بسم الله الرحمن الرحيم الحمد لله والصلاة والسلام علي رسول الله الصادق الأمين وعلي أهلة القر الميامين وإنا لله وإنا إلية راجعون أعزي أهلي الحباب في جميع مشارق الأرض في فقيدهم محمد عثمان المصري
القايل بدوم غير الله أحلف صادق إنو بموت والجايى برضو وصابق مات الرسول المدحو ناضم ؤرابق عليهو السلام المسكو لسع عابق ... اصلو الموت اجل محسوم ومابتنطا سمح البموت بى التقوى جسمو مغطا ود ناظر الحباب القيمتو ما بتتوطا رحل الليله حلّال العُقد والشبطه ... محمد عثمان المصرى يرحمو الله بى جنه وعرايش ؤحور ذعيم الحباب الكفو جودو يفور زي خور اربعات لابحبسو قيف لاسور .... محمد عثمان المصرى ياسامعين محل قالولو عوك تلقاهو راضي معين تيلاد القبيل عزّه وشموخ لا معين خلاهم رجال من الرحيل دامعين .... محمد عثمان ضيوفو مهجعين وصباح قضّاي الغرود سند السنينو قُباح تركة العندهم مالا تنفقو رباح رحل الليله دفّاع الشباحها شُباح ... الحباب فى الدنيا اصحاب باس كرما مكرمين فى كل مكرمه راس محمد عثمان زعيما فى البلد نبراس مابكفن رثا ميتين ألف كراس ... بعرفو الشرق اسدا مقافى الشك فكاك عقدة الشبك الأبت تنفك عضو تشريعى ناظر ودفوارس مك ساعة القاسى يقسى عليهو ببقى الرك .... خليفة المراغنه الشرفا أهل البيت نسل الكرام اللى المفتق خيت زعيم الحباب البدفع المربيت يرحمك الله مابقدرك دوبيت .... بتفقدك خلاوى أكنت جايب قوته بتفقدك مشافى مأملات ماتفوته بفقدنك مجالس انت كت بتلوته بحر المالح العمقو هده الحوته ... جبل كسلا العريق فى شرقو بفقدك ياخريف المطرو صابق برقو عندك صفات لزمنك آبتفرقو جودك والصفا وضيوف العشا البطرقو ... جبال التاكا تبكيك وجبال توتيل وتبكى العقبه والوادى اب غزال ونتيل زعيم الحباب صمد الشرق عنتيل جنزيز حديد ساعة الرباط موتيل .... اهلى الحباب اهل الدرق والسيف اهلى الحباب رُكزه ومآوى الضيف رحل زعيمنا بحرا بهد القيف يا أولاد المصري وراهو الناس دى عاملين كيف
د. عاهل عبدالله محمود زاجر لندن ٢٨/٠٢/٢٠٢١ 00447366913939
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة