مربع 5 الفيحاء هو الحي المخصص لأساتذة جامعة الخرطوم. أحد الزملاء الذين كانت بيوتهم من أوائل المنازل التي تم احتلالها والسكن فيها وسرقة سيارته أثناء غيابه. بعد مدة طلبت زوجته من قريبها الذي يسكن الحي المجاور لحي الجامعة أن يذهب ويشوف الدعامة طلعوا من البيت ولا لسه موجودين، ذهب وعلم من الجيران أنهم خرجوا، نقر الباب فتحت له إمرأة عرفت نفسها بأنها كانت تسكن في هيكل العمارة المواجه لمنزل زميلنا، قالت ليهو الدعامة طلعوا من كم يوم بعدما كهربة المنزل خلصت وما عرفوا يوصلوا من العمود، وأنا طوال فترة وجودهم كنت بعمل ليهم كل الوجبات والشاي والقهوة وبغسل ليهم ملابسهم ولمن طلعوا كتر خيرهم ما قصروا معاي، قال ليها إن شاء الله أدوكي قروش تقيلة، ضحكت قالت ليهو سجلوا لي البيت ده باسمي، قال ليها لكن البيت ده آنتي عارفاهو بيت ناس فلانة جارتك، قالت ليها كان أي والله هكذا أجابته، سألها قال ليها أدوكي مستند قالت ليهو أيوا، قال ليها ممكن أشوفو قالت ليهو لكن تقراهو في يدي وفعلآ جابت ورقة موقعة ومختومة، تشهد حكومة آل دقلو أنها منحت هذا المنزل للسيدة فلانة الفلانية، وقال ليها الشخص الذي منحها الورقة دي مكافأة ليك على خدمتك لينا ولو قعدنا في الحكم البيت ملكك ولو حصلت حاجة تانية كمان تقاضي بيها من يريد إخراجك من المنزل، أخونا المرسل ليها قال ليها طيب الملابس والأثاثات ما حقة ناس فلانة، قالت ليهو لا لا سجلوا لي البيت بكل ما فيهو،، سلم على فلانة وقول ليها الله يعوضها، ضحك وقال ليها خلاص رتبي البيت. هذه قصة حقيقية، راويها وناقلها وست البيت وزميلنا صاحب البيت كلهم موجودون. منقول.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة