لو لا إنو المارجوانا أصبحت قانونية هذه الأيام، كنت أخاف على نفسي من التفكير في السفر لسويسرا وشراء الموت الرحيم الذي هو أيضاً أصبح قانونياً.
يا أخي، لمان تكبر؛ يصبح الآخرون بالنسبة لك مملون جداً، كتاباتهم مملة، يعيدون أنفسم بشكل أكثر مملاً، نضالهم ممل، كتاباتهم السياسية تقطر مللاً ونستهم مملة، المنتدى ممل، الفيسبوك هو الملل، وبعد دا ممكن زول يتجرأ ويحظرك كمان من مللو، كل شيء ممل، الطعام بنفس الطعم لسنوات، القهوة لا تتجدد، بس البركة في السيجارة دي، كل يوم هي شأن، عظيمة الخيال، كلما أجر نفس أحك بطرف أصابعي الأربعة وهم شبه مقفولات أحك جنب الترقوة اليسار، وكنت زمان وأنا حضور عن حكاوي أصحاب الخضرا انو الزول بشعر بنفسو كبير جداً والآخرين صغار، لكن والله، الكلام دا كضب، أجمل ما فيها؛ بتخليك بس لا تتذكر ملل البشر، وتشوف نفسك قرد صغير متشعب بيد واحدة في فرع شدرة وجسمك مقلوب، ثم ترجع تحك باليد التانية نهاية الرقبة وبداية الراس مكان القطعية بتاعت الحلاقة، آخر حلاقة الحلاق قال لي؛ قطعية الرقبة دايرها مربعة ولّ مدورة، قالها لي بالانجليزي، أول مرّة حلاق يسألني السؤال دا، تعجبت من السؤال واستغربت إنو أنا الشارب السجارة ما الحلاق، بدون تفكير تذكرت انو قبل أعلق نفسي في الشجرة رأسي كانوا يقولوا لي مربع، قلت ليهو؛ ربعها المهم الموضوع الجديد بحلني جد جد من منتدى بكري الممل دا وناسو الأكثر مللاً، عليكم اللعنة أجمعين
01-20-2022, 09:29 AM
اخلاص عبدالرحمن المشرف
اخلاص عبدالرحمن المشرف
تاريخ التسجيل: 03-04-2014
مجموع المشاركات: 10314
لي شهور طويلة تقريباً كل يوم لو ما مسافر بمشي الشيلتر بتاع الهومليس، كلهم ضاربين السجارة وأصناف أرقى لم يتجرأ بايدن بعد بجعلها قانونية، أولاد الكل_ب كلهم مخدرين، والله، تعاين في عيونهم تعرف إنهم قبل الشيلتر كانوا حساسين، لكن ملل البشر جابهم للجنّة واحدة مسطلّة سطلة شديدة مسكت فيني وتردد شعرك سمح عندك شعر حلو، قبل أرجع البيت غشيت اشتريت مع السيجارة كريم كنت بشوف دعايتو في سي ان ان، عاينت في المراية لقيتو مع الصبغة خلى الشعر لامع وملفوف، تذكرت واحدة من حبيباتي القدامى شاعرة قاعدة في باريس ضربت ليها تلفون وما عندي رقمها، قالت لي عرسّت للمرّة السادسة قلت ليها حاجز السابعة لكن نرجع نعيش في دردق قالت لي شعرك السمح داك في ولّ صلعت؟ قفلت الخط وقفلت على بتاعت الشلتر فهي الأقرب شعراً من ماكرون كيف هو بحب فيروز؟! بفهم العربي؟
01-20-2022, 11:05 AM
Yasir Elsharif
Yasir Elsharif
تاريخ التسجيل: 12-09-2002
مجموع المشاركات: 49595
فكرت أهدي ليك حاجة استوحيتها من كلام صاحبك الزلنطحي أسامة فوزي عن شعر العامية عند مظفر النواب. يازول الكلام ساق التفتيش لحدي ما عرفت قصة القصيدة "الريل وحمد" والريل هو القطار حسب الاصلاح العراقي المأخوذ من الكلمة الانجليزية.
أولا هذه شابة عراقية تحكي قصة القصيدة الأغنية:
وعلى لسان الشاعر شخصيا: المهم.. أنا عملت العلي بخصوص الملل. وقد أعود
01-20-2022, 10:58 AM
الزبير بشير
الزبير بشير
تاريخ التسجيل: 08-11-2009
مجموع المشاركات: 1803
Anhedonia حالة إسمها أنهيدونيا.. سبحان الله يا مستنير.. عندي مقال لم يكتمل منذ أيام الإغلاق (اللوكداون) وحظر التجوال المفروض أيام الكرونا عن هذا الموضوع.. فقد الإحساس باللذة والمتعة مهما رددت ورا وردي (السعاده فتحنا بابا) مع الفارق الشاسع بين المتعة والسعادة فالمتعة مصدرها خارجي والسعاده بتجي من جوه.. ح أكمل المقال وأرسله ليك لو لقيت وكت تقرأ (أحداث "هذيان" معلن)..
