عيوشة لحميد

Quote: .عيُّوشة عيوشة ... عيوشة صبت غيوم ذات يوم فوق أرض معطوشة كان في حشاها بعوم كركارتو مفقوشة في الفيها حي قيوم والدنيا مدووشة فاقت بصور الدوم كم حلِة معروشة * * الباقر الدرويش وحِّيدو خابر السر فالدومي صورا دا ريش جنحين ملاك البر ما بين سبيطة يعيش بالليل نبي الله خضر جيش يا ابن آدم جيش وِِرْ العشق يا تر * * وينطاير الدرويش بين حضرتو وهوشة وتمرق من المافيش للدنيا دقلوشة * * تمرق مروق الريح والغيمة والمطرة قش الخلاء اللا ليح لا شوك ولا ظهرة تمرق بلا تاريخ وتدخل بها الوكرة دبش الظلط والسيخ والتلتلة الضكرة .... يا نوح مراكبك فوج فرت من الحجرة الموج يشيله يلوج من كوشة لي مجرى .* * يا نوح حصايتنا قامت في ساقيتنا كان الرحم واطة والغيمة دايتنا بين نارلدايتنا وأزيار كدايتنا كانت تنيص وتئن ما كنا فيها نحن بس فرهدت كيفن فزت سعايتنا إلا أن يكون الجن عوض رعايتنا وساعة السواقي تجن بكسر سقايتنا * * يا نوح يا إما الجن يا الباقر الدرويش صقر البطانة أب سن يا دابي رندة أب ريش أدا الحصايي الحن وكبرت من المافيش بس سابتن يا نوح يوم دمَّ قلب الدوم سابت دياره جروح وشابت على الخرتوم اختارت البيروح وأبت الوفاء البيدوم * * لكين دعي الدرويش لكن نجيهة الجن بي دابي رندة أب ريش طارت نديهة أب سن من طاعمي زي الفل انضبلنت كيفن لا همبريب لا ضل في الريح تضاضي تئن * ** من تابري بفراشة وزرزور وحواشة دقلوشة كنتوشة لاماله شماشة همبوبة فشفاشة وصيصايي كرموشة عينيها رماشة أم لمبة فتاشة من كوشة لي كوشة دنقيره صنقيره حنديره في غيره خلاها دعموشة تلوشة ولا ضفاف بارك عليها جفاف بي ريحو مقشوشة وزي صرخة الغرقان في الفاضي عز فيضان شعراته منفوشة * * وشفع مباراها عيوشة عيوشة الليل هديماتا وشمش الله برطوشة تشرب من الشارع وتلقف من الكوشة عيوشة أرقصيلنا صقرية كاروشة السمبا جابودي الهورس عيوشة وعيوشة ماب ترقص لكنها الدوشة والدوخة .. بي هوشة بالراحة بي شدِّي زي البتنترتع في إيدا دم نقع والتاني برطوشة تفلت من الشفع كيف عاقة مهبوشة * * منعودي الزي دي من بدري مو هسع مما انضبح جدي في كورتي وانقطع وجدعوهو في كوشة في شندي قام ولّع نيرانو محموشة في الباشوات ترشع تشلع في طربوشة * * عند لفة الهندي عيوشة منجقدي تدخل على بيتاً ستاتو متمدي ناساً بعرفوها لكين بعافوها دايرين غسيل عدي شاكرين يا دقلوشة ويدوها عيشايي بي دمعة مرشوشة * * وتتملك الشارع خطواته مربوشة السوقة والصبيان عيوشة عيوشة الليل هديماته وشمش الله برطوشة تشرب من الشارع وتلقف من الكوشة * * شبعاني ماليها جيعاني مدهوشة في الراح بأهاليها والحلَّ بالكوشة لا من رغيفايي كسرايي قرقوشة لا برتكانايي بي صفحة مدقوشة * * وين المدينة الكان على رغم ما فيها من فاقة من حرمان لحاقة أياديها وتشفق على الإنسان لا دَوَشة لا دُوشة حنانة مبشوشة بي فضلة في مطعم بي فكة في قروشة بي نظرة لي طفلة في لوعة منقوشة يا رقصة في حفلة وأحلى أكلة يوم بوشة ويا كلمةًً طيبي بالبسمة مفروشة يا عالم الغيب شن حلَّ بالكوشة * * حلابه ما حلَّ بي الباقر الدرويش الجن جنا الحلة وناساً بيوتا عويش رايداكي لي الله أول قوالك ريش سبتيله يا أم ذلة قتيله دايرة أعيش وجاكي الكضب فلّة خدر المدن بخشيش ما أبيخ العلة ومأمولك المافيش * * لكن جماعة الله ناس باقر الدرويش غفرولك الذلّة فاوة العشم والطيش قفروكي يا ولاَّ بس نقطة التفتيش والعارض الحاشا ناشا ونعل خاشا خرطوم وقرقوشة * * ينذكروك والليل قمراتو متشوشة من عاشة دون دوشة في الحلي دقلوشة جم دوكي تتعشى وتصبح تقش حوشه مدخورة لي باكر ما دلاَّ عشُّوشة طوالي بتذاكر بأصحابه مدووشة * * صاب المحل قشة وراس البلد دوشة بالك طفر طشَّة جيتيها مخموشة غيرتي لي عشة وسووكي عيوشة مويتك من الشارع وقوتك من الكوشة وجابولك الكشة حين درتي كشكوشة * * وتنصنتيها أصوات أماتك الأموات صديلنا وين كتي في مجرى في كوشة في أحضان دِقن ميتي أو تِفِّي منفوشة صديلي يا بتي يا عاشة عشُّوشة أنا عندي ليك إنتي وكيف كنتي كنتوشة صدِّي وكفاك دوشة دي مدينة ماهيلك غاشاك ومنغشة ميتي وتقاويلك مافي اليخليلك صبراً يخاويلك غير ناس أحاويلن قطعن أحاويلك * * سيبي الفي إيد الغير واتباهي بالليلك ما شفتي كيف الطير باكي ويغنيلك * * يا جرحنا الحائم طول النهار هائم من مجرى لي كوشة ينحاشى لي كومر قبّل على كوبر بأصحابو مكشوشة * * أصحاباً أومولك باكر يلاقولك في مجرى فوق كوشة كالعادة يحكولك ودونا لي ضابط في الفيها كان ظابط ما الوضع منجارط وسعر الدموم هابط * * وين قال أوديهن والعندي ما قادر بالموية أكفِّيهن والعسكر أدُّونا سيطان وفكّونا كالعادة يا أخونا حيكومة مجنونة * * بنغسِّل العربات وما أبعد الكورنيش عتالة جرسونات شغلاً ما يكِّل عيش وما فينا إضرابات غير نضرب الأورنيش وبالحالة دي الكابات مرات يجيك الديش * * ما يقبضوا الباعوض الماب يدور فتيش ما يصوبو البارود تالا أب كلام غشغيش يا أوضاع ضلامية إشمعنا نحنا وليش نحنا الحرامية ولاّ البدسو العيش شقيش نقع شقيش حتى السجن ما فيش ما فيش يا عيوشة * * يا ريح بشيشي بشيش ... ويرجع صراخ الجن والباقر الدرويش نبي الله وأهل الحن وغيماً مطرتو دريش صقرالبطانة أب سن وحس دابي رندة أب ريش * * في الدومي آخر الليل يا عاشة صدى الدار يا حاشا حوشي السيل يا راشة رشي النار يا خاشة بين الحيل ونفس الغلابة الحار يا طاشة نحنا يي ديل ضيب المدن غدار * * الفأرة بأجحاره البومة بأوكاره الطيرة بعشوشة الكل بي مأواه الكافة بعيوشة وود البلد داك تاه ضاقت بو أرض الله غير مجرى أو كوشة * * يفقش صديرك آه أواه يا مفقوشة ما آدم بدور حواه في أوضة بي حوشه أوضة معيشي ونوم مفروشة معروشة من صور وجوبيل دوم ويي ديل يا عيوشة ولابد تجيهن يوم لابد يا عيّوشة * * ويا كل عيوشة مطروشة في الخرطوم في مجرى أو كوشة يا الحقكن مهضوم يا قصروا الدوشة يا أرجو القيامي تقوم والسلطة حنكوشة * * يا أبونا يا الأسود يا أمنا القرقد يا دون شغل يا زول ما لاقي منّو يصد طول الوكت مشغول ماسك في بالو يكد * * جاك المحل قاسيت لامن هجرت البيت أو هجروكا غصِب صب المطر خبيت أول هناك طبيت دارك لقيتا حرب كرت عليك فريت * * كان ما في غير تنفد بي جلدك الأسود بي راسك القرقد وبي فألك الشامخ زي تاج أبو الهدهد لامن يطير لبلاد لا نبلة لا صياد من كايا حتّى جبيت دود الحلال دون خيت زي ما يدور ينقد * * حاشاكا صيبي وعيب لي شينة ما ختيت قدّامي من تبِّيت قلبك يحس بالغيب ماك التقول يا ريت عند تبنتك للجيب دخري وركيزة البيك دغري وعراض إيديك بس كفها إنعود بالعندو ينجود وفي الأرض يرمي الحب ما قنبلة وديناميت * * يا عامراً بالرب يا سيداً .. عب عب قول للمساخر أبيت رش القميري وكب بالعافي يا ناس بيت بالخوّة يا أم سوميت في الأرض نرمي الحب ما قنبلة وديناميت ماب نقسمك نُصّين يا بنية غير نصّين سالمات من الدوبيت * * ماهل وطنا وهيط نيلو بيشيلُّو محيط ريح الحسادي نشيط والتمرة ساقه هطيط سابل جريده بسيط وحافض الأمانة سبيط لا غفلة لا تفريط لامِن يحين لُو لقيط * * قوليها يا خيّة للنفسو ما هيِّة شن جبهة متكية لي شاشة كاكية من يا نكي طربوشة جم جبهة دغرية العمة مكوية صنعة كبوشية فوق راسه ملوية ترقش بياض نية حاضناله طاقية بالهيبة منقوشة زي وشم ما كيَّة وشلخاً في عيوشة * * يا جرحنا الطيب جاييك زمن طيب خيراتو ليك أول صدقني يا طيب مهما الزمن طول الحال حيتحول الكوشة لي واحة والمجرى لي جدول والسجن لي ساحة بيناتا تتجول * * عينيك مدهوشة في طفلة دقلوشة كنتوشة في حوشة في إيدا بت لعاب والتاني كشكوشة فرحاني تتجول ضاجات أهاليله بالخضرة مدووشة من كان بتسول في مدينة ماهيلة ومن كشة لي كوشة حميد