Quote: الإخوان الاجلاء بدر الدين و ود الأصيل سلام،،، يا بدر الدين ياخ امسك الدكتورة ديانا ابوعبود دي طرف وخلي ود الأصيل يحكي ليها وباللغة الانجليزية وبلهجة جنوب لندن قصة عمو لحظة ضايقو الإسهال ونقر للبص بالعصاية عشان ينزل.ونزل وضرب الغابة ثم حدث ما حدث . انا عارف المقام ما مقام محليات. بس برضو عارف محبة بنات بنت جبيل للتفنيص.
|
سلام سا عُصمن ود موسى
♤غايتو اللخو عليك جمس مِحَنن يشبن الراس!
لكن تعال للجلاكين ديل متخفي في فروة حناكيش ،
عاملين متل السحيحيرة ديك الخايفة من (التقطقي) و
هي قاعدة بتسوي في لعبة (الترنعي) وهبشيتي؟!!
® يا روح ما بعدك روح π√©
● طيب اسمع وكت جيت براك مديت رويسك، لأوسعنك
نضماً و نثراً و شعراً من جراب كنوز سحارة حبوبتي. رغم
إنو هي ناثرة و لا هي شاعرة بأيتها حاجة إلا الرضا بي الحاصل
لكنها مليانة حنيةلو فاضت بأهل الأرض جميعاً لاغرقتهم.
▪ فمرة عارف كنت ماسكني ليك برجم (يعني حصبة ألمانية لأبناء الشهادة
العربية والعمركانية) معاه جنس وردة يازول طايرة لي في راسي لمان قاعد
أهضرب .و جلدي دا السهراجة ديك لمان يلمسوها بالعود . تقول بس كورونا
حمناالله و إياكم . فحبوبتي طبعاً زي ما ذكرت بتريدني ريدة جنونية ما متل
محنة كتكت البرا لبن و ما بتتحمل فيني الهبشة.يعني فعلاً بالجد من النوع
القايلة أنو القيامة دي ظات\طا يمكن تقوم لو يوم وقع لي مكروه قدام عينيها.
▪ قامت يا زول لفلفتني ليك بفردة قنجة طابقة فوقها شملة صوف و بقت
مصنقرة الليل دا كلو موقدة ليها نار جمر للدفو و جنبها لمبة (حبوبة و نسيني)
و كورة نشاية (رمضان كريم) معطون فيها قرض ومحريب روس نال تديني
أكرع غصب حسنة كل شوية؛ولو شافتني تمحطني بسير المفحضة لامن أنلوي
و كان حرقني تأكل اصابعيها
من الندامة و تجهش معاي بالنحيب و هي كاطعة على نفسها ميثاقاً غليظاً بأن لا يجد
الحزن سبيلاً إلى قلبي وقلوب أخواني اليتامى من ثغرتها أبداً. يلا كلما
تسمعني أزانف و لا أقنت من حر الوِردة أسمعها ليك تبكي عز الليل تمنح بكاياً
بي جعيرو تقول:الليلة وووووووووووب علي يا عشا البايتاتو مقنع الكاشفات ومدرِّج
العالطلات.. وتناجي ربها رافعة أكف الضراعة شاقة جوف الليل بسهام الدعوات تقول:
يا دفع اللن اامثوبن و يا يوسف المانجيل الله هيييييييييي سعلتكن بالخلقكن من عدم علا تخلو
لي جنا جناي دا المتل الويحيد في أخوانو اللي هسي ما ضاق ليهو حريرة و لاجرتق لا
ضريرة يا ألله تعفيه لي بس من الموت؛وإن شاء الله بعد داك تشيلني نا ذاتي بدالو.
● هنا أنا بصراحة لامن خلتني نا ظاطي أشفق عليها و تكطع قلبي بحالة الجزع
والهستيريا اللامة فيها ؛ قلت كمان تحصل ليها نصيبة بسببي فقلت إلا أسكتا ليك الحاجة
دي بمقلب حار. وأخوك أصلاً شالق و صنعتي المقالب. فلما شفتها النعاس خلاس دب في
أجفانها و كسر عنقها لمن الريالة سالت على سدرهاو هجست شوية أخدت ليها غفيوة كدي,
قمت براحة انسحبت من الغتا و بعد ما أتمولصت ليك طططب بقيت مولاي متل ماخلقتني؛
ثم بحركة بهلوانية كدي قدلت مشيت على جيهة تيبار (الموية ) و من تحت النقاع خمشت
لي منو فكامة طين صلصال (برجوب) كبيرة جلطت ليك بيها جسمي دا من راسي لي
كرعيني و جيت على تقابة النار و من وسط اللدايات خمشت ليك جميرات موقدات و
غزغزتهن فوق الطين في جلدي. وجيت وقفت منشحط فوق رأس حبوبتي
المسكينة وغيرت حسي خليتو متل البعاتي و ناغمتها ليك بصوت مخيف:
+يلا، أهاااعععااووو.. جيتك يا مرا يا عجوز يا حيزبونة،مالك عاملة
لينا شمطة حاميانا الغمدة؟ مالك قولي دايرة شنو؟!
♤ أها يلا زولتك من حيسا داك تنقش تنقش تنننننقش الحاجة قمزت
مخلوعة تكورك و ترجف: - بسم الله حصبني الله دا منو البصيح لي؟ ,
جان يا يابا إتا والله إنسان؟و شن بتدور عندي ؟ كدي زح مني لي غادي
كابس لي فوق نفسي متل الرهجومة. قلت ليها:- دا أنا عزرائيل ملك
الموت شخصياً ، وجيت أشيل رويحتك بدال وليدك البتريديه دا و
عاملا لينا بيه غلبة! دحين مو دا كلامك قلت فادياه بي روحك؟
♤أها الحاجة هنا تممم كرست كطعت النفس؛ لكن بحلاة الروح
الظاهر ضربت خماسي في سداسي و فصلت رجعت في كلامها:
و جري أنحشرت ليك في شملتا و ما مرقت علا الأصبع السغيروني
و هي تأشر على عنقريبي نا محل راقد و تقول: هييييي يا يمة! وا
خجيلتي! اليلة ما رحت فيها عديييل كدي لاكين أأأبوى مييها أنا
المرضانة, لا لا , هداك المرضان الجنا المغتا داك أمش عليه
راسك عديل وسوي عوسك معاه آآآآي آآآآبوي ، يديك العافية.
و محمد معنانا ماتغشانا!!!و أنا بهنا من الضحكلمان بلت
و شتتت بولي فوق سيقاني.!و قبرت اشرق ،علا
بس" أنا ما شرقتا أنا جيت أعاين "