وانا بشرب قهوه الصباح في مكتبي تقاطع كاترينا مع شارع الصناعات الخرطوم تلاتة دخل على رجل شايب الراس حمريطي البشرة عريض الخشم كتير التبسم لابس بدلة وكرفتة زرقاء .. تفضل اي خدمة !!! شكرا... جلس... انا دكتور احمد بلال عثمان مساعد رئيس الجمهورية؟؟ مساعد رئيس الجمهورية حته واحدة كده خير ماااكون عملت جريمة وانا ماعارف ؟؟ لاوالله سمعت عنك كل خير في مجال الشحن الجوي .. اشتريت فندق السودان في (واو) ولاية بحر الغزال وعملت ليهو صيانة شاملة وعاوز اشحن معدات الفندق كاملة !!! عاوز اعرف السعر كم ؟؟ قلت ليهو طبعا أغراض الفندق بتكون كلها (دايميشن) بتاخد مساحة في الطيارة ومافيها وزن ، جيب البضاعة الشركة وانا بديك السعر ، قال خير ... بعد ساعة بس لقيت قدام المكتب واقفات بطاحين ومشحونات للسقف ، تلاجات مراتب كرسي جلوس صفرة صحانة ملاعق ؟؟ جااااااني راجع تاني اهااااا السعر كم ؟؟ قلت ليهو الشحنة دي بتمشي واو في رحلتين عشرين طن عشرين طن . وسعر الرحلة الواحدة أربعين مليون يعني الرحلتين ب تمانين مليون ... رسل واحد من الحرس بتاعو العربية جاب عشرين مليون كاش وفتح الشنطة كتب شيك بستين مليون عملنا عقد الشحنة واستلم الفواتير ... بعد تلاتة ايام الشحنة وصلت كلها (واو) سليمة وماانكسر صحن صيني واحد منها . رسل جواب شكر وتحيات عطرة وعينك ماتشوف إلاالنور في باقي القروش الليلة بكره ؟؟ الليلة بكره؟؟ انا عيان انا تعبان؟؟ عندي مؤتمر في المغرب عندي اجتماع في بلجيكا الكلام دا والاسطوانة دي استمرت سنة كاملة . بعد داك توكلت على الله قدمت الشيك لبنك التنمية الصناعية (الرئاسة) رفضوا يختموا الشيك (R.D) جاااااني راجع بدون إجراء اتصل مدير البنك تلفون وقال لي ياولد ماتلعب مع الكبار ارعي بقيدك !!! جوني اتنين من ناس الأمن ، اركب ركبت معاهم العربية وطولي على مجلس الوزراء لقيت مستشار الرئيس قاعد في مكتبه ومشغل قناة الجزيرة . قال لي انت عارف لو البلد دي قامت فيها ثورة مفروض اول حاجه يعملوها شنو؟؟ قلت ليهو شنو !!! قال .. يهدوا المسجد الفي حدائق مايو قصاد الهيلتون لانو شكلو ماحضاري ومكانو غلط ؟؟؟ ياولدي انت عاوز تدخلني الحراسة بشيبتي دي وانا راجل كبير ودكتور كماااان معقول اقعد في الحراسة مع الشماشة في شيك راجع وقنب يضحك .. والله العظيم بكره قروشك تجيك لحدي عندك ؟؟ وخليك عاااااااقل.. ماتهور تاني .. شهر كامل مافي ولاقرش جااااني !!! لاقيت ابراهيم احمد عمر في مقابر احمد شرفي جاء يشيل فاتحة ،،، وبدون مقدمات قلت ليهو عندكم واحد من مساعدي رئيس الجمهورية حرامي سرق قروشي رجاله كده وحمره عين .. قال لي منو قلت ليهو احمد بلال عثمان قال لي ده عندو منصب سيادي تجي البرلمان تقدم طلب وندرج القضية في جدول الأعمال ونعمل تصويت ولو وافقوا بنسبة التلتين نرفع الحصانة السيادية منو وبعد داك تمشي البنك وبعد البنك تمشي النيابة ومن النيابة المحكمة . وقبلي مايتم كلامو شلت شنطتي وقطعت تذكرتي وهسي قاعد في الصحراء الكبرى شاكر حامد بدعوا للشهداء ليل ونهار وفخور بكفاح الشعب السوداني وشباب الثورة ولجان المقاومة الوروني يوم في الكيزان اولاد الكلب ديل .. والقروش في ستين داهية طالما ماشين في السكة نمد وبنسترد في البلد شبر شبر ومكتب مكتب . عبدالواحد عبدالله
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عاطف حقة
فيس بوك
تويتر
انستقرام
يوتيوب
بنتيريست