وبالمره .. حارم وصلي مالك؟
01-20-2022, 02:24 PM
أبوبكر عباس
أبوبكر عباس
تاريخ التسجيل: 03-04-2014
مجموع المشاركات: 3594
مكانك ما بين سمح الزي وطاحونة الدي أما سمعت بصلاح الرفاعي الذي طلٌق المنطقة الصناعية و"كسر ركبة" عنده ثم لما رحل سمح الزي كان لسان حاله "عيشا بلاك مسخان يا أزرق أم ضبان" فلحقه سريعا
الا تتذكر ما قال لك Gussai Hamror ذات ليلة أماراتية وقد استبد بك القلق فعجبت لقوله؟!
01-20-2022, 03:00 PM
عبداللطيف حسن علي
عبداللطيف حسن علي
تاريخ التسجيل: 04-21-2008
مجموع المشاركات: 5545
د. إخلاص سلام.. منذ سنوات طلبت كتابا عَز الحصول عليه في المكتبات هنا وكتبت في حوش بكري هذا أن يدلني عليه من يعرف له مكانا، يقوم أبوبكر عباس يقول لي عنوانك وزودته به وماهي إلا أيام ووصلني الكتاب في مكتبي.. أها، النوع دا من البشر مستحيل الأنهيدونيا وجاراتها تقرِّب منه أو تَهَوِّب نحوه ساي دعك عن ملازمته، فا شنو، هو بيجامل فينا ساكت ويرسل التعازي.. . مواساه وكدا.
01-21-2022, 03:29 PM
اخلاص عبدالرحمن المشرف
اخلاص عبدالرحمن المشرف
تاريخ التسجيل: 03-04-2014
مجموع المشاركات: 10314
خليني ارجعك يا ايها المستنير لى جمال عبدالرحيم والفاتح حسين والرشيد محمدالامين (كسلا)..ولى فريق النهضة طبعا الرشيد الفنان ماعنده اي علاقة بمدينة كسلا والاسم جاء تشبيها بى كسلا لاعب الهلال الرشيد دا فنان في الغنا وفي الكورة.. كان مستلم دردق ومدني كلها بى رمية" رماد الذكرى" ز"مسافر وين مخلينا" و " النعناعة " وانا دردق عارفها ما بتشعر فيها باي ملل.واحلى ايام في بيت عمتي (ستنا) واولادها محجوب والسر وياما عملنا فيها حفلات..
01-22-2022, 03:37 AM
Ahmed Yassin
Ahmed Yassin
تاريخ التسجيل: 01-31-2013
مجموع المشاركات: 5507
بتعرف شوقي أخو الرشيد كسلا، كان صديقي صداقة لا تتصورها وشوقي دا مختلف من ناس الدنيا ديل كلهم فارقتو من كم وتلاتين سنة لو عندك ليهو أي وسيلة تلفون برني بيها
01-22-2022, 04:24 AM
أبوبكر عباس
أبوبكر عباس
تاريخ التسجيل: 03-04-2014
مجموع المشاركات: 3594
والله، يا ياسر، قصيدة مظفر دي عجيبة وسمحة سماحة ما حصلت؛
مرينا بيكم حمد واحنا بقطار الليل وسمعنا دقّة اقهوة و شمينا ريحة هيل يا ريل صيح بقهر صيحة عشق يا ريل
يا أخي، مرات كتير بجيني إحساس أكتب شعر ثم أشعر بأدوات الشعر التقيلة ديك تحاصرني تفعيلة ومفعل وتفعل ديك لكن الليلة وبعد عشت القصيدة دي؛ عرفت وزنتي الداخلية بتاعت الشعر،
جاكم بلا ح أرشكم شعر أرقّ من شعر التجاني يوسف بشير بلغة تدخل من مساماتكم
ابوبكر والله مشاكل العالم الأول حلوة شديد 😂 أحمد ربك ما عندك إحساس بالأوميكرون زيي و زي أولادي و نص العائلة ،بعد عزائين في اسبوع واحد. دعواتك و دعوات القراء (رجاءاً في سركم ما ضروري تكتبوها عشان ما نخرب البوست) 😁 و العفو و العافية .
01-22-2022, 02:13 PM
الصادق عبدالله الحسن
الصادق عبدالله الحسن
تاريخ التسجيل: 02-26-2013
مجموع المشاركات: 3244
Quote: "إن الفن في حد ذاته وربما الأدب بوجه خاص، هو رفض للعالم القائم وتعبير عن النقصان وعن قلق الوجود، إن من يشعرون بالراحة لأحوالهم ويعشقون الحياة عموماً ويرضون عن حياتهم خصوصاً لا يحتاجون أبداً لاختراع عالم مواز عن طريق الكلمات".
إذا تأملت المقتبس في الأعلى يا بكور، ثم نظرت ملياً إلى الجزء الممتلئ من (جـك الفول) فسوف تُدرك بأن أعراض الملل وإمارات القلق تعني أن مجهوداتك التنويرية لم تذهب مع الريح وأن إبداعاتك التثويرية لم تضع سدىً
فبأمكانك الآن أن ترفع رأسك متفائلاً وتمشي ممتشق القامة لتُبصر الكثير من أضواء الاستنارة تلوح وتشعشع عند نهايات النفق
فها هي خيوط الإستنارة تتمدد، وها هي الأضواء الثورية تتمدد وتملأ الأجواء وتتسلل عبر المسامات حتى إلى داخل بيوت الأفراح:
المستنير الحبيب تحياتي يا جميل انت محظوظ لا كفيل ولا صاحب الشقة والايجار ولا رسوم بعدين عندك كل حاجة ( آخر العمر ده ما ندخل في حاجات عميقة نحن خلاص بقينا ناس عمرة وحج) تعرف يا المستنير نحن في الخليج جمعيات وتجمعاتنا الونسة والكوتشينة ناس ضواحي الدنيا نحاول بقدر الامكان نخلق وطن بديل في الغربة كل قرية لديها جمعية تجمع في نهاية الاسبوع قراريص ملوحة وويكة وكوتشينة وست واربعتاشر ونسة ممنوع استخدام اللغة العربية إلا ما ندر
تحياتي يا زول يا جميل .. انت أهم واحد في سودانيز .. شخصيا اتابع مداخلاتك
01-22-2022, 05:58 PM
الصادق عبدالله الحسن
الصادق عبدالله الحسن
تاريخ التسجيل: 02-26-2013
مجموع المشاركات: 3244
Quote: "إن الفن في حد ذاته وربما الأدب بوجه خاص، هو رفض للعالم القائم وتعبير عن النقصان وعن قلق الوجود، إن من يشعرون بالراحة لأحوالهم ويعشقون الحياة عموماً ويرضون عن حياتهم خصوصاً لا يحتاجون أبداً لاختراع عالم مواز عن طريق الكلمات".
إذا تأملت المقتبس في الأعلى يا بكور، ثم نظرت ملياً إلى الجزء الممتلئ من (جـك الفول) فسوف تُدرك بأن أعراض الملل وإمارات القلق تعني أن مجهوداتك التنويرية لم تذهب مع الريح يا مستنيرولم تضع سدىً
فبأمكانك الآن أن ترفع رأسك متفائلاً وتمشي ممتشق القامة لتُبصر الكثير من أضواء الاستنارة تلوح وتشعشع عند نهايات النفق
وها هي خيوط الإستنارة والأضواء تتمدد وتملأ الأجواء وتتسلل عبر المسامات حتى إلى داخل بيوت الأفراح:
قلقك جميل زي بسمتك .... .. .
01-22-2022, 06:18 PM
الصادق عبدالله الحسن
الصادق عبدالله الحسن
تاريخ التسجيل: 02-26-2013
مجموع المشاركات: 3244
Quote: فيديو ياسر الشريف معدل بواسطة الصادق عبدالله الحسن قفل البوست لا يمكن فتحه عادي ، دي عاقبة الزندقة في الدنيا
تعديل مداخلتي يا منتصر لأ شأن له بكرامات الزنادقة وما أحدثوه في مجرى البوست
ولعلك لم تلاحظ بأن كرامة المستنير و"ثقبه الأسود" كان قد انفتح قبل مجيئي مبتلعاً أكثر من سبع عشرة مداخلة سبقت مداخلة الدكتور ياسر دفعة واحدة كل هذه المداخلات طمست كرامة الزنديق على أعينها فاستبقوا الصراط فأنا يبصرون.
أما مداخلتي المُفترى عليها فقد سبقتها مباشرة مشاركة للدكتورة نعمات عماد وهو ما شجعني – بعد تردد – لضغط زر إرسال مشاركتي التي ابتلعها اليـَـمْ واختفت في بطن الحوت فحاولت اللحاق بها قبل فوات الأوان وقبل أن ينفخ "المستنير" صفارته الاسرافيلية
عندما أرهقتني المحاولات واستبد بي المملل، شأن صحابنا الزنديق، الذي أرهقه التفكر في تدبر الأكوان والبحث في رب الكواكب وما وراء المجرات قمتُ بحذف المداخلة من لغاليغها خوفاً من غضبه (رضي الله عنه وأرضاه)
فأنت يا منتصر تعلم بأنه: (لا يبلغ أحد درج الحقيقة حتى يشهد فيه ألف صديق أنه زنديق) وأننا (أنت وأنا) إن هرولنا وجرينا مثل الابل العطاش فلن نظفر بقطرة واحدة من كأس الحضرة، التي ارتشف وشرب منها الزنديق حتى ارتوى فاكتسب هذه الروح الشفيفة وهذه النفس الصافية المطمئنة.
تحياتي له ولك ونعوذ بالله من سخط "الزنادقة" ومن مَللهم .... .. .
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة