بسمع فى الراديو فى طريقى للعمل ؛ كان هناك لقاء مع امرأة كندية vegan تتعرض لاستفذاذات بسبب ملصقات stickers فى سيارتها تعبر عن رأيها فى قتل الحيوانات و أكلهم.
مقدم البرنامج تساءل بأن هؤلاء احتمال يكونوا اصحاب مزارع تربية ماشية و جداد . قالت ان الحمهور بصورة عامة يكن شعور بالعداء نحو النباتيين.
المهم ؛ صاحبى عنده مزرعة صغيرة يربى فيها بعض الأغنام ؛ عنده عتود (حلو) جدا مقرب اليه. حتى اصبح خروف كامل الدسم.
. يوم اصحابه جاؤوا لزيارته قاااااااام ضبح الخروف !!! قلت ليه انت monster ، كيف تسمح لنفسك تعمل علاقة وجدانية مع الخروف وفى النهاية تاكلوا ... اضبح اى خروف تانى و بيع الخروف ده ! وحهة نظر ضعيفة ! موش؟ I know
اكل الحيوانات شئ مقزز جدا ....
......
...
. ....
وفى نفس الوقت لذيذ .
التحية لكل النباتيين ؛ قلوبنا معكم .
هناك فرق بين vegetarian and
Vegan
Post: #2 Title: Re: هل بيننا سودانيين نباتيين او vegan ؟ Author: Mohd Ibrahim Date: 10-27-2019, 03:24 PM Parent: #1
في ناس كمان مزودنها بقول ليك ماتاكل من الشجرة الا الثمرة تقع في الارض ..لانو قطع الثمار غير مستوية تماما برضو مؤلم للنبات ..ولا عشان النبات مابكورك معناها ماعندو مشاعر ...
والكلام دا كلو منطقي من الناحية النظرية لكن عمليا الانسان اكبر معتدي علي الطبيعة بما فيها الحيوان والنبات ومع دا كلو يقول ليك "وقد كرمنا ابن ادم" .. life is a big puzzle man!!
Post: #3 Title: Re: هل بيننا سودانيين نباتيين او vegan ؟ Author: muntasir Date: 10-27-2019, 03:33 PM Parent: #2
الڤيجن هم سلفيين الڤجيتيرين، إحساس كده لو في زول فيجان في المنبر ده بكون محمد أدم
Post: #4 Title: Re: هل بيننا سودانيين نباتيين او vegan ؟ Author: أبوبكر عباس Date: 10-27-2019, 03:48 PM Parent: #3
حناكيش أم درمان ديل، الله يدينا خيرهم. قلت لي شافع الضان اسمو عتود؟!
النعجة بقولوا ليها خروف بت
Post: #5 Title: Re: هل بيننا سودانيين نباتيين او vegan ؟ Author: النصرى أمين Date: 10-27-2019, 03:49 PM Parent: #3
نعم ، محمد إبراهيم الحياة فزورة كبيرة ..
سمعت مرة انه الامام محمد احمد المهدى كان يصيد السمك بدون صارقيل حتى لا يخدعه.
التطرف غبر مقبول فى اى حاجة و يت ريا النباتيين يكتفوا بعدم اكل الحيوانات حتى نستطيع مواصلة التعاطف معاهم..
اظن نهاية الشهر احدى اكبر البوتيكات فى أمريكا ستوقف بيع فرو fur الحيوانات الطبيعى و تستعيض عنه بواحد صناعى. It's crazy out there
Post: #6 Title: Re: هل بيننا سودانيين نباتيين او vegan ؟ Author: osama elkhawad Date: 10-27-2019, 03:50 PM Parent: #3
Quote: إحساس كده لو في زول فيجان في المنبر ده بكون محمد أدم
حدس في محلو .
ولو طلع بعد نقده للاديان الجماعية بيحب اللحمة،
نكون في حاجة ماسة إلى دفاع منو ههههههههه
Post: #7 Title: Re: هل بيننا سودانيين نباتيين او vegan ؟ Author: علي عبدالوهاب عثمان Date: 10-27-2019, 04:06 PM Parent: #3
حبيبنا النصري .. تحياتي .. أنا شخصياً لا آكل اللحوم الحمراء فقط الاسماك والدجاج .. لا أعرف السبب لماذا ربما من صغري لا استسيغ لحوم الحيوانات أبداً في عيد الضحية أذبح الخروف وأدعو الشباب ناس الجمعية الشرط لازم يتم القضاء على أكبر كمية من اللحم .. باقي العائلة ما عندها مشكلة مع اللحم واستغرب أحياناً عندما يصف الناس بشوق وعشق لأكل ( الكبده ، والقلب ،والكلاوي ) أشعر أنه نوع من الاعتداء الغاشم على الحيوان .. وخاصة ( العجول ) لأننا نشأنا في السواقي أبناء ترابلة أجمل حيوان في دنيا العجل وخاصة عند أهلنا ترابلة زمان .. كانت العجول مدللة .. لونها اللامع مع اشعة الشمس والجميل جداً ذلك الدلال الطبيعي للعجل .. عندما يتم تدريبه على تناول أوراق اللوبيا من الجروف كما الطفلل المدلل تجد العجل يبدأ باللحس ورق ( اللوبيا ) ثم بعد ذلك تأكل من الأطراف ( بشوية شوية ) .. ونحن في التراث النوبي نشبه البنت المدلل بالعجل .. كما في شعر وغناء المرحوم وردي ( ارمديه قورتود ) يشبه الحبيبة بتلك العجلة التي تأخد جزء مريح من المراح لجمال عيونها وسعتها وحتى ظهرها تلمع مع أشعة الشمس .. لا أعرف كيف تسمح النفس لأكل لحم حيوان بهذا الجمال .. وأكثر ما يثير غضبي هو عشق الناس ( للكبد والقلب والكلية ) صدقني هذا الانسان أناني مدمر للكون البعض يأكل اللحم في الوجبات الثلاث ( فطور كبده ، غداء لحم ، عشاء لحم مشوي ) حتى الحيوانات المفترسة إذا أكلت ظبية أو غزالة لا تأكل لمدة ثلاثة أو اربعة ايام فقط تنام بالقرب من المياه لتشرب فقط .. ولا تصطاد إذا في حالة شبع أبداً .. ولكن هذا الانسان مدمر للارض .. لأن الارض أساساً ملك الحيوانات والانسان كان في الجنة ( سيدنا آدم ) .. السمك والدجاج .. الدجاع المتلج ( الحمام ) لا وألف لا ..
تحياتي الحبيب النصري .. هنا معروف وسط زملائي بأنني ما نباتي لكن لا أتناول اللحوم .. ================ كنا في ليلة في مدينة جدة في ساحة حدائق المطار القديم وتم إحضار العشاء طبعاً كبسة ( أرز + لحم ) الشباب دعوني إلى العشاء (( يا عم علي العشاء )) وعندما شاهدت اللحم قلت لهم (( بعد نص الليل حتى الكلاب لا يأكلوا اللحم )) واصبح قولاً يردده الشباب (( عم قال بعد ساعة 12 ليل الكلاب ما يأكلوا اللحم ))
شكراً الحبيب النصري .. آسف للاطالة .. وهذه المرأة الكندية معاها حق وسلم عليها وترجم ليها الكلام ده مودتي يا جميل ..
Post: #8 Title: Re: هل بيننا سودانيين نباتيين او vegan ؟ Author: بدر الدين الأمير Date: 10-27-2019, 04:29 PM Parent: #7
انا غايتو بحب من النباتات البصل الابيض والفول السودانى لانو بدونهم ماكان ممكن نستمتع بالمرارة وكبدة الابل وام فتفت
Post: #9 Title: Re: هل بيننا سودانيين نباتيين او vegan ؟ Author: أبوبكر عباس Date: 10-27-2019, 04:36 PM Parent: #8
بشكل علمي لا يمكن لجسم الانسان الاستغناء عن البروتين الحيواني، هناك بعض الأحماض الأمينية الاساسية الضرورية لبناء الجسم لا تتوفر في البروتينات النباتية، يعني تكون نباتي لازم تتناول حليب أو بيض أو ضبان أو باكتيريا ....
Post: #10 Title: Re: هل بيننا سودانيين نباتيين او vegan ؟ Author: النصرى أمين Date: 10-27-2019, 05:36 PM Parent: #9
با ابوبكر عرفت الكلام حيحرقك ههههه. غايتو بصراحة اول ناس لازم يكونوا نباتيين هم البياطرة .. ياخ انتو عارفين تفاصيل عن البهائم تقشعر لهاىالابدان . كفاية عملية (التخصيب) الصناعى للبقر (باليد) ...ووووووووب ووووب ..ههههههه.
بعدين نحن اولاد امدرمان اتربينا فى بيئة اى بيت فيهو كار غنم و حمام . اى بيت و بدون إستثناء.... نحن كان عندنا زقاق فيهم غنم و كان عندنا برج حمام .
اقول ليك ملاحظة ...السودانيين هنا فى كندا ..لاحظت اصواتهم عاليه مقارنة بباقى الشعوب.. السبب التربية فى حيشان كبيرة بها بهايم و حمام و بط كمان. انا كان عندى جوز ارانب ( تكاثروا بسرعة لكن للآسف تعرضوا لاعتداءات سافرة من كديس متوحش و عندى قصة احكيها يوما ما)
هناك حادثة حصلت لى وانا ابن ستة او خمسة سنوات تفاصيلها vivid فى دماغى .
كنت بلعب بكورة beach ball ..طارت وقعت فى زقاق جيرانا ..ناس حبوبتى زينب بت الامير كرم الله كركساوى ...مشيت ارجع الكورة من الزقاق و كان به غنم ...براحة دخلت و قبل ارفع الكورة هجمت على غنماية عندها قرون و كادت تشرط لى بطنى لكن شرطت العراقى الذى كنت ارتديه و كان ابيض جديد يصل تحت الركبة بقليل (موش قلت ليك تفاصيل vivid)
المهم من اليوم داك شهيتى للخرفان زادت و لم تتضمحل الا بعد وصولى كندا و الخرفان الزفرة ذات الرائحة الكريهة فى كل مكان
Post: #11 Title: Re: هل بيننا سودانيين نباتيين او vegan ؟ Author: النصرى أمين Date: 10-27-2019, 06:53 PM Parent: #10
وآلله لو طلع محمد ادم بتاع كوارع و ام فتفت و الباسم 🙂 ...تكون مشكلة كبيرة... اظهر يا محمد ادم و رينا رايك فى الموضوع ده
Post: #12 Title: Re: هل بيننا سودانيين نباتيين او vegan ؟ Author: النصرى أمين Date: 10-27-2019, 09:30 PM Parent: #11
يا سلام يا على ياخ انت زول راقى جدا...
واضح من مداخلتك انك بتتاثر شديد بالبيئة حولك ، معناها انك كنت تتمعن فى كل شي حولك موش زى ناس كتيرين الواحد يكون منقطع من الطبيعة حوله.
وده الحاصل لى من فترة ، اراقب الشجر و الطير و (و البط و الوز) و السناحب و الارانب . الاسبوع الفات فى الفجر و عند مدخل الشغل لقيت مجموعه من الغزلان (طبعا وقفت و قعدت اعاين ليها)
قبل فترة ، برضه ، كنت طالع من الشغل بالعربية ...بعد أول اشارة ..قبضت فرامل شديدة لمن لاحظت لطائر من قبيلة الغربان (شكله جميل جدا بالمناسبة) يعتدى على عصفور صغيرونى حليونى . قبضت فرامل..نزلت من العربية ..رفعت العصفور ..لقيت ميت .. صاحبى كان وراى ...وقف ..سألنى ..يا زول مالك ؟ حكيت ليه سريع .قال لى انت جنيت رسمى 😂.
هل لاحظت انه الناس البتاكل لحم كتير بكونوا شرانين و عدوانيين.
زمان يقولوا لينا ؛ الكلب لو اكل لحمه نيه بكون سعران او بيبقى hostile يعض اى زول . عشان كده تلقى الكلاب البتتحاوم حول الجزارة كلاب شرسه خاصة بالليل...
فى النهاية ...و بصراحة..لا أستطيع التعاطف معك فى موضوع العجل لانه اللحم المفضل عندى و بعده الدجاج ثم الخروف ثم السمك .
Post: #13 Title: Re: هل بيننا سودانيين نباتيين او vegan ؟ Author: النصرى أمين Date: 10-27-2019, 09:34 PM Parent: #12
تعرف يا بدر الدين؟ لو جابوا لى لسته بتاعت ناس نباتيين و لسته اخرى لناس بتاعين لحوم و شيات. طوالى اقول ليهم بدرالدين ختوه مع ناس الشيه و الكوارع. ناس اللحوم ظاهرين من كتاباتهم هههههههههه
Post: #14 Title: Re: هل بيننا سودانيين نباتيين او vegan ؟ Author: أبوذر بابكر Date: 10-27-2019, 10:34 PM Parent: #1
أنا غايتو نباتى تب
زول خدار و فواكه وحبوب و بقول
وحلاوة مولد
ههههههه
بالله لو ادوك موزة انيقة كده ولا عجورة خدرا و تريانه و روخسه
وادوك عضم
بتشيل ياتو ؟
سبب مشكلتى اساسا مع اللحوم بأنواعها كلها و اللبن هى الريحة
الريحة و شكل الحيوانات كمان
ههههههه
فى الجنة ح ارطز بس على الفراولة و الجوافة الخدرا الماكنة ديك
لونها بكون ابيض من جوه
طبعا فى الجنة بقول ليهم عايز جوافة بدون البذور الجواها دى
واحتمال برضو بطيخ بدون حب
قال ليك الجنة دى اى شى فيها
ههههههههههههه
ازيك يا نصرى و الرهط الكرام
Post: #15 Title: Re: هل بيننا سودانيين نباتيين او vegan ؟ Author: امتثال عبدالله Date: 10-27-2019, 10:43 PM Parent: #14
بوست اوسكار ... اما تعليق استاذنا علي عبد الوهاب وبدر الدين الأمير، وعلى الرغم من التعليقين ضد بعض ، لكنهما تعليقان اوسكار خمس نجوم . . واكلتي المفضلة، وكما هو موضح في البروفايل ، كبدة بالبيض، ،،،وأنا بتفنن في عمل الكبدة بالبيض، ،،واطمئن يا عمنا علي ما بناكل كبدة العجل ولكن فقط كبدة الضأن ، ،الخروف....هههههههه.....هسه ما جوعتونا ....
Post: #16 Title: Re: هل بيننا سودانيين نباتيين او vegan ؟ Author: النصرى أمين Date: 10-27-2019, 10:44 PM Parent: #14
اخيرا ظهروا الناس القيافه ..ياخ اى زول نباتى انيق و مرهف الاحساس اهلا ابوذر ، معاك ناس تانيين من المنبر ده متخيلهم فعلا ناس نباتيين ..انا حاولت كم مرة اتوقف عن اكل اللحوم لكن والله غلبنى بالذات اللحوم المشوية على الطريقة الهندية...وووب على قولة ماما أميرة ههههههTika او Peri Peri احييك و الله ..ريحت نفسك من الأمراض و التفسيات .وعندى ليك بوست الأيام الجاية عن فاكهة مبالغة عديل .اكتشفتها بالصدفة قبل بضع سنوات و بقيت مدمن عليها للاسف تظهر فى الشتاء بس
معذرة الطابع الالى كمل الاسم بدلا من ابوذر الى ابوبكر
Post: #17 Title: Re: هل بيننا سودانيين نباتيين او vegan ؟ Author: النصرى أمين Date: 10-27-2019, 10:49 PM Parent: #16
امتثال ياخ خيبت توقعاتى !
كنت خاتيك مع قائمة النباتيين طلعت وحش مفترس 😂. ياخ فى زول عاقل بياكل كبدة ؟
ما تشوفى فصاحتى دى !!! انا بموت موت فى السجك لدرجة انى بقيت اصنعه تجاريا و نفسى اعمل مصنع كبير يغطى كندا كلها .
Post: #33 Title: Re: هل بيننا سودانيين نباتيين او vegan ؟ Author: أبوذر بابكر Date: 10-28-2019, 06:18 AM Parent: #16
عوافى يا نصرى
بالله شفت الفواكه الإستوائية دى كيف ؟
العجب كمان لما تعمل ليك منها كوكتيل عصير
تقول لى لحم بى الصاج
هههه
فى مكان غريب كده فى تخوم امدرمان الغربية اسمه قندهار
المحل ده محتاج ضربة نوويه والله
مره جماعة ساقونى هناك و انا ما فارز اى شى طبعا
عارف اول احساس جانى شنو
تتذكر فلم Scream
ياخ لغاية الآن أنا بتجينى كوابيس والله
هههههه
Post: #18 Title: Re: هل بيننا سودانيين نباتيين او vegan ؟ Author: معاوية المدير Date: 10-27-2019, 10:58 PM Parent: #14
Quote: بالله لو ادوك موزة انيقة كده ولا عجورة خدرا و تريانه و روخسه
وادوك عضم
بتشيل ياتو ؟
مُو النصري البعرفو أنا دا، لوّمك بي إياهو المكنكِش في العضُم .
يا النصري يوم الخميس عازمك chicken wings في محل في الـ32 عندهم ما يقارب الـ30 فليفر ؤ قطع شك المحل دا بتكون خابرو إنت، تدفع 10 ولآر ؤ تقعد ترتع للصباح ...
Post: #19 Title: Re: هل بيننا سودانيين نباتيين او vegan ؟ Author: النصرى أمين Date: 10-27-2019, 11:02 PM Parent: #18
يا مدير
اموت ركن فى الجكن و ينقز .. بتذكر المحل ده ..مشينا ليه قبل كم سنة.. تدفع عشرة دولار و تاكل 866 جناح دجاج بجميع النكهات ...
الحقيقة انا مفكر ابقى نباتى و اوقف اكل اللحوم لكن ممكن ناخر المسألة دى لغاية موضوع العيزومة دى .. نعتبرها خم الرماد لعالم اكل اللحوم ..
Post: #20 Title: Re: هل بيننا سودانيين نباتيين او vegan ؟ Author: Mahjob Abdalla Date: 10-28-2019, 01:47 AM Parent: #19
Quote: وآلله لو طلع محمد ادم بتاع كوارع و ام فتفت و الباسم 🙂 ...تكون مشكلة كبيرة... اظهر يا محمد ادم و رينا رايك فى الموضوع ده
غايتو قبل 10 سنين لما كان معانا شراقي بجاى, كان زول كوارع من الدرجة الاولي لكن مما مشى بقي غرابي شايف كتاباتو اتغيرت و ربما ايضا اكلاتو.
Post: #21 Title: Re: هل بيننا سودانيين نباتيين او vegan ؟ Author: خضر الطيب Date: 10-28-2019, 01:51 AM Parent: #19
سلام يا النصري بدر الدين الامير دا مرفعين عديل الاسبوع الفات كان عندنا مشوار مشيت ليهو في البيت جا نازل و معاهو بوكس بلاستيك مليان لي نصو ام فت فت و معاهو ملعقة و ريحة العربية بقت مأساة قلت ليهو دا شنو ؟ قال لي ام فت فت جبتها ليك قلت ليهو انا ما باكل الحاجة دي عاين لي كده باستنكار ما قال شئ فتح الصندوق بتاعو دا و بدا ياكل باستمتاع كانت اسوأ رحلة اليوم داك هههههه قبل كده بفترة جاني معتز القريش في البيت شايل معاهو كيس كبير ما ركزتا فيهو شنو .. خليت معتز في البيت و مشيت الشغل قام رسل لي صورة لمصيبة كده سألتو قال لي دي كبدة جمل حاجة ضخمة تقول كبدة ديناصور .. صراحة اول مرة اشوف كبدة جمل بعدها رسل صورة تانية و الكبدة مقطعة و فيها دكوة و حاجات تانية قال لي بخلي ليك منها , قلتا ليهو انا ما باكل الحاجة دي و لو سمحتا الصحن العملتها فيهو شيلو معاك تباً لهم متوحشين :)
Post: #22 Title: Re: هل بيننا سودانيين نباتيين او vegan ؟ Author: يحي قباني Date: 10-28-2019, 02:20 AM Parent: #21
Quote: غايتو قبل 10 سنين لما كان معانا شراقي بجاى, كان زول كوارع من الدرجة الاولي لكن مما مشى بقي غرابي شايف كتاباتو اتغيرت و ربما ايضا اكلاتو.
يا النصري انا كنت نباتي الا يوم اتغديت في بيت محجوب ده لقيتوا شاوي لحم مسيساغا كلو
Post: #23 Title: Re: هل بيننا سودانيين نباتيين او vegan ؟ Author: يحي قباني Date: 10-28-2019, 02:25 AM Parent: #22
Quote: حاجة ضخمة تقول كبدة ديناصور .. صراحة اول مرة اشوف كبدة جمل بعدها رسل صورة تانية و الكبدة مقطعة و فيها دكوة و حاجات تانية قال لي بخلي ليك منها , قلتا ليهو انا ما باكل الحاجة دي و لو سمحتا الصحن العملتها فيهو شيلو معاك تباً لهم متوحشين :)
خدوري يا جميل ...
زمان قبل شريعة اب عاج عزمت لي زي 5 شباب في دار المهندس
اها الخمسة طلعوا ما بياكلوها ... قمت بيها براي و انتهيت في الحوادث قربت اروح فوقها ... :)
اما ام فتفت ... فوحياتك كانت بالطشاته ايام قعداتنا ... هههه
Post: #24 Title: Re: هل بيننا سودانيين نباتيين او vegan ؟ Author: Mahjob Abdalla Date: 10-28-2019, 02:53 AM Parent: #23
Quote: اضطريت اقلب معاهم ... هههههه
تعرف يا يحيي نحن السودانيين ما بنخت اى احتمالات انو في زول سوداني ما بياكل لحمة لكن من هنا و رايح الزول يضع الاحتمال ده و يعمل انكلوشن لسلطة اسود في كل الاحوال.
Post: #25 Title: Re: هل بيننا سودانيين نباتيين او vegan ؟ Author: النصرى أمين Date: 10-28-2019, 03:16 AM Parent: #24
يا خضر ؛ نوع بدرالدين ده يدفعنا دفعا نكون نباتيين . ياخ ديل تفكيرهم اصلا ما بجى نحو الرحمة للحيوان الذى يلتهمون كبدته و قلبه و مراراته و فشفاشه.
والله انا seriously بفكر اترك اللحمة بكل انواعها؛ المشكلة مقاومتى ضعيفة جدا ضد الشواءات خاصة بالفحم والفرن الهندى.
Post: #26 Title: Re: هل بيننا سودانيين نباتيين او vegan ؟ Author: النصرى أمين Date: 10-28-2019, 03:25 AM Parent: #25
يا محجوب ؛ احتمال التغيير الحصل فى القناعات و المسلمات يكون (هبش) الموقف من الكون كله و بما يحوى .
يعنى الزول من مستهلك للكوارع و ام فتفت يتحول الى مستهلك للنباتات ال organic
Post: #27 Title: Re: هل بيننا سودانيين نباتيين او vegan ؟ Author: النصرى أمين Date: 10-28-2019, 03:33 AM Parent: #26
يا يحى ؛ غالبا ضيوفك الخمسة الذين رفضوا كبدة الابل من امدرمان . وآلله انا طوال حياتى فى امدر لم يمر على شخص ياكل لحم الابل . موش كده و بس ولم امر على جزارة تبيع كبدة ولحم الابل . احتمال ده حاصل فقط فى محيط المجتمع الذى عشت فيه لكن برضه اظن ان الامدرمانيين عموما ليسوا من هواة الابل و منتجاته .
طبعا فى طفولتنا ؛ القعدات كانت مظهر اجتماعى عادى ؛ تقريبا فى كل حوش او مربع او حى كانت هناك قعدة...هذه القعدات كانت دائما بدون منتجات الابل.
Post: #28 Title: Re: هل بيننا سودانيين نباتيين او vegan ؟ Author: muntasir Date: 10-28-2019, 03:52 AM Parent: #27
يا نصري ما أكلت كبدة إبل عند عمك الوسيلة العكام الله يرحمه في نادي التاج
Post: #29 Title: Re: هل بيننا سودانيين نباتيين او vegan ؟ Author: النصرى أمين Date: 10-28-2019, 03:56 AM Parent: #28
خيالى انت يا منتصر (على قولة واحد اخونا) هو انا متذكر نادى التاج ده وين ؟ عشان اتذكر كبدة عمك الوسيلة
Post: #30 Title: Re: هل بيننا سودانيين نباتيين او vegan ؟ Author: يحي قباني Date: 10-28-2019, 04:14 AM Parent: #29
Quote: خيالى انت يا منتصر (على قولة واحد اخونا) هو انا متذكر نادى التاج ده وين ؟ عشان اتذكر كبدة عمك الوسيلة
يا النصري مونتا ده كان بلعب كونكان مطعم في نادي الحديد ... ما تباريو عليك الله ...
النصري تتذكر محل الفول ألكان قصاد محطة محجوب خال العيال و قلبوهو كشك توت بعد داك ؟
Post: #31 Title: Re: هل بيننا سودانيين نباتيين او vegan ؟ Author: امتثال عبدالله Date: 10-28-2019, 04:49 AM Parent: #30
ابو ذر ما ممكن تكون نباتي في الجنة لان الله يقول في كتابه الكريم :وفاكهة مما يتخيرون ، ولحم طير مما يشتهون :: واذا اللحم مضر بالصحة يا النصري ما كان الله ذكره في القران ،،،وحتى اذا بطلت تاكل احم الابقار والضان ، اقع بس في الدجاج (والله لهسع ما عارفة الصاح بيكتبوها دجاج ولا جداد )واظن الدجاج من الطيور ...وما تنسى ان لجسمك عليك حقا ، والجسم يحتاج للبروتين ، والبروتين موجود في اللحم ،،،وعشان كده بطل حكاية تكون نباتي لانه ضار بالصحة ، وما دام الدجاج عندكم رخيص في كندا زي ما بيقول معاوية ود المدير فممكن تخلي اكلك كله دجاج .....وابعد من العجل...عم علي ما يزعل منك..
Post: #35 Title: Re: هل بيننا سودانيين نباتيين او vegan ؟ Author: أبوذر بابكر Date: 10-28-2019, 06:27 AM Parent: #31
Quote: ابو ذر ما ممكن تكون نباتي في الجنة لان الله يقول في كتابه الكريم :وفاكهة مما يتخيرون ، ولحم طير مما يشتهون ::
ازيك يا امتثال
ما شنو
يخيل لى الشغلانة بتكون اوبشنال
ما مشكلة احتمال اجرب لحم الطير ده
بس على شرط يكون ما فيه أى ريحة
ياخ ما ممكن الزول ياكل ليه شى بمش ويتحرك
و يطير كمان
هههههههه
Post: #32 Title: Re: هل بيننا سودانيين نباتيين او vegan ؟ Author: النصرى أمين Date: 10-28-2019, 04:56 AM Parent: #30
انا عارف منتصر ده قديم معتت ؛ اكبر مننا بعشرة سنين على الاقل . ما بتذكر والله دكان محجوب خال العيال لكن بتذكر دكان توتوكورة .. اذكر مرة قريب لينا ..صدقت معاه نتيجة عشرة مباريات (توتو كورة كانت 11مباراة) المباراة الأخيرة كانت فى الاقاليم ؛ ناس البيت كلهم طلعوا مظاهرات احتفالا و توقعا بالفوز بجائزة توتو كورة ..للاسف ظهرت نتيجة المباراة الأخيرة و لم تكن فى الصالح .. فى النهاية قريبنا فاز بجائزة ميتانه .
Post: #34 Title: Re: هل بيننا سودانيين نباتيين او vegan ؟ Author: أبوذر بابكر Date: 10-28-2019, 06:23 AM Parent: #22
بجيهو شد عصبى يعنى ولا كيف زى بتاع ناس الكورة داك مشهههههههههههههامشى يا مجرم
Post: #36 Title: Re: هل بيننا سودانيين نباتيين او vegan ؟ Author: عمر سعيد علي Date: 10-28-2019, 07:26 AM Parent: #34
انا الجابني هنا شنو . . عايزين تطلعو اللحمة من نفسنا . .؟ هو الاكل شن طعمو كان مافيه لحوم . . الشيه بالشطه والصاج بمزاج والاقاشي . . مع التحية للجميع . .
Post: #37 Title: Re: هل بيننا سودانيين نباتيين او vegan ؟ Author: Ahmed Yassin Date: 10-28-2019, 08:36 AM Parent: #36
النصري وشركاه اي زول عايز تتمتع وتستمتع باللحم حتى بدون ماتاكل كان تعاين بعيونك بس ل( اللحو) وهو يلتهم حملا كاملا بحالو بعد الفاصل الاول. وبدون عيش اما (القلع)ممكن براحة يلتهم خروف مع عيش وشطة
Post: #38 Title: Re: هل بيننا سودانيين نباتيين او vegan ؟ Author: Ahmed Yassin Date: 10-28-2019, 08:42 AM Parent: #37
استاذنا علي عبدالوهاب قلت شنو؟
Quote: كنا في ليلة في مدينة جدة في ساحة حدائق المطار القديم وتم إحضار العشاء طبعاً كبسة ( أرز + لحم )
شوف عيني في اللمة دي كانت ( سماية) عمك علي قاعد طرف وماسك راس الخروف بكلتا يديه و...بكود فيو
Post: #40 Title: Re: هل بيننا سودانيين نباتيين او vegan ؟ Author: علي عبدالوهاب عثمان Date: 10-28-2019, 09:15 AM Parent: #38
شوف عيني في اللمة دي كانت ( سماية) عمك علي قاعد طرف وماسك راس الخروف بكلتا يديه و...بكود فيو
============================= ووو أحمد أمبس .. تحياتي .. حتى في جمعيات في جدة يعرفون أنني لا أتناول اللحوم راس خروف !!! صدقني أصابني الدوار ( ههههه ) حتى عندما يكون العشاء علي في ليالي الرابطة .. قراصة بالويكة مطبوخ بالدجاج أو الخضرة أيضاً بالدجاج .. تعرف الحبيب أحمد فطوري ثابت ..ساندويتش خبز بالموز المستوي .. أحلي فطور في الدنيا .. ارجوك جرب مرة واحدة ( ساندويتش موز ) بقيت مشهور في ليالي جدة .. لازم كبسة دجاج .. طبعاً مع تعليقات الاخوان ..
تحياتي احمد أمبس ..
Post: #39 Title: Re: هل بيننا سودانيين نباتيين او vegan ؟ Author: احمد عمر محمد Date: 10-28-2019, 08:59 AM Parent: #36
لا اذكر انني اكلت اي نوع من انواع لحوم البقر او العجول فكانت لا تدخل بيتنا البتة
من العام الماضي وحين وطأت قدامي عتبة الاربعين غيرت نظامي الغذائي تماماً فاصبحت الوجبة الاساسية عندي بصورة شبه يومية سمك السالمون القادم من النرويج لما فيه من فوائد لا تحصى ولا تعدى والغني بالاوميغا ثري اضافة الى انني بجانب سمك السالمون اصبحت شبه نباتي لما يقارب الخمسة وتسعون بالمائة فاتناول وبصورة راتبة عند السادسة صباحا قبل التوجه الى العمل سلطة فواكه خفيفة عليه طبفة من عسل السدر واتناول عسل السدر المخلوط مع الحبة السوداء المطحونة ملعقة يومياً عند الصباح الباكر على الريق ويسبقها شرب ماء قليل قبل تناول العسل المخلوط بالسدر صباحا وعند الحادية عشرة سلطة خضراء جزر وخيار وزيتون شرائح وورق البقدونس الاخضر حتى نوفمبر الماضي كان وزني حوالي 85 كيلو غرام هبطت بالاستمرار على هذا النمط الى 68 كيلوغرام ومن ثم استقريت عن ال 74 كليو غرام ما يقارب الثمانية اشهر الرياضة اليومية اصبحت كما انها ركن ركين من جدولي اليومي في كل الاحوال شتاء وصيفا مع الرطوبة او بغيرها
يمكن ان يكون اعلاه مقترح للراغبين في تغيير نمط حياتهم للافضل
وشاركونا تجاربكم ايضا تحياتي لك النصري و لضيوفك الفخيمين
Post: #41 Title: Re: هل بيننا سودانيين نباتيين او vegan ؟ Author: خضر الطيب Date: 10-28-2019, 11:39 AM
حببنا قُبة يا فنان
يعني يا قبة نقدر نقول من كل ستة اشخاص في واحد بكون متوحش و بتاع كبدة ابل ماكنتوش هههههه رغم انو عندي اهلي جزارين لكن علاقتي بالخروف اللحمة بس اما كوارع ام فت فت كمونية راس ضنب خصاوي ديل ما تبعي بمناسبة الخصاوي دي مرة مشيت سوريا عندي صاحبي سوري جاني من الرقة قال لي عازمك في مطعم في سوق الحميدية قال لي هو مطعم شعبي لكن رهيب صراحة المطعم من الزحمة ممكن تكون واقف نص ساعة عشان تفضى ليك تربيزة المطعم بعمل كلاوي و قلوب و كبدة لكن اغلب رواد المطعم بتجيبم الخصاوي عندهم اعتقاد انو الخصاوي بتحسن القدرة الجنسية اول ما جاب سيرة الخصاوي طوالي قلت ليهو خارجني من هنا .. كمان جابت ليها خصاوي ههههههه
Quote: خدوري يا جميل ...
زمان قبل شريعة اب عاج عزمت لي زي 5 شباب في دار المهندس
اها الخمسة طلعوا ما بياكلوها ... قمت بيها براي و انتهيت في الحوادث قربت اروح فوقها ... :)
اما ام فتفت ... فوحياتك كانت بالطشاته ايام قعداتنا ... هههه
Post: #42 Title: Re: هل بيننا سودانيين نباتيين او vegan ؟ Author: Ahmed Yassin Date: 10-28-2019, 12:14 PM Parent: #41
غريبة بتاعين الخضرة بقولوا لناس اللحمة ( متوحشين) وعديمي الاحساس وضرب علي مثلا بالعجل السمح والوانه الفاقعة مع انه العكس....اول شىىء النباتات دي لراحة النفس والجمال وهي ملهمة الشعراء غنوا للبان وفريعه غنو للاشجار والنخيل واشجار المنقة والنجيلة ..حتى ان الجنة لونها اخضر ولم نسمع ان احدا نظم شعر او تغنى في العجول لو الخروفان او التيوس فهي خلقت لتؤكل.
Post: #43 Title: Re: هل بيننا سودانيين نباتيين او vegan ؟ Author: علي عبدالوهاب عثمان Date: 10-28-2019, 12:36 PM Parent: #42
ولم نسمع ان احدا نظم شعر او تغنى في العجول
======================= احمد أمبس .. يا فنان يا جميل .. بالعربي ما بعرف .. ولكن بالنوبية كثيراً ما يتم وصف البنات بالعجول . العجل بالنوبية بالمحسية والدنقلاوية ( قوتود gortoud ) وردي قال ( بروليه بالنق منو كيوسو .. أرمديه قرتود قوسوا ) مع أنك تفهم شوية في النوبية ( برو .. البنت ) ( بال نق .. بدون ما ننتبه ) كيوسو ( نشأت وكبرت ) أرمديه ( الحبل الذي يربط به العجل ) ( قورتود العجل ) بمعنى : هذه البنت فجأة كبرت ولم يكن ذلك في بالنا وأصبحت في مصاف العجل المربوط في المراح لأن العجل في هذه المرحلة يكون أملس الظهر لا مع ودلوع في الأكل ..
السمة الثانية لدى أهلنا الترابلة وطبعاً ناشئة من أهمية البقرة في حياتهم تشبيه عيون الحبيبة بعيون البقرة صدقني يا أحمد عيون البقرة البلدية زمان كانت مكحلة طبيعي .. وأهلنا كان مقياس جمال العين عندهم السعة العيون الواسعة والمكلحة .. فكانوا يشبهون عيون البنت ( تي مسي كول ) أكيد فهمت المعني ( تي يعني بقرة .. مسي يعني العيون ) ما زي الشاعر العربي زمان : عيون المها بين الرصافة والجسر .. جلبن الهوي من حيث أدري ولا أدري
واخذوا منهم ناس الحقيبة ناس الحبيب قباني .. عيون المها يا عيون ..
لا عندنا عيون البقرة .. هي المثال ( السعة والجمال والكحل والنعاس ) وأخيرا العجول من أجمل الحيوانات .. أحذروا من أكلها .. وخاصة الكبدة والكلاوي والكمونية .. إلخ حتى لا تسبب تعب للمعدة ومشقة للجهاز الهضمي .. ونهاية التاريخ طبعاً جلسة طويلة جداً في مقعد الحمام .. وتكاليف اضافية لمعالجة مياه المجاري ..(ههه )
تحياتي الحبيب احمد .. معليش ذهبت بعيد جداً .. أنت السبب يا جميل أنت من أثرت فيني هذا
الحبيب النصري .. البوست سوف يمتد طويلاً ..
Post: #44 Title: Re: هل بيننا سودانيين نباتيين او vegan ؟ Author: يحي قباني Date: 10-28-2019, 12:37 PM Parent: #42
Quote: بجيهو شد عصبى يعنى ولا كيف زى بتاع ناس الكورة داك مشهههههههههههههامشى يا مجرم
شايفها مشت لازم (تزرنا) عشان اسمك ابا ذر هههههه
Post: #45 Title: Re: هل بيننا سودانيين نباتيين او vegan ؟ Author: muntasir Date: 10-28-2019, 12:50 PM Parent: #44
أحمد يس القاعدة انك ما تأكل حاجة عندها وش 😋
Post: #46 Title: Re: هل بيننا سودانيين نباتيين او vegan ؟ Author: بدر الدين الأمير Date: 10-28-2019, 01:27 PM Parent: #45
او لا بتبادى يالحناكش المابتاكلو حلوم نية خضر الطيب ومن لف لفه اللحلوم نية مربوطة بشكل احساسى لدى الشعوب الشرب الخمر فيها جزء اصيل من حياتها لانها بتمتص الكحول من الجسم والداير توسع يسال المستنير ابوبكر عباس وماداير ارجعكم لاتفاقية البغط وخمر النوبة المعتقة وزى مابقول صديقى الكاتب الساخر الرطانى جعفر عباس ابو الجعافر اى شعب من شعوب الدنيا عندو اكلة زفرة المصرين الجنبنة ام دود المعتقة اللبنانين الكبة النية اهل الخليج اكل الضب لومشينا الصينين والفلبين عيييك على قول الرطانى بشاشة وبجيكم لقصة المسيرى المابشرب الشاى دى اروع من قصة قبانى بتاعت حب الكلاب حاتموتكم من الضحك وبصحتك ياوطن وبصحتك دى زاتها عندها قصة لدى الخواجات بس مازى قصة المراءة في لاول
Post: #47 Title: Re: هل بيننا سودانيين نباتيين او vegan ؟ Author: Ahmed Yassin Date: 10-28-2019, 01:33 PM Parent: #45
muntasir
Quote: أحمد يس القاعدة انك ما تأكل حاجة عندها وش
ههههههه .... الله يسعدك شايف في ناس قالوا مابياكلوا لحم لكن بحبوا الجداد والسمك معنى كدة حسب القاعدة الذكرتها مفروض يمتنعوا ...
Post: #48 Title: Re: هل بيننا سودانيين نباتيين او vegan ؟ Author: يحي قباني Date: 10-28-2019, 09:17 PM Parent: #47
Quote: تعرف الحبيب أحمد فطوري ثابت ..ساندويتش خبز بالموز المستوي ..
يا سلاااام يا عم علي
و انا اقول بريدك ليه ...:)
امي الله يرحمها و يطول في عمرك كانت ما تاكل غير الموز في الفطور ...
و اذا جا وقت الغدا و اشتهت شي محمر كانت تقلي الموز ...
وزنها لم يتجاوز الخمسين كيلو ...
و لم تحتاج للاكل ابدا ... حتى وفاتها في سن ال 85 كانت صايمة رمضان الله يرحمها و كانت تقول ليك انا ما بجوع ..
اما اخوك فبعد الموز الاصابع حق السودان تاني نفسي مرقت منو بعد جيت السعودية و هنا كمان ... الموز حجم ما طبيعي و ما سمح زي حقنا ...
الله يديك العافية ياخي و خليك مع الموز ... ههههه
Post: #49 Title: Re: هل بيننا سودانيين نباتيين او vegan ؟ Author: muntasir Date: 10-28-2019, 09:27 PM Parent: #48
عمو قباني الحريق انت أسياده في نادي بيت المال النضم الأطرش تكون في توتو دي ضربت ليك كم عمود وكسبت السيهان بيرد ،يا زول عمك الوسيلة كان عندو أحسن أم فتفت
Post: #51 Title: Re: هل بيننا سودانيين نباتيين او vegan ؟ Author: معاوية المدير Date: 10-28-2019, 10:08 PM Parent: #49
Quote: أحمد يس القاعدة انك ما تأكل حاجة عندها وش 😋
Post: #52 Title: Re: هل بيننا سودانيين نباتيين او vegan ؟ Author: Mohamed Adam Date: 10-28-2019, 10:34 PM Parent: #49
Quote: آلله لو طلع محمد ادم بتاع كوارع و ام فتفت و الباسم 🙂 ...تكون مشكلة كبيرة... اظهر يا محمد ادم و رينا رايك فى الموضوع ده
سلامات اخونا النصري وان شاء الله ثلجنا ده ما نزل علبكم بالبراري!. موضوع مهم وأنا إنتهزو كفرصة عشان ما أفك فيهو أسرار مهمة تساعدنا علي فهم شنو يعني الزول لما يكون لاحم او لما يكون نباتي!!!
لكن، قبل ما ابدأ خليني اعقب ليك علي كلام بلدياتي محجوب عبدالله(ابو شاودرشيد). إنت عارف يا النصري، آخر مرة انا آكل مع محجوب في صينية واحدة كان ذلك في 2005 كنا جينا ليهو في بيتو وفعلا كان ظابطين لينا غدوة مُدنكة بس للأمانة ما كان فيها كوارع ولا كان فيها فتافت زي ما هو قال بس كان فيها لحم تقبل و كمونية وانا قاعد آكل لكن كنت محصن نفسي(ح اشرحو تحت)، كمان لا أنساها لمحجوب لما سألناهو من الشاهي الأخضر، قال لينا ماعندو وقلت ليهو طيب يا العشي باللبن وكت ماعندك شاهي أخضر، مستفننا لحوم كده فوڨكم!
يبقي علي كده،والحمد والمنة لله، محجوب ذاتو صار عامل من العوامل الكتيييرة الخلتني أفتح للحم وأكون نباتي(ههههههه)!.
نجي للكلام الجادي: بالنسبة للناس البتأكل لحم: إنت عارف نحن كبني آدمييين بهذا الكون، معظم زعلنا وغضبنا وضيقنا بالآخر بل حروبنا الفي ما بينا كأفراد، قبائل، جماعات و بين الدول، ماهي إلا عبارة عن طاقات سالبة منبثقة بطريقة واخري من لحوم الحيوانات القاعدين نتناولة بطريقة راتبة! كيف الكلام ده!!! شاهد جدادة، خروف او جمل يذبح وكمية الفرفرة، الخوف، الرعب والضيق البيمر بيهو اي قبل خروج روحو!! شيء صعب للغاية لدرجة انو لا يطاق!! أين تذهب تلك الطاقة المزرورة الخائفة الطالعة من الحيوان المذبوح، ده اذا سلمنا أن الطاقة لاتفني ولاتخلق من عدم... وين تذهب ووبن تخزن علي اساس ما ترجع لمادة مرة اخري؟ أليست تذهب لنا وتخزن ببطني وبطنك وببطن محجوب!! أليست تذهب بعد عملية الهصم والهدم لمواد أولية تمتصها أجسامنا!!! أليست أجسامنا تغذي عقولنا لأنها بمثابة الغلاف الخارجي لعقولنا(وعينا)!
يبقي ماذا تتوقع ان تكون سلوكنا لما الواحد فينا صار غذاءه العقلي والروحي مشحون بشحنات سالبة(كلها خوف ورعب وحقد و...الخ)!!! هل تتوقعنا نكون ملائكة ولا شياطين!!! عشان كدة أنا نباتي بوعي وبإقتناع؛ لكن رغم كده احيانا بنأكل اللحوم في حالة أكون مسافر أو مضطر بس افعل بعدما أحصن نفسي من تلك الطاقة السالبة الملوثة الموجودة باللحمة والموجودة بالمكان الفيه اللحمة processed!!!
يبقي لو أي زول بيضمن يحصن نفسو كويس ممكن يأكلها بلا إسراف يعني تأكل منها بقدر ما يسد رمقك!
معظم المصلحين من رسل، أنبياء، فلاسفة، رجالات أديان تجدهم نباتييون بإمتياز للأسباب الذكرتها فوق وغيرها!! لكن برضو تجد منهم من يأكل اللحوم بل يشجع أتباعه علي أكلها وذلك يرجع للأسباب التالية: - تلقي المصلح بيعرف كيف يتحصن من طاقتها السالبة أثناء الذبح، أثناء، الطهي، أثناء الأكل وأثناء طرح الفضلات وهنا كمثال: نجد نبي الإسلام محمد بن عبدالله وامته من المسلمين بيأكلونها بطريقة نهمة بس معظم اتباعه لايفقهون السر الكامن خلف تلك الرخصة الأعطاها ليهم بخصوص أكل اللحوم!! . -المصلحين كانوا عايشين في بيئة صعبة الزول فيهم عادي يبيت القوّه يعني يكون(طاقي النار وزاحف علي الملال) .. عندهم لحوم الطير والألبان والعسل غذاء يصلح ان يكون بملكوت الإلهه من ندرته، ولك ان تتم الباقي خيال!!
طيب، كيف تتحصن من الطاقة السالبة الموجودة في اللحم عندما تخرج منه روح الحيوان المذبوح؟ الإجابة: لازم إنت تكون Full awareness. لما تذبح، لما تقطع اللحم، لما تطهيهو، لما تأكلو، لما تطرحو خارج جسمك...الخ. لوفهمنا ما سبق نقدر نفهم السر الكامن خلف السرعة في دفن الحيوان الميت؟ واحدة من أهم تلك العوامل هي ان الحيوان الميت يحمل طاقات سالبة هائلة من الخوف، الغضب، الحقد، الطمع، الجشع، ..الخ عشان كدة يدفن خوفا من انتشارها علي الكائنات الحواليو بالذات الإنسان.. تعتبر جثة الإنسان من أكثر جثث الحيوانات تلوثا بتلك الطاقة السالبة ثم اضف انا مليئة بباقي الكائنات الحية الأخري من بكتيريا، فطريات، فايروسات..الخ. عشان كده لازم تدفن جثته وتدفن ثم تغطي بالضانقيل(الطين الأخضر) ..لأنو علي كده نكون قد قللنا من خطر تلوث البيئة! يبقي الزول لما يكون نباتي بيكون حامل طاقة موجبة ويكون عندو قابلية للتحول الروحي اللطيف اكتر من الزول اللاحم الكثيف، لكن رغم كده لو اللاحم بيقدر يحصن نفسه بالوعي التام أثناء تعامله مع اللحوم ممكن يأكل بس يكتفي منه بالمعقول لأن النبي محمد كان يفعل ذلك.
مع تقديري.
Post: #50 Title: Re: هل بيننا سودانيين نباتيين او vegan ؟ Author: النصرى أمين Date: 10-28-2019, 10:02 PM Parent: #48
شكرا يا شباب على المرور اسمحوا بالتعليق على مداخلتين اعتقد انهم interesting الاول للاخ احمد عمر محمد والثانية للاخ قبانى و علاقة الوالدة بالموز .
الاولى تتحدث عن سمك السالمون و الثانية الموز
الاثنين بالنسبة لى elusive
Post: #53 Title: Re: هل بيننا سودانيين نباتيين او vegan ؟ Author: امتثال عبدالله Date: 10-28-2019, 11:55 PM Parent: #50
محمد ادم بصراحة تعليقك الأوسكار ده أثر في نفسياتي تأثير غير عادي، ومن اللحظة الإنتهيت فيها من قراءة التعليق قررت قرار صارم ان لا اكل لحوم حيوانات بعد اليوم...وان أصبح نباتي ....اكل الخضروات فقط ....اما اللحوم فدي طرفي منها ...والله يا محمد ادم خوفتنا عديل كده ...يعني عصبيتنا ونرفزتنا وجشعنا ووحشيتنا كله من أكلنا اللحوم الحيوانية..... والحمد لله انت ما اتكلمت عن السمك ....عشان ممكن نغير للسمك لغاية ما نبقى نباتيين ١٠٠ في الميه.. والمهم شكرا على التعليق الأوسكار المنطقي.... .
Post: #54 Title: Re: هل بيننا سودانيين نباتيين او vegan ؟ Author: بدر الدين الأمير Date: 10-29-2019, 01:49 AM Parent: #53
امتثال ياموسيقة خيبتى ظنى فيك وكمان دايرة اتبارى نظريات محمد ادم نحن فى مدينتى اربجى التى تقع على منحنى النيل الازرق السمك عندنا اكل السكارا الحيارة والدجاج عشان شوربته بنضبحو للزول المريض وفى الملمات الكبيرة البضبحوا فيها تور ام فتفت مابنخلى النساء يزبطنها لانهن ببلعنها هل نساء اربجى متوحشات ومنهن الآن وزيرة التعليم العالى ومديرة جامعة الخرطوم كدى جربى ام فت فتفت وبعداك تعالى نظرى مع الحنكوش محمد ادم
Post: #55 Title: Re: هل بيننا سودانيين نباتيين او vegan ؟ Author: يحي قباني Date: 10-29-2019, 02:38 AM Parent: #54
زمان يا بدر كان رسلونا السوق و جبنا اللحمة حمرا يسمعونا كلمتين
اللحمة لو ما دهنتها تلمع زي الودعة يرجعونا السوق ——— يا امتثال الخروف وهو معلق فيو لحيمات بناكلها نيه بعرف محلتها اي زول بضبح🙂
اسألي منها عمك بدر و عمك منتصر
Post: #56 Title: Re: هل بيننا سودانيين نباتيين او vegan ؟ Author: امتثال عبدالله Date: 10-29-2019, 03:09 AM Parent: #55
بدر الدين ود الامير ويحي ود قباني معقولة بقدر اكل ام فتفت ولحمة نية !!!...ومع اني كنت بحب اكل الكبدة بالبيض وبتفنن في عملها ، وما كبدة نص استوى ولكن كبدى كاملة الاستواء والطبخ عشان ما تكون فيها حاجة شبه نية ، لكن بعد كلام محمد ادم ، الكبدة ذاتها طلعت من نفسي، ،،،تراهو النباتيين ديل دمهم رايق وصبرهم طويل ومشاعرهم حساسة ،،،،ونقول للنصري صاحب البوست عندك حق تكون نباتي ،،،،..وبمناسبة اللحوم دي نسمعكم النكتة دي كل ما اتذكرها اضحك على الرغم من الهم والغم العايشين فيه ده ،،،،والنكتة بتقول::~ جماعة من البدو الرحل ماشين في الصحراء ومروا على واحد صاحبهم وقاعد في خيمته وقدامه خرفان وغنم وبقر بمرحن ،،ونزلوا عنده ضيوف وقالوا ليه : يلا يا اخونا نحن جعانين قوم كلم الولية زوجتك تعمل لينا الغداء ،،الراجل قال ليهم : والله عندي ليكم لبن تمام التمام وهسع قبال شوية انا حلبت اللبن ده من البقرة ديك، والله لبن بيرد الروح ،،الجماعة قالوا ليه : لبن شنو يا زول، قوم اضبح لينا الخروف الماكن داك ، وخليك كريم زي ما كان والدك واعمامك ،،،الراجل خجل ولكنه زعلان ومشى ضبح الخروف وزوجته عملت الغداء بكل لحم الخروف ، والجماعة بعد ما ضربوا اللحمة والشية ، غسلوا يدينهم ومسحوا خشومهم بكم جلاليبهم التفتوا لصاحبهم وقالوا ليه: اها بعد كده شوف لينا اللبن البتشكر فيه ده،،،،،،
Post: #57 Title: Re: هل بيننا سودانيين نباتيين او vegan ؟ Author: النصرى أمين Date: 10-29-2019, 03:38 AM Parent: #56
يبدو اننا سوف نأجل التعليق حول سمك السالمون و الموز و نركز شوية مع مداخلة محمد ادم خاصة و انها عملت تاثير على الجمهور🙂 (امتثال مثالا).
اظن كلام محمد ادم به بعض من الحقيقة و ليس كلها . انا مؤمن بحكاية الطاقة السلبية و سرعة انتقالها من جسم لآخر لكن ليس بالضرورة عن طريق الأكل.
دائمابحاول أتجنب المواقف/الناس السالبة خوفا من انتقال طاقتهم السلبية .
مرات كتيرة بكون بخيل فى التصرف فى الطاقة الإيجابية العندى و احاول قدر المستطاع استعمالها فيما يفيد ، بعنى ما ببعزقا شمال يمين ؛ بحاول استفيد منها فى نواحى شخصية مثل الاسرة و العمل.
لكن يطل علينا سؤال يا محمد ادم
؛ افرض انه فى زول عنده طاقة إيجابية هائلة تتطلب افراغها كل فترة ! هل لو وقع لحوم ليل نهار ، هل يصل مرحلة التوازن ؟
طيب نرجع لموضوع اللحم
مرات كتيرة يجينى احساس بالقرف من اللحم خاصة لمن اتمعن فى اللقمة فى يدى و اقعد افكر ؛ اللقمة دى كانت جزء من مخلوق كان يتنفس و يتكاثر ؛ الفرق شنو بينى و بين المورفعين ؟. المهم بحاول جاهدا اطرد الوساويس دى و انجع الطرق(المجربة عندى) عندما اذكر نفسى ان رسولنا الكريم عليه افضل الصلاة والسلام كان ياكل اللحم . اقول لتفسى طالما الرسول ياكل اللحم ، حق لى ان اكل اللحم مثله. انه امر طبيعى و عادى و لا يدعو للقلق.
Post: #58 Title: Re: هل بيننا سودانيين نباتيين او vegan ؟ Author: بدر الدين الأمير Date: 10-29-2019, 05:24 AM Parent: #57
ياقبانى هسى سن البرك دى يترجموها كيف للخواجية امتثال وكيف يصوفو ليها مكانها فى الخروف وليش بياكلوهانية وعيييك على قول والمطرطش بشاشة
Post: #59 Title: Re: هل بيننا سودانيين نباتيين او vegan ؟ Author: أحمد محمد عمر Date: 10-29-2019, 08:11 AM Parent: #58
Quote: فى الجنة ح اركز بس على الفراولة و الجوافة الخدرا الماكنة
غايتو إلا تبقى من ناس على سرر متقابلين .. سلمية سلمية لكن وحاتك دحماً دحما داك بلا لحم ما ببقى
Post: #60 Title: Re: هل بيننا سودانيين نباتيين او vegan ؟ Author: علي عبدالوهاب عثمان Date: 10-29-2019, 10:37 AM Parent: #59
يا سلاااام يا عم علي و انا اقول بريدك ليه ...:) امي الله يرحمها و يطول في عمرك كانت ما تاكل غير الموز في الفطور ... و اذا جا وقت الغدا و اشتهت شي محمر كانت تقلي الموز ... وزنها لم يتجاوز الخمسين كيلو ... ==================== حبيبنا قباني .. الله عليك يا جميل .. اللهم اغفر لها وارحمها وأجعل مثواها الجنة صدقني أحسن فطور ساندويتش الموز يا أخي لازم تجرب .. أنا ذاتي أكثر وزن بلغته في عمري 61 كلجم عشان كده ( الجزمة والشبط تعيش معاي سنوات طويلة ) وكمان في المواصلات العامة بس زمان كان اعجاب البنات للشاب الممتليء الجسم والوجه المدور .. كنا نخسر كل الجولات وكانت السمنة نادرة عندنا في ضواحي الدنيا للرجال والنساء ( اليوم العكس ) بالنسبة لي بنطلون مقاس 30 وقميص مديوم النحافة ما تنفع مع الجلابية السودانية شوف ناس ( ترباس وحسين خوجلي ) ما شاء الله لكن البدلة 100%
تحياتي يا جميل .. رحم الله الوالدة وأسكنها جنات الخلد
Post: #61 Title: Re: هل بيننا سودانيين نباتيين او vegan ؟ Author: بدر الدين الأمير Date: 10-29-2019, 03:37 PM Parent: #60
ياامتثال نحن علاقتنا بلحوم بكل مشتقاتها زى علاقة المسيرية بالشاى حكى لى صديقى هاشم على نمر الجلة ودناظر المسيرية انو جاهو صديقو ضيف المسيرية عندهم لشرب الشاى طقوص واشعار واول حاجة بستقبلو بيها الضيف الشاى وبعداك يكرمو المهم قالى ولعو النار وظبطو براد الشاى قال وجدى كان راقد فى السرير ومغطى وجهه بالعمة قال قدمنا الشاى للضيف قام الضيف قال انا مابشرب الشاى قال جدى طوالى جلس من رقدته ووجه كلامه للضيف باستغراب وقال له ياولدى نحن سمعنا بتارك الصلاة لكن تارك الشاى دا مسامعنا بيهو
Post: #62 Title: Re: هل بيننا سودانيين نباتيين او vegan ؟ Author: ايوب عبدالرحيم Date: 10-29-2019, 04:31 PM Parent: #61
Quote: انا غايتو بحب من النباتات البصل الابيض والفول السودانى لانو بدونهم ماكان ممكن نستمتع بالمرارة وكبدة الابل وام فتفت
بدر الدين الأمير إزيك يا صديق , مع جائزة أجمل تعليق تحياتي يا النصري
بوست معتق ب ريحة المشاوي والدمع وأم فتفت
Post: #64 Title: Re: هل بيننا سودانيين نباتيين او vegan ؟ Author: بدر الدين الأمير Date: 10-29-2019, 05:44 PM Parent: #62
Post: #63 Title: Re: هل بيننا سودانيين نباتيين او vegan ؟ Author: امتثال عبدالله Date: 10-29-2019, 04:35 PM Parent: #61
والله يا بدر الدين ود الأمير لمن قريت وصفك لي امتثال الخواجية بقيت اضحك براي لغاية ما المسنوحات المعاي في الغرفة استغربن وقالن جنيتي ولا شنو يا امتثال بقيتي تضحكي براكي ،،ولا أخبار حميدتي والخال الرئاسي وعبد الحي الإرهابي جننوك .. قلت ليهن لا ولكن زميل لينا في المنبر العام وصفني امتثال الخواجية. .ايه رايك يا بدر الدين هن ذاتن بقن يضحكن ..وقالت واحده فيهن أظنك ما خبرتيه انك قروية وما شفتي الخرطوم الا لمن قبلوكي في الجامعة وجيتي تعملي التأشيرة...والثانية قالت أظنك كنت مع الأطفال القرويات في غناهن : متين اشوف الخرطوم ....والثانية سألت ولييه وصفك الخواجية ..قلت ليها لاني قلت ليه انا ما باكل اللحوم...وقالت وفي زول في الدنيا دي ما بياكل لحوم !!وانتي ذاتك تكضبي مالك ...ما كل يوم بتضربي اللحوم اشكال وأنواع، ناهيك عن الكبدة العملتي لينا بيها وجع وش..... ود الأمير انا قروية بدوية ريفية ولهجتي في الكلام زي اخونا عبد الله ود البوش القروي .... هسع كدي نزل لينا اغنية الأطفال القرويات متين اشوف الخرطوم ...عشان نسمعها المسنوحات الخواجيات الصحي صحي والبتكلمن انجليزي ليل نهار ....ههههههه...
Post: #65 Title: Re: هل بيننا سودانيين نباتيين او vegan ؟ Author: بدر الدين الأمير Date: 10-29-2019, 05:59 PM Parent: #63
امتثال قلتى انك قروية قروية فى عينك ههه قروية ومابتاكل اللحوم و المرارة هسى لوجيتينا فى اربجى وضبحو ليك تقومى تقولى ليهم ماباكل المرارة ديل لويربطوك حاياكلوك ليها والمرارة فى الصينية كناية عن اننا ضابحين ليك ياخى صحباتك الهندوسيات قصدى الخواجيات بياكلن اللحوم انت الطنقعة ليك فى شنو
Post: #66 Title: Re: هل بيننا سودانيين نباتيين او vegan ؟ Author: Ahmed Yassin Date: 10-30-2019, 00:24 AM Parent: #65
الماشاف علي
Quote: أنا ذاتي أكثر وزن بلغته في عمري 61 كلجم عشان كده ( الجزمة والشبط تعيش معاي سنوات طويلة ) وكمان في المواصلات العامة بس زمان كان اعجاب البنات للشاب الممتليء الجسم والوجه المدور .. كنا نخسر كل الجولات وكانت السمنة نادرة عندنا في ضواحي الدنيا للرجال والنساء ( اليوم العكس ) بالنسبة لي بنطلون مقاس 30 وقميص مديوم
الخالق الناطق
Post: #67 Title: Re: هل بيننا سودانيين نباتيين او vegan ؟ Author: النصرى أمين Date: 10-30-2019, 01:38 AM Parent: #66
يا سلام على على
من القلائل الواحد يتمنى يقابلهم .
مكسب للب بس عيبه برطن مرات 🙂
داير اعمله معاه لقاه بوردى أسئلة و اجوبة قصيرة
Post: #68 Title: Re: هل بيننا سودانيين نباتيين او vegan ؟ Author: النصرى أمين Date: 10-30-2019, 04:01 AM Parent: #67
نرجع لموضوع سمك السالمون ، لدى اهتمام خاص بهذا النوع من السمك ، شاهدت عدة حلقات من قناة ديسكفرى عنه ، و كل يوم اهتمامى بزيد ، المشكلة انى فشلت استسيغه كطعام . جربت طبخه بكل الطرق ولم يعجبنى ؛ دائمآ اشعر و كانى امضغ فى بلاستيك.
اليك ؛ عزيزى القارئ ، على قولة بشاشا ؛ معلومات عن السمك العجيب ده (الترجمة من قوقل)
يرتبط سمك سالمون المحيط الهادئ ارتباطًا وثيقًا بسمك سلمون الأطلسي ، إلا أنه لا يمكن أن يتكاثر معًا لأن هذه الأنواع لها أعداد مختلفة من الكروموسومات.
سمك السلمون الوردي Pink هو الأصغر والأكثر وفرة ، ويعتبر سمك السلمون من طراز شينوك Chinook أكبر الأنواع (التي تتجاوز 50 كيلوغراما) ولكنه أقل الأنواع وفرة. ومن المثير للاهتمام ، لديهم بالضبط نفس العدد من المقاييس.
سمك السلمون في المحيط الهادئ هو أيضا semelparous ، وهذا يعني أن معظم البالغين يموتون بعد التكاثر ويصبحون مغذيات في أنظمة المياه العذبة. إنها العمود الفقري للمغذيات للنظم الإيكولوجية الساحلية في كولومبيا البريطانية.
بمجرد عودة سمك السلمون البالغ إلى المياه العذبة ، لا يأكل. هذا يعني أنه يمكن للبالغين قضاء ستة أشهر دون طعام أثناء نقل الدهون في الجسم إلى الأمشاج للتكاثر.
يقوم سمك السلمون في المحيط الهادئ بعمليات هجرة غير طبيعية مما يعني أنها تتكاثر في تيارات المياه العذبة النظيفة والباردة ، ولكنها تقضى جزء من كبير من حياتها في المحيطات ، حيث تتراكم أكثر من 99 في المائة من وزنها.
سمك السلمون في المحيط الهادئ يرجع لنفس مكان تكاثرها فى المياه العذبة لإعادة الإنتاج. يعود الكبار إلى نفس الجداول التي استخدمها آباؤهم لوضع البيض . سمح هذا السلوك بتطوير تنوع وراثي واسع النطاق داخل كل نوع ، مما يتيح للسلمون أن يكون قابلاً للتكيف بدرجة عالية.
يسافر سمك السلمون اثناء وجوده فى المياه المالحة إحوالي 18 ميلًا في اليوم ، لكنه قادر على الاحتفاظ بمعدل 34 ميلًا يوميًا على مسافات طويلة.
يمكن لسمك السلمون القفز ما يصل إلى مترين لعبور العقبات في الأنهار العذبة.
يمكن أن يهاجر السلمون أكثر من 3000 كيلومتر عبر المياه العذبة ليصل (نهر يوكون) لوضع البيض .
ياكل سمك القرش Orca حوالى 25 كيلو من سمك السالمون كل يوم ، هناك حوالى 300 سمكه قرش شواطئ كولومبيا البريطانية مما يعنى ان اسماك القرش فى المنطقة تستهلك الف طن من السالمون كل سنة.
تضع انثى السلمون الآلاف من البيض (عادة ما يتراوح بين 2000 و 10000) ، للأسف ، في الوقت الحاضر أقل من 1 في المائة من هذه البيض يعيش ليصل مرحلة إعادة الإنتاج .
Post: #69 Title: Re: هل بيننا سودانيين نباتيين او vegan ؟ Author: Mahjob Abdalla Date: 10-30-2019, 05:35 AM Parent: #68
زميلتنا في الشغل زمان قالت مشت زيارة لاهلها في اسرائيل. عزموها في مطعم و بحكم انها ما بتعرف الاطباق و الاصناف, خلتهم يختارو ليها. قالت جابو الطبق و تاكل و تشكر و انو الاكلة دسمة جدا جدا. بعد ما خلصت قالو ليها It the bull's balls اها قالت كل ما تتذكر الاكلة ديك, بجيها احساس انها نامت مع تور (دى تميتها موية من عندى :))
انتو يا ناس برارى كندا و جبال الروكى, قالو بتسموها Rocky Mountain Oysters
Post: #70 Title: Re: هل بيننا سودانيين نباتيين او vegan ؟ Author: النصرى أمين Date: 10-30-2019, 06:08 AM Parent: #69
اول مرة والله اسمع بال Rocky Mountain Oysters
قوقلتها طلعت فظيعة.. غايتو انا واقع مطاعم الهنود ..نفس اكلنا لكن اطعم و احدق. اوع من مطاعم الصينيين و الخواجات و الفيتناميين ..
Post: #71 Title: Re: هل بيننا سودانيين نباتيين او vegan ؟ Author: علي عبدالوهاب عثمان Date: 10-30-2019, 07:58 AM Parent: #66
الحبيب .. فنانا أحمد أمبس .. أشعر في شبه .. في البداية كنت مفتكرو ( الفنان حسب الدائم ) كنت مع الخواجات لفترة .. كان يستغربوا من وزني .. وكان يشجعوني على سباقات الجري في البلد تغيرت السلوك في الطعام .. أوزانهم زادت بشكل كبير جداً حتى في الجيش والبوليس ألاحظ في التلفزيون ( كروش ضخمة )
مودتي الحبيب أحمد امبس ..
Post: #72 Title: Re: هل بيننا سودانيين نباتيين او vegan ؟ Author: أحمد محمد عمر Date: 10-30-2019, 10:45 AM Parent: #71
Quote: نامت مع تور (دى تميتها موية من عندى :))
قبل فترة كدة كنت شغال مع امريكان شرامة النوع البفكفك لي أي حاجة داك وأول كلمة بقولوها بداية أي جملة شِت ودي كانت أول مرة أتعامل مع الخواجات في مكان السكن واتونس معاهم عادي كدة وعاجباني فكرة إني بتكلم انجليزي ونسة بتلقائية عشان كدة اندمجت معاهم في لغتهم دي انتهت الفترة وجابوا لي جنوب افريقي مهذب شديد كتمني النفس أي كلمة أقولها طوالي يخت يدو في راسه ويقول لي This is rude ومرات it is not polite عرفت منه إنه حتى كلمة jesus في تلفزيونهم بختوا محلها تيت غايتو اجتهد معاي شديد خلاص في موضوع تهذيب اللغة لكن حتة slept with دي أصلو أبت لي أقول ليه ياخي الجماعة ينططوا عرقانين وانت تقول نايمين!
Post: #73 Title: Re: هل بيننا سودانيين نباتيين او vegan ؟ Author: Ahmed Yassin Date: 10-30-2019, 11:03 AM Parent: #72
Quote: كن حتة slept with دي أصلو أبت لي أقول ليه ياخي الجماعة ينططوا عرقانين وانت تقول نايمين!
ممكن تترجم لينا الحتة البى العربي دي من ( اصلو ابت ليه اقول . وحتى .....- تقول نايمين) لو سمحت يا ابوحميد
Post: #76 Title: Re: هل بيننا سودانيين نباتيين او vegan ؟ Author: أحمد محمد عمر Date: 10-30-2019, 11:43 AM Parent: #73
دي مشكلة العربي الملخبط مع الانجليزي :) بتعذبني في تعليقات اليوتيوب إلا تفصل الانجليزي في سطر براهو
Quote: انتهت الفترة وجابوا لي جنوب افريقي مهذب شديد كتمني النفس أي كلمة أقولها طوالي يخت يدو في راسه ويقول لي This is rude ومرات it is not polite عرفت منه إنه حتى كلمة jesus في تلفزيونهم بختوا محلها تيت غايتو اجتهد معاي شديد خلاص في موضوع تهذيب اللغة لكن حتة slept with دي أصلو أبت لي أقول ليه ياخي الجماعة ينططوا عرقانين وانت تقول نايمين!
Post: #74 Title: Re: هل بيننا سودانيين نباتيين او vegan ؟ Author: بابكر قدور Date: 10-30-2019, 11:35 AM Parent: #71
النصري سلام والله قريت البوست من أوله لآخره لقيتكم كلكم بتاعين حيوانات أليفة وكنت كايس واحد يقول بالغلط أكلت لحم كديس ولا لحم كلب .. غايتو الإتنين ديل أكلتهم لكن الأغرب إني أكلت لحم "كراي" وإنتو بتسموهو مرفعين .... مرة قضيت فترة أسبوع فنكهة مع أصحابي مدرسين إتنين في منطقة ريفية تقع في الحدود بين السودان واريتريا .. شيخ المنطقة واحد من قبيلة الهوسا .. كان جالس معانا في ونسة وقال أمبارح ضربنا مرفعين لقينا لحمو سمين كملناهو شية جمر ساكت .... واحد من المدرسين "سنة ناعمة" قال ليهو (إخي ياعلي! تاكلو لحم المرفعين؟) فزجره بنظرة وضحك .... بعد يومين جاءنا الشيخ ودعانا للسهر وتناول العشاء معه .... فذهبنا جميعاً والجماعة شربو "الكونياك الحبشي ماركة 44" وجات صينية العشاء بما لذ من الطعام تسبقها رائحة التوم المركز .. إشي لحم محمر ولحم مشوي وكباب وعينك ماتشوف .... غسلنا أيادينا .. عندها قال مضيفنا للأستاذ ناعم السنة .. اللحم ده مالو؟ رد عليه لحم لذيذ جداً .... فأحضر لنا رأسين لمرفعينين قائلاً له : هذا هو اللحم الذي أكلته فانتهى الأمر بالأستاذ إلى المستشفى وعينك ماتشوف .. أما نحن فقد تم الهضم بسلام ..... هذه القصة والله واقعية كما رويتها ....
Post: #75 Title: Re: هل بيننا سودانيين نباتيين او vegan ؟ Author: Ahmed Yassin Date: 10-30-2019, 11:43 AM Parent: #74
بابكر قدور ؟؟؟!!!
Quote: فأحضر لنا رأسين لمرفعينين أما نحن فقد تم الهضم بسلام
انا آمنت بالله سمعنا بالاكل لحم حمير او ولا خنزير بالغلط او تمساح لكن بنى آدم يتعشى بى مرفعين !!؟
Post: #77 Title: Re: هل بيننا سودانيين نباتيين او vegan ؟ Author: أبوذر بابكر Date: 10-30-2019, 12:50 PM Parent: #1
يا لحمنجيه يا سفاحين
لحمنجيه دى على وزن امنجيه
داير اقول شنو
احتمال غايتو كان انا بقيت على التهام اللحوم
غالبا بختار ال استيك
يعنى شكلو و خلقتو مقبوله شويه
احتمال احتمال
ههههه
Post: #78 Title: Re: هل بيننا سودانيين نباتيين او vegan ؟ Author: Shinteer Date: 10-30-2019, 09:27 PM Parent: #77
يا أيها النباتيون، اسمعوا وعوا. النباتات كائنات حية مثلها مثل الحيوان، وكل كائن حي لديه أحاسيس لا يبرِّئك من ذنب أكلِه عدم رؤية تعابيره عنها؛ لكن النباتات ما بتفرفر، عشان كدا افتكرتو إنها مخلوقات هاملة ساكت ما عندها وجيع يبكي عليها. سمعت أن كل الكائنات الحية مسخّرة للبني آدم المجرم داـ عشان كدا ما تعافوا ... أضربوا من طَرف. شخصياً لو في طريقة أعمل عصير لحم بعملوا وأشربوا (سمعت أن بروس لي كان بيعمل عصير لحم مخلوط بالبيض). ياخي الدنيا دي غير لحم شن طعمها؟ علاقتي بالسمك في السودان يا أخانا النصري كانت علاقية كراهية متطرفة ولم أكن أطيق ريحة الحوت (كلمة السمك دي جديدة على القاموس السوداني وجاتنا من أولاد بمنبة)، لكن بعد عاشرت أهل السمك الآسيويين بقيت باكلو نيْ عادي. السالمون الني لا يُعلى عليه، وكل الأسماك التي لم نكن نعرفها في السودان الشغيغ أكلتها نية بكميات تجارية مع أرباب السمك. في السودان أكلت كدايس الخلاء (طبعاً تبريراً لأكل الكدايس، بنفرّق بين كديس البيوت وكديس الخلا) وما أحل الله من بعاشيم. البَرِك، البَرِك البَرِك؛ لو ما أكلت برِك تكون ما بتعرف مطايب اللحم الني.
بعد دا كلو ... إلى يومنا هذا ما حصل أكلت أم فتفت ولا كوارع. وهذه نقطة ضعف عاملة لي حرج كبير مع ناس يتهمونني بأني تايواني.
وتمجيداً للحم واحتراماً لمقامه، أقول لك قصة واحد من عندنا (اسو حسن). من المعلوم بداهةً أن المرّاسة أكثر من يحب اللحم وزولنا حسن دا مرّاسي معتّق ودايماً مفلِّس عايش على ضراعو رزق اليوم باليوم. ذات في يوم مشى الإنداية وجيبوا ما فيه ولا فرطاقة. دخل الراكوبة الأولى ولقى فيها ناس خاتّين جرادلهم الكبار قدامهم، سلّم عليهم ما في زول ردّ عليه لأنهم عارفنّو زول مقشّط. ومشى الراكوبة التانية، برضو ما في زول رد عليه السلام، والتالتة والرابعة .... إلى النهاية وما في زول رحّب بيه. حسن قنع من خيرن في الناس الشافهم وطلع من الانداية عطشان ريقو زي الوَدْعة، وبقى ماشي على غير هدى. ربك رب الخير يعتّرو في عنز ميتة (غالباً تكون طقّتها نَقَرة أو شقّتها سيوة، لأن الدنيا كانت دَرَت)، ومن حسن حظو أن العنز ميتة جديد ... almost fresh ... وحسن ما كضّب، مشى السوق جاب ليه مخلاية دمورية غليدة ونزل في العنز سلخ. قطّعها تقطيع على أصولو، وملأ المخلاية الكبيرة ديك لحم مقطّع جاهز ودمّو ينقّط ظاهر برّة المخلاية، واتوجّه على الإنداية. دخل الراكوبة ديك الدخلها أول شيء وما سلّم على أي زول، وقف زي الإمبراطور ونادى ست الإنداية الكبيرة شخسياً وقال ليها عليك الله جيبي صحن كبير أخت ليك فيه لحم تعملي لينا شية كاربة إكراماً للناس القاعدة دي. الناس القاعدة رفعت راسها وتعال شوف الحلايف؛ يا حسن على الطلاق تبقى جاي، حرّم تفك ريقك بالكاس دا (لأنه شكلو كان مريوق جد ظاهر في وشّو)، وتطاقشت كاسات المريسة فوق راس حسن. وحسن نزل في الكاسات نزول زول مغبون ... شرب ليه قريب نص صفيحة ... وقال ليهم آخوانا أكلوا اللحم دا بعد يجهز لأني لازم أودي باقي اللحم العندي دا للوليدات، وليداتي لا هسه منتظرني لا فطروا لا اتغدّوا... وزاغ منهم بدون ما يضوق معاهم لحم. وفعل نفس الشي مع كل البايقيين. حسن كان داير ينتقم من الناس الما عزموه لكن ممكن عادي ياكل فطيسة أو أي شي ... المهم بالنسبة ليهو إنه هو انبسط من المقلب العملو دا.
جرب لحم الكديس يا ود الأمير. صدقني ما حتندم. أما كبدة ألبل (الإبل) فهي من أطيب المآكل. غايتو الجنة لو ما فيها لحم نكون اتمقلبنا مقلب العدو المو صليح.
Post: #79 Title: Re: هل بيننا سودانيين نباتيين او vegan ؟ Author: ايوب عبدالرحيم Date: 10-30-2019, 09:55 PM Parent: #78
Quote: ما نحن فقد تم الهضم بسلام ..... هذه القصة والله واقعية كما رويتها ....
Post: #80 Title: Re: هل بيننا سودانيين نباتيين او vegan ؟ Author: يحي قباني Date: 10-30-2019, 10:32 PM Parent: #79
يقال ان بعض أنصار الخليفة عبد الله التعايشي كانوا من عشاق اكل الكدروك ...
قام الخليفة نهاهم عن اكله باعتبار ان اكل لحم الخنزير حرام ... !
لكن.. لامن شاف الحسرة فى عيونهم ... قام قال ليهم لكن ربنا قال:
و من اضطُر غير باغٍ ...
بسسسسس ... جماعتك انطرحو و عيونهم لمعت و قالو للخليفة و الله انحنا يا مولانا ... لامن نكون في الخلا ... و نشوف الكدروك ده و اللاهي بنضطر ليهو جنس اضطرار ...
Post: #81 Title: Re: هل بيننا سودانيين نباتيين او vegan ؟ Author: muntasir Date: 10-31-2019, 01:21 AM Parent: #80
طبعاً أنا شغال بي أصغر منك دوسو إلا الshellfish ٣ مرات أكلت الجمبري مرة للتجربة ومرتين بالغلط مشيت الحوادث قربت اتلحس بتورم زي التامبيرا والغريبة جسمي بعرفوا من أول لقمة ،يا نصري الأويستر بتاكلوا كيف ياخ تلقاهم بشطفوا فيه في البارات زي المخاتة ،تقول لي نباتيين عندنا جارنا في السودان عمك عثمان النعيم الله يرحمه تاجر مع شاي المغرب كل يوم بجيبوا ليه صحن ربيت تقول لي كولسترول
Post: #82 Title: Re: هل بيننا سودانيين نباتيين او vegan ؟ Author: Mahjob Abdalla Date: 10-31-2019, 01:41 AM Parent: #81
Quote: غايتو اجتهد معاي شديد خلاص في موضوع تهذيب اللغة لكن حتة slept with دي أصلو أبت لي أقول ليه ياخي
طبعا يا اخ احمد عمر, احنا الكنديين معروفين بالـ politenessلدرجة انو بقولو الكندى تعفصو برجلك و هو اليعتذر ليك. الامريكان بنكتو في الكنديين. واحد كوميدى قال جاء زيارة لكندا و عمل مخالفة في الهايوى. قال البوليسة عملت الصفارة و طرفتو علي جنب. قال بعد داك طلعت بوليسة من عربيتها و بتلوك في لبناتها . اول شئ قالت ليهو: Good afternoon sir May I have your driver's license .قال, قلت ليها You can have me too الكوميدى واصل في مقارنتو بالبوليس الامريكى, قال اول شئ يديك كم اف و يعمر سلاحو و بعد داك يقول ليك ارضا و يكلبشك حتي بعد داك يشوف الاى دى.
اخونا الهولندى احمد ياسين. الزول ترجم من العربي للانجليزى, و تجي تقول ليهو ترجم تاني من الانجليزى للعربي.
Post: #83 Title: Re: هل بيننا سودانيين نباتيين او vegan ؟ Author: النصرى أمين Date: 10-31-2019, 03:45 AM Parent: #82
ثلاثة مداخلات اوسكار على قولة امتثال الاول من بابكر قدور عن العشاء بشية المورفعين . قبل فترة كنت بتونس مع مجموعة من الشباب فى النادى السودانى بكالقرى ؛ الموضوع كان المورفعين ؛ احد الاصدقاء حكى ان جبهة المورفعين كانها خرسانة مسلحة لو اطلقت الرصاصةعليها من مسافة قريبة لارتدت الرصاصة من صلابة الجبهة.
صديق اخر حكى ان للمورفعين رائحة قوية جدا وعفنة ؛ كل الحيوانات عندما تشم هذه الرائحة تصاب بالذعر ؛ لذلك عندما تعانى بهيمة من تعثر فى الولادة ؛ وتحتاج لمساعدة فى وصع الحنين يشمموها جلد المورفعين ؛ تصاب بخوف شديد ترمى جنينها بعيدا .
عشان كده يا بابكر قدور ؛ اعتقد انه صاحب العزومة رجل يحب المزاح ، ضبح ليكم خروف بج و خدعكم براس المورفعين كنوع من الدعابة
Post: #84 Title: Re: هل بيننا سودانيين نباتيين او vegan ؟ Author: النصرى أمين Date: 10-31-2019, 03:55 AM Parent: #83
الأوسكار التانى لشنتير العائد بعد غيبة. و للأعضاء الجدد (عشرة سنين و انت نازل ) شنتير من قدامى المحاربين فى سودانيزاونلابن .
عنده اسلوب متميز ، ساخر جدا ؛ و قلم سلس.
مداخلة دسمة يا شنتير لكن خربتها بمصطلاحات يخربنى كان بعرفها
مثل
Quote: البَرِك، البَرِك البَرِك؛ لو ما أكلت برِك تكون ما بتعرف مطايب اللحم الني.
ما بعرف البرك والله
كذلك
Quote: عنز ميتة (غالباً تكون طقّتها نَقَرة أو شقّتها سيوة
ما عرفت والله سبب الوفاة فى الحالتين
Post: #85 Title: Re: هل بيننا سودانيين نباتيين او vegan ؟ Author: النصرى أمين Date: 10-31-2019, 03:59 AM Parent: #84
الاوسكار التالت ليحى قبانى و الله اول مرة اسمع بحكاية حيران الخليفة التعايشى و الكدروك . لكن ضحكت لمن اتخيلت المنظر . بالمناسبة الخنزير فيهو لحمة بت ستين لزينا ، عرفت كيف ؟ الخواجات ديل عندهم رقائق بتاع bacon بفطروا بيها تشهيك الفطور واضح انها ممتعة جدا بالنسبة ليهم .
حيران المهدى ليهم حق فى ادمان لحم الكدروك خاصة وانه عايش فى الخلا ، اليوم كله جارى ممكن يجعل لحمه هش و طرى
Post: #86 Title: Re: هل بيننا سودانيين نباتيين او vegan ؟ Author: Ahmed Yassin Date: 10-31-2019, 06:07 AM Parent: #85
حبيبنا محجوب عبدالله اهاهههها ياخي انت لذيذ
Quote: اخونا الهولندى احمد ياسين. الزول ترجم من العربي للانجليزى, و تجي تقول ليهو ترجم تاني من الانجليزى للعربي.
تصدق لو كان نزل لينا الترجمة ب( الفلمنش) كان اسهل ثم ثانيا ..الترجمةبالله داك عربي؟
Post: #87 Title: Re: هل بيننا سودانيين نباتيين او vegan ؟ Author: الصادق عبدالله الحسن Date: 10-31-2019, 10:10 AM Parent: #86
=
هذه السيدة في الفيديو يا النصري ذاع صيتها بأنها عالمة "في مجالها" فالتنصت إليها قليلاً ، ولينصت إليها عازف الأوتار القباني وهو القائل:
فلربما يجد يحيى عند جهينة الخبر اليقين بشأن ما يُحيي الخلايا عند ارتخائها، وما يشد الأعصاب ويدوزن الأوتار.
فجهينة الفيديو تجزم بأن الخس والبقدونس وعصيدة الدخن والجرجير والرِجلة والملوخية وسواها من خشاش الأرض إضافة إلى السمك الأبيض (وليس الجمبري أو السالمون ، يا أحمد عمر) هي أكثر فائدة في دوزنة الأعصاب وفي ترميم وتنشيط العضلات، وإحياء الخلايا بعد موتها وفي تربيط وشـد الأوتار لتُعطي أحلى وأقوى نغمة ممكنة، وأن ما تطرحه أمنا الأرض من إخضرار لا يوجد له نظير في إحياء ما هو رميم وأن الخضروات تتفوق على كل أنواع الكبد والكلاوي والكوارع والبيض والخصاوي وشوربة الحمام واللحوم والدهون والشحوم والرأس النيفة وأم فتفت وبقية العواليق واللواييييق واللغاوييييس التي نلوث بها أبداننا ويتسبب كوليسترولها في سد مسامات أجهزتنا الداخلية ويقلل تدفق الدم في أنابيبنا الخارجية.
هذه الجهيزة، التي قطعت قول كل خطيب، تؤكد لكم في خبرها الصادم أنكم إن أردتم توازناً معقولاً فالتبتعدوا عن اللحوم (مشوية وغير مشوية) وان توجهوا اهتمامكم إلى الإخضرار مع الرِجلة والفلفلية والسبانخ والملوخية وتوصيكم أن تركزوا على الإكثار من مضغ الجرجير ما استطعتم إلى ذلك سبيلا.
وتقول لكم: قاطعوا كل ما أكل السبع والمرفعين والضبع منها من شاكلة كبدة الإبل وسنامها والمقانص وسِن البَرِك والكوارع، واقتصدوا في أكل اللحوم، وقللوا من شهوة البطن والفم لكي تستمتعوا أكثر وأكثر بشهوة الاحتضان والشم والضم.
لكم التحية .... .. .
Post: #88 Title: Re: هل بيننا سودانيين نباتيين او vegan ؟ Author: أبوذر بابكر Date: 10-31-2019, 12:29 PM Parent: #1
لا
بعدين المفارقة العجيبة وين اتو قايلين
انا والله زول صريح وما بعرف اكضب
عشان ما تقومو تمبشونى ساى
انا والله زول مرايس
بعشق المريسة حتى الثمالة
و كنت زمان من رواد الانادى عديل
وبعد ده برضو العلاقة متازمه جدا جدا مع كل اللحوم
بس لو ألقى لى طريقة اغير بيها ريحتها دى
يعنى مثلا مثلا
ريحتها تبقى زى ال فهرنهايت
ياخ أن شاء الله زى ال كافن كافن حتى
ههههههه
Post: #89 Title: Re: هل بيننا سودانيين نباتيين او vegan ؟ Author: أحمد محمد عمر Date: 10-31-2019, 02:54 PM Parent: #88
يا الصادق يا خوي البنية دي كلامها كلام جرايد ساي خدارها وسلطتها دي كان نافعة ما كان وصفوها للريجيم .. سمعت ليك بي زول عامل ريجيم ونشاطه زايد؟ :) شابكانا ليك دي فيها كولسترول! هو بلا الكوليسترول دة البجري الدم شنو! السمك ثم السمك ثم الشية والكبدة المقلية .. قيل ثم من؟ قال والباسطة البلدية ذات السمن والعسل المنقطات
Post: #90 Title: Re: هل بيننا سودانيين نباتيين او vegan ؟ Author: النصرى أمين Date: 10-31-2019, 05:47 PM Parent: #89
يا الصادق و الله المصرية بالغت كمان فى وصف النباتات. غايتو رد اخونا احمد عمر ريحنى فى حنانى. انا طبعا مع اللعبة الحلوة ، مع النباتيين احيانا و مع الملحمين احيان اخرى.
زولتك المصرية دى دفعتنى متر نحو الملحمين
Post: #91 Title: Re: هل بيننا سودانيين نباتيين او vegan ؟ Author: النصرى أمين Date: 10-31-2019, 05:48 PM Parent: #90
والله يا ابوذر متخيلك زول رقيق لا بتسف لا بتسجر و لا شيوعى كمان. طلعت بتاع مرايس ..صدمة شديدة. غايتو انا ضقت العسلية ؛ فظيعة
Post: #92 Title: Re: هل بيننا سودانيين نباتيين او vegan ؟ Author: أبوذر بابكر Date: 10-31-2019, 06:16 PM Parent: #91
اقول ليك شى كمان
وفى الانداية كمان كنت النوع البدوبى داك
هههه
يا زول المريسة دى شراب الأولياء
انت ما سمعت بى عبار الشيخ إدريس أب فركه
ده جدنا بوالمناسبة
Post: #93 Title: Re: هل بيننا سودانيين نباتيين او vegan ؟ Author: Mohamed Adam Date: 10-31-2019, 07:45 PM Parent: #92
العود أحمد أخونا شنتير.
Quote: يا أيها النباتيون، اسمعوا وعوا. النباتات كائنات حية مثلها مثل الحيوان، وكل كائن حي لديه أحاسيس لا يبرِّئك من ذنب أكلِه عدم رؤية تعابيره عنها؛ لكن النباتات ما بتفرفر
الوجود بطبعو قاعد يعمل Recycling لنفسة... الإنسان جبران خليل جبران قال: طاقة الوجود زي القط الذي يجرح لسانه بالمبرد.. دمو سايل، ويقعد متكيف يتلمظ في لسانة... فاكر نفسه ماكلو فريسة شهية!!
يا اخ شنتير...الشيء الكويس في هذا الوجود انو عاقل ...كلما تدرج صعودا في سلم الوعيّ تجده يختار الأحسن لإستمرار وعيّو. يبقي.. وجود الإنسان في قمة ذلك الواعيّ وعليه دائما تلقاهو يتغذي بما هو أدني وعيا منه لكي تتناسب طاقة المتغذي عليه مع درجة تطور الإنسان(الأوعي)..تبقي.. الطاقة في النباتات أقل وعيا من الطاقة في الحيوانات وعليه تكون مناسبة جدا للتطور الروحي بالنسبة للإنسان.... هذة القاعدة تدق لحدي ما توصلك لغاية ما تستغني من الغذاء بكل طاقاته... مثال: الملائكة لايتغذون لأنهم وصلوا اعلي قمة التناسخ(الملائكة هم العقول المروضة الفارقت عملية التناسخ) وكذلك الشياطين لايتغذون لأنهم في درك قمة التناسخ الكوانتمي(الشياطين هم العقول الغير مروضة القاعدة في مرتبة التناسخ)!!
الاخ النصري طرحت عليّ سؤال بتعقيبك علي كلامي ما كان واضح، ياريت توضحه لي؟
Post: #94 Title: Re: هل بيننا سودانيين نباتيين او vegan ؟ Author: النصرى أمين Date: 10-31-2019, 09:48 PM Parent: #93
يا محمد سؤالى عن الطاقة السالبة الناتجة عن استهلاك اللحوم . اذا ، انا ، مثلا ؛ بداخلى طاقة ايجابية هائلة ؛ هل استهلاك اللحوم بكثرة يساعد فى معادلة الطاقة السلبية مع الإيجابية؟
Post: #95 Title: Re: هل بيننا سودانيين نباتيين او vegan ؟ Author: Mohamed Adam Date: 11-01-2019, 00:26 AM Parent: #94
يا النصري شايفك قلت لنفسك طالما الرسول ياكل اللحم ، حقو انت برضو تإكل اللحم مثله وبعدها سيكون الامر طبيعى و عادى و لا يدعوك للقلق!!... ................. نعم يا النصري، الرسول كان ياكل اللحم لكنه قاعد يحصن نفسه بإستمرار خوفا من طاقتها السالبة، لأنو بيكون واعي باللحمة قبل ذبحها, وعند ذبحها, وعند طهيها ولما يتناولها فهو بإستمرار في حالة Awarness واثبات ما قلته عن الرسول عشان ما يكون كلام إنشائي, دائما بتلقاهو يردد في جملة يسم الله الرحمن الرحيم ويهلل ويكبر ثلاث مرات عند الذبح.. ثم يطهر ذبيحتو(يرشها بالماء في اماكن معينة) كذلك يسمي بعد طهيها وعند أكلها مش كدة وبس وانما يسمي الله حتي لما يتخلص من فضلاتها لءنو بيدخل الحمام(العراء) برجله الشمال وبيخرج منه برجله اليمين ..
اضف لذلك في زمن الرسول, ما كان عنده خيارات اخري يأكلها غير البهائم ومشتقاتها, عشان كدة تلقاهو مضطر ياكل لحمها، يعني ما كان عندة خضروات وبقوليات وفواكهه مثلما هي متوفرة لك اليوم، إحتمال كبير لو حضر زمانا هذا قد يحرم أكل اللحم إذا اصلا الناس تأكله من غير Awareness !! ولكان غير سنة نحر الخرفان للناس بسنة أكل النباتات والعنب والرمان!
Quote: اذا ، انا ، مثلا ؛ بداخلى طاقة ايجابية هائلة ؛ هل استهلاك اللحوم بكثرة يساعد فى معادلة الطاقة السلبية مع الإيجابية؟
يا النصري, إذا بداخلك طاقة إيجابية هائلة زي ما وصفتها, ما أظنك تأكل اللحوم ولا اظنك تدنيها ليك! الفكرة كالآتي: كلما صرت واعيا بإشراطات حياتك اليومية وطبعا منها طعامك ستجد الطاقة الإيجابية تحل مكان الطاقة السلبية(الوعي بيطرد الغفلة) او ممكن تقول كلما كنت واعيا بتفاصيل حياتك تجد عقلك الباطن يكشف جزء منه ليكون(عقل واعي) او ممكن تقول كلما اصبحت اكثر وعيا بسلوكك كلما إمتلئت بطاقة الله...
Post: #96 Title: Re: هل بيننا سودانيين نباتيين او vegan ؟ Author: النصرى أمين Date: 11-01-2019, 01:51 AM Parent: #95
والله يا محمد ، كلام زى الورد. الظاهر الواحد بقى راسه خفيف ، كلمة تجيبه و كلمة و توديه. تقرأ كلامك نميل نحو النباتيين نقرا كلام شله شنتير نميل نحو اللحامه. ما عارفين نعمل شنو !!!
Post: #97 Title: Re: هل بيننا سودانيين نباتيين او vegan ؟ Author: يحي قباني Date: 11-01-2019, 02:13 AM Parent: #96
Quote: فلربما يجد يحيى عند جهينة الخبر اليقين بشأن ما يُحيي الخلايا عند ارتخائها، وما يشد الأعصاب ويدوزن الأوتار
Post: #98 Title: Re: هل بيننا سودانيين نباتيين او vegan ؟ Author: Mahjob Abdalla Date: 11-01-2019, 02:34 AM Parent: #97
غايتو البوست ده بدا بـ اكل القش, و اتحول لشئ كدا تقدر تسميه The joker of all trades and the master of all as well. علي حكاية المرفعين, بتذكر سنه 83 مع طلوع الشمس و الناس كلها نازلة الوداى (ناس جناين و كدا), ما عارف المرفعين راح ليهو الدرب و لقي نفسو في نص الوداى بين الجناين. اتلمو فيهو الناس و عملو دائرة حولو. المرفعين لما لقو نفسو مزنوق و ما في مخرج, شاف اقصر زول في المجموعة و نط ليك فوقو. يعني بالمعني الواضح كدا, قال ما دام موت, حيموت بواحد. من بين الناس الاحاطو بيهو, واحدة امرأة قريبتنا و معروفة بالشراشة. من القصص الكثيرة عنها اتشاكلت مع كم الرجال و في كل الاحوال كانت منتصرة. هذه المراة بضربة واحدة كسرت صلب المرفعين. المرفعين من الالم فتح خشمو و هكذا تمكن الرجل من الافلات من فكي المرفعين (سلامة كبيرة). المهم الجماعة ولعو نارهم في نص الوادى بين الجناين و ضربو ليك شية المرفعين.
برضو عن كديسة الخلا, عندنا هناك بسموهو (قط). برضو الناس عندهم زى الارنب. اعتقد انو حيوان ليلي, فالناس بعملو ليهو شرك و بعض مرات بقبض.
Post: #99 Title: Re: هل بيننا سودانيين نباتيين او vegan ؟ Author: Mahjob Abdalla Date: 11-01-2019, 03:02 AM Parent: #98
Quote: طبعاً أنا شغال بي أصغر منك دوسو إلا الshellfish ٣ مرات أكلت الجمبري مرة للتجربة ومرتين بالغلط مشيت الحوادث قربت اتلحس بتورم زي التامبيرا والغريبة جسمي بعرفوا من أول لقمة ،يا نصري
برضو شفت حالة زى. واحد بدرس كورس اسعافات اولية. في البريك زمن اللنش, عندهم الميكرويف في نفس غرفة التدريس. واحدة من الصينيات سخت اكلها في الميكرويف. بعد دقائق, الاستاذ وشو بقي زى التامبيرا. من استاذ اسعافات اولية الي عربة الاسعاف للمستشفي. شمومة بس.
Post: #100 Title: Re: هل بيننا سودانيين نباتيين او vegan ؟ Author: النصرى أمين Date: 11-01-2019, 03:04 AM Parent: #98
يا اخوانا والله حيرتونا ، تكررت قصص اكل المورفعين اكثر من ثلاثة مرات. كل مرة نكذب الحادثة يعاد ذكرها. انتو المورفعين موش هو الضبع ولا حاجة تانية ؟ كيف الناس تأكل حيوان زى ده ؟ هل هى الضرورة ؟ هل بختلف عن الضبع البنشوفه فى ديسكفرى جينيل ؟
وآلله قايلكم بتهزروا لكن يبدو أن اكل المورفعين عادى فى السودان . زول يجيب لينا صورة المورفعين بتاع السودانى
Post: #101 Title: Re: هل بيننا سودانيين نباتيين او vegan ؟ Author: Mahjob Abdalla Date: 11-01-2019, 04:57 AM Parent: #100
طبعا يا النصرى الناس الاكلو الشئ ده كانو بسيطين و كنا لمدة طويلة لما نلاقي واحد فيهم نكاويه. عنقرتك دى شايفين قايم فيهو شعر كدا ما طبيعي. احتما تنقلب تبقي مرفعين. او يا اخي صوتك ده اتغير شوية, غايتو الله يستر عليك بس نشوف كان خلال اسبوع ما قلبت او نوديك فكي يشوف ليك.
Post: #102 Title: Re: هل بيننا سودانيين نباتيين او vegan ؟ Author: Biraima M Adam Date: 11-01-2019, 05:35 AM Parent: #100
بوست أنيق بالنصري .. قرأت في أكبر ويب سايت طبي في أمريكا .. وجبة تسمي Paleo Deit يمكن ترجمتها إلي "طعام أهل الكهف" .. الكهوفيون .. أو طعام الأحفوريون .. هنا الوصلة .. وهذا موقع استشارات طبية متخصص ..
قصة طعام أهل الكهف .. تعتمد علي أكل أجدادنا في زمن الكهف .. تضرب المشويات وتأكل الثمار والخضروات .. لكن عليك الأبتعاد من كل أنواع الحبوب (كسرة، قراصة، عصيدة، عيش، ولا حتي المريسة كنجيمورو والبقنية) ..
أقرأوا الموضوع هنا ..https://www.webmd.com/diet/a-z/paleo-diethttps://www.webmd.com/diet/a-z/paleo-diet
يا أخوانا نسيتوا أهم حاجة .. الكول .. أصح ملاح أو بهار .. يحتوي علي نسبة عاليه من البروتين النباتي .. تغنيك عن اللحوم تماماً ..
بريمة
Post: #103 Title: Re: هل بيننا سودانيين نباتيين او vegan ؟ Author: Ahmed Yassin Date: 11-01-2019, 06:21 AM Parent: #102
المتعة لحمة كبيرة من احسن حتة في الخروف ( مع انه كله على بعضه حلو) ومع العضم تكون معمولة نظام(ضلع) ومستوية تمام..تمسكها بيدك تقطع معاك وش ومع الشطة الخدرة المسحونة بالتوم والليمون بالدكوةوحبة ملح. ياخي في طاقة اكتر من كدة.....واحلى وامتع من كدة... ياهو دا البرم عضمك وعصبك سلبية قال. بقدونس شنو وحشائش وزعتر بتاع الساعة كم .. عمركم في الدنيا دي شفتو ولا سمعتوا مصري طلع كلمه صاح؟ اذا كانت (عنيزة او فاطمة)، حبيبة امرؤ القيس وصاحباتها اكلن ناقة امرؤ القيس وَيَومَ عَقَرتُ لِلعَذارى مَطِيَّتي ,,,, فَيا عَجَبًا مِن كورِها المُتَحَمَّلِ فَظَلَّ العَذارى يَرتَمينَ بِلَحمِهِ وَشَحمٍ كَهُدّابِ الدِمَقسِ المُفَتَّلِ
Post: #104 Title: Re: هل بيننا سودانيين نباتيين او vegan ؟ Author: Mohamed Adam Date: 11-01-2019, 07:24 AM Parent: #103
Quote: .... من اللحظة الإنتهيت فيها من قراءة التعليق قررت قرار صارم ان لا اكل لحوم حيوانات بعد اليوم...وان أصبح نباتي ....اكل الخضروات فقط ....اما اللحوم فدي طرفي منها
الإبنة إمتثال عبدالله من خلال كلامك إستشفيت انك والنصري أمين أقرب الناس بهذا البوست ممكن يكونوا نباتين بس انصحك ما تسمعي للهرطقة بتاعت اخونا بدرالدين ود الأمير .. يبدو لي متورطين في ماشية كتيييره بآربجي عشان كده ما عايزكم تكونوا نباتين!!.. انصحك, انسي مغريات بدر الدين عن الشواشي والفتافت ماهي إلا دعاية مجانية للضأنم ولأغنامم!
Quote: الظاهر الواحد بقى راسه خفيف ، كلمة تجيبه و كلمة و توديه. تقرأ كلامك نميل نحو النباتيين نقرا كلام شله شنتير نميل نحو اللحامه. ما عارفين نعمل شنو !!!
يا النصري باين عليك من ناس الأعراف(ههههه) ..يعني قاعد بين الجنة والنار.... علي الهبشة يعني واقف علي الصراط وبرجل واحدة.ِ.. بيمينك النباتين وبشمالك اللاحمين!! يعني شنتير يجرك عليهو ونحن نجرك علينا...وفي النهاية الخيار متروك ليك... بس... انا انصحك من هنا, ان لا تسمع لكلام الزميل شنتير لأنك اقرب لل Enlightment منه. .. كذلك المحاججة بتاعت شنتير عن أكل اللحم, اصلها مامبنية علي ساس روحي وانما هي مبنية علي حالة إشتهاء لحظية... وشتان مابين الحالتين .!!
Post: #105 Title: Re: هل بيننا سودانيين نباتيين او vegan ؟ Author: أحمد محمد عمر Date: 11-01-2019, 07:30 AM Parent: #103
يا اخوانا الناس تنضبط شوية في تعليقاتها يعني ما ممكن أكون بديت الريجيم الليلة ودة فطوري مع الرجال
وأجي ألقى ألفاظ خادشة للحياء العام بالطريقة دي
Quote: لحمة كبيرة من احسن حتة في الخروف ( مع انه كله على بعضه حلو) ومع العضم تكون معمولة نظام(ضلع) ومستوية تمام..تمسكها بيدك تقطع معاك وش ومع الشطة الخدرة المسحونة بالتوم والليمون بالدكوةوحبة ملح. ياخي في طاقة اكتر من كدة.....واحلى وامتع من كدة... ياهو دا البرم عضمك وعصبك سلبية قال. بقدونس شنو وحشائش وزعتر بتاع الساعة كم ..
دة تحرش واضح بالنظام الغذائي بتاعي ومحاولات إغواء يصعب الصمود أمامها الناس تقول كلام علمي وبلاش الأوصاف الخليعة دي وانا قليبي رهيف وما بقدر على الضلع أبو شطة ودكوة عز الصيف
Post: #106 Title: Re: هل بيننا سودانيين نباتيين او vegan ؟ Author: الصادق عبدالله الحسن Date: 11-01-2019, 01:11 PM Parent: #105
=
Quote: سمعت ليك بي زول عامل ريجيم ونشاطه زايد؟ :)...
بالحيل يا أحمد، الإجابة بنعم وألف نعم أيها المُلهَم
نعم أنا سمعت، وأنت أيضاً سمعت، ومعظم إن لم يكن كل رواد وقُراء هذا البوست سمعوا بذلك الزول الهزيل الذي في أثوابه وسراويله أسد هصور
ومن حقك يا أحمد أن تُشكك في شهادة الدكتورة المصرية خبير الجنس وبطلة الفيديو في الأعلى ولكن هل هناك من يجرؤ على التشكيك في ذِمة الخبيرة السودانية (بِت مجذوب) التي لا يمكن أن يرقى إليها الظن أو الشك خصوصاً وأن عمنا ود الريس أقـّـر بخبرتها عندما خاطبها :
(( هل أحد يعرف "طعم الكوارع" أكثر منك يا بنت مجذوب ؟ انك دفنت ثمانية أزواج ، والآن وانت عجوز كركبة لو "قُدمت إليك شوربة الكوارع الساخنة" لما قلتِ لا ))
أنت تعلم وقباني يعلم بأن الخبيرة بت مجذوب لم تقل كلمة خير واحدة بحق سبعة من أزواجها السمان الغلاد مفتولي الشوارب والعضلات وضاربي لحم المشاوي، ولاعقي شوربة الحمام والكوارع .. وإنما شهِدت فقط لواحد من بينهم هو (ود البشير) ذلك الكحيان التعبان الذي كان هزيلاً تأكل الغنماية عشاه.
ذلك الهزيل الكحيان الضئيل - كما تعلم - كان يبدأ مع بت مجذوب تلاوة أوراده و"أوتاره" وأداء واجباته مباشرة من بعد صلاة العِشاء ويستمر في أداء طقوس عبادته بلا انقطاع أو ارتخاء أو توقف حتى مطلع الفجر.
-------
واصل يا أحمد ريجيمك بلا تردد أو نكوص عسى أن يبلغك ربك مقاماً محموداً مع أمثال ود البشير بعيداً عن الفطائر والألبان والأجبان، وبعيداً الكوارع وعن مصائر أولئك الغلاد السمان.
.... .. .
Post: #107 Title: Re: هل بيننا سودانيين نباتيين او vegan ؟ Author: أحمد محمد عمر Date: 11-01-2019, 05:06 PM Parent: #106
Quote: عسى أن يبلغك ربك مقاماً محموداً مع أمثال ود البشير
وحسن أولئك رفيقا
Post: #108 Title: Re: هل بيننا سودانيين نباتيين او vegan ؟ Author: جمال ود القوز Date: 11-01-2019, 05:46 PM Parent: #107
ما متخيل نفسي زول نباتي نهائي !! .. الضحية لمن ضبحت الخروف .. قرّمت من الكبده والكلوه وحتة من الفخدة .. عشان أولادي الواقفين معاي يتعودو .. مش ممكن نحن جزارين نضبح التور أب جاعورة .. ويكونوا اولادنا نباتيين .. خخخخ لكن للاسف اولادي 14 - 16 مابياكلوا لحوم نهائي الا لمن اهرشهم .. وبرضو يشيلوها يدسوها تحت الصحن في الصينية .. لكن يكبروا شوية متاكد ماحيقربوا اللحمة خالص .. أما أم فتفت والمرارة والحاجات النية دي مستحيل ياكلوها اكثر منها تعود أنا شايف إنها جينات وحاجات في تكوين الزول ونفسيته .. في ناس من تشوفهم تحس بأنهم نباتيين وتوقعك يطلع صاح ..
Post: #109 Title: Re: هل بيننا سودانيين نباتيين او vegan ؟ Author: Ahmed Yassin Date: 11-01-2019, 08:19 PM Parent: #108
الظريف اللذيذ احمد محمدعمر
Quote: دة تحرش واضح بالنظام الغذائي بتاعي ومحاولات إغواء يصعب الصمود أمامها الناس تقول كلام علمي وبلاش الأوصاف الخليعة دي وانا قليبي رهيف وما بقدر على الضلع أبو شطة ودكوة عز الصيف
بالله فطورك دا هسي فطور.. وبقعدك كم ساعة دا؟ صاحبنا لاعب المريخ السابق كان يوميا الصباح لمدة اسبوع والدنيا برد بشيل صحن المونيوم كبير ومطرقع بمشي يظبط فول بى (زبدة الفول السوداني) وجبنة وزيت سمسم وعيش حار....وصحن شطة بى ليمون ياخي اصلا ما حتتخيل المتعة. الاسبوع التاني....الفطور لحمة ضان تعمل حلة
Post: #110 Title: Re: هل بيننا سودانيين نباتيين او vegan ؟ Author: عمر التاج Date: 11-01-2019, 08:57 PM Parent: #109
النصري سلام.. النباتيين ديل ناس موهومين ساكت وبعد ما اقتعوا أنفسهم ما استبعد يحاولوا يقنعوا الأسود والنمور حتى ما تاكل اللحوم.. وبالمرة كده اتمنى يكونوا حساسين اكتر والنباتات زاتها ما ياكلوها لأنها كائنات حية ورقيقة وتبعث على التفاؤل والرومانسية.. عيبوا لي التراب ده، مش البني آدم أصله من تراب؟ ومحمد آدم الكان ما بيؤمن الا بما هو مادي وما كان مقتنع بوجود الله، عايز يقنعنا اليوم بأنه في ملائكة وشياطين وطاقة تخرج من الحيوان المذبوح، القال ليك هي طاقة منو يا محمد آدم؟ إذا كان ربنا الخالقنا قال الروح من أمر ربي وأما اوايتم من العلم الا قليلا، تجي انت وتقول طاقة سلبية بتدخل في البني آدم؟ وطيب الحيوانات دي ما أكثر حيوانات وديعة ومسالمة وخنينة وفي نواصيها الخير، ليه ما بتدخل كل الطاقات دي أجسام الناس البياكلوها ويستمتعوا بها؟ وهي ذاتا البهائم الانعام دي فايدتها شنو اذا ما اكلنا لبنها ولحمها، إذا ربنا عايزنا نتفرج فيها ساكت كان خلاها حجارة كريمة أو زهور، أو كمان خلقها من نور لا بتنوكل لا بتنشوي.. يا اخ اقول ليك حاجة.. الجزارين البضبحوا البهائم كل يوم ديل أرق مخلوقات الله، وما سمعنا يوم واحد بجزار قامت عليه الطاقة السلبية وركب بسكينه ضبح مواطن شريف.. نرجع للاطايب واللحوم، البهيمة دي غير الضلوف والشعر تأتي مافيها حاجة ما بتتوكل، إلا الذ حاجة وأطيب حتة فيها هي المقرشة، والاماكن القريبة من العظام عموما، والتعصب كمان لمن ينطبخ صاح، الاتنين ديل انا من المداومين على أكلها والاستمتاع بمضغها ومص المخ منها (شفوط)، والحمد لله لا اسه بقرش العظم وامضغ العصب زي ما الأسد، ومافي يوم شكيت من سن ولا ضرس ولا هشاشة عظام بحمد الله، اما الكمونية وسن البرك والكلاوي كان ما اتثقفنا ساكت كنت لا اسه بضربهم ساخنات من (امهم) ، يا اخي لقريب ده كنت بضرب شلوفة الباسم بي صوفها والحمد لله.. تقول لي الجمبري والسالمون والسمان وراس القمرية المشوية؟
Post: #111 Title: Re: هل بيننا سودانيين نباتيين او vegan ؟ Author: Ahmed Yassin Date: 11-01-2019, 11:48 PM Parent: #110
Quote: ذلك الهزيل الكحيان الضئيل - كما تعلم - كان يبدأ مع بت مجذوب تلاوة أوراده و"أوتاره" وأداء واجباته مباشرة من بعد صلاة العِشاء ويستمر في أداء طقوس عبادته بلا انقطاع أو ارتخاء أو توقف حتى مطلع الفجر.
ولكن في نهاية الواجب كان يشخر مثل (الثور حين يذبح) وقالتها بت مجذوب الوصلت السبعين وهي تضحك وتنفض رماد سجارتها. ويا الصادق يا اخوي منو القال ليك ان (ودالبشير) كان نباتياً ؟
Post: #112 Title: Re: هل بيننا سودانيين نباتيين او vegan ؟ Author: Mohamed Adam Date: 11-02-2019, 00:47 AM Parent: #111
سلامات بأخي عمر التاج.
Quote: بعد ما اقنعوا أنفسهم ما استبعد يحاولوا يقنعوا الأسود والنمور حتى ما تاكل اللحوم..
الأسود والنمور اللحم طبيعة اكلها، هي تحتاج للعنف، الغضب، الخوف (للطاقة السالبة) عشان ما تكمل دورة تطويرها الجسدي!! هي لم تدخل مرحلة التطور الروحي! الإنسان وحدة في هذا الوجود يمتلك تلك الخاصية وده طبعا بعدما جهزته الطبيعة(الله) جسديا اي تطوره الجسدي قد بلغ قمة الإبداع(في احسن تقويم) فهو الآن لايحتاج للحوم عشان ما يتطور جسده وانما يحتاج لغذاء اقل تطورا منه(نباتات) عشان يبدأ تطوره الروحي بوعي منه!! التطور الروحي يكون بإختيارك إنت وبإختياري انا وبإختيار غيرنا، اما التطور الجسدي فهو بإختيار الطبيعة هي التي تمسك بناصية الحيوان وتتولي امر تطويره!
Quote: .. محمد آدم الكان ما بيؤمن الا بما هو مادي وما كان مقتنع بوجود الله، عايز يقنعنا اليوم بأنه في ملائكة وشياطين وطاقة تخرج من الحيوان المذبوح، القال ليك هي طاقة منو يا محمد آدم؟
انا بؤمن بأن لهذا الكون عقل واعي بيسيرو.. ي اللهّ بعداك انت سميهو مايحلو ليك... الله، براهما، بودا، أو شهود جهوفة!!
في نفس الوقت ما بؤمن بأن هنان هناك شياطين وملائكة، ارجع لمداخلاتي حتي تتضح لك الرؤية.
Quote: .. وطيب الحيوانات دي ما أكثر حيوانات وديعة ومسالمة وخنينة وفي نواصيها الخير، ليه ما بتدخل كل الطاقات دي أجسام الناس البياكلوها ويستمتعوا بها؟
بالرغم من حنيتها ووداعتها إلا ان طاقتها سالبة لأن تطورها مازال بأمر الطبيعة وليس بأمرها! أضف لما سبق، عملية انها حنينة ووديعة ده بيكون من نظرتك ليها كمراقب وده شيء شيء نسبي!!
Quote: وهي ذاتا البهائم الانعام دي فايدتها شنو اذا ما اكلنا لبنها ولحمها، إذا ربنا عايزنا نتفرج فيها ساكت كان خلاها حجارة كريمة أو زهور، أو كمان خلقها من نور لا بتنوكل لا بتنشوي..
البهائم جزء من الطبيعة لم تخلق لك عشان ما تأكلها ومن انت ليخلق لك الوحود عشان تلقمش!! الوجود تعامل معك ومع غيرك من الموجودات بقانون الواجب....قانون محايد لايحابي غني ولا فقير... فائدة الحيوانات من عدمه ده شيء بنسقطه نحن عليها... هسع انتو خليتو الحجارة الكريمة!!
يا اخ التاج، الوجود لايتسائل عن الفائدة والضرر من تواجده، زينا كده، وإنما هو في حالة تواجد مستمرة لاتعرف الإنقطاع كما هي لاتعرف العدم!!
Quote: يا اخ اقول ليك حاجة.. الجزارين البضبحوا البهائم كل يوم ديل أرق مخلوقات الله، وما سمعنا يوم واحد بجزار قامت عليه الطاقة السلبية وركب بسكينه ضبح مواطن شريف
ياراااحل، الجزار يركب راسو اكثر من كده كيف!! زول يضبح ليهو كم بهيمة في اليوم الواحد وبعد ده كلو تقول لي عليهو وديع ورزين! طيب ... ركوب رااس أكثر من كده عايزو يكون كيفن!!
في زول عامل نفسو من أرق مخاليق الله، يقوم يضبح ليهو أرواح!!
شوف يا التاح، أي زول نشأ في بيئة لاتشجع ذبح الحيوان في الأماكن العامة، او المكشوفة، تجد نفسو بالفطرة كده بتتغزز من عملية الذبح ودونك اولادنا الإتربوا بالغرب وكيف يعانون من تلك المناظر اللا إنسانية القاعدين نمارسها ببيوتنا، نضبح البهيمة ونعلقها من رجلها علي الباب، للقاصي والداني، كأنما نجاهر بالعنف... وكل ذلك يتم بشكل راتب وممنهج.!
Post: #113 Title: Re: هل بيننا سودانيين نباتيين او vegan ؟ Author: Abureesh Date: 11-02-2019, 01:12 AM Parent: #112
سلام يا النصرى و ضيوفك الكرام.. و شكرا على البوست السمين دا
اخونا ابو بكر عباس كتب: "بشكل علمي لا يمكن لجسم الانسان الاستغناء عن البروتين الحيواني"
يا دكتور اضخم حيوان هو الفيل.. و اقوى الحيوانات الحمار و الحصان.. و كلهم ديل عايشين على السلطة بس.. الهندوس لا ياكلون اللحمة و هم بالملايين فى الهند. الأشغاء فى شمال الوادى لا ياكلون اللحمة عشان غالية و رب الاسرة لو جاب ربع كيلو اخر الشهر.. دى تكون مناسبة يؤرخوا بيها.. و رغم ذلك صحتهم العامة جيدة . اقوى مننا البنضبح كل يوم ما عدا الايام الما بنضبح فيها.
Post: #114 Title: Re: هل بيننا سودانيين نباتيين او vegan ؟ Author: النصرى أمين Date: 11-02-2019, 01:36 AM Parent: #113
غايتو بصفتى واقف على السور ؛ اراقب الطرفين، واشجع اللعبة الحلوة...و بصراحة محمد ادم متقدم هدف لنسنغ
Post: #115 Title: Re: هل بيننا سودانيين نباتيين او vegan ؟ Author: Ahmed Yassin Date: 11-02-2019, 04:26 AM Parent: #114
يا سلام ... يا حنيٍّن
Quote: ضبح البهيمة ونعلقها من رجلها علي الباب
خلاص .. نضبح البهيمة ونشيلها ونرقدها في الصالون
Post: #116 Title: Re: هل بيننا سودانيين نباتيين او vegan ؟ Author: muntasir Date: 11-02-2019, 05:36 AM Parent: #115
أحمد يس ده حنشيل منه الفلوت ونحوله عازف بيز ولا بنقز ودُنب لانو ما رقيق خالس ،لاحم درجة أولى
Post: #117 Title: Re: هل بيننا سودانيين نباتيين او vegan ؟ Author: Salah Zubeir Date: 11-02-2019, 06:54 AM Parent: #116
Quote: بالله فطورك دا هسي فطور
سلام أخونا النصري ,,, يا الأحمدين ,,, جدي ود جبرين قال الفطور قوة الراجل بالليل ,,, يعني كدي باكر جرب تفطر سرويس متوسط فيهو نص كيلو كبدة نص إستوا مفقوشات فيهو بيضتين مسلوقات علي أربع قطع وجنبو سرويس متوسط فيهو نص كيلو سنكيت مشوي وبالجنبة كدا سرويس صغير فيهو أم فتفت معطونة بالألتي والليمون والشطة بكل ألوانها ,,, الخضار الوحيد المسموح بأكله في هذه الوجبة هو البصل الأبيض مخلوت مع الدكوة والشطط بكل ألوانها ,,, تفطر بالوجبة دي بعد داك ما مهم تتغدا شنو ولا تتعشي شنو ,,, المهم تاكل أي حاجه ما تخلي مصرانك فاضي ,,, وقوم بالليل علي سنتك ساي ,,,,, ويا الأحمدين طبعا صعب عليكم نقول ليكم قومو بعد يوم أو يومين جربو فطور KG2 الجايبو أحمد دا ,,,, نديكم أسبوع واضربو 5 سندويشتات من فطور أحمد دا ونوعو الملاح من جبنه لي لبنه لي مربه ,,, إلخ وبالليل قومو علي السنه ,,, وقارنو ,,, تجدو الفرق واااااضح ,,,,, الفطور الأول تجد نفسك زي القرد تنطط الليل كلو كأنك لاعب في الدوري الممتاز ,,,, وفطور KG2 تجد نفسك مجبورة علي الفعل التكنك لاعب روابط أو حواري ساكت ,,,, تقول لي ريجييم ,,, ههههههههه
Post: #118 Title: Re: هل بيننا سودانيين نباتيين او vegan ؟ Author: Ahmed Yassin Date: 11-02-2019, 09:16 AM Parent: #117
ابوصلاح ود زبير جدك ودجبرين دا فارس
Quote: تفطر سرويس متوسط فيهو نص كيلو كبدة نص إستوا مفقوشات فيهو بيضتين مسلوقات علي أربع قطع وجنبو سرويس متوسط فيهو نص كيلو سنكيت مشوي وبالجنبة كدا سرويس صغير فيهو أم فتفت معطونة بالألتي والليمون والشطة بكل ألوانها ,,, الخضار الوحيد المسموح
عليكم الله يا جماعة شوفو النعمة دي دا فطور الرجال.. البقومك والبسندك بالليل ساعة الحارة ..هسي انا كبدتي فوق النار ومفقوشات فيها بيضتين ..واربعة مسلوقات
Post: #119 Title: Re: هل بيننا سودانيين نباتيين او vegan ؟ Author: muntasir Date: 11-02-2019, 09:17 AM Parent: #117
هييع يا صلاح ده ما فطور لقيت أمها مافي ذاتو
Post: #120 Title: Re: هل بيننا سودانيين نباتيين او vegan ؟ Author: Ahmed Yassin Date: 11-02-2019, 12:03 PM Parent: #119
muntasir
Quote: أحمد يس ده حنشيل منه الفلوت ونحوله عازف بيز ولا بنقز ودُنب لانو ما رقيق خالس ،لاحم درجة أولى
هههههههههههههههه مع اني حزنان على ابن البادية... بعد مداخلات ناس اللحمة الاشاوس ..شيل الفلوت يا حبيب واديني بدله عضمة
Post: #121 Title: Re: هل بيننا سودانيين نباتيين او vegan ؟ Author: امتثال عبدالله Date: 11-02-2019, 01:17 PM Parent: #120
صلاح الزبير أحمد ياسين هسع من اول الصباح ما جوعتونا بحكاية كيلو الكبدة نص استوى ومفقوشات فيها بيضتين ... لكن بوظتو الموضوع بالبسنكيت وام فتفت ....ابعدوا الاثنين ديل واعزموني معاكم على الكبدة وكتروا من البيض بالزيت والبيض المسلوق...
Post: #122 Title: Re: هل بيننا سودانيين نباتيين او vegan ؟ Author: محمد محمد قاضي Date: 11-02-2019, 01:34 PM Parent: #1
سلام يا النصري يا أمين وضيوفك الكرام شوف الخبر ده اليوم في yahoo style uk Meat eaters can now get paid to go vegan
Quote: If you’ve been contemplating going vegan, you might be interested to know that multivitamin brand, We Are Feel, will pay you £2,000 to make the change. It’s looking for five people to take part in a three-month study to determine how your body reacts to switching to veganism. The popularity of the vegan lifestyle has quadrupled in the past four years, with restaurants and fast-food chains bolstering their plant-based offerings. But, would £2,000 encourage you to take the plunge؟ READ MORE: McDonald’s to trial plant-based burger The brand doesn’t want you to just adopt the plant-based diet, it also wants to test how its supplements can help your body prepare for its new way of eating. It wants to focus on the deficiencies your body might experience as a result of the change so as well as the meat-free diet, you’ll also have to take supplements including: B12, vitamin C, iron, folate, lodine and vitamin D. There is a catch to this £2,000, though. Each week you’ll have to give yourself a blood test in the form of an at-home pin prick test and send it off to We Are Feel. READ MORE: Adding lemon to your drink might not be vegan The researchers involved in this study will start by looking at how your body reacts to its new vegan lifestyle by analysing the data from month one. In month two, it’ll introduce vitamins to counteract any negative impact the diet is having on your health. The study starts in December, so those who apply will be enjoying a plant-based Christmas dinner. Those who want to apply will have to do so speedily, because applications close on 11 November. To be eligible, you must have regularly eaten meat in the past six months, be aged between 18 and 60 and not have any pre-existing medical conditions (which include diabetes and obesity) QUOTE
Post: #123 Title: Re: هل بيننا سودانيين نباتيين او vegan ؟ Author: يحي قباني Date: 11-02-2019, 02:26 PM Parent: #122
Post: #124 Title: Re: هل بيننا سودانيين نباتيين او vegan ؟ Author: Ahmed Yassin Date: 11-02-2019, 03:15 PM Parent: #123
هههههههههههههههههههههههه اهاهاهاهااهاهااهاهاهااهاهاها والله يا يحي قباني مع اني ماكل كبدة بالبيض في الفطور ومستمتع لكن مندي التمساح دا كيفني كيف .. شديد
Post: #125 Title: Re: هل بيننا سودانيين نباتيين او vegan ؟ Author: Ahmed Yassin Date: 11-02-2019, 03:19 PM Parent: #124
امتثال عبدالله الشهير بـ امتثال اوسكار
Quote: هسع من اول الصباح ما جوعتونا بحكاية كيلو الكبدة نص استوى ومفقوشات فيها بيضتين ...
عندنا خبر انك متخصصة في عمل طوة الكبدة بالبيض ... اسنتاذة ورئيسة قسم
Post: #126 Title: Re: هل بيننا سودانيين نباتيين او vegan ؟ Author: الصادق عبدالله الحسن Date: 11-02-2019, 03:33 PM Parent: #125
=
الملاحظ أن الفنان الرقيق أحمد ياسين استنكر في الصفحة الأولى للبوست على الأخ قدور اضطراره لقرمشة لحم المرفعين فخاطبه مستنكراً:
Quote: لكن بنى آدم يتعشى بى مرفعين !!؟
بينما تغيرت أحوال ذات الفنان في الصفحة الثانية للبوست عندما شم الدم ورائحة أم فِتفت والكبدة والسنكيت والبيض المفقوش فأصابه "الخفيف" وانتابته حالة سعار مفاجئ فرمى الفنان أحمد ياسين ريشته وأطاح بقيثارته واستبدلها بالسكاكين والشطوط والنصال والسواطير و تحوّل أحمد ياسين نفسه من فنان "في صوته أحلى نغم يشجيك إذا اتكلم" ومن ملاك ساحر في شكل إنسان، إلى جزار وإلى سحار وآكل للحوم النيئة ومصاص دماء (فامباير) كامل الدسم واصبح هو نفسه على أتم الاستعداد لأن يأكل مندي التماسيح وأن يقول حرّم ويمص الدم ويستمتع بسحب النخاع وامتصاص المخ والدسم من عظام وجمجمة المرفعين.
Quote: ويا الصادق يا اخوي منو القال ليك ان (ودالبشير) كان نباتياً ؟
كان واضحاً يا فنان ومن البودي لانقوج لود البشير أنه كان نباتياً ولغة جسده حكتها بت مجذوب منتشية بلسان حالها ومقالها وقالت أن شخير ود البشير، لم يكن نتيجة التعب والرهق وإنما هو شخير النشوة عند بلوغ ذروة النيرفانا.
عد يا فنان إلى تأمل الطبيعة بما فيها من نبات ومياه وخضروات وإلى إبداعك وكمنجاتك وإلى مضغ النعناع والجرجير وابتعد ما أمكنك عن الدماء وعن ود قباني وود الأمير وود الزبير وزمرة السحاحير.
.... .. .
Post: #127 Title: Re: هل بيننا سودانيين نباتيين او vegan ؟ Author: Ahmed Yassin Date: 11-02-2019, 03:41 PM Parent: #126
والله ووالله ..انا بالضحك من كلام الصادق عبدالله الحسن ماقادر اكتب..وافكاري الحيارى مشتتة
Post: #128 Title: Re: هل بيننا سودانيين نباتيين او vegan ؟ Author: النصرى أمين Date: 11-02-2019, 03:54 PM Parent: #127
يا احمد يسن You're not helping your cause
بتخايل لى انك خاتى قدامك سراويس اللحمة و الكبده و القلب و اصابعينك برجفوا من التوتر. الحل فى البل. وقف استهلاك و قتل و اكل هذه الحيوانات المسالمة .
Post: #129 Title: Re: هل بيننا سودانيين نباتيين او vegan ؟ Author: امتثال عبدالله Date: 11-02-2019, 04:03 PM Parent: #128
يحيى ود قباني زولك الجبته لينا هنا وهو بيشوي التمساح وكمان بياكل منه بشهية زول مجنون ولا شك... ولكن بصراحة انا متكيفة منه لأنه انتقم لينا من هذا التمساح والذي بدون شك اكل الكثيرين من الأطفال والشباب والشيوخ الذي ذهبوا للنهر كي يتمتعوا بسباحة في النهر واكلمك هذا التمساح اللئيم، وأخيرا جاء هذا المجنون وأكله....يستاهل الكلب ...
Post: #130 Title: Re: هل بيننا سودانيين نباتيين او vegan ؟ Author: أحمد محمد عمر Date: 11-02-2019, 08:39 PM Parent: #129
يا صلاح دي غايتو 4 شهور كل سنتين بنتصدق بيها .. تكون كحياااااان عدا الأيام البكون غداها سمك بالإضافة لليوم الفري لكن أخوك بلتزم بالريجيم دة سنة بعد سنة لأنه كان خليتني بي راحتي ياني الاتبرملت باقي أخوك زول سكريات للطيش .. وحاة الله زول باسطة ولا سائل في انصار السنة :) .. فاااااا شنو بتحمل الأربعة شهور دي لحدي ما أنزل تحت الوزن المثالي وبعديها بخربها تاني
Post: #131 Title: Re: هل بيننا سودانيين نباتيين او vegan ؟ Author: عمر التاج Date: 11-02-2019, 09:09 PM Parent: #130
مرحبا محمد آدم،
Quote: الأسود والنمور اللحم طبيعة اكلها، هي تحتاج للعنف، الغضب، الخوف (للطاقة السالبة )
أولا يا اخ محمد فكرة الطاقة السلبية المكتسبة من اللحوم دي لا يوجد أي سند علمي لها، فالعلم الذي وصل بالناس لاختراق الفضاء ودراسة أجزاء الذرة وأشكال الطاقة واكتشاف العالم الرقمي كعالم افتراضي موازي لعالمنا الحقيقي، ما كان له ان يعجز عن اكتشاف هذه الطاقة السلبية التي تدخل أجسام البشر وتملأهم بالعنف والقسوة وتجردهم من بعض ادميتهم، ولو كانت هذه الطلقة حقيقية لكان التحذير من أكل اللحوم يفوق التحذير من المخدرات ومسببات السرطان ولحرم الصيد والذبح والسلخ كثير من دول العالم ، لذا يظل حديثك عن هذه الطاقة المتأثرة بالذبح مجرد هواجس وتخيلات تشبه تخيلات قريبي الذي كان يشرب اللبن مع كل وجبة، إلى أن اكتشف فجأة ان صديقه الذي يقاسمه قدح اللبن ليلا (يرعف) على القدح ومن يومها يخيل له أن لبن كل العالم ممزوجا بدم. الشئ الثاني لو كانت هناك أرواح شريرة أو طاقات سالبة تتلبس من يقوم بذبح البهائم لتجلت بوضوح في أولئك الجزارين في المسالخ الذين يزهقون يوميا عشرات الأرواح ثم تراهم يتفاعلون مع المجتمع بكل ود لا تكاد تفرقهم ممن لم يذبح يوما دجاجة، ولو كانت الطاقة السلبية والغضب الحيواني يتلبس ذابحه لامتلأت العيادات النفسية ومستشفيات المجانين بالجزارين ، ولكن الحقيقة عكس ذلك تماما اذ نجد أن هؤلاء الجزارين هم الأشد التحاما بالمجتمع واكثرهم ظرافة ولطفا واطلاقا للنكت والدعابة. الشئ الأخير فإن الوحوش التي تعيش على افتراس الآخرين طوال عمرها، لاتقوم بذلك من أجل التشفي ولا بفعل الأرواح الشريرة أو الطاقات السالبة في جسدها، بل تفعله وفقا لقانون الكون، ولو شاء الله لجعل كل الكائنات نباتية ولكن موت الحيوانات بالمقدار الحالي يحفظ للكون توازنه، ورغم ذلك فان الاسود مثلا حيوانات وديعة جدا لدرجة انها لا تفترس الا لحوجتها، وتظل تتأمل في جمال الغزلان وهي تسرح بجانبها مالم تشعر بالجوع والرغبة الملحة في الأكل، وبالتالي لا يتعلق الموضوع بطاقة سالبة أو شيطانية، وحتي لو فرضنا جدلا بوجود طاقة سلبية فإن الطاقة الايجابية والفوائد والبروتين هي العامل المرجح لأي معادلة. و في الختام اهديكم في الختام هذا المشهد الجميل للشيف للتركي ( المبتسم دوما) ، وهو يشري جملا بكامل قوامه الجميل المتبل داخل الفرن البلدي.
Post: #132 Title: Re: هل بيننا سودانيين نباتيين او vegan ؟ Author: Shinteer Date: 11-02-2019, 11:15 PM Parent: #130
يا سلاااام يا سلام من فريع البان البسوح نديان. البوست بقى بيت عرس وطرب وقفشات جميلة تسُر القلب المحزون. متعة جد. الله يمتعكم جميعاً بالعافية واللقمة الدافية. أول شيء أحيي أخانا محمد آدم وأشجع مسعاه في الترقّي إلى عالم الأرواح (تاني ما بنشوفك آخوي بعد تنضم لعالم الأرواح، ودعناك الله). أعلم يا أخي محمد آدم أن الإنسان كلما ارتقى في حياته وفي تفكيره وفي وجدانه ... رقّت أحاسيسه ... ورقّ طعامه. واليوم بحمد الله ارتقت شعوب كثيرة في تفكيرها (أعني الشعوب الغربية واليابان وغيرها من الشعوب المجيدة. الهند والصين لسه عليهم شوية). هذه الشعوب التي ارتقت ... ارتقت في طريقة معاشها وطعامها لكن من حيث الإعداد لا من حيث المكوّنات. فقد تفنّنت في كيفية الطبخ ... وكلو لحم ومشتقات لحم. يعني ارتقوا بغذائهم بترقية الطبخ ... وطبخ اللحم تحديداً. عملوا من اللحم أطباق لم نسمع بها نحن القرمانين. وأول يوم خارج السودان الشغيغ دخلت مطعم درجة أول لطبخ الsteak، ما صدقت إنو دا لحم بقر زي بقرنا داك. ونزلت فيه زي الزول الضارباهو كوفارة. ما خليت فيه التكتح وكان لا يقل عن اتنين كيلو. أولاد الذين بقوا رقيقين لأنهم ما بشوفوا البقر دا ضبحوه كيف ولا أدوهو صدمة بكهرباء في راسو كيف ... لكن ارتقوا في طبخ لحمه رقياً بعيدا، فجزاهم الله عنا كل خير ونحن لسه في أم دِليدِلَّة دي. إن شاء الله نترقى زيهم ونغيّر حكاية المفروكة دي. هسه أنا بقيت كل يوم باكل بامية مفروكة، نفس البامية المفروكة الأكلتها مع حبوبتي أم كلتوم الله يرحمها، وأم كلتوم ذاتها وارثاها من أم كلتوم الأولى؛ (أم كلتوم الأولى دي أظنها عاصرت موسى عليه السلام قطع شك وشعيب كمان. هذا لتعلم يا أخي محمد آدم أننا نحن أصحاب أتعس مطبخ في الورى؛ لم نتطور قيد أنملة منذ سيدنا شعيب). هؤلاء الناس يا محمد آدم يا روحاني ارتقوا أو ظنوا أنهم ارتقوا وظننت أنت أنهم ارتقوا لأنهم لم يروا الذبح والقتل والصقع. حتى في قتل البشر... ارتقوا في القتل بال drones، والأسلحة الموجهة بالليزر ووووووو ... وصرنا لا نرى فيها بشاعة. دي حقيقة. شفنا ناس داعش ضبحوا بضعة أشخاص ... وكلنا ارتعشنا وفي ناس بكوا وناس وقعوا في الواطاة، لكن الموت بالطريقة المرتقية في سلم البشرية عادية جداً. أنا دا لو شفت زول بيضبح زول يمكن أمرض ... لكن عادي أشوف طيارة بدون طيار تكتل ناس في حفلة أو في عرس ... وكأن شيئاً لم يكن. الترقي دا يا عزيزي محمد آدم فيه بلاوي متلتلة وتعريفه غير ثابت وغير متفق عليه. عليك باللحم وما تجفّل مننا الزباين. ثم ثناياً يا أخانا محمد آدم. شنو حكاية الملائكة والشياطين دي؟ أولاً الملائكة لا نعلم عنهم شيئاً إلا ما ورد في القرآن. إنهم مخلوقات ملسوبة الإرادة (يفعلون ما يؤمرون) ونحن حقيقةً لا ندري عن أكلهم أو شربهم شيئاً. القرآن لم يقل عنهم ذلك (حكاية لا يأكلون ولا يشربون ولا يُعرفون بذكور أو إناث ... دا كلام ناس جابوه من رأسهم ودخّلوه في راسنا لما كنا صغار. مين قال إن الملائكة والشياطين ما بياكلوا ولا بيشربوا؟ الله ما قال غايتو. وحتى لو الملايكة ما بياكلوا فهم أصلاً مسلوبو الإرادة). هل ربنا قال الملائكة لا يأكلون ولا يشربون ولا يُعرفون بذكور ولا إناث؟ حسب معرفتي ... الله ما قال الكلام دا. الملائكة في فهمي خلقهم الله لغاية محددة وسلب منهم إرادتهم ولا يتحركون إلا بإذن ... يعني ما عندهم خيار. إذن كلامك عن الملائكة الذين لم نرهم ولم نرَ من رآهم ولا نعرف عنهم شيئا ... كلام فيه تحامل علينا نحن آكلي اللحوم التي سخرها الله لنا. دحين ما تجيب لينا مخلوقات ما بنعرفها. أما الشياطين ... الله يعلم ووحات النبي ما لاقاني زول شاف ليه شيطان ليوم الليلة. شياطين شنو يا محمد آدم؟ غايتو أنا ما لاقاني شيطان ولو لاقاني بقول ليه في ذمتك دي بتاكل لحم وللا ما بتاكل. أنا متأكد لو لاقيت شيطان وسألتو حيقول لي أنا الشيطان الرجيم باكل ود أبنادم ذاتو ... خليك من خروف وبعشوم وكديس خلا. الحيوانات خلقت ورُسمت لها خريطة غذائية ثابتة. الحيوان النباتي نباتي وآكل اللحم آكل لحم. ما سمعت بحيوان آكل لحم قام اتطنقع وقال أنا عايز آكل قش وحشايش. الإنسان هو الوحيد الذي كرمه الله بالخيارات. وأنا ماشي فوق درب الله في مسعلة اللحم دي. القش دا عندي معاه قصة تانية. ياخي دا حكي مريح. أها نجي لموضوع الخضار ... أو القش في روايات الساخرين. أنا حقيقةً مغبون من الزول الأول الأكل القش (الخضار). والله مغبون منه غبينة يمكن تدخّلو النار بالمقلوب. يعني زول بدائي يقوم ياكل ليه قشة أو نبتة أو خضارة زي الخس (الخص) دا وفجأة يتوقف!!! الزول الأكل الخص الما عندو طعم دا كان ممكن ياكل أي حاجة تانية معاه، زي التبر والنال والكرمشيب والحسكنيت وكل قشة قدامو، ليه وقف هنا؟ لو الزول دا واصَل في أكل القش ... والله نكون هسع في أمان الله ناكل مع غنمنا وبقرنا وحميرنا. شنو الخلاه ياكل الخس وما ياكل الضريساء؟ إنسان عجيب وغريب. والله بتكلم جد ... أو والله صحي. يلعن أبو الزول الأول الذي بدأ أكل الخضار. عندنا قش لو هو واصل في الأكل كنا مرقنا من سنين عجاف في أمان الله. ناكل تبر وحسكنيت وضريساء ونال ونجيلة وأي قشة ما تعتّر لينا. تصدق يا النصري ... كنا في السودان لما كنا صغار بناكل قش شكلو جميل وأحلى ألف مرة من الخس والكرنب. لكن الله غالب. قنعنا منه وبقينا ناكل في حاجات قالوها لينا ناس تانيين. الأكل دا مفروض يحددو الزول الموجود في البيئة ويطوّرو بطريقتو. وبلاش فلسفة. أخونا أبو الريش دا عاش في الصين وأنا زرت الصين كتير ... الناس دي بتفجخ أي شيء قدامهم. لكن مع الرخاء ... حتتغير طريقة غذائهم ... لكن من ناحية الإعداد والتقديم فقط. ممكن تلاقى في أرقى فندق رجال أعمال يطلبون طبق جراد أو ككروتش مطبوخ بطريقة هاي هاي هاي. أخيراً أحيي أبوذر بابكر. عفيت منك. المريسة إرث عريق وبلّة ريق ومقوت. قعداتها سمحة وناسها سمحين. لكن ما دام بتقعد في الإنداية وعلاقتك باللحم ما إياها، خلينا نعمل حاجة سودانية خسوسية، ما دام الناس طفشت مع حكاية vegan and vegetarian ... خلينا نطوّر منتجاتنا المحلية ونعمل حاجة اسمها Mareesarian. عبد الساوي عليه رحمة الله وغفرانه كان ما بفارق المريسة. وبعد يملأ تب ... عندو Mantra ... ظل يرددها إلى أن مات: نشرب مرّوسْنا ... ونبول في تروسْنا. وهكذا اختلطت المريسة بالبول. ويحلها الشبّكها. الله يمتعكم بالعافية.
Post: #133 Title: Re: هل بيننا سودانيين نباتيين او vegan ؟ Author: النصرى أمين Date: 11-03-2019, 02:17 PM Parent: #132
مرافعة قوية يا شنتير تكاد تسدد هدف التعادل فى مرمى النباتيين لكن نعيب عليها التلميحات باننا متاثرين بالثقافة الغربية التى تتنفنن فى قتل الناس بالدرونات و فى نفس الوقت ترحم الحيوان بالتفنن فى طريقة طبخه . على كل ، مرافعتك قوية بحيث شجعتنى على التهام ملاح خدرة ظابط بلحم العجل ، و بصراحة كنت اكل مستمتع لكن هناك شي كان يضايقنى .
اعتقد ان النتيجة العادلة هى التعادل هدف لكل فريق مالم يجى محمد ادم و يسجل الهدف الذهبى
Post: #134 Title: Re: هل بيننا سودانيين نباتيين او vegan ؟ Author: Shinteer Date: 11-03-2019, 08:31 PM Parent: #133
بالعكس يا النصري. أنا بتمنى إنكم تتأثروا فعلا بالثقافة الغربية ... تأثير حقيقي. أنا شخصيا عندي عقيدة في الثقافة الغربية وفي الخواجة ... لدرجة إني بدافع عنهم. ياخي رضي الله عن الخواجات وثقافتهم. الدرونات دي دخلت فقط لإثبات أن الارتقاء يمكن يحدث حتى في قتل البشر .... لكن النتيجة واحدة: موت بشر وموت حيوانات لكن بطريقة يشعر الإنسان أنها غير مقززة.
Post: #135 Title: Re: هل بيننا سودانيين نباتيين او vegan ؟ Author: Mohamed Adam Date: 11-03-2019, 09:12 PM Parent: #133
سلامات باخونا المحترم عمر التاج.
Quote: أولا يا اخ محمد فكرة الطاقة السلبية المكتسبة من اللحوم دي لا يوجد أي سند علمي لها، فالعلم الذي وصل بالناس لاختراق الفضاء ودراسة أجزاء الذرة وأشكال الطاقة واكتشاف العالم الرقمي كعالم افتراضي موازي لعالمنا الحقيقي، ما كان له ان يعجز عن اكتشاف هذه الطاقة السلبية التي تدخل أجسام البشر وتملأهم بالعنف والقسوة وتجردهم من بعض ادميتهم، ولو كانت هذه الطلقة حقيقية لكان التحذير من أكل اللحوم يفوق التحذير من المخدرات ومسببات السرطان ولحرم الصيد والذبح والسلخ كثير من دول العالم ،لذا يظل حديثك عن هذه الطاقة المتأثرة بالذبح مجرد هواجس وتخيلات تشبه تخيلات قريبي الذي كان يشرب اللبن مع كل وجبة، إلى أن اكتشف فجأة ان صديقه الذي يقاسمه قدح اللبن ليلا (يرعف) على القدح ومن يومها يخيل له أن لبن كل العالم ممزوجا بدم
هل العلم لقي إجابات لكنهه وطبيعة الأشياء ومنها الطاقة الكهربائية ناهيك من يجد كنهه الطاقة الداخلة بتكوين ال Cosciousness بتاعنا ؟ هسع انا ممكن نأثر في سلوكك بطريقة مباشرة مثلا: لو انا مبسوط مبتسم فرحان بجعلك مبسوط وفرحان ولو انا زعلان متجهم بجعلك تعيس ومبتئس! طيب، في الحالتين كيف أثرت عليك؟ اليس بسلوكي الأمامك!! اقصد بإنفعالاتي الداخلي ومن ثم قمت انت وتفاعلت معها سواءا عرفت هذا ام لم تعرفه!! تلك الإنفعالات هي التي نسميها بالطاقة الموجبة اوالسالبة... هي كالعدوي انتقلت اليك! مثال آخر، لو انا ممسك بقطعة ليمونة وعمال امص فيها لماذا نجد لعابك يسيل ليها... بالضبط زي ما حصل لكلب الروسي لافوف!! مثال ثالث: مش رسول الإسلام حذر اتباعه من العين ومن السحر!! مش ما وقف هناك وبس بل قال هو ذاتو تعرض للسحر.. طيب كيف انتقل ليهو السحر من الساحر!!! يبقي من باب اولي طاقة غذائنا في حالة إنتقال مستمر ثم تؤثر علي سلوكنا بطريقة مباشرة او غير مباشرة وهذا الأمر ليس من إختصاصات العلم التجريبي وإنما هو يجتهد جهد المقل في بعض الأحايين عشان يجد لينا تفاسير نبرر بيها حدوث الأشياء، لكن معظم محاولاتو تأتي بطريقة خجولة ومبتسرة كما هي نظرياته في عملية فيزياء الكم(الكوانتم) يعني لسع العلم التجريبي بتاعنا في طور الطفولة بالنسبة لعمليات تطورنا بهذا الكون وال هي سرمدية!
