بالله زول حريف يمشي ينكت لينا الفيديو بتاع والي النيل الأبيض وهو ينهر في المواطنين ويخاطب طفل صغير (يبدو ذلك من صوت الطفل) جابت ليها نهزرة للمواطنين الوالي دا كلموه الشفع الصغار ديل هم أسياد الثورة وهم السايقين الدرداقات وهم المستقبل
معقولة يا عبدالعظيم بسرعة صاحبنا الكان مصاقر المنبر بسرعة انتفخت اوداجه وظن المنصب تشريف ما تكليف قول ليه لو دام لغيرك لما اااااااااااااااااااااااااااااااااالت إليك ولله يا وراق ما كنت دي المحرية فيك
09-24-2020, 09:28 PM
Arif Nashed Arif Nashed
تاريخ التسجيل: 05-12-2014
مجموع المشاركات: 12692
يمكن الشافع النهرو الوالي يكون عضو لجنة حي يعني سيد الجلد والرأس في الثورة يمكن الشافع النهرو الوالي عضو لجنة مقاومة برضه سيد الجلد والرأس في الثورة يمكن الشافع النهرو والي الكوفة زول مواكب يعني هو أساس الثورة الجابت الوالي وجابت الجاب الوالي زاته
ولا شنو يا ناس
هو والي شغلته ينهر وينهزر في الناس؟ ولا المعنى شنو يعني
09-24-2020, 09:53 PM
عبدالعظيم عثمان عبدالعظيم عثمان
تاريخ التسجيل: 06-29-2006
مجموع المشاركات: 8399
دا الفيديو كما ظهر في قروب البورداب، عاوز معالجة،،
...... وراق اخلاقو ضيقة شديد ما اخلاق حاكم الاولاد ضحكوا عليه هههههههههههها اسكت هسسس دي تقولا لاولادك في ولسا العصر تقيل جائي مفروض يستقيل، هذه ليست اخلاق حاكم، ....... وراق اخلاقو نتشة ادناهو مكتوبي لصديقنا قال حدو الخرطوم ما بقدر يمشي لاهلو في الدويم
تمشي الدويم اهلك طوالي النهج دا لو استمر الخرطوم بمنعونا منها الجنجويد ديل،
...... دي مداخلاتي في قروب البورداب وراق فيهو، ما رد بكلمة،،
09-24-2020, 11:20 PM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
يا عبد العظيم قبلما تفتح بوست مفروض تجهز عدة الشغل مسألة نادو لينا البنا يبني لينا الجنة دي ما كل مرة بتظبط تصرف وراق تصرف غير انساني و يجب ان يحاسب نفسه على هذا التصرف بالإستقالة او على السيد رئيس الوزراء ايجاد البديل واقالة وراق خلال ال 24 ساعة القادمة هذا الشخص و بهذه الطريقة المبتزلة اثبت بأنه لا يصلح ان يكون والياً و أهل النيل الأبيض اهله وهو لم يحترمهم فكيف اذا كان والياً في ولاية أخرى؟
09-24-2020, 11:44 PM
Gafar Bashir Gafar Bashir
تاريخ التسجيل: 05-02-2005
مجموع المشاركات: 7220
بالغ وراق و الله ما اتوقعتا التصرف دا ..غايتو اللمام يكون هدا فيهو الله يهديهو .. عليه تقديم استقالته او على رئيس الورزاء ايجاد البديل من لسته البدلاء خلال ال 25 ساعة القادمة و اقالة وراق فوراً حتى لو اعتذر , فليذهب غير مأسوفٍ عليه, و بهذا التصرف يكون وراق قد ارتكب اربعة حماقات , الأولى انه اساء لنفسه و حط من قدرها , الثانية انه اساء لحزبه المحطوط اصلاً من قدره و هو في الحقيقة ليس له اي قدر , الثالثة اساء للحكومة ممثلة في مجلس الوزراء , الرابعة اساء لمن ضحوا بأرواحهم و من ضحو بوقتهم من هؤلاء الشباب لإقتلاع النظام البائد , عليه يجب اقتلاع وراق اقتلاعاً عاجلاً غير آجل
لم اعهد الاخ العزيز اسماعيل وراق هكذا ، عشت فترة من الزمن في الرياض في السعودية وكان الاخ اسماعيل شخص في قمة الأدب والاخلاق الكريمة والهدوء ، وستظل هذه الصورة مرسومة عندي ، فلنبحث عن السبب الذي دفعه لذلك ، وهو عضو في المنبر ده وأتمنى إنو يجي ويوضح الظروف والملابسات التي دعت إلى ذلك
قلنا ليكم دخلة الولاية بي سقف البرادو سلوك إنقاذي يعني بعدها تتوقع كل صلف الإنقاذ ألذ مافي المشهد إنه متوقعهم يسكتوا بعد نهرته :) والله راجل طيب خلاص ماخد مقلب كبير في روحه
09-25-2020, 04:49 AM
عبدالعظيم عثمان عبدالعظيم عثمان
تاريخ التسجيل: 06-29-2006
مجموع المشاركات: 8399
نهير ونهزرة الناس من قبل الحاكم حاجة كعبة شديد مسيئة للحاكم نفسه أولاً ومسيئة لثورة ديسمبر غايتو وقعت مع لجان المقاومة يا والي النيل الأبيض ما مفروض تفقد الناس بالطريقة دي الشافع ذنبه شنو تنهروا كدا سألك من العيش تقوم تنهره كذا
زي والي الكوفة دا كان طلبوا منه تقديم تقرير أداء أو إقرار ذمة مالية حيعمل شنو بي أخلاقية الضيقة دي شكلوا حيتمرد
سؤال عن سعر العيشه من شافع ما قادر تتحمله يا زول الحكم دا عاوز مسؤلية وبال طويل النهزرة والنهير ما بنفع مع الجيل الراكب رأس دا
09-25-2020, 05:40 AM
عبدالعظيم عثمان عبدالعظيم عثمان
تاريخ التسجيل: 06-29-2006
مجموع المشاركات: 8399
الحساسية في التعامل مهمة جدا علي المستوي الخاص ناهيك عّن العام ثورتنا عظيمة ونريدها مدرسة لإرساء السلوك القويم بين المسئول والشعب ما شاهدته في الفيديو لا يشبه اسماعيل وراق الذي اعرفه جيدا
09-25-2020, 06:20 AM
Mutasim Idris Mutasim Idris
تاريخ التسجيل: 04-03-2019
مجموع المشاركات: 2435
مدرسة الانقاذ ياااخ لم ينجوا منها الا من رحم ربي.. الزول دا نسي روحه واتقمصه (الكوز) الجواهو. هسسسس اسكت.. الشفع ديل لما الكيزان قالوا ليهم (الحسوا) ردوا ليهم (يا انت يا وطنك). غااايتو.. سلام عبدالعظيم وضيوفه.
09-25-2020, 06:39 AM
نعمات عماد نعمات عماد
تاريخ التسجيل: 03-08-2014
مجموع المشاركات: 11404
هيبة الدولة ياخ ولا قول هيبة الوالي الناس تسكت في حضرتو وتأمن علي كلامو وتستحسنو قريت انو قال اعتذر ماقاصد الشافع دة 😆 قاصد زول غيرو لكن تزامنت معاهو يعني قاصد زول كبير😆😆 العذر الاظرط من الذنب
09-25-2020, 06:55 AM
عبدالعظيم عثمان عبدالعظيم عثمان
تاريخ التسجيل: 06-29-2006
مجموع المشاركات: 8399
انا ماسك خشمي وما قادر أردم الزول الكفوة دا والي الكوفة ما تصعبها علينا بحق زمالة المنبر إتعدل يااااخ ما هاين علينا البتسوي فيه دا أنا ماسك نفسي عن كفاوي الزول دا من يوم اللاندكروزر قلنا الله يعوضنا في والي النيل الأبيض لكن كمان تصل إلى نهير المواطنين أصحاب المصلحة في التغيير والمكتوين بنيران الغلاء وضنك العيش
لا لا دي ما بتتبلع ياااخ
09-25-2020, 07:00 AM
عبدالعظيم عثمان عبدالعظيم عثمان
تاريخ التسجيل: 06-29-2006
مجموع المشاركات: 8399
سمعنا طراطيش كلام ناس الجبهة الثورية قالوا عاوزين ولاية النيل الأبيض وبي كدا والي الكوفة بكون قنطر روحه ويمكن... بقول يمكن يكون وصلته طرطشتة الكلام ودمه فار ولقى الجنا دا قدامه ورشاو بقول يمكن
09-25-2020, 08:47 AM
عبدالعظيم عثمان عبدالعظيم عثمان
تاريخ التسجيل: 06-29-2006
مجموع المشاركات: 8399
اعتذر دي وين يا أب سن؟ غايتو لحدي أمس بالليل كان بقول الشافع قليل ادب اتلفظ علي وانتو قطعتوا الفيديو .. بحسب ما وصلنا
Quote: كنت في الدويم لحضور اجتماع مجلس جامعة بخت وبعد انتهاء الجلسة الافتتاحية ذهبت لقرية وكرة لأداء واجب العزاء في المرحومين حسن الطاهر وزايد رابح وأنا في طريقي للسلام على الاسرة علمت ان الكبري تم اغلاقه بواسطة عدد من الشباب ففضلت عدم زيارة الاسرة والذهاب للكبري وحل المشكلة وبالفعل وجدت ان حركة السير تعطلت مما سيعيق مصالح المواطنين. نزلت لهم وطلبت من القوة العسكرية المرافقة عدم مرافقتي وبالفعل جرى بيني وبينهم نقاش رغم تشنج بعضهم. ردي كان لشاب صغير تلفظ بعبارة غير مقبولة ومعه شاب اخر شجعه على ذلك، ويا ليت المصور اتى بالفيديو كاملا دون بتر او تجزئته بما يحقق اجندته وفي خاتمة الامر تم فتح الكبري. رد الوالى من قروب واتس
طبعاً ردوا الفوق دة مفهوم بالنسبة لي كديكتاتور فرحان بالمنصب وظهرت عدم قدرته على فهم الشارع في كل تصرفاته
لو كان زول عادي زي وزيك كان حيمشي يفتش الشافع ويعتذر ليه في بيته ويتصور معاهو ومع أسرته زي ما بعملوا أغلب المسؤولين في الحالات دي .. وعلى فكرة فيها شغل شو وإعلام رهيب بس يجيب ليكم الفهم من وين الحجاج دة!
09-25-2020, 09:06 AM
عبدالعظيم عثمان عبدالعظيم عثمان
تاريخ التسجيل: 06-29-2006
مجموع المشاركات: 8399
هنالك رد منتشر من السيد وراق والي النيل الأبيض(لا أعلم مدى صحته) سوف أنقلته هنا
Quote: الرد لم يكن موجهاً للطفل الذي قال أن سعر الرغيفة وصل 30 جنيه ولو لاحظتي أن كلام الطفل كان أثناء ردي أي أن الرد كان موجه لكلام قبل كلام الطفل الحاصل أنه مجموعة من الشباب وأغلبهم أطفال يقفلوا كبري الدويم مما تسبب في إعاقة حركة المرور وصلت للشباب وتكلمت معهم وأثناء الحديث طلبت منهم الهدوء علشان أستمع لهم بدلاً عن الهرج والمرج كان بالفعل يتكلم أكثر من عشرين شخص في وقت واحد
هل يعقل أن أنفعل من أول الكلام الحوار دا مدته ساعتين أو أكثر تم بتر الفيديو والترويج للعشرين ثانية دي
أحد الأطفال تفوه بعبارات غير مقبولة فكان الرد الحاسم بأن يصمتوا وبالفعل أشرت لعبارة الطفل
المؤسف صاحب الفيديو حذف الكلام وركز على الكلام الذي يخدم أجندته
ليته سكت والله شنو كان الرد الحاسم دي الزول نسى إنه هو الحاكم
ماياهو يا احمد قدر فهمو ومشهادو وظنه اعتذار مش قالوا ابو نواس همز هرون الرشيد وهرون نط وامر بقتلو اعتذر ليهو وقال قايلك الست زبيدة زوجة هرون الحس الوطني والقيادي والانفعال بقضايا الناس يا احمد دة ما بدرسو تنفعل مع قضاياهم ولاهم بهرجو وبكوركو ماباقي ليهو الا يقول اعتقلوه
نعم يا عبد العظيم الرد منتشر في اسكرينات الغريبة كان ممكن يكتب الكلام دة في صفحته الشخصية وكان ممكن يكتب في الصفحة القال عملها لناس الولاية وللرد على استفسارات الناس لكن يكتب شنو هو المسكين دة! الناس لايمينو على تعنيف شافع واحد يقوم يقول عنفت شفع كتار؟ في الأول قال الشافع اتلفظ وتاني قال عشان كان في جوطة !!
أب سن ا لله يرضى عليك كلمة اعتذار دي تفها من خشمك .. الزول دة شايف روحه حاجة كبيرة شديد والناس الحوالينو ديل كلهم ما فاهمين حاجة نجيب ليكم تواضع من وين حبايبي أنا !
09-25-2020, 11:08 AM
عبدالعظيم عثمان عبدالعظيم عثمان
تاريخ التسجيل: 06-29-2006
مجموع المشاركات: 8399
والي الكوفة مفروض يعتذر لمواطني النيل الأبيض عن سوء التصرف مع مطالب بسيطة للمواطنين بسطاء وبعداك بي دربه يمشي علي الخرطوم ويسلم حمدوك مفاتيح ولاية النيل الأبيض ويتم تعيين حاكم بسيط يشبه البسطاء يسمعهم وينزل الي طلباتهم وأهم شئ ما يطلع من فوق سقف اللاندكروزر ويلوح ليهم بيدينهم وهو يتلفت يمين ويسار
Quote: Abubakr Ahmed Abbas غايتو لي زمن قررت خفض تصنيف الشبح أحمد محمد عمر لدرجة عبد العظيم عثمان ود القوز، مستغرب كيف كنت خاتيهو في درجة واحدة مع حافظ بشير!!
بي عدلك .. بس النبي فيك ما توصلني درجة عاطف عمر
__________ بالمناسبة في البداية شككت في وجود الفيديو وجابوهو ليك بعديها عملت رايح .. فهل لديك أي مشاركة في موضوع البوست تستاهل يرفعوها ليك فوق ولا نخليك تتونس مع عاطف تحت؟
هسه دو لو كفيله في السعودية كان نهروا كده . لن يستقيم حالنا الا اذا عرفنا جميعاً إن مبدأ الخدمة المدنية هو معناه انك تخدم من يدفع راتبك من ضرائبه وليس العكس من عسكري المرور الي الرئيس هسه لو ما الاطفال والشباب ديل كان تكون لي هسه مع طال عمرك فسبحان الذي أعطاك ملكاً وعلمك الطلوع من سقف البرادو
09-25-2020, 12:13 PM
عبدالحفيظ ابوسن عبدالحفيظ ابوسن
تاريخ التسجيل: 06-24-2013
مجموع المشاركات: 22319
حدثني واحد من ناس حيو في الخرطوم دق الصيوان وقفل الشارع بالاحتفالات لحظة تعينو والي قال مابعرفو شاف الزيطة والزمبريطة وسأل كلموه دة والي النيل الابيض الجديد بعدينك هو يا احمد عمر قايلو تبرير منطقي عشان نحذف اعتذار دي قال ليكم انا مانهرت شافع واحد .. نهر ناس كتار وكدة
09-25-2020, 12:32 PM
بدر الدين الأمير بدر الدين الأمير
تاريخ التسجيل: 09-28-2005
مجموع المشاركات: 23011
يبدو لي أن القضية اكبر من قضية العنف اللفظي للسيد وراق هل نكنا بحاجة إلى ولاة سياسيين في الفترة الانتقالية ؟ هل قضايا الولايات قضايا سياسية ام قضايا حياتية؟ ألم ينتهي دور الوالي السياسي مع ذهاب نظام الحزب الواحد او المهيمن في الفترة انتقالية؟ ربما كان المطلوب كفاءات إدارية غير مسيسة لتنفيذ برنامج حكومة الثورة ولس واليا سياسيا منتميا لحزب باحندة معينة تتغير حسب لونية حزب الوالي هل تتخيل ان ينحاز الوالي الحزبي لغير حزبه وهو العارف ان الفترة انتقالية لمرحلة الانتخابات؟ بكل اسف قحت اضاعت فرصة للتغيير بطمعها في السلطة الانتقالية اولا وبمحاصصاتها ثانيا. يبقى اللوم مش ع الوالي بل ع الحاضنة التي اتت به واليا
09-25-2020, 01:04 PM
علي عبدالوهاب عثمان علي عبدالوهاب عثمان
تاريخ التسجيل: 01-17-2013
مجموع المشاركات: 12484
لجان مقاومة الدويم نزلت بيان في صفحتها أدانت التصرف في نفس الوقت خرج بيان تاني في الاسافير لكن بدون رابط لصفحة يمكن الاحالة اليها باسم لجان الدويم برضو يتهم الشباب بانهم ليسوا لجان مقاومة وتابعين لحزب المؤتمر السوداني و يرفض التتريس بعد تعيين الوالي المدني! واضح انه بيان مسلفق و سيده عايز يضرب المؤتمر السوداني
09-25-2020, 06:30 PM
Abdullah Idrees Abdullah Idrees
تاريخ التسجيل: 12-05-2010
مجموع المشاركات: 3692
غايتو لو جاملناهو خاالص، ح نقول انو ماجاهز ابدا عشان يتولي منصب سياسي او منصب عام. الزول الناجح في العمل العام لازم يكون بعرف يسمع، بي اضنينو الاتنين، البتسمع الكلام الشين والبتسمع المدح علي السواء انت كزول معارض ٣٠ سنة مفروض تكون اتعلمت كتير جدا وعرفت انو الغطرسة والصلف ما حاجة كويسة وما بتصنع سياسي ناجح. وطالما ما اتعلمت اي حاجة وجايي تكرر اخطاء القبلك يبقا انت ما جاهز.. الخلاصة step down وامشي،واصل تعليمك او اتوكل علي الله شوف ليك شغلانة تانية السياسة دي ما بتاعتك.
