قرات مقال الاخ وديع عبد الرحيم يشيد فيه بنساء منطقة قرينزبورو فى مناسبات مرت على المنطقه مؤخرا وليس هناك اسم يناسب مجتمع مدينة قرينزبور نورث كارولاينا غير انه السودان الجديد فى الغربه و اذا اردتم ان تروا السودان بعد ان تحل مشاكله الاقتصاديه فتعالوا للجاليه السودانيه فى قرينزبورو لتعيشوا الزمن الجميل فى السودان فمجتمع قرينزبور دائما يذكرنى بالسودان فى الزمن القديم الجميل الذى عشناه بكل جماله وتلك العلاقات الحميمه والطيبه بلا حدود والتواصل والتوادد والتزاور والمحبه فقد كنا نتزاور فى هذه المدينه فى نهاية الاسبوع بلا مناسبه تداخل اسرى جميل اولادنا يقضون عطلة نهاية الاسبوع فى الجامع مع بعض ومع الدروس الدينيه وفى الأمسيات زيارات وجلسات جميله وونسات حلوه تتمنى الا تنتهى وفى كل مجتمع تحدث بعض المشاكل ولكن فى مجتمع قرينزبورو لا تسمع بمشكله والا تداعى الاجاويد كل يريد ان يسبق الاخرين منافسه فى الخير ومااجملها وفى الاحزان لا تشعر بالحزن فالجميع معاك يشاركونك الألم وتشعر انهم يئنون مثلك وذلك يخفف عنك كثيرا كم هم جميلين وأدهشنا حتى الامريكان واتذكر عندما توفى المرحوم محمد ادم فى البوسته جاء كل السودانيين والسودانيات الى مبنى البوسته من كل انحاء قرينزبورو ودموعهم تجرى وخرجت البوسته لتتفرج على هذا المشهد الحزين الفريد ولتندهش من هذه الحب العميق بين ابناء السودان واتذكر اننى اجريت عمليه بسيطه واولادى كانوا فى السودان وجاءت اسر قرينزبورو للمستشفى وادهشوا الامريكان ايضا وفى الأعياد وما اجمل الأعياد فى قرينزبورو لها طعم خاص كل ايام العيد اطفالنا مع بعض ونحن مع بعض والنساء مع بعض وصدقونى مجتمع قرينزبورو كانما اختاروهم بمعاينات فهم من طينه طيبه واحده وتم اختيارهم بعنايه ربانيه ليس هناك نشاز او من هو مفارق للجماعه ولابد ان تاثير الجماعه على الفرد كبير وتأثير الفرد على الجماعه ايضا مؤثر فالجماعه الطيبه تخلق فردا طيب والأفراد الطيبون يخلقون مجتمع طيب وقرينزبور طيبه وفريده وهى مجتمع طيب ورائع لا تشبه بقية المجتمعات السودانيه فى اى مكان ولقد شاهدت مجتمعات سودانيه فى الغربه يقابلك السودانى فى العيد ويلتفت فى الاتجاه المعاكس لكى لا يقول كل سنه وانت طيب حتى هذه ثقيله على نفسه ومااباس نفسه وكل ماقابلت احد من قرينزبورو أبادر بسؤاله هل مازالت قرينزبورو جميله كما كانت ومازال السودانيون طيبين ومحافظين على تلك العشره السمحه النبيله وهل مازالوا متماسكين ومترابطين ووصيتى لناس اللوترى عليكم يقرينزبورو اذا اردتم ان تتمتعوا بالسودان الجديد ولا تعانون من الغربه
والعزاء لمجتمع قرينزبور وللأخ احمد عبد الغفور واسرته فى وفاة الحاجه والدتهم رحمها الله رحمه واسعه ودام الود والتواصل والتعاضد فى مجتمع قرينزبورو
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة