|
Re: مرقتا (Re: Amira Hussien)
|
لا حول ولاقوة الابالله يا لخبر محزن يا الأخت أميرة ربنا يحفظك ويحفظ الأسرة وتعودي الي بيتك سالمة في اقرب وقت وربنا يحفظ العباد والبلاد ويحقن الدماء نتمني لكي السلامة اينما كنتي لا للحرب
| |
|
|
|
|
|
|
Re: مرقتا (Re: محمد نور عودو)
|
هذا ما نقاومه حتى الان والاحباب يصيحو: امرقو امرقو فعلا شئ فيه قهر ان يترك الاناسان داره =ون ارادته (نواسيك)
| |
|
|
|
|
|
|
Re: مرقتا (Re: Ali Alkanzi)
|
الاستاذ الكنزى قاومت وقامت قاومت الخوف من الطلقات الطائشة الاصابت نوافذنا وابوابنا و العربات الفى الحوش …..لكن تعيش اسبوعين من غير ماء ….كان عندى مخزون مياه للشرب تحسبا لظروف العيد ،لكن للاستخدامات التانية كنا بنشترى موية من بتاع كارو بجيبا من البحر بدا البرميل من عشرة حتى وصل لثلاثين ، وقبل اربع ايام من مرقتنا قطعت الكهربا ……حذرونا الناس من تدوير الجنريتر …..لكن ما كان فى طريقة خصوصا بالليل وانت مفترش الارض فكنا ندور للتكيف فقط والانوار مطفية اخر ايام اكتشف اولاد الحى بير فى مبنى جديد جابت موية اتشاركو موتور وخرطوش وبقينا من الصباح نملا البراميل والكهربا من العمود مباشرة
| |
|
|
|
|
|
|
Re: مرقتا (Re: Amira Hussien)
|
بت اختى جزاها الله كل الخير رتبت لينا كل امور المرقة وهى سبقتنا ….وتركت عربيتا بى سواقا فى خدمة اى محتاج وكل الخرطوم بقت محتاجة ….جات العربية واول مرة اشوف الشارع من ١٥ يوم او ازيد……اندهشت من كمية الدعامة فى استوب التحرير وشارع الازهرى السواق سليق ببطء وسلم عليهم وقال ليهم ماشين امدرمان ، اشار واحد منهم بيده امشوا….اقبح منهم واقذر ما شفتا شوارع محترقة جثث متناثرة بيوت مكسرة خراب وبحرى مدينة اشباح الس كانت ستة صباحا اتصلنا بمنظم الرحلة قال استعجلتو مالكم مع انو امس قال البص بتحرك سبعة لكن قال مافى مشكلة تعالو بيتى وصف لينا مشينا …فتح لينا صالون انيق وقال لى اعتبرى نفسك فى بيتك ….كيف عاد ولدى قاعد فى الحوش مع الرجال جات ام شابة معاها اربعة اطفال عديييل جات على حضنتني وقعدنا نبكى اولاد بى هدوم البيت وبى اثار النوم شايلا ليه كيس صغير صمت صمت وحيرة بعد شوية بدت تحكى وين سكنا وكيف خلت شقتا الكانت بتحلم بيها ….النصيحة الشقة فى برج الاحلام فيهو سويمنج بول وجيم زى شقق الامارات وافخم …بعد ما طالهم الضرب وزوجها يعمل فى بلد بعيد….بدات تجيها تلفونات فهمت انها مرقت بدون ما تكلم زول من ناس بيتهم بعد ما زوجها رتب ليها امور الرحلة ….ابوها اتصل كم مرة وقال ليها ارجعى ازو اخوك يجى يسافر معاك وكلام ونقاش كتير …اقنعتهم بانو البص اتملا. بدا المسافرين فى الوصول و وصل البص والس ١٢ اتحرك
| |
|
|
|
|
|
|
Re: مرقتا (Re: Amira Hussien)
|
يا اميرة كفي عن المواصلة مزقتي قولبنا وادمعت عيونا لا خير فينا لا خير فينا لا خير فينا الى الله المشتكي منكما حميدتي والبرهان
| |
|
|
|
|
|
|
Re: مرقتا (Re: Amira Hussien)
|
Quote: اندهشت من كمية الدعامة فى استوب التحرير وشارع الازهرى السواق سليق ببطء وسلم عليهم وقال ليهم ماشين امدرمان ، اشار واحد منهم بيده امشوا….اقبح منهم واقذر ما شفتا شوارع محترقة جثث متناثرة بيوت مكسرة خراب وبحرى مدينة اشباح[/QUOTE
التحية الاستاذة الاميرة ان شاء الله بالسلامة وربنا يحفظك ومن معك فقط أريد أن أطرح سؤال أريد الاجابة لو سمحت ظروفك .. وبكل تجرد كما عهدناك في المنبر شخصياً لا أعرف الكثير من الأمكنة في العاصمة عموماً ولكن أريد أن أعرف بالضبط هل الدعم السريع أو الجيش هوالمسيطر على الوضع حقيقة أنني اقضي ساعات أمام الشاشات والتواصل ( لا أجد أي كلام حاسم في القنوات رغم عشرات المراسلين) وفلسفة الخبراء الاستراتجيين الفارغة أرجو أن تخبرينا على عن الوضع واتجاهه
تحياتي ودعواتي بالسلامة والامن
| |
|
|
|
|
|
|
Re: مرقتا (Re: Mahjob Abdalla)
|
جاء الوقت الواحد يطلع مجبرا من بيتو وذكرياته وهو في الشارع يخاف هل حيصل للمجهول او حيصحى يلقى نفسه في يوم القيامة حمدالله على السلامة...
| |
|
|
|
|
|
|
Re: مرقتا (Re: علي عبدالوهاب عثمان)
|
والله يا على أقول ليك شنو انا ما شفت طوال الطريق غير الدعامة المتمركزين فى شارع الازهرى كتيرين فى الشارع الرئيسى وكمان بالشوارع الجانبية بين البيوت وتحت الاشجار وبدوا اى بيت اهلو يخلوهو يدخلو ينصبو خيمتم البيت شمالى مباشرة نصبوا فيهو مدفع شفت فى امدرمان المنارة شويةعساكر جيش وضباطين بى دبابيرهم قاعدين فى كراسى فى الضل بيعاينو للبصات …..يخيل بحسرة واسى
| |
|
|
|
|
|
|
Re: مرقتا (Re: Amira Hussien)
|
أميرة العزيزة حمدا لله على السلامة ~ يا أميرة قلبى معصور شديد - عرفنا كل أنواع الحزن بس دا نوعه براه - فقدان الوطن حار شديد لكن الأمل لن ينقطع وحتما نعود
#المنتصر من الأثنين مهزوم بإرادة الشعب، بس الناس تحافظ على أرواحها
| |
|
|
|
|
|
|
Re: مرقتا (Re: هدى ميرغنى)
|
ربنا يكتب لكم السلامة في حلكم وترحالكم اهم شيء السيارة تكوني طلعتي منها البطارية وعطلتي اي حاجة بتساعد على تشغيلها ربنا هو الحارس استودعوه كل شيء .. لا تضيع لديه الودائع .
| |
|
|
|
|
|
|
Re: مرقتا (Re: Amira Hussien)
|
لاحول ولا قوة الا بالله وانا لله وانا اليه راجعون سلامة الخروج من جحيم الحرب العزيزة أميرة الحزن يعصر القلب مما نشاهده من قتل وتدمير وتشريد وسرقة فى وضح النهار . ربنا يحفظكم جميعاً بحفظه الجميل .
فقدنا فى هذه الحرب اللعينة اعز الاصدقاء عثمان موسى زميل المنبر عثمان موسى ربنا يحمو ويغفر ليهو .
وجنرالات الحرب المواطن وحياته واملاكه آخر همومهم ألا لعنة الله عليهم جميعا .
| |
|
|
|
|
|
|
Re: مرقتا (Re: Amira Hussien)
|
اسأل الله مخلصا له الدين ان يحفظ وديعتك يا اميرة
Quote: حيدر انا مرقتا فى حالة لايعلم بيها الا الله و بالجد استودعت البيت وكل شى للذى لا تضيع ودائعه |
| |
|
|
|
|
|
|
Re: مرقتا (Re: Ali Alkanzi)
|
Quote: و بالجد استودعت البيت وكل شى للذى لا تضيع ودائعه |
بإذن الله ستصفوا الليالي بعد كدرتها وتعودوا إلى دياركم سالمين من كل شر. اسأل الله السلامة والأمان لكل الناس في بلدنا
| |
|
|
|
|
|
|
Re: مرقتا (Re: حيدر حسن ميرغني)
|
الاخت الكريمة تحياتي وحمدلله علي سلامتك
قد لا تصدقي كم الحزن والالم ونحن نري أهلنا يغادرون بيوتهم بل الوطن الحبيب بحق أنها خيبتنا الحقيقة لم نستطع حماية أهلنا من الظلم والخوف لذلك نحن شركاء في جريمة تشريدهم أيضا لن يرحمنا التاريخ لقد كنا أفشل طليعة ثورية علي وجه الأرض وأكثر أنانية في كل شيء لا لا عليك حقيقة و سوف تعودين وتجدين بلدنا في حالة أمن وسلام ولن يخطف هؤلاء القتلة الوطن منا وهذا عهدنا لكلم أهلنا سوف يسقطون أجمعين وتبقي أنت يا وطني حرا عزيز وأهلك كرام لك كل الامنيات بالسلامة
| |
|
|
|
|
|
|
Re: مرقتا (Re: Amira Hussien)
|
تحرك البص ببطء شديد فى غرب امدرمان ….الناس تحت الاشجار والضللة واجمة وتعاين للبصات المارقة بأسى وحزن المهم مشينا غرب لما لاقاني شارع ظلط ماشى شمال ، شارع بدائى ضيق ومحفر …..ذادت سرعة البص وبقينا ما شايفين غير جدب ومحل اتارى الناس كلها فى الخرطوم والبلد دى ظنيت مافيها غيرا بعد ساعات ومعذرة ما حاقدر احدد الوقت لانو الفترة دى فقدت احساسى بالزمن وترتيب الاحداث لاحت لينا على يمين الشارع صيوانات وناس واقفة شايلة حفاظات وساندويشات وبلح وبسكويت شمال الشارع فى سوق صغير فيهو كافتيريا ودورة مياه رسوم دخولا ميتين جنيه …..البص مافيه حتى حوض غسيل يدين تخيلو ….نسيت ما اقول انى كنت شايلة معاى طحنية ومربى وجبنة خليتهم للسواق الوصلنا قلت مالى متقلا على روحى.البص فيهو حفاظات بيملوها موية وتلج…… نزلنا شوية نتحرك خوف من الجلطات والخدر حتى الاطفال غلبهم الاكل واصلنا فى نفس الخلا داك لحدى الليل ….الليل ده كمان قصة ضلام ضلام عجيب اعاين بالشباك اشوف الافق بين السماء والارض كانو حائط ضخم منظر عجيييب وصلنا نقطة زى استراحة نزلنا هنا دورات المياه مجانا وممكن تشرب شاى او عصير وعندهم بسكويت فيها كراسى بلاستيك وكنبات من الاسمنت مشيت على واحدة من الكنبات قلت افرد ضهرى القرب ينكسر فى واحدة من بص تانى قالت لى ده محل ناس فى عدة بصات واقفة شابة مراقبة الموقف نادتنى قالت لى نحن قايمين تعالى محلنا فعلا مشيت طوالى اتمددتز فى الكنبة جه ولدى سلم على البت وطلعت كانت زميلة واحدة من البنات جات حاجة اكبر منى برضو تفتش فى مكان ترقد فى لى دقايق ناديتا قلت تعالى بتشيلنا ما صدقت ختت راسا بى جهة وانا بى الجهة التانية ومافى نوم طبعا …..والسودان كلو بيعرف بعض عرفتنى عرفت اهلى ونسابتى ….السواق ضرب البورى و و مشينا واصلنا مشوار الليل الطويل .
| |
|
|
|
|
|
|
Re: مرقتا (Re: Amira Hussien)
|
*رغم الأسى...متابعين**
سرد ممزوج بالألم والمعاناة والعذاب,,
حكي يذكرنا بما كنا نقرأ أحيانا من قصص الهجرات...الروهنجا... الايزيديين... اليهود في ألمانيا..و
تيه بني إسرائيل/الخروج /EXODUS مع الفارق...و لكنه في النهاية ألم التشتت و ليس الشتات..والحيرة..
*** ربنا يسهل أمركم أستاذة أميرة**
ملحوظة قبل أغادر: حتى العنوان"مرقتا" يعبر بصدق عن الحالة والوضع ( استغر أن كلمة CONDITIONتعني الاثنين-
معليش جملة اعتراضية لم أشأ أن أجعل الفكرة تفلت مني..
كلمة مرقتا تقف وحيدة ...كما المروق نفسه الذي قمتي به..و كذلك تبدو مفتوحة النهايات..
*****وصف مبسط وصادق ولايف ومن قلب الحدث... لا يحتاج لتصوير أو كاميرا...
| |
|
|
|
|
|
|
Re: مرقتا (Re: محمد عبد الله الحسين)
|
Quote: حرك البص ببطء شديد فى غرب امدرمان ….الناس تحت الاشجار والضللة واجمة وتعاين للبصات المارقة بأسى وحزن المهم مشينا غرب لما لاقاني شارع ظلط ماشى شمال ، شارع بدائى ضيق ومحفر …..ذادت سرعة البص وبقينا ما شايفين غير جدب ومحل اتارى الناس كلها فى الخرطوم والبلد دى ظنيت مافيها غيرا بعد ساعات ومعذرة ما حاقدر احدد الوقت لانو الفترة دى فقدت احساسى بالزمن وترتيب الاحداث لاحت لينا على يمين الشارع صيوانات وناس واقفة شايلة حفاظات وساندويشات وبلح وبسكويت شمال الشارع فى سوق صغير فيهو كافتيريا ودورة مياه رسوم دخولا ميتين جنيه …..البص مافيه حتى حوض غسيل يدين تخيلو ….نسيت ما اقول انى كنت شايلة معاى طحنية ومربى وجبنة خليتهم للسواق الوصلنا قلت مالى متقلا على روحى.البص فيهو حفاظات بيملوها موية وتلج…… نزلنا شوية نتحرك خوف من الجلطات والخدر حتى الاطفال غلبهم الاكل واصلنا فى نفس الخلا داك لحدى الليل ….الليل ده كمان قصة ضلام ضلام عجيب اعاين بالشباك اشوف الافق بين السماء والارض كانو حائط ضخم منظر عجيييب وصلنا نقطة زى استراحة نزلنا هنا دورات المياه مجانا وممكن تشرب شاى او عصير وعندهم بسكويت فيها كراسى بلاستيك وكنبات من الاسمنت مشيت على واحدة من الكنبات قلت افرد ضهرى القرب ينكسر فى واحدة من بص تانى قالت لى ده محل ناس فى عدة بصات واقفة شابة مراقبة الموقف نادتنى قالت لى نحن قايمين تعالى محلنا فعلا مشيت طوالى اتمددتز فى الكنبة جه ولدى سلم على البت وطلعت كانت زميلة واحدة من البنات جات حاجة اكبر منى برضو تفتش فى مكان ترقد فى لى دقايق ناديتا قلت تعالى بتشيلنا ما صدقت ختت راسا بى جهة وانا بى الجهة التانية ومافى نوم طبعا …..والسودان كلو بيعرف بعض عرفتنى عرفت اهلى ونسابتى ….السواق ضرب البورى و و مشينا واصلنا مشوار الليل الطويل .
|
الاستاذة أميرة تحياتي
جزى الله الشدائد خيراً ... لقد اظهرت لنا قدراتك على الكتابة والرسم بالحروف فيلم تراجيديا .. ابداع .. كأننا معكم في نفس البص
رغم شعورنا بالحزن .. ولكن واصلي
تحياتي
| |
|
|
|
|
|
|
Re: مرقتا (Re: mohmmed said ahmed)
|
العزيزة اميرة حمد الله على السلامة قصة محزنة والله ... ما تشهده البلاد الآن من مآسي وقصص محزنة وكأننا في حلم ..في كابوس مخيف ..ولكن بعد الكرب فرج ان شاء الله،،، وكل هذا الدمار والقتل من أجل تحقيق مصالح شخصية بحتة ...ونسأل الله سبحانه وتعالى أن ينتقم منهم ويرينا فيهم عجائب قدرته ... من كان يصدق أن السودانيين سيطلبون اللجوء في الدول المجاورة بعد أن كانت شعوب تلك الدول تطلب اللجوء إلى السودان حيث كانوا يعتبرون السودان بلاد امنا ومضيافا .... ....الله يحرقك يا حميدتي ويقتلك شر قتلة زي ما حرقت قلوب سكان العاصمة المدنيين وقتلت أطفالهم ونسائهم وشبابهم وكهولهم ... ...ستعودين قريبا يا اميرة إلى دارك بعد أن تنجلي هذه الغمة وهذا البلاء ... كوني بخير وعافية.
| |
|
|
|
|
|
|
Re: مرقتا (Re: أبوبكر عباس)
|
صحى ما خايل ….وكما الظروف كنت وقفت حاربت الشردنى ومرقنى من بيتى ومن بلدى وهملنى بى بلاد الناس بركة الظهرتا يا ابوبكر عباس
| |
|
|
|
|
|
|
Re: مرقتا (Re: Amira Hussien)
|
يا استاذة اميرة نحن نرافقك في رحلة (المروق) مرقتا والتي وصفها الاخ الدكتور محمد عبدالله الحسين ب Exodus ولا اتمنى ان يكون خروجك مماثلاً اي نزوح دون عودة وتعودين ان شاء الله لديار تعلقت بها. وتعلقت بك ولبيئة يصعب الغياب عنها طويلا وان شاء الله يكون نزوحا مؤقتا والحقيقة العنوان يحمل معان شتى بمفهومنا السوداني وغالبا ما يكون من حظ المرأة ان تقول (مرقتا) عندما ينتظرها الوالد او الزوج أو الاخ الاكبر على الباب وهو على عجل من امره فيناديها (امرقي) ولكن بكل اسف في هذه الحالة لم يكن نداء الاب او الزوج او الاخ الاكبر ولكن كان نداء البلاء الاكبر الدعم (الصريع) ينتظرونك ان تخرجي على عجل ليحتلوا دارك رغم انفك ومن معك ولم يمهلوك حتى تحملي بعض اغراضك الهامة فخرجتٍ بحقيبة اليد ويعد هذا مكرمة ولطف منهم وانتصار لك في وقت الهزيمة
| |
|
|
|
|
|
|
Re: مرقتا (Re: Ali Alkanzi)
|
استاذ الكنزى ان شاء الله ويا رب عودة سريعة ….والله كم زرت من مدن وعواصم لكن ما بقدر اكمل ستة شهور فيها ………حب للسودان ورثتو و ورثتو وعلمتو لى اولادى ولى احفادى
| |
|
|
|
|
|
|
Re: مرقتا (Re: Amira Hussien)
|
الأخت الأستاذة أميرة حفظكم الله ونسأل الله يرد غربتكم قريباً سالمين ..
كغير الذين تداخلوا وأحسنوا في مداخلاتهم، أقول ليك أنا تربيت في مناطق الحروب .. أنت قوية وأرجو أن لا تهزك المأساة .. فهى مأساة كل الشعب السوداني.
خلي ثقتك في الله قوية كما أنت .. وأبقي قدوة ومصدر قوة وإلهام لأبنائك ولمن حولك .
كما أرجو أن تتخذي خطوة عملية تجاه المنزل .. بأن تتواصلي مع لجنة الحي أو لجان المقاومة في الحي .. أو نقطة الشرطة في الحي لو ما زالت فاعلة .. أو حتي الجيران بأن يراقبوا ليك المنزل .. وحتى لو تستأجري شخص يسكن ليكم فيه موقتاً ..
ربنا يحفظكم
اللهم ألطف بالشعب السوداني
بريمة
| |
|
|
|
|
|
|
Re: مرقتا (Re: محمد عبد الله الحسين)
|
محمد عبدالله سلام ما بعرف ردى ليك ما ظهر فعلا مرقتا هى وصف لى حالتى …زول انسلا من بيتو بلا ترتيب ولا استعداد انقلع بى قوة ….الحمد لله
| |
|
|
|
|
|
|
Re: مرقتا (Re: Amira Hussien)
|
Quote: يا استاذة اميرة نحن نرافقك في رحلة (المروق) مرقتا والتي وصفها الاخ الدكتور محمد عبدالله الحسين ب Exodus ولا اتمنى ان يكون خروجك مماثلاً اي نزوح دون عودة وتعودين ان شاء الله لديار تعلقت بها. وتعلقت بك ولبيئة يصعب الغياب عنها طويلا وان شاء الله يكون نزوحا مؤقتا والحقيقة العنوان يحمل معان شتى بمفهومنا السوداني وغالبا ما يكون من حظ المرأة ان تقول (مرقتا) عندما ينتظرها الوالد او الزوج أو الاخ الاكبر على الباب وهو على عجل من امره فيناديها (امرقي) ولكن بكل اسف في هذه الحالة لم يكن نداء الاب او الزوج او الاخ الاكبر ولكن كان نداء البلاء الاكبر الدعم (الصريع) ينتظرونك ان تخرجي على عجل ليحتلوا دارك رغم انفك ومن معك ولم يمهلوك حتى تحملي بعض اغراضك الهامة فخرجتٍ بحقيبة اليد ويعد هذا مكرمة ولطف منهم وانتصار لك في وقت الهزيمة |
https://sudaneseonline.com/msg/board/510/msg/1683544306/rn/44.html
| |
|
|
|
|
|
|
Re: مرقتا (Re: Ali Alkanzi)
|
الاخت اميرة حمدالله على سلامتكم ربنا يوصلكم بالسلامة. حي غلبني الكلام اقول شنو يارب تلطف بالسودانيين والوطن
| |
|
|
|
|
|
|
Re: مرقتا (Re: Amira Hussien)
|
امس في القاهره...
فى ساعة متأخرة من هذا المساء، صعدت إلى الهايس ذات العشرة ركاب(وهي من وسائل المواصلات فى القاهرة) من اول حي فيصل قاصداً آخر فيصل فى طريقى إلى هضبة الأهرام حيث توجد أسرتى .. صعد بعدى شاب سودانى وجيه ، صبوح الوجه ،صادق القسمات، تنبيك هيئته انه ود بلد وابن حلال.. لحظات قليلة وإمتلأت الهايس بأهلى السمر الميامين من ديار عازة.. لفت إنتباهى ذلك الحديث الذى وجهه الشاب الوجيه الذى يجلس جوارى إلى سائق الهايس قائلاً له : كل الركاب من السودان!!! رد السائق : أحسن ناس.. سرت فى جسدى رعشة كسريان التيار الكهربائي عندما نلامس بالخطأ سلك كهربائي حاملاً للتيار!! وإلتفت بهدؤ متفحصاً تلك الوجوه الطيبة من أبناء جلدتى، شباب وشابات ورجل وامرأتين.. أخرج الشاب صبوح الوجه الذى يجلس جوارى مبلغ مئة جنيه مصرى وأعطاها للسائق وقال له خذ حساب كل الركاب!! مع أن جملة الحساب لا تتعدى مبلغ الخمسة وأربعون جنيهاً، إلا أن جميع الركاب همهموا بالإعتراض وهموا جميعاً بنيل هذا الشرف ، أو على أقل تقدير أن يدع كل واحد منهم ليقوم بدفع أجرته .. فرفض ذلك الشاب الوجيه وأصرّ على دفع الأجرة وحده !! إغرورقت عيناي بالدموع ..عجزت عن مغالبة دموعى فخلعت طاقيتى وأدخلت فيها وجهى فى محاولة لحبس شلال الدموع.. وفشلت فى كتم ذلك الهواء الحااار الذى يخرج من الصدر محدثاً صوتاً مسموع!! إنتبه جارى ذلك الشاب الوجيه ود البلد ووضع كفه بين كتفي رابتاً على ظهرى وقائلاً لي :ولا يهمك ياعم ، إن شاء الله كلو لى خير... هنا تطور الأمر عندى وخرج عن السيطرة ودخلت فى نوبة بكاء حار وبصوت عالٍ، تماماً كما نبكى عزيزٍ غالٍ.. وهنا إحتار سائق الهايس ووقف على جانب الطريق ليستفسر عن الأمر!!! فطلب منه الركاب أن يواصل المسير .. وبدأوا فى مواساتى بأصواتٍ متهدجة وقلوب منفطرة ، وأعطوني كمية من مناديل الفاين الورقية بعد أن أشفقوا على طاقيتى التى بللها دمعي السخين !!مادموع رجال بتهد جبال هداره زي رعد المطر. وبعد أن أخرجت كل ذلك الهواء الساخن، قلت مخاطباً تلك الوجوه النبيلة: والله نحن ما بنستاهل ذلة الغربة ونحن أكرم من بهدلة التشرد..ونحن ما شبه اللجوء..نحن مالاجئين ومتشردين.. نحن اطيب وانبل خلق الله....واكرم الخلق... لكن الله غالب..
كلو لى خير ياحاج.. وأبسط حاجة نغتنمها فرصة لعلاج كُبارنا.. وهسه ياعم انت ذاتك بتكون عايز تتعالج!! ولم أجرؤ على أن أخبره أننى فعلاً جئت قاصداً العلاج ، لكنى بعد وصولى إلى القاهرة جعلت هذا المقصد فى الدرجة الثانية من سلم إهتماماتى، وما كنت أدرى أن الحرب ستأتي لتخلط كل أوراقي وتحطم سُلم إهتماماتي. لأحول ولاقوة الا بالله الله العلي العظيم وحسبنا الله ونعم الوكيل.
** صدقت الدموع حقا نحن شعب لا يستحق المذله * شعب لايستحق لقب لاجى جايع ينتظر الاغاثات * شعب مسالم لايعرف القتل والسحل و الدم والدانات
نسال الله ان ينتقم من كان السبب فى اشتعال الحرب والقتل والدمار
منقوووول
| |
|
|
|
|
|
|
Re: مرقتا (Re: Ali Alkanzi)
|
دي مرقتا
بس ل اديس نفس الدموع بس فيها فرحة
Quote: ب السودان(1)
يا سلااااااام علي ناس القضارف واهل ام شجره البوادره
كنا مجبورين نطلع من الخرطوم (جبره) بعد عشرين يوم من استمرار الحرب، كنا مدركين بأن الحرب لن تنتهي بعجاله، ليس تقليل من مقدرات الجيش، بل لان الحرب داخل المدن دائمآ تكون الخسائر في الارواح كثيره وهذاء ما سيتحاشاه جيشنا الأصيل، كنت مدركه بخطورة الوضع لذلك قررت السفر الي الدوحه عبر اثيوبيا، لم تسعفنا الحرب ان نلتقط انفاسنا ونتجول في شوارع الخرطوم، لانها اندلعت بعد وصولنا بخمسه ايام من الدوحه، في صباح السبت تمكنا من الخروج مع بداية الاشتباكات في المدينه الرياضيه، استودعنا الله الخرطوم واهلها وقوات شعبها المسلحه، ثم انطلقنا نحو مدني حيث كان الطريق به بعض الارتكازات للمليشه المتمرده، توقفنا لنتناول وبجبة الافطار في مطعم الدنقلاوي الذي يقع في الطريق الرئيسي مدني القضارف بعد كوبري حنتوب، كانت استراحه صغيره لنواصل الطريق الي ولاية القضارف شرق السودان،وصلنا الولايه الساعه الخامسه مساء بحثنا عن فندق، تم توجيهنا لفندق الربوه الذي يقع علي مبني جاهز الامن والدعم السريع سابقآ، الان يستولي عليه الجيش السوداني، قبل الدخول للفندق طلب سائق البص (الشريحه) ان نذهب معه محطة البترول للحصول علي بترول دون التوقف في الصفوف الممتده بحجة الذهاب الا الحدود السودانيه الإثيوبيه لمنطقة (القلابات)، رفض عامل المحطه تمريرنا وطلب الوقوف خلف اخر سياره.
ومن هنا بداء عنوان القصه والشي الذي يدفعني لعدم الذهاب للخرطوم حتي اذا انتهت الحرب اليوم قبل الغد.
#يتبع مكوك ام شجره-حرب السودان.... (2)
طلب منا احد سائقي الحافلات المصطفه،الذهاب الي محطة ام شجره فسأله السائق اين تقع، قال استمرو في هذاء الطريق الرئيسي تبعد من هنا مسافة خمسه كيلو تغريبآ، بالفعل اتجهنا عليها وقبل الوصول ظهرت لنا قرية ام شجره المضيئه، وصلنا المحطه التي كانت لا تعمل ولا توجد بيها صفوف ولا حتي سياره واحده، خطر في تفكيرنا ان الرجل صاحب الحافله اراد ان يتخلص منا، وصلنا المحطه وقبل ان يستعد السائق للرجوع، خرج الينا احد عمال تلك المحطه، قائلآ (اتفضلو يا ناس هوي) مسرعآ علينا، قال له السائق هل عندكم وقود بالمحطه،..؟ فأجاب لا. نظر الا داخل العربه، وجد بها اطفال وكثير من النساء والرجل السائق. فقال(من وين جاين انتو وماشين وين..؟) قص عليه السائق المشوار الذي قطعه والذي يود الذهاب اليه في الغد. قال له (تعال يا زول انتو ضيوف لو مافي نجيبو ليكم) اتصل علي صاحب المحطه من نفس القريه وقال له بالحرف الواحد( كيف امسيت، معانا ضيوف جو من الخرطوم ماشين قلابات دايرين جاز الراي شنو..؟) اجري تلك المكالمه وطلب من الجميع النزول من السياره وطلب من السائق ايضآ النزول والانتظار. ذهب بالسياره قرية ام شجره (غلق التنك) ورجع في اقل من نصف الساعه وإحضر لنا معه الغداء، كنا في حيره من هذاء الموقف ولم استطيع مقاومة الدموع التي فاضت، شاب لا يفوق عمره العشرين او الخمسه والعشرون عام، انسانا كل المعاناه وكل التعب وكل الخوف الذي كان بداخلنا... بعد الغداء اللزيز والشاي، رجعنا للسياره لمواصلة الرحله. رفض اخذ مبلغ الوقود فنطق مبتسمآ قائلآ:(دي حاجه بسيطه من صاحب المحطه انا م عملت حاجه) ومن هنا ايقنت اننا لم نعيش الحياه بشكلها الصحيح وقررت ان اتكلم بطريقته البسيطه دون تكليف. نقطه سطر جديد.
صراحه اتمنيت انو نقعد قبلنا في المحطه دي لانو الاحساس الحسيتو هنا في بيتنا م حسيتو ولا حا احسو،خلاص جات لحظه الوداع ودعوات ومع السلامه وربنا يستر عليكم ودموعي ما دايره تقيف وكلنا نبكي بي السواق. اثناء اللحظات دي جاء بوكسي دخل المحطه من القريه، سأل بتاع المحطه مننا، رد ليهو قال ليهو ديل من الخرطوم ماشين اثيوبيا. نزل علينا بتاع البوكسي سلم علينا قال يا جماعه انتو من اهلكم تمشو للحبش الكلام دا عيب عليكم، اتكلم مع السائق قال ليه انا زول مشوار بس م عندي اي قرار. اتكلم مع امي قال ليها يا حاجه الليل دا م فيهو سفر، الشارع شين نحن اسيادو وبنعرفو، (وحرم ما تبيتو في فندق وام شجره بيوته فاتحه) . الزول دا صدمني صراحه، بتكلم بي ذعل شديد وبضرب في الشريحه بي يدو، م عرفتا افرح ولا اخاف لاني ما حصل مريت بي موقف زي دا. صراحه انا غلبني التعبير.
امي قال ليه شكلك داير سبب تطلق لكن كوسو عن غيرنا ههههه شكيتك يا امي دا شنو البتقولي فيه دا..!! قعد يضحك قال ليها لو مشيت البيت وخليتكم يا داب انا الطلاق جاني. ( سبحان الله كرم عجيب وغريب) المهم قال لي بتاع البوكس تعال وراي، دخلنا قرية ام شجره (دي اخر مره اكتب قريه لانها مدينه وعاصمه ودوله في نظري وفي نظر الكثيرين الذين يعرفونها) لكن بكتب قرية للبساطه الشفتها وحسيته فيهم وكلامهم السمح.
دخلنا البيت ما شاءالله تبارك الله شي م بتوصف ياخي انا في الليل داك اندهشتا من الجمال والحوش والترتيب.. لما جاء الصباح وطلعت براء القطيه انصدمتا(ندمتا علي اي لحظه عشتها في الخرطوم) ما كملتا ليكم بعد دخلنا عليهم، ياخي ترحيب وسلام انا قلتا الناس ديل طلعو بعرفونا ولا شنو...؟!!! سلام ناس بعرفوك اصلو ما سلام زول غريب، سبحان الله. بعد التعارف داك،قعدنا شويه (الساعه تغريبآ سبعه ونص مساء) قادرين تتخيلو من اللحظه ديك للساعه عشره ونص نحن خشمنا ما وقف ولا دقيقه من المضغ والشراب(الشيه دي من النار لي خشمنا مباشر والكبده والمراره والعصائر والشاي والقهوه) انا م شبعتا لكن فترتا من الاكل لانو اكلهم حلو شديد وطاعم بدون بهارات، والبشاشه حقت الناس ديل حاجه تانيه..احلي من اي شي (طبعآ ناس ام شجره ديل بقولو ليهم المكوك حسب المعلومات العرفتها والبحث البحثتو عن القريه دي في قوقل، وعرفتا انو مك عموم قبائل البوادره في السودان من ام شجره برضو اسمو (المك/ متوكل حسن دكين ود مادا). حقيقه اسم علي مسمي (المكوك) حبيت الناس ديل. نقطه سطر جديد.
#يتبع مكوك ام شجره - حرب السودان... 3)
اها بعد العشاء ادونا قطيه ظريفه شديد تتخيلو فيها مكيف وشاشه ثابته علي الحيطه وستائر وفرش وموكيت حاجه تحفه (بمعني تحفه م كلام ساي) الصور معاي لكن رفضو انشره لانو ما داير يشهر والناس يعرفو انو هو عمل معانا الواجب دا. شوفو الناس ديل وصلو لي ياتو مرحله، زعلانه لانو نحن كنا شايلن عن ناس الولايات والارياف صوره غلط وغلط كبير، حقيقه لو داير تعرف الناس شق البلد. المهم انا رغم التعب داك ما قدرتا انوم من الشي العايشنو نحن دا، لما طلعنا من الخرطوم كنت خايفه من البحصل قدام، لكن هسي خايفه من الحرب تنتهي ونرجع الخرطوم وخايفه من الصباح يجي نمشي القلابات.. كنت مستمتعه بالمنظر وبي الجو الرهيب والحوش المنسق والرمل والتفاصيل الكتيره (طبعآ ادونا بيت ولدهم عرسو بعد الضحيه حوش منفص حمامات ومطبخ وعريشه وقطية وسراير حوش) ربنا يتم ليه ويسعدو ويسعد اهلو ويسعد صاحبة البيت المحظوظه بالاسره الكريمه دي. كنت بتسأل هل ناس القريه ديل كلهم بي نفس الصوره دي لانو بقولو ليهم( المكوك) م قادره اتخيل السعاده العايشنها الناس ديل. الساعه 3:00 صباحآ وانا راقده في الرمله بتاعت الحوش حسيت الزمن دا جاري جاري والشمس دي دايره تشرق من الساعه 12. المهم نمتا ساعه كدي وصحوني للشاي والقهوه ههه ما عارفين نحن الشاي بنشربو الساعه عشره.
قايتو الناس ديل حيروني بي طيبتهم وتعاملهم وابتسامتهم الما بتفارق وشوشهم، جات لحظة الوداع والسفر، ما بخفي عليكم سر انا قلتا لي امي نقعد مع الناس ديل، الحرب دا بنتهي قريب مافي داعي نسافر. واخواتي يحنسو في امي، امي قالت لينا ما دايرين نكون سبب في تأخير عرس ولدهم لانو نحن قاعدين في بيتو، (هنا سكتنا خلاص) وهم ما خلو لينا حاجه في تحانيس واقناع عشان نقعد معاهم فترة الحرب دي.ياخ خجلونا بي اسلوبهم واصلهم الطيب. طلعنا والدموع والحزن من الطرفين، حسينا انو في حاجه بينا وبين الناس ديل. ركبنا الشريحه واتحركنا الناس ديل واقفين في الباب لامن اختفينا من نظرهم، تتخيلو الموقف دا غير في سائق الشريحه...!! اثناء ما اتحركنا وطلعنا من الناس ديل قال لينا(يا ناس هوي انا خليت ليكم نص المبلغ من المشوار....) صدمتني ردت فعلو والتأثير المباشر الدخل في الزول دا، مع انو نحن م عارفين الحصل معاهو شنو في الديوان بتاع الرجال. (الديوان دا معاك منفصل تمامآ عن البيوت وهو ملك للحي كلو، بعملو فيهو المناسبات حقاتهم بي مختلف انواعه) نحن الآن في القلابات، عندهم زول هناك من نفس القريه استقبلنا نفس الاستقبال بتاع عامل المحطه ونفس استقبال ناس البيت في ام شجره، ياخي انا ماعارفه الناس ديل اتربو كيف وهل هم متفقين علي الحاجه دي...؟ ولا الشي دا فطره قامو عليها. الزول دا نحن لو احتجنا لي اي شي، بنلقاها في يدنا، حتي الإجراءات الزول دا بدفع في الرسوم من غير م يرجع لينا. انا بكتب في الكلام دا والدموع م دايره تقيف، واهلي مصدمومين من البحصل. الشي الدايره اقولو، ناس ام شجره انا م بعرفهم لكن عرفتا فيهم التلاته نفر ديل، دايره اطمنكم يا ناس جبره والخرطوم عامه والسودان اجمع، والله والله والله السودان بي خير، وعز، ومحروس ما بتجيهو عوجه. رجال زي ديل ما بنهزمو ولا بعرفو الجبن ولا بعرفو الخوف ولا بعرفو الخيانه. هنيئآ للسودان بام شجره وبالبوادره وبي هولائي المكوك الثلاثه. شكرآ شكرآ شكرآ وعمر الله دياركم وجزاكم الله الف خير. شكرآ سائق الشريحه، سافر وتلفونو ما انقطع مننا. تحيه لكم من اديس ابابا. |
| |
|
|
|
|
|
|
Re: مرقتا (Re: Ali Alkanzi)
|
اخى الكنزى بيفرق انك تكون عايش فى الخرطوم مما اتولدت عقود من الزمان ما بتفارقها الا تجى جارى راجع ليها بشوق وحب بعيدا عن السياسة …..ترجع لى اهلك ولى بيتك تعانى مع الناس من انقطاع الكهرباء و صفوف العيش والبنزين والجوازات واى صفوف وانت مرتاح البال ……وبين انك تكون مغترب وعندك بيت و وطن تانى غير وطنا …..لذلك اختلف الاحساس بالمرقة …….حتى خط السير تمشى من الجزيرة شرق ما زى تمشى شمال فى صحراء وغبشة…..الحمد لله
| |
|
|
|
|
|
|
Re: مرقتا (Re: Amira Hussien)
|
ما كان فى خيار غير المرقة اليوم واحد لكن البهدلة الصعبة ….شفتا الهم فى عيون ولدى كل مرة يعاين قريت همو وفسرتو … عرفت انه بيقول فى نفسو امى كان ضغطها ارتفع كان حصل اى شى اقبل بيها وين كان الموية كملت والاكل والجاز ….مافى زول اصلا فاضى لى زول السودان بقى زى يوم القيامة ……جات المشكلة دائما بنرقد فى الصالون منتصف البيت فى الارض يوم حنيت لى نوم مريح قبل الفطور صحيت مفزوعة بصوت عجيب وقزاز الشباك متناثر على الارض وريحة نار ولا بارود جه ولدى جارى عاين فى الارض لقا طلقة تعدت سريري و وقعت كسرت البلاط بعد ما كسرت الشبك وحرقت الستارة وبى صوت باكى قال يا امى الرقدك هنا شنو …..بقيت زى طفلة ما عارفة ارد و واصل هسه انا كنت اقول لى ابوى شنو واقول لى بناتك شنو الحمد لله
| |
|
|
|
|
|
|
Re: مرقتا (Re: Amira Hussien)
|
ما اكون نسيت زول ما رديت على زول ….احساسى بى تعاطفكم واستماعكم حسسنى بى خوة و ود عجيب نواصل البص ماشى فى ظلام وبسرعة لما تتخيلو واقف لكن لو عاينت للاسفلت الجارى تدرك سرعتو ……فجاة ولاول مرة تلاقينا زى الحاجات البقفلو بيها ناس الحركة الشوارع ……البص وقف ظهر ضابط شرطة برتبة نقيب اتكلم مع السواق وبدات اصواتهم تعلو قام طلع فى البص وقال انه معبر ارقين ممتلى بالباصات والناس ومافى اى طريقة لى زيادة تانى عشان كده انتو تمشوا حلفا بى بصكم ده طوالى …..الناس ما عندها فرق بين ارقين او اشكيت بل بالعكس حلفا تمام معانا عشان الاولاد المحتاجين لى فيزة مصر…. كل الركاب وافقوا الا السواق ، قال الا ارقين زى الاتفاق مع سيد البص ورفض يسمع لاى صوت او راى ، قام الضابط قال لى ده امر اما حلفا اما ترجع الناس دى محل جبتهم او تقيف قبلك هنا …..وامرق من الظلط….مرق من الظلط فى تلامة غريبة وتجمع حولو الركاب الرجال …..بالمناسبة البص ده اغلبيته نساء واطفال تركيبة مختلفة بجيها بالتفصيل ….بقت شكلة بينهم ……قال دى تعليمات سيد البص المشرف على الرحلة بدا محاولات للاتصال بصاحب البص تلفونو كان مقفول لمن الواطة صبحت رد وقال لى للسواق وديهم حلفا ….. وصلنا حلفا ما حلفا الزمان الكنا بنركب منها البواخر الجميلة ناس الثريا والزهراء ما حلفا الخضرا الناعمة ومليانة شجر نيم ظليل حلفا الوصلناها مدينة قاحلة ناشفة مغبرة ما شفت فيها ولا شجرة ولا فرع اخضر …وقف البص فى مكان افتكر ده السوق …..ذهب الشباب للقنصلية المصرية عشان الفيزا والعندو اب مريض او ام ساقا معا شفيعة لاستعجال الفيزا التعب بقى ظاهر مع الجوع والعطش وباقى السيدات الفى البص مع الاطفال مرعوبين …..فى واحدة معاها طفلين عرفت منها انهم اولاد اختا المشت العمرهمع زوجها وخلتا معاهم فى البيت فلما حصل الحصل قالت ليها جيبيهم لى فى مصر الزولة دى وصلت الحد مع الاطفال تشيل ده وتخت ده فى الاخر رقدتم فى ارضية البص بنيات صغار نزلن استكشفن وقالن فى دورات مياه قريبة بدا الناس شوية شوية تتحرك وترجع البص نزلت ورغم انو مارقين من الصيام لكن شعرت بى جوع عجيب …واحدة من البنات ملازمانى لقينا كافتيريا فيه طعمية وبيض اشتريت ساندوتشات قلت اكيد ناس البص شاعرين بالجوع انا شلت واحد من الساندويتشات وقعدت فى اقرب كرسى وبديت اكل لقمتين وغلبنى….فى حبشية بتبيع قهوة فى الكافتيريا مراقبانى طلبت منها قهوةء…….جابتا قلت ليها بى كم قالت نحن ما بنشيل من الضيوف قروش جابتا ومعاها موية باردة شربت القهوة …….ومشيت قلت ليها انا قبلت هديتك مشكورة انتى اقبلى هديتى واديتا القسما ليها الله ……..قعدت تبكى …….الكافتيريا بها حبشى بعمل عصاير ايضا اصر انو اشرب عصير ….حلفا كلها حبش ….. شلنا الساندويتشات ولقينا كشك تلج اشتريت نص لوح كسرتو ختينا فى حفاظات البص نفعنا لحدى اسوان متواصلة مع ولدى بالتلفون قال لى مافى طريقة نسلم حتى الجوازات لاى زول فى القنصلية كل الابواب مغلقة…..لما انتصف النهار قال لى لو البص ماشى امشى معاهم وانا بستنى لحدى ما اعمل الفيزا قلت خير …
جانى تلفون من وش الخير حلالة العقد ربى يديها قدر نيتها قالت مشا وين خلى يرجع القنصلية سريع نزلت من البص افتش على كان يجى مشعلق فى ما رشال كلمتو وبسرعة وصل ولقا بينادوا بى اسمو ودخل واستلمو منو الجوازات وما خيب ظنى دخل كل جوازات ناس البص معاهو …….الاستلام تانى يوم ……ونحن فى البص لحدى الس ٩ بالليل جونا ناس قالوا فى مدرسة معدة ومفروشة ممكن تنوموا فيها ….ركبونا عربات وبكاسى وصلنا المدرسة ….الفرش فرشات فى الارض والفصول مليانة امهات واطفال ،انا جابوا لى سرير مجلد بى سيور اظن حق الغفير غايتو نمتا نومة ما فى احلى منها رغم قصرها نبهونا انو نعمل حسابنا من العقارب ! صحينا لقينا الجيران جايبين الشاى واللقيمات ورجل خير ذبح خروفين عملوهم دمعه وقراصة ……المشكلة انو النفس ابت الاكل والحمد لله الدكاكين فيها موية باردة …….عرفنا انه الجوازات اتأشرت واستلموها …..لكن منظم الرحلة اكتشف انه ولدو الكبير العمرو ١٦ سنة وشهرين بحتاج لى تاشيرة ! كيف يرجعوا تانى وكيف يفتحوا ليهم الباب من اساسو ….واحد من العساكر حفظ شكل ولدى لما رجعوا تانى استلم منو الجواز وقال ليهم بكره …..لكن كيف نخلى الولد ده فى حلفا وكيف البص يتاخر بالناس الفيهو كلهم المهم الراجل جدع خلى اخوهو اللى هو عمرالولدزمعاهو وقال تانى ما باخركم ……بس يجى البص التانى المفروض يعبر بينا ويوصلنا اسوان غيرنا البص واتحركنا نحو معبر اشكيت
| |
|
|
|
|
|
|
Re: مرقتا (Re: Amira Hussien)
|
الآن أكملت القراءة إلى آخر مداخلة.
عارفة يا أستاذة أميرة أعظم حاجة تستحقين عليها التهنئة هي الاهتمام بالكتابة وتسجيل هذه التجربة.
نسأل الله لكم الحفظ والتوفيق .
ياسر الشريف
| |
|
|
|
|
|
|
Re: مرقتا (Re: Yasir Elsharif)
|
رغم هذه التجربة المريرة والمتعبة يا اميرة لكن برضه اعتبري نفسك محظوظة انتى مشيتي مصر في بدايات هذه المعركة العبثية لانه بنت خالتي وصلت حلفا مع أولادها قبل أسبوع ولغاية هسه ما قادرة تتحصل على التأشيرة وبتقول لي حالة الناس المنتظرين في حلفا حالة صعبة ... المفروض السلطات المصرية ونسبة الظروف الصعبة التي تمر بها البلاد يلغوا التأشيرة للسودانيين حتى انتهاء هذه الغمة .. والله يجازي الكان السبب.. والله يحرقك يا حميدتي يا قاتل يا مجرم ..
| |
|
|
|
|
|
|
Re: مرقتا (Re: امتثال عبدالله)
|
يبدو ان هذه الحرب جعلتنا محتقنين بالدموع التي تبحث لها ان سبب ان تنهمر من عيون تيبست من متابعة الشاشات هاتف واتس تلفزيون نشرا وكمبيوتر سودانيراونلاين ولكن حكيك يا اميرة جعل عيوني تمطر حزنا وفرحا وانت تقولين:
Quote: فى حبشية بتبيع قهوة فى الكافتيريا مراقبانى طلبت منها قهوةء…….جابتا قلت ليها بى كم قالت نحن ما بنشيل من الضيوف قروش جابتا ومعاها موية باردة شربت القهوة …….ومشيت قلت ليها انا قبلت هديتك مشكورة انتى اقبلى هديتى واديتا القسما ليها الله ……..قعدت تبكى |
Quote: وصل ولقا بينادوا بى اسمو ودخل واستلمو منو الجوازات وما خيب ظنى دخل كل جوازات ناس البص معاهو …….الاستلام تانى يوم |
Quote: وصل ولقا بينادوا بى اسمو ودخل واستلمو منو الجوازات وما خيب ظنى دخل كل جوازات ناس البص معاهو …….الاستلام تانى يوم |
لوحات رائعة لانسان هذا الارض رفع ستارها
مرقتا لوحة حقيقة تستحق التسجيل في كتاب مع قصص لأخرين
| |
|
|
|
|
|
|
Re: مرقتا (Re: Amira Hussien)
|
انا لما اكتب واتذكر دموعى ما بتقيف لحظات صعبة جدا والمجموعة الفى البص ناس مختلفة جدا فى طباعا ….تلاحظ الانسان المساعد العطوف والاناني والشرفان والجيعان والعينو فارغة تلاحظ للراجل وللسيدة السودانية بت البلد الممكن تساعد اى زول ….بعضهم شايل سناكس وحاجات خفيفة بقسما على الركاب وبعض بيضارى وياكل برا غايتو …..فى شخصية غريبة انا ملاحظاها انانية مفرطة وهم اسرة فيها لحدى الاحفاد كلهم بهذا الطبع ……من اغرب ما سمعت حديثه لولدى قال لى عليك الله امك ماعندها حبوب ضغط انا حبوبى قطعت …..اجى يا اخوانى يعنى جايب معاك حبتين……ما علينا قلت لى انا حبوبى عشرة ملم انتا بتبلع كم قال لى عشرين ادينى حبتين ايتو بلعم وتكل راسو فى الكرسى القدامو وناااام …..جات بتو صحتو ادتو علبة تونة ……جايبين التونة وما جايبين حبوب الضغط …..قبل على الشباك وقضى على العلبة بى زيتا وبدون عيش …..الحل ما بخلو طباعهم نسيت ما اقول معانا شابين من سوريا يحملو جوازات سودانية .
| |
|
|
|
|
|
|
Re: مرقتا (Re: Amira Hussien)
|
فى القنصلية المصريين ادوا سورى واحد والتانى رفضوا موضوع طويل السوريين ديل اتوادعوا فى حلفا والبص وصلنارالمعبر كان السورى الخلينا ورانا يجى طالع البص وقال اتحلت ….ما بعرف شنو الاتحلت المعبر مكان مظلم موحش ينتابك احساس غريب وانت فيهو والباصات فى صف طويل بطىء اول ما عبرنا البوابة الحدودية نزلنا من البص وكل زول جارى شنطتو تفتيش سريع ورجعنا البص الليل داك كلو نحن فى البص زاحفين فى صف الجوازات اصبح الصباح ونحن فى بصنا وحولنا عالم مايج وهايج بياعين شاى وقهوة وبسكويتات وناس افترشت الارض ودورة مياه قذرة ….فيها اثار لى مشروع ولادة طفل لحقوا الام فى اخر اللحظات ناس الاسعاف ….ناس الهلاك الاحمر بيوزعوا موية على البصات …..زول حبوب الضغط عرض عليهم مشكلة الحبوب …ما اظن لقوا لى حل نحن فى نفس المكان لحدى الضهر اتحركنا نحو بحيرة السد ….وصلناها بحر عديييل ومنظر عجب ……انه ناصر …….حر مبالغة جات العبارة رجعناالبص العبارة شالت ١٢ بص ……مرقنا فى شوارع الظلط المصرية مستوية ومرتبة وانطلق البص وسط طبيعة قاسية جبال سوداء وبنية لامعة وخشنة ….مشوار طويل لكن الخلاص لاح عبرنا قناة توشكى وبعدها استراحة مطاعم تعبانة ودورات مياه بالقروش المصرية ….المطعم الدخلنا مشغل وردى يا طير يا طاير …..دموعى ما وقفت على الهملة وعلى ربوعنا الخليناها وخلتنا رجعنا البص وانطلق بينا نحو اسوان ساعتين او تلاتة عند مدخل المدينة وقف والسواق قال انا ما بقدر ادخل ….لقينا حافلات وعربات تاكسى تعبانة ……..نزلو الشنط وحانت لحظات الفراق مع ناس عشت معاهم ايام لاتنسى بكاء و وداع حار اغلب ناس البص كان اقرباء او معارف قليل الذينا الجابتم الصدفة هم مواصلين مع بعض انا و ولدى كان عندنا حجز فى فندق موڤنبك لمدة تلاثة يوم ركبنا تاكسى اسوان مدينة هادئة وجميلة ونظيفة جدا ……شفتها وانا طفلة كنت بزور فى الصيف جدتى وعماتي واعمامى فى دراو ……وصلنا الفندق بى لنش صغير لانه فى جزيرة نص النيل ونومة اهل الكف لى تانى يوم اتصلت بى اهلى …..كيف ننزل فى فندق وهم جايين يسوقونا المهم قلت ليهم انا نزلت رجليني مرومة ومافى اى طريقة لى اى حركة الداير يلاقينى يجينى ……غايتو ناس الفندق فهموا شى والعز اهل جو اولاد عمى واولادهم و وعدتهم بى عودة تانى بعد ارتب امورى وعقلى الصباح عدينا النيل الى المطار وظهر لى جمال اسوان اكتر ووصلنا القاهرة بعد رحلة استغرقت ساعة وربع والحمد لله على ما اراد الله
| |
|
|
|
|
|
|
Re: مرقتا (Re: muntasir)
|
الأخت أميرة.. الف حمد لله على سلامتكم. ووصولكم للقاهرة. وارجو الله ان يحفظ دياركم ويعيدكم اليها قريباً
| |
|
|
|
|
|
|
| |