09-25-2020, 06:57 PM
عبدالعظيم عثمان عبدالعظيم عثمان
تاريخ التسجيل: 06-29-2006
مجموع المشاركات: 8399
والي الكوفة بتاع النهيير دا ما ظنيته يستقيل هو إعتذار ساي ما عاوز يعتذر أخذته العزة سلفقة ساي عاوز يمشي الموضوع لكن يا والي الكوفة إنت موضوعك إستحمى وقت تسقط جوة قلوب الناس تاني ما بتقدر تسوسهم.. أي حاجة ممكن تتفهم إلا الغطرسة هي زاتها الغطست حجر نافع لحس الكوع إنت جاي تعيد العطرسة سيرتها الأولي وفي عهد الثورة كمان
ما عندك سكة تانية الإستقالة بس
09-25-2020, 09:34 PM
يحي قباني يحي قباني
تاريخ التسجيل: 08-20-2012
مجموع المشاركات: 18708
والى الغفلة فى الفيديو لم يكم مربع يديه وجسمه فى حالة سكون وأنه فقط يتحدث، بل كان يتكلم وذارعه ممدودا ومتحركاً فى التدقيق فى اللقطة ستجد منظر حركة الذراع متسقة من بداية الفيديو حتى نهايته ومن ضمنها حركة السبابة وهس دلالة على أن الفيديو فى اللقطة المتدولة لم يتم التلاعب فيه. هذه الجزئية وحدها تدينه لو إتكلم دقيقة أو ساعتين ما بتفرق
ياخ الحجاج بن يوسف لو الأيام دى بقوهو والى ما بتصرف بالطريقة دى .. !
09-26-2020, 03:27 AM
نادر الفضلى نادر الفضلى
تاريخ التسجيل: 09-19-2006
مجموع المشاركات: 7022
الأطفال أحباب الله مافي شخص بيقهر طفل ويكون اخلاقه كويسة الزول البنهر شافع وسط الناس ما تتوقع منه خير نهائي الزعماء دايماً بحاولوا يستغلوا الأطفال في البروباغاندا تلقائية الأطفال بتصنع الابتسامة والتعامل الحنين معاهم بصنع ابتسامة وراحة نفسية وبخلي الناس تحبك لأنها بتحب الأطفال بالغريزة رجب طيب اردوغان عندو مواقف كتيرة مع الأطفال .. ورغم إنها عادي ممكن تكون مصنوعة لكن التعب في انتاجها بوريك لياتو حد التعامل مع الأطفال مهم لشخصية الزعيم
أردوغان بخطب في الناس ومشغول بالقراية من ورقة والشافعة تشيل وتكورك ليه (جدو طيب) ما قال سكتوها بل بحركة مسرحية جميلة جداً رد ليها (أفندم)
والله في بلدنا دي وفي ظل الظروف الإقتصادية بالغة التعقيد دي المفروض أي شخص في موضع مسئولية إكون راكب حمار عديل بي سرجو ويدافر وسط المواطنين ويشاركم في كل شئ عشان يعرف عايزين شنو بالضبط ما يقعد إتعنطز عليهم ويسوي فيها رئيس الولايات المتحدة. المفروض الواحد إذا ادوهو فرصة يحكم أول حاجة يشبع في البكا عشان الحال المايل ما يعديها فشخرة وحرس. هو عليك الله الزول البعاين لي معاناة الناس في بلدنا كيف بتجيهو نفس للفشخرة والشوو.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عبدالعظيم عثمان
أيمن نواى على
Arif Nashed
علي عبدالوهاب عثمان
عبدالمنعم الطيب حسن
محمد البشرى الخضر
خضر الطيب
ترهاقا
Mutasim Idris
نعمات عماد
عبدالحفيظ ابوسن
بدر الدين الأمير
Al Sunda
Abdullah Idrees
يحي قباني
Abureesh
فيس بوك
تويتر
انستقرام
يوتيوب
بنتيريست