بسم الله الرحمن الرحيم سفارة السودان بالرياض .... لم تسقط بعد أكثر من ثمانين محادثة علي مدار ثلاثة أيام ولم يحالفني الحظ بالاستماع الي صوت أي فرد من السادة العاملين بسفارة السودان بالرياض غير صوت فتاة المجيب الآلي والتي ترحب بي وتطلعني علي مواعيد العمل في السفارة من الاحد وحتي الخميس يوميا من الساعة كم ماعارف للساعة الثالثة والنصف مساءا ومن ثم تقوم بتوضيح ارقام التوصيل لأقسام السفارة المختلفة والتي بحمد لله حفظتها عن ظهر قلب والحمد لله وادمنت الاتصال بها خصوصا عامل السنترال والذي اظل ملطوعا عنده لانه مشغول حتي يتم قطع المحادثة آليا أو القسم القنصلي ( دا بالزات قاصدو لانو عندي شغل معاهو) والحمد لله نجحت كل مساعيي في سماع جرس تلفونه بعد ادخال رقم التوصيلة ولكن هذه المرة ابقى في انتظار من يرفع سماعة الهاتف وأبقى في الانتظار حتي تعود فتاة المجيب لتبدأ الحكاية من جديد وبما ان هذه هي تجربتي الاولي مع هذه السفارة شكوت لاصدقائي من السودانيين عن ارتفاع الضغط عندي بسبب ما حدث .. فنصحوني ان أنسى الموضوع برمته وقد كان والحمد لله أنا اعمل بمنظمة وقد طلبت هذه المنظمة من مستشاريها الاتصال بسفارات بلادهم لمناقشة ان كان للسفارات اي ترتيبات تخص تسهيل سفر مواطنيها الي بلادهم تحت هذا الظرف الخاص بالحظر ومنع التجوال وهكذا اتصل كل المستشارون بسفاراتهم تلفونيا الا السودانيين والحمد لله علما بأن المنظمة قبلت ان يعمل المستشارون من دولهم حتي تعود الأمور الي طبيعتها العجيب في الامر حاولت البحث عن الموقع الالكتروني للسفارة ولم اصدق عيني ..(تشوف فيهو حاجات عجيبة) معقول دي سفارة السودان بالمملكة ! المهم فقدت الأمل في الاتصال بالسفارة لا عن طريق التلفون ولا عن طريق الايميل وعملت بنصيحة الاخوان بأن انسى الموضوع حتي لا يرتفع ضغطي في رمضان السادة وزارة الخارجية انا بس داير أسأل اذا كان عندكم اي فكرة عن مطار الخرطوم بفتحو متين والله كان في اي ترتيبات لاستقبال العائدين في الزمن العلينا دا ولو سمحتو برضو كلمو لينا ناسكم في الرياض يرفعو التلفون لمن سوداني يتصل بيهم وبرضو فهموهم انو السفارات دي من مهامها خدمة المواطنين البدفعو الضرائب والرسوم عشان يوفرو مرتبات الدبلوما سيين خاصة الموظفين الاتعينو في زمن الانقاذ دون وجه حق وفجأة لقو نفسهم دبلوماسييييين (قادر الله) حقا انها لم تسقط بعد
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة