يوم خطبت فى الناس وكنت امامهم في صلاة الجمعة

Quote: إذا كان كلامك صاح يا بشراك بجنة عرضها كعرض السموات والأرض

Quote: قام ناصر سالنى شو حايكون موضوع خطبة الجمعة

Quote: في الليلة ديك قصدى فى الخطبة ديك نجمت ليك صدام حسين نجام قبورة بس تانى يوم صدام فك فينا صاروخ باتريوت ربك ستر الصاروخ وقع فى منطقة خلوية اسمها ام قرن شفتى كيف بركات الإمام بدرالدين الامير

Quote: قبيل الصباح لاقاني الأمام بتاع الجامع الجمبنا بعد سلم علي قال لي عايزك في خدمه ياعزو وعارفك مابتخزلني لأني قبل كدا طلبتها منك وماقصرت معاي والله وعشان كدا جيتك بقلب قوي وعشمان فيك كل خير قلت ليهو خير ابشر تب مافي عوجه اتفضل اطلب تب يامولانا قال لي انا ان شاء الله الجمعه الجايه مسافر البلد لمناسبه وعايزك تسد لي وتعمل الخطبه وتصلي بالناس زي المره الفاتت انا عارف كترها بس والله ماعندي طريقه غيرك كل الناس الطلبتا منهم اعتزروا وانت زول ماشاء الله بتصلي معانا طوالي ومتعلم وقبل كدا جربت يعني مامنك خوف اها طبعا انا قبل كدا الراجل دا زااااااااتو وكرني ليك في صلاة جمعه خلاني مضحكه للبسوي والمابسوي يلا طوالي اتزكرتا المأسي الحصلت لي في المره الفاتت وقلت ليهو والله ياريت ياشيخنا بس انا زاتي الجمعه الجايه مسافر شندي ل مناسبه معليش والله انا اسف المهم الزول اتقبل الكلام وقال لي خير مامشكله انا بتصرف ومشي مني ع كدا اها ارجع بيكم للخطبه العملتها انا المره الفاتت او بالأحري الكموديا العملتها غصبا عني اها جاني شيخنا دا زاتو وقال لي انا مسافر ومالقيت زول غيرك وانت زول ملتزم وبتصلي معانا ومتعلم ومثقف والموضوع بسيط بس عايز منك حبة شجاعه ادبيه وانا عشان اسهلها ليك بكتب ليك الخطبه واديك ليها جااااااهزه ماعليك انت الأ تقراها وبس المهم الزول دا حنكني بكلامو دا وكبر لي راسي اني زول ملتزم ومتعلم ومثقف والحنك دا المهم اداني الخطبه المكتوبه وسافر الكلام دا كان يوم الخميس وطبعا بكره الجمعه اها جبت الخطبه البيت وجيت قلت اقراها عشان اركزها كويس قمت فتحت الورقه عليك امان الله التقول كاتبها بكراعو الشمال لقيتا ليك مابتتقري نهائی والله غير بسم الله والحمدلله تاني غلبني اقرأ فيها حرف واحد اها الفار لعب في عبي في الورطه الورطتا فيها نفسي بشلاقتي وهبالتي دي ياخ انا مالي ومال الخطب والجمعه يصلوا ولا مايصلوا ياخ انا لمن امشي صلاة الجمعه واجي مابعرف الأمام قال شنو سمع ساي مابسمع كويس خلي اجي اقولها انا اها بقيت افكر في الموضوع البقولو في الخطبه دي ياربي اتكلم عن شنو دا اذا كان ربنا طلق لساني وماغمرت وقدرت اقول لي حاجه عليك امان الله الليل داك كلو عديتو ليك تفكير ومره امشي ابحت لي في كتب دينيه قديمه كدا ألقاها مابتتفهم اقفلها واجي راجع وتاني ارجع افكر المهم ادخل وامرق زي ام العروس لمن الواطه صبحت والنوم يضروا لي ضرووووووووره ياخ مخي دا حسيت بيهو ورم من التفكير اها قبل الشمس تشرق صحيت اختي قلت ليها قومي غسلي لي جلابيه واكويها لي مكوه سيف قعدت تطنطن غسيل شنو ياخ وحركات قمت دخلت يدي في جيبي طلعت لي عشرين جنيه غمتها ليها عليك امان الله نطت زي الشيطان جرت جري خمشت الطشت والجردل وخمشت الجلابيه وقعدت تغسل غايتو الحمدلله بس انا عايش لي مع ناس كدا عباره عن يهود الواحد لو مادفعت ليهو رشوه مابخدمك ابداها ليك من ابوي قاعد لي زي بتاع المرور لو ماغمتا ليهو عشره جنيه في الداخله وعشره جنيه في المارقه مابزح ليك من الدرب وامي نفس الوضع من ولدتني ولحدي هسي انا بدفع ليها في اقساط ملايات وستاير وصرفات صناديق ماعارف الاقساط والصرفات دي بتنتهي متين واخواني برضو بس ديك ناس بواقي ساي يعني لو عندك باقي بنطلون باقي جزمه باقي ريحه باقي رصيد باقي فكة حديد ف بتمشي امورك معاهم عادي اها هسي الشيطانه دي من قبضت العشرين جنيه قامت جاريه وشها ماغسلتو المعفنه والله لمت في الجلابيه دي هردتا هرد لمن قلت ليها كفاها بتشرطيها وخلاص اجدعي ليك سروال من سراويل ابوي ديل غسليهو لي معاك قالت لي يازول هوي سروال شنو نحنا مااتفقنا ع سروال قلت ليها انتي متخلفه ولا شنو يعني في رايك كدا وفهمك لو ربنا اداك مخ ح ألبس ليك الجلابيه دي بدون سروال وامرق ميطي زي الله ماخلقني؟ ولا تكوني عايزاني تاني ادفع ليك عشرين جنيه حتي تغسلي لي سروال ابوك دا؟ قالت لي فيها شنو لو دفعت لي ؟ قلت ليها ادفع ليك تاني ليه سروال هو ولا بطانيه؟ المهم جابت سروال ابوي وجات وقالت لي انا السروال دا بغسلو ليك بس ابوي لو عرفك لبست سروالو والله العظيم الله اعلم تاني تلبس ليك لباس لمن تموت ح تعيش عريان عمرو كلو لأنو ح يشويك شييييييه دا اذا كان ماملصو منك في نص الشارع اها بيني وبينكم كدا البت دا لمن قالت كدا والله لمن بعلت ريقي بس كمان انا مزنوق ماعندي حل غير كدا قامت قالت لي النسألك انت ماشي وين مقومني من الصباح كدا اغسل واكوي ليك وجلابيه وسروال ؟ قلت ليها الليله صلاة الجمعه علي انا طبعا انقعت ضحك لمن بكت قالت لي عليك الله انت جادي؟ قلت ليها اي والله جادي وامام الجامع مسافر وطلب مني اصلي بالجماعه قالت والله امام الجامع ماعندو عقل بقرش جمعة شنو البتصليها انت وقعدت تضحك قالت لي والله الليله كان امشي اصلي الجمعه في الجامع واشوف عبدالرحمن السديس دا قلت ليها لو انتي مرا اشوفك في الجامع دا والله اكسر رقبتك يامعفنه اها الهدوم اتغسلت واتكوت وجابوا الفطور اتزكر كان بفسيخ والواطه مسخنه وانا ضربت الفسيخ دا لمن الله غفر لي واستحميت ولبست جلابيتي وسروال ابوي وبقيت ادخل وامرق لمن الوقت جا واتوكلت ع الجامع اقسم بالله التقول ماشي المشنقه قلبي مامطمن نهائی اها وصلت الجامع ودخلت ب باب الأمام عشان اطلع المنبر ختيت كراعي في طرف السلم كدا وانا ارجف زي الهبابه اها مع الرجفه وسروال ابوي العريض كرعي اتشربكن ف جيت مندرش ع قدومي في السلم لمن لحقني حاج الطاهر المؤذن خماني خم من اباطاتي هو يرفع فيني لفوق وانا ماشي منخرت منو لتحت ماخلاص عصبي مات كلو بقي يقول لي ياولدي قوم ع حيلك مابقدر ألاويك انا عندي غضروف المهم بالجلاله قدر وقفني ع حيلي قال لي بتقدر تطلع باقي السلم دا ولا انادي لي ناس يجوا يطلعوك انا والله لابقدر عليك ولا بكضب قلت ليهو لا خلاص بطلع براي اها قمت اكربش لمن وصلت فوق مسكت في حديدة المنبر عايز اقول السلام عليكم واقعد في الكرسي لحدي حاج الطاهر يأذن حتي ابدأ الخطبه ف مسكت حديدة المنبر كدا وقبل اسلم ع الناس عاينت كدا للناس لقيتهم صغااااااااااااااااار ولشقاوتي اليوم داك الجامع ملان لخشمو لفضيحتي انا اها لمن شفت المنظر دا لمن راسي لفه وبطني طمت قمت كنكشتا في المنبر دا بيدي الأتنين قلت مااقوم اجي متكايت في الناس ديل من فوق اكسر رقبتي دي ساي بدرب صلاة الجمعه دي المهم فتحت خمشي مرتين وسديتو زي البتشهق حتي المره التالته فتحتو وقلت ليهم براحه كد السلام عليكم وجيت واقع في الكرسي ارجف وعرقان ومخي كابس اقسم بالله ماعارف اقول شنو للناس الراجني تحت ديل بقيت افكر ياربي اشرد بالباب الورا دا واخليهم يتصرفوا براهم؟ ياربي ادوخ واعمل فيها غمران ؟ ياربي انا اسوي شنو الليله اها في عز تفكيري دا بطني لوتني ليك لمن عيوني دمعن طبعا خلاص الفيسخ بالشطه الفطرت بيهو هسي دا اشتغل فيني وقال لي انعدل ساي وحات الله جنس وجعه ولوايه قربت اتلب من المنبر دا واجري الحمام بس مافي طريقه اها بقيت ماسك بطني ومدنقر وحاج الطاهر شغال يأذن بتحت وانا اقول الاذان دا انشاء الله مايقيف الليله اها الأذان تم وحاج الطاهر قعد مع الناس في الصف وبقي يعاين لي منتظرني اقوم وانا مصنقر فوق نص واعي ونص مغبي والفسيخ عايز يمرق بنخرتي وغير كدا متمحن في الشي البقولو فصاحتي دي كلها راحت المهم اتقدرت ياااااااالله قمت ع حيلي راسي لافي وشايف خيوت خيوت عاينت في الناس ديل كدا لقيتهم كلهم مجحمين فيني وحاج الطاهر التقول حاسي بي راسي لافي ياشر ع العصايه يعني امسك العصايه الجمبك دي بتسندك وانا ناسي العصايه نهائی اها مسكتها وبقيت منشحط كاضم لابودي لابجيب والمروحه قدامي شغاله فووووووو دايره تقطع رقبتي اها بعد مسافه كدا فتحت خشمي وقلت بسم الله والحمدلله والصلاة والسلام ع رسول الله وكضمت تاني ولا حرف لاني متصنج ماعارف لي حاجه اقولها اها فكرت كدا قلت اتكلم عن غلاء الأسعار والمعيشه الصعبه دي قلت ليهم كلنا نعلم ونعي وندرك لما تمر به البلاد هذه الأيام من ندرة في السلع وغلاء في الاسعار وهذا كله بسبب هذه الحكومه في المقام الأول وبسبب جشع التجار في المقام التاني اها فجأه كدا اشوف ليك واحد لابس بنطلون وقميص ونضاره سودا دوكو وانا قبل ادخل الجامع شفت موتر واقف بره فقلت خلاص دا اكيد بتاع امن الليله يومك اسود زي السجم ياعزو ود الجعليه الوداك تهبش الحكومه شنو اها الليله برفعوك في التاتشر المظلل ويملوك شطه بتحت لمن تقعد تنطط اها طوالي كتلت ليك ملف وقلت ليهم بس