك زيّنا زول بشيلك في عيونو وفي ضلوعو وفي دموعو وفي ابتسامتو وهناهو في شجونو.. ما بنعاتبك يا ما جيناك ويا ما بابك لو بحس دقات قلوبنا نحن ما ناسك
| |
|
|
|
|
|
|
Re: ما نسيناك...جاي تعمل ايه معانا؟؟؟؟؟؟ (Re: Ahmed Yassin)
|
الراحل محمدابوالقاسم حاج حمد...الرجل الموسوعة والمفكر الكبير كان رئيس تحرير صحيفة"الفجر" في ابوظبي...سمع بظروف ومعاناة ابوامنة حامد .. طلب ان يأتوا به مديرا لمكتب الصحيفة في دبي ... وقد كان.... ولكن لم يستطع ان يبعد روحه عن "الشعبية" بحري.. وما قدر يكمل كم يوم وزهج وقال شوفوا ليكم زول تاني قلبه حجر كلفوهو بمهمة صحغية في اديس ابابا قال ليهم تمام ... وتوجه مباشرة للخرطوم... والجماعة في ابوظبي منتظرين اكمال المهمة المكلف بيها... ( توجه ) دي ذكرتني في رده على سؤال لماذا انت توجهت نحو القومية العربية ولم تتوجه لاصولك الافريقية قال ساخرا هي اقريقيا فيها حاجة عشان يتوحهوا ليها؟
| |
|
|
|
|
|
|
Re: ما نسيناك...جاي تعمل ايه معانا؟؟؟؟؟؟ (Re: محمد عبد الله الحسين)
|
نحن بلد .. فيها عانى ويعاني المبدعون..حتى في معايشهم ايما معاناة الدولة و مؤسسات الدولة ووزارة الثقافة والاتحادات و النقابات والتنظيمات الرسمية الامثلة كتيرة جدا...قامة فنية او ادبية او اعلامية يتولى علاجه اصدقاؤه وبعضهم مات دون ان يكون معه ثمن حبة بنادول او سقف وجدار يؤويه .. نحن ماشين نفتح جروح ليه؟ في البوس دا .. مثال ابوامنة حامد .والجابري .. والشىء المحير ان المبدع تلقاهو مسكون بحب هذا البلد وناس البلد وتراب البلد ابو امنة .. العبقري المرهف .. الما بتستعصى عليه الكلمات..الانسان بكل معنى الانسانية المتواضع.... هو طالب كان ساكن مع رئيس الوزراء ويصل المدرسة في سيارة رئاسية اشتغل في وزارة الداخلية والخارجية والتربية والتعليم والاعلام وفروعها اذاعة وصحافة ما كان لاقي ياكل... واخر ايامه التف الجلد على عظامه الهشة... ويا للاسف بنلقى غير الموهبين والمقلدين وفاقدي الحس الفني والوطني وحتى الما بعرفوا لا تاريخه لا قيمة ترابه ..تلقاهم ساكنين في قصور وراكبين افخم انواع المركبات وخدم وحشم شوفوا الفرق بينا وبين الجارة مصر.... عبدالحليم حافظ كان بتعالج في لند ومات في مستشفى ميدلثكس دا سنة1977.. .. والشاعر الشعبي احمد فؤاد نجم كان بتعالج على حساب الدولة في باريس وعملوا ليهو تمثال تخليدا له ولاشعاره..... بنفس القدر .. هل ابو امنة حامد اقل شائنا من نجم؟ واحد قال" وشوشتي العبير... فانتشيت" تاني في كلام؟!!!
| |
|
|
|
|
|
|
Re: ما نسيناك...جاي تعمل ايه معانا؟؟؟؟؟؟ (Re: Ahmed Yassin)
|
مساء الخير عزيز نا أحمد ياسينQuote: نحن بلد .. فيها عانى ويعاني المبدعون..حتى في معايشهم ايما معاناة الدولة و مؤسسات الدولة ووزارة الثقافة والاتحادات و النقابات والتنظيمات الرسمية الامثلة كتيرة جدا...قامة فنية او ادبية او اعلامية يتولى علاجه اصدقاؤه وبعضهم مات دون ان يكون معه ثمن حبة بنادول او سقف وجدار يؤويه .. نحن ماشين نفتح جروح ليه؟ في البوس دا .. مثال ابوامنة حامد .والجابري .. والشىء المحير ان المبدع تلقاهو مسكون بحب هذا البلد وناس البلد وتراب البلد ابو امنة .. العبقري المرهف .. الما بتستعصى عليه الكلمات..الانسان بكل معنى الانسانية المتواضع.... هو طالب كان ساكن مع رئيس الوزراء ويصل المدرسة في سيارة رئاسية اشتغل في وزارة الداخلية والخارجية والتربية والتعليم والاعلام وفروعها اذاعة وصحافة ما كان لاقي ياكل... واخر ايامه التف الجلد على عظامه الهشة... |
*****************************************************************************
فعلا دي الحقيقة... هسه اتذكرت كلامك ده و أنا بقرأ نعي سبت دودو الله يرحمه...
وشوف زي حامد بريمة العملاق يصبح نسياً منسيا...
تعرف يا أحمد الحكاية مش الحكومة براها ..نحن ذاتنا كشعب ما عندنا اهتمام ولا بنعظم ونحتفل و نكرم رموزنا كما ينبغي.
| |
|
|
|
|
|
|
Re: ما نسيناك...جاي تعمل ايه معانا؟؟؟؟؟؟ (Re: Ahmed Yassin)
|
ابوامنة حامد اشتغل في الاذاعة... بعد فترة دخل مكتب مديرها محمد خوجلي صالحين وطلب نقله من مكتبه الحالي الى اي مكتب اخر... صالحين رفض ... وكل يوم ابوامنة يدخل ويكرر طلبه وصالحين يرفض.. بعد اخذ.. و..رد ..على شمو جا داخل مكتب صالحين ودخلوا ناس معاه....ابوامنة لقاها فرصة ودخل وراهم وقال بسخريته المعهودة وبخفة دمه المتناهية وهو يحك شعره هناك محاولة لقتل الابداع فيني والملكات الشعرية من ناس الاذاعة... ضحك شمو وضحك صالحين..في النهاية شمو اتوسط ليهو وفي الصباح كان مكتبه بالقرب من مكتب " ليلى المغربي" كانت شمعة و.. وردة الاذاعة. خلال اقل من اسبوع كتب سال من شعرها الذهب
| |
|
|
|
|
|
|
|