نصائح للقادمين الجدد لأمريكا

Quote: صدقت يا عبد المنعم فان نيويورك، عاصمة العالم، الشغل فيها موجود بكثرة...وحتى الان وفي زمن الكرونا الشغل موجود على الرغم من ان معظم المدن الامريكية الشغل فيها انعدم.. وبعدين ناس نيويورك كلهم، سواء كانوا سودانيين او امريكان ، بيمتازوا بالشهامة والمروءة ولا يبخلوا باي نصيحة او مساعدة.. من كريم أصلك واصيل طبعك

Quote: جزاك الله خيرا يا عبد المنعم السعي لمساعدة الآخرين عمل عظيم داير أضيف حاجات بسيطة أهمها الحاجة الملخصها المثل السوداني يا غريب كون أديب أحترم الآخرين وأحترم نفسك وأبعد عن محلات المشاكل وناس المشاكل كلما إحترمت الناس الحوالينك في السكن والشغل والقراية كلما كانوا راغبين في مساعدتك ما تخجل من لغتك مهما كان ظنك في مستواها سلم علي الناس وعرف نفسك وكان في واحد داير يمشي قدام في الونسة فدي فرصة عظيمة عشان تمرن لغتك الإنجليزية النضيحة المهمة برضو كل ما تلقي طريقة لشغل أشتغل كلما ما تلقي أكل يعني ما تمشي لغزابة ويختوا الاكل تقوم تقول هسع أكلت وكل ما تلقي طريقة نوم نوم وفر قروشك للأيام الصعبة وتشتري الما بلزمك بكرة تبيع البلزمك

Quote: برضوا نصيحتين انت والناس البتنزل عندهم أول مرة راكبين تاكسي بركبوك تاكسي داعمين مدكيت بتدعك معاهم والنصيحة التانية ما تنطط من ولاية اي ولاية ابناء العم سام حاسبين الدخل والمنصرفات والنصيحة التالتة من النصيحتين كان عندك شهادة عادلها وما تسك القروش عشان زي ما بيقول عزوز صاحب التاج تشتغل في مجالك لانه في دكاترة من بني كجة لي هسي في السفارات العربية ليهم عشرومية سنة ما استفادوا من الكرتونية عشان كان باريت الأصلع أبوالجورج ده بتلحق السمحين

Quote: الاخ عبد المنعم سلامات. شكرا على هذا الفيديو الهام. هنالك أمر أخر يجب أن ينتبه اليه القادمين الجدد إلى أمريكا خصوصا من الشباب، وهو موضوع الاعتداء الجنسي والقوانين الأمريكية الصارمة والمعقدة جدا في هذا الأمر. هنالك قصص لبعض الشباب السودانيين تورطوا في مثل هذه القضايا، وذلك بسبب جهلهم بالقوانين الأمريكية، و الذي ادى الى محاكمات وإدانات وقضاء فترة عقوبة في السجون الأمريكية.

Quote: سبحان الله ده واحد ادين بتهمة اغتصاب طفلة وحوكم ب ١٠٥ سنة سجن وفي السودان نسمع بواحد فكي اتهم باغتصاب طفلة وبعد شهر تلقاه عادي ماشي في الشارع وكمان بيواصل تدريس القران للاطفال.. ويقولوا ليك امريكا بلد الفساد !!!؟؟؟ هنا المجرم مغتصب الاطفال بعد يقضي عقوبته ما بيقدر يعيش مرتاح لانه محل ما يمشي الشرطة بتوزع منشورات لسكان الحي الذي سيعيش فيه وتقول ليهم ::: هيييه خلوا بالكم ولموا شفعكم عليكم في مجرم مغتصب اطفال سكن في حيكم.....