نرجع ونقول انو حكومتنا الرشيده هذه لاذنب لها لأن مانمر به الأن تمر به كل الدول بسبب الازمه العالميه ياخ اللابس النضاره دا قطع قلبي الله لا كسبو اها قلت احسن اغير الموضوع دا قلت ليهم من الطبيعي ومن مخلفات اي ازمه انتشار الفساد والجريمه والعنوسه وسط الشباب والشابات اها في اللحظه دي شايف ابوي جا داخل الجامع يادوب طبعا لمن شافني معلق فوق وبخطب في الناس اقسم بالله لمن ضحك وهوزز راسو وقعد وبقي يعاين لي وانا خلاص اصلا ملبوش وجية ابوي دي لبشتني زياده لانو خايفو يشوفني انا لابس سروالو من تحت ويطين عيشتي اها بعلت ريقي وقلت ليهم لذالك دورنا نحنا كمجتمع وك اباء وأولياء امور انو نسهل الزواج للشباب والشابات تجنبا لحدوث مالايحمد عقباه طبعا موضوع العرس دا وقع لي في جرح وعجبني لانو عدم العرس دا ياهو المارضني انا زاتو ف اندحت ليك في الناس ديل لاخليت لابقيت ليهم وقلت بعد دا ياود ياعزو اخد ليك قعده وقوم ع الخطبه التانيه وانفكا من البرنامج دا اها قعدت مسافه كدا وقمت ع حيلي ومع قومتي كدا اشوف ليك محجوب صاحبي جا داخل وطبعا دا الكنت خايف منو زااااااتو لأنو محجوب اهبل وماح يقعد ساي وفعلا كلامي في محلو محجوب من شافني مشنوق فوق في المنبر دا لمن خت يدو في خشمو من الضحك ومشي اترزع هناك في كوع الجامع وبقي يعاين لي ويضحك اها قلت مااشتغل بالحيوان دا كتير واحسن اركز في خطبتي دي قلت ليهم لازم ولابد من تسهيل عادات الزواج وتقليلها بقدر الامكان ومافي داعي للتبزير والبوبار والأستعراض نرضي بالقليل ونستر اولادنا وبناتنا كما قال الحبيب المصطفي عليه الصلاة والسلام اقلهن مهرا اكثرهن بركه وانا بوجه كلامي هذا للامهات بالذات اها في اللحظه دي محجوب بقي يأشر ع بيت ناس رشويتي ويعمل لي حركات بيدو كدا انو ماااااااااااااافي ليك ويضحك براهو هسي عليكم الله زي محجوب دا جاي يصلي ولا جاي يلعب؟اها قبلت منو كدا وقلت ليهم الامهات هن اللاتي يبالغن في تكاليف الزواج برضو محجوب ابن الكلب بقي يطلع لي في لسانو ويكاوي فيني والله قربت اتف ليهو في وشو مش قلت ليكم دا اهبل ساي؟ اها قلت ياجنا بعد دا احسن تختم ساي محجوب المعفن دا مابخليك تواصل اها دعيت دعاء طويل كدا وقلت ليهم قوموا لصلاتكم يرحمكم الله اها نزلت من فوق ركبي يطقشن وخايف اقوم اتكبكب في الصلاة واجوطا لاني ملبشوش لبشه ماطبيعيه اها الحمدلله قدرت صليت كويس والصلاة انتهت قمت جاري جري وقفت لمحجوب جمب الباب عشان اكتلو في الجامع دا قام شافني وقام جاري بالباب التاني سكيتو مساااافه مالحقتو تفيت ليهو وجيت جاري البيت جري قلت الحق املص سروال ابوي قبل يجي يشنقني بيهو المهم غايتو داك كان يوم الله لا عادو......... تمت الحمدلله صلوا ع النبي عليه الصلاة والسلام.

Quote: يا بدر الدين عرب قطر بوحدتكم العسكرية خلوك تصلى بيهم عشان صلاة الجمعة فيها خطبة وصلاة جهرية لو كانت أى صلاة تانية سرية ظهر أو عصر كان بنطوا فيها وبيعملوا خلفاء