إنت عارف يا التاج قولك بأن العلماء ما حذرونا من اكل اللحوم، ده اصلو ما معناهو أنها لاتسبب مرض السرطان!! انت عارف أكثر عامل يمهد لمرض السرطان هي اللحوم. واكثر الناس عرضة لمرض السرطان هم اللاحمون لكن المختصين في هذا الأمر يتجاهلونه بسبق الإصرار والترصد، مثلما يتجاهلون انتشار الأسلحة والمخدرات!
بالنسبة لقولك بخوص تحريم الصيد؛ هل تعلم هسع ده في دول كثيرة قاعدة تحرم عملية الصيد الا تحت ظروف صارمة و إستثنائية وده ان دل فإنما يدل علي ان البشرية في طريقها للإنعتاق من بعض نواقصها!
يبقي مما سبق، يكون كلامي، أقرب للواقع من كونو مجرد هواجس الزي هواجس صاحبك بتاع اللبن. !
Quote: الشئ الثاني لو كانت هناك أرواح شريرة أو طاقات سالبة تتلبس من يقوم بذبح البهائم لتجلت بوضوح في أولئك الجزارين في المسالخ الذين يزهقون يوميا عشرات الأرواح ثم تراهم يتفاعلون مع المجتمع بكل ود لا تكاد تفرقهم ممن لم يذبح يوما دجاجة، ولو كانت الطاقة السلبية والغضب الحيواني يتلبس ذابحه لامتلأت العيادات النفسية ومستشفيات المجانين بالجزارين ، ولكن الحقيقة عكس ذلك تماما اذ نجد أن هؤلاء الجزارين هم الأشد التحاما بالمجتمع واكثرهم ظرافة ولطفا واطلاقا للنكت والدعابة. الشئ الأخير فإن الوحوش التي تعيش على افتراس الآخرين طوال عمرها، لاتقوم بذلك من أجل التشفي ولا بفعل الأرواح الشريرة أو الطاقات السالبة في جسدها، بل تفعله وفقا لقانون الكون، ولو شاء الله لجعل كل الكائنات نباتية ولكن موت الحيوانات بالمقدار الحالي يحفظ للكون توازنه، ورغم ذلك فان الاسود مثلا حيوانات وديعة جدا لدرجة انها لا تفترس الا لحوجتها، وتظل تتأمل في جمال الغزلان وهي تسرح بجانبها مالم تشعر بالجوع والرغبة الملحة في الأكل، وبالتالي لا يتعلق الموضوع بطاقة سالبة أو شيطانية، وحتي لو فرضنا جدلا بوجود طاقة سلبية فإن الطاقة الايجابية والفوائد والبروتين هي العامل المرجح لأي معادلة.
انت منو القال ليك الطاقات السالبة ما متلبسة الجزارين!! عشان قاعد تشوفهم يضحكوا معاك ومع غيرك بحنية ولطف!!! هم يتفاعلون معك ومع المجتمعات بالصورة الطبيعة ما إعتقد عشان أنهم مسالمين، ولكن في الغالب عشان محكومون بقوانين وتقاليد ذلك المجتمع او تلك الدولة... يبقي لولا تلك القيود ابدا ماتستبعد انهم يضبحوك من اجل مواصلة حياتهم كما ضبحوا تلك البهائم لأتفهه الأسباب، هل سمعت ببعض جزاري الحمير والكلاب من اجل مواصلة حياتهم وحياة اطفالهم !
انا قلت ليك مافي زول مالياهو طاقة موجبة يتجرأ ويذبح ليك أكثر من روح (7 يوم في 24 ساعة) ، ده في حدي ذاتو غفلة واضحة من الجزار بإستثناء معاملته للناس تكون شكلها شنو!!
بعدين، ما شرط تمتليء عيادات المصحات النفسية بالجزارين ولكن كافي جدا ان يكون الزول غافل عن مراقبة إشراطاته اليومية وهذه صعبة تتوفر لزول شغلانتو قتل ارواح الحيوانات لأنو يتعامل في حقل طاقة سالب كل وقتو...
منعطف ليه علاقة بالمصحات النفسية: هل تعلم يا اخي التاج، لو الواحد فينا راقب محتويات عقله(فكرة) بصورة راتبة يصل لحقيقية مفادها انو مافيش فرق بينو وبين المجنون بتاع المصحة القاعد يهلوس ويرفس ويتكلم بأعلي صوته! فقط، المجنون متصالح مع نفسو وقاعد يسقط تلك الطاقات السالبة للخارح، في حين نجد الشخص "العاقل" قاعد يسقط هلوسته واحلام يغظتو للداخل عشان كده مافي زول من خارجه بيقدر يعلم بما يجري له من جنون بداخلو بل في احايين كثيرة نجد "العاقل" نفسو بيكون غافل عن جنون احلام يقظته الداخلية وفي هذه الحالة يكون احسن منو المجنون!
يبقي من حيث الغفلة يتساوي المجنون والعاقل! المجنون طلع جنونو بالخارج والعاقل كتها بحنانو!!!
نرجع للجزار: لم نسمع قط علي مر التأريخ ان هنالك جزار ما، قد دخل علي الحقيقة مثلما دخلها، سقراط، إيمانويل كانط، النفري، الحلاج، ابن عربي، ابن الفارض، ابن حيان التوحيدي، فرح ود تكتوك، الصايم ديمة، البرعي، ابراهيم الكولخي، سيدي الحسن، الأستاذ محمود.. !!! كذلك ما سمعنا قط واحد من هؤلاء المصلحين كان يمتهن مهنة الجزارة !! بمعني آخر، لم نسمع قط بصاحب سجادة قاعد يمارس الجزارة(طبعا مع إحترامنا للمهنة)!!!
وعليه.. العبرة ليست في معاملتك اللطيفة الخارجية مع الناس، لانو دي ممكن تفتعلها او تفعلها وإنت خائف من القانون الوضعي او من قانون الشريعة وانما العبرة تكمن في معاملتك اللطيفة الداخلية معاهم وهذه لاقانون وضعي ولا شريعة تحكمها وإنما تُحكم بالمراقب القاعد بداخل وعيك !!
بخصوص الحيوانات المفترسة... قلت ليك مطلوب منها تتغذي باللحوم عشان يتطور جسدها وتحصل علي مرتبة أحسن تقويم.. عشان كدة الطبيعة تولت امرها وزودتها بجهاز هاضم قصير مقارنة بجهازنا الطويل كبني آدمين!! نعم هنالك حيوانات تحت السلم(في ترتيب الحيوانات وتناسخها) تتغذي علي النباتات وده تخطيط من امنا الطبيعة!
يا التاج، قلت الغزال وديعة ومسالمة وجميلة.. نعم هي كذلك... لكن كمان مايفوت عليك، بها خوف ورعب لا يوصف...يبقي وداعة داخلها رعب وخوف بتكون لسع ناقصة يلزمها تطوير عشان تدخلها (طاقة سالبة من خارجها) لتمشيها نحو الكمال.... يبقي لازم تؤكل عشان تتطور وتكون فيما بعد هي ذاتها حيوان لاحم تأكل غيرها زي ما أكلها السبع حتي تصل لمقام احسن تقويم!!
الغزال الوديعة تحتاج لطاقة سالبة عشان يطور جسمها وايضا السبع المفترس يحتاج للطاقة السالبة بنفس الغرض.
خلاصة: وجود الطاقة(سالبة او موجبة) لاتحتاج لعلم تجريبي عشان ما يثبتها لنا، بالضبط كما في وجودها بالكهرء و التي نحس بتأثيرها أينما إتجهنا..البروتين الحيواني مبرر كافي للحيوان ولكنه لايبرر لنا كوعي عشان نقوم ونأكل بعضنا بالوجود ... !!
Post: #136 Title: Re: هل بيننا سودانيين نباتيين او vegan ؟ Author: النصرى أمين Date: 11-04-2019, 10:06 PM Parent: #135
اوسكار لمحمد ادم
Post: #137 Title: Re: هل بيننا سودانيين نباتيين او vegan ؟ Author: امتثال عبدالله Date: 11-05-2019, 09:50 PM Parent: #136
الممثلة الكندية -الامريكية العالمية باميلا أندرسون، وبطلة المسلسل التلفزيوني Baywatch معروف انها نباتية ولا تاكل اللحوم ، وهي تحمل الجنسيتين الكندية و الامريكية ، وقررت العودة إلى كندا وان تعيش هناك ، وهي من المدافعات عن حقوق الحيوانات وتعتبر قتل الحيوانات جريمة بشعة ..وبعد أن عادت إلى كندا أرسلت رسالة إلى رئيس الوزراء الكندي ، ترودو ، وطلبت منه إيقاف إطعام المساجين في السجون الكندية اللحوم وان يستبدل طعامهم بالخضروات وان هذا الأمر سيفيد من ناحيتين ، أولهما حفاظا على صحتهم وثانيا عدم هدر أموال دافعي الضرائب في شراء اللحوم الغالية الثمن وتقديمها المساجين وتوفير هذه الأموال لأشياء تفيد المجتمعات من دافعي الضرائب، ،،ولكن البعض اعتبر أن طلب الممثلة الكندية الامريكية هراء وسخف وان على رئيس الوزراء الكندي أن لا يلتفت إلى طلبها وانهم لا يهمهم صحة المساجين....ولكن يبدو أن الممثلة العالمية سوف لن تستريح الا بعد أن تقنع كل الكنديين أن يصبحوا vegans وأولهم طبعا صاحب البوست النصري ...
Post: #138 Title: Re: هل بيننا سودانيين نباتيين او vegan ؟ Author: النصرى أمين Date: 11-05-2019, 10:08 PM Parent: #137
والله يا امتثال ؛ صاحب البوست ، النصرى، مجهجه بين الكفر و الإيمان. اقرأ كلام محمد ادم اقتنع و اكره اللحمة. اشوف الشية و اشم الريحة ابيع محمد ادم و عشرة أمثال محمد ادم.
نحن حالنا حال شيعة الحسين قلوبنا مع على (الخضروات) و سيوفنا مع معاوية (اللحوم )
غايتو الشي المؤكد انى قللت من استهلاك اللحوم بصورة عامة و هى حاجة تتسق مع برنامج الاستعداد لزيارة السودان الشغيغ فى يناير حيث النية التهام خروف كامل كل بضع أيام.
Post: #139 Title: Re: هل بيننا سودانيين نباتيين او vegan ؟ Author: Ahmed Yassin Date: 11-06-2019, 06:24 AM Parent: #138
اني اشتم رائحة الشواء المنعشة التي تجعل تمطق وتسيل لها النخاشيش عاينوا يا اعزائي سيبوا حكاية الطاقة والسلبية والاستاتيكا والكهرباء دي على جنب .. سلبية شنو يعني انا اضرب لحمة بى عضم محمرة وتكون لونها بني غامق وحارة وصحن شطة خدرة بى توم ودكوة وليمون وعيش فينو حار .. وسلطة خدرة ..قام جاني واحد اقوم ابهل فيهو طاقة سلبية ؟ ياخي انتوا خليكم واقعيين شوية .. اشطحوا لكن ما قدر دا ياخي انا كنت قاعد مع فنان في صينية واحدة ...ياخي هي جنس لحمة لكن .. ابداع ومتعة الفنان دا قرقش اي حاجة في الصينية دي ومسك العضم قعد يكود فوقو.... بعد عشرة دقايق كان طالع المسرح وبغني (في الليل الهادي) سلبية قال
Post: #140 Title: Re: هل بيننا سودانيين نباتيين او vegan ؟ Author: بابكر قدور Date: 11-06-2019, 07:07 AM Parent: #139
معقول بوست مكتظ بلحمنجية قدر ديل على قول أبوذر وسفاحين من الدرجة الأولى وإكيلة من الدرجة الأولى وواحد فيكم ولو بالغلط ما ضاق شرموط الزراف؟ تلاتة باللهي أول يوم في حياتي أكلت شرموط الزراف ني "قرمشة" مسكني سعر .. لدرجة أني وصيت واحد أخونا كان مسافر .. الرنك .. في مهمة وحلفتو مايجي راجع من غير شرموط الزراف وجاب لي نص شوال تقريباً .. وبقينا ناكل أنا والمعاي كل يوم .. غايتو مرة مرة وسط الشرموط نلقى كرعين كديس أبوعفنة بي جلدو المنقرط ونرمي الكرعين ونقول الله ينعلك يالضبحت الكديس .... والله أحمد يس لو ضاق شرموط الزراف الني ماكان إستشهد بناقة إمرؤ القيس الضبحا للبنيات ديل ....
Post: #141 Title: Re: هل بيننا سودانيين نباتيين او vegan ؟ Author: عمر التاج Date: 11-06-2019, 08:58 AM Parent: #140
أخونا النصري شغال يوزع في الاوسكار شمال ، و ما شايف حاجة يمينه، وبالتالي فهو حكم غير محايد وغالبا تكون بطنه طمت من اللحمة وعايز يقلع عنها لكن أسلوب علمي .. وبمناسبة العلمية نحي اخونا محمد ادم مرة ثانية، ونشكره على ردوده الضافيه وصبره على اثبات نظرية لم نسمع بها غير عنده .. الكهرباء يا اخ محمد لم تعد مجهولة علميا، بل معروفة طبيعتها ومثبتة من خلال الكترونات متدفقة من مصدر لآخر ، وعليها انبت كثير من النظريات العلمية المهمة في حياتنا ألشئ الوحيد غير المعروف كنهه في الحياة الدنيا هو الروح ، ولكن كل الناس تؤمن بوجودها .. أما مواضيع السحر والجن والملائكة فهي غيبيات لايؤمن بها كثير من الناس فاذا كانت طاقتك السلبية المنبعثة من اللحوم هي أمر غيبي أخذناها في هذا الاطار وتوجناك رسولا لتقنع الناس للايمان بها وان كانت غير ذلك فعليك اثباتها علميا، أو على الأقل وضع فرضيات لها عسى أن يأتي خلف من بعدك يثبتها عمليا .. وإلى ذلك الحين ، الي بطبق شية معتق نهزم به جوع أجسادنا وأنفسنا
Post: #142 Title: Re: هل بيننا سودانيين نباتيين او vegan ؟ Author: عمر سعيد علي Date: 11-06-2019, 09:39 AM Parent: #141
ما نعلمه ان مخالطة الحيوان تؤثر في الانسان حيث جاء في الحديث (الفخر والخُيَلاء في أصحاب الإبل، والسَّكينة والوَقَار في أهل الغنم) وقيل ان رعاة الابل دائماً اصحاب فخر وأحد طباعاً من رعاة الغنم التي لها طبيعة مسالمة . . وقيل لذلك كل نبي رعى الغنم . . هذا حد علمنا في تأثير الحيوان على الانسان . .
Post: #143 Title: Re: هل بيننا سودانيين نباتيين او vegan ؟ Author: Shinteer Date: 11-06-2019, 12:00 PM Parent: #142
Quote: الفخر والخُيَلاء في أصحاب الإبل، والسَّكينة والوَقَار في أهل الغنم
. وكلها صفات إيجابية الحمد لله. يعني لا طاقة سلبية ولا طاقة فالتة. كدا موضوع الطاقة السلبية لقي حتفه ولحق أمات شيّة.
أكتر لحم طمّم بطني هو لحم الورل. قدر ما حاولت ما قدرت آكلو ... والجماعة المعاي ضربوه ضرب الهوامل. أنا اتعوّضت جِلْد الضنب لأنه يصلح ضَبّة أقوى وأجمل كتير من ضبة ضنب البقر.
قوموا إلى شيّتكم يرحكم الله، وكتروا البصل الأحمر (البصل الأبيض دا شكلو عندو برص وبارد) والشطة القبانيت بالليمون الكتير وعليها شوية ملح خفيف ... وما تبوّظوا الشطة بالدكوة الأصبحت زي الوباء تلاقيها خالطنها في كل شيء. وإذا كان لا بد من الدكوة فالأفضل استخدامها زي العطر؛ يعني شطة معطرة بدكوة. لازم نشوف طريقة كمان نصنع حاجة اسمها روح الدكوة.
Post: #144 Title: Re: هل بيننا سودانيين نباتيين او vegan ؟ Author: النصرى أمين Date: 11-06-2019, 10:17 PM Parent: #143
يا عمر قدور ياخ بالغت والله !! انا عملت بوست امبارح عن انقراض فصيلة من الزراف اسمها كردفان و ما كنت متخيل انه سبب الانقراض هو الاستعمال الادمى ! ياخ البلد فيها الف مليون راس من البقر و الغنم و الابل ؛ لم يحلو لكم سوى اكل هذا المخلوق المهدد بالانقراض؟ انها جريمة كاملة الدسم تجعلنا نشك ان وحيد القرن الابيض انقرض برضه بسبب المهوووسين باللحمة. انه الجنون
Post: #145 Title: Re: هل بيننا سودانيين نباتيين او vegan ؟ Author: Mahjob Abdalla Date: 11-06-2019, 10:35 PM Parent: #144
Quote: معقول بوست مكتظ بلحمنجية قدر ديل على قول أبوذر وسفاحين من الدرجة الأولى وإكيلة من الدرجة الأولى وواحد فيكم ولو بالغلط ما ضاق شرموط الزراف؟ تلاتة باللهي أول يوم في حياتي أكلت شرموط الزراف ني "قرمشة" مسكني سعر .. لدرجة أني وصيت واحد أخونا كان مسافر .. الرنك .. في مهمة وحلفتو مايجي راجع من غير شرموط الزراف وجاب لي نص شوال تقريباً .. وبقينا ناكل أنا والمعاي كل يوم .. غايتو مرة مرة وسط الشرموط نلقى كرعين كديس أبوعفنة بي جلدو المنقرط ونرمي الكرعين ونقول الله ينعلك يالضبحت الكديس .... والله أحمد يس لو ضاق شرموط الزراف الني ماكان إستشهد بناقة إمرؤ القيس الضبحا للبنيات ديل ....
احنا درسنا الابتدائى داخلية. ثلاث وجبات عصيدة بملاحات مختلفة. عندنا ملاح روب يوم الجمعة (الجمعة يوم سوق الجمعة بشترو الروب) و عندنا يوم الثلاثاء بضبحو لينا بهيمة (بشتروها من سوق الاثنين) اها بقية الايام عندهم شرموط في المخزن (مرات بقولو لينا شرموط بقر و مرات بقولو شرموط صيد) و معظمنا مصدقين انو شرموط صيد (فيل زراف و احتمال نمر) لكن بنغمض عيونا و بناكل عصيدتنا و نقول ده احسن من ملاح ابوثلاثة. و للذين لا يعرفون ملاح ابوثلاثة (موية و ملح و ويكة). بحصل بعض مرات التموين بخلص و عشان يجينا من كتم المدينة ممكن يمر اسبوع. في الفترة دى مدير المدرسة بضطر يستلف بعض المواد من تجار المنطقة و لكن بالطبع كلنا نعتبر الشرموط ليس اساسيا.
____________ ابقي في الغالب ضقت شرموط الزراف و كل حيوانات الاستوائية.
Post: #146 Title: Re: هل بيننا سودانيين نباتيين او vegan ؟ Author: النصرى أمين Date: 11-06-2019, 10:43 PM Parent: #144
يا عمر التاج ؛ لا ننكر ان الاوسكارات التى نوزعها يمينا و يسارا نابعه عن الهوى. كلام محمد ادم صادف هوى فى نفوسنا اما كلامكم ؛ رغم قوة حجتكم ؛ يجد كل الرفض و الإستياء 😎
Post: #147 Title: Re: هل بيننا سودانيين نباتيين او vegan ؟ Author: Mohamed Adam Date: 11-07-2019, 02:31 AM Parent: #146
يا خوي شنتير صبحك الله وامساك بكل خير... ،معليش ياخوي قمت بكتابة رد شافي ووافي لكن ضيعته بجهلي لفنون التقنية نعم.... لا القي اللوم علي التكنلوجيا وانما القيه علي نفسي المهمله الرفضت تواكب. المهم ادناه كل ما قدرت اجمعه منو .. ياريت يوصل ليك الفكرة.
بخصوص الغربين: انا ماقلت انهم إرتقوا عشان لم يروا الذبح والقتل والصقع!! في الحقيقة قتل البشر بالآلة التقليدية أو بالآلة الحديثة بتاعت ال drones، والموجهة بالليزر كلو قتل في قتل والقتل بطبعو شنيع اي كانت المبررات ليهو, هو ناتج عن سلوك غليظ.. وباعث هذه السلوك يرجع لعدة عوامل أهم ما فيها نوع الغذاء الذي يدخل جسم الانسان, فالشخص البيشمئز من قتل داعش البشع للإبرياء ولا يشمئز من القتل لما يكون بالدرونز الصامت تأكد انو شخص "لاحم"... يعني طاقة اللحم السالبة غطت علي معظم ضميروا (ههههه أمسك الخشب ياشنتير)! بالجد كده.. الزول النباتي في الغالب تلقاهو حساس، بيشمئز من قتل الروح صرف النظر بأي وسيلة قتلت، حتي لو حصل ذلك برش الماء علي المقتول!
مايتعلق بكلام الكتب الدينية بخصوص الملائكه والكاونترا بارت بتاعم:
شوف يا اخي العزيز شنتير انا شخصيا لا أؤمن بشيء إسمه ملائكة او شياطين لكن ده لاينفي اني قاعد أطلع خارج اطار العقل الجمعي وأفكر في ماهيتهم بل من الحكمة- بالذات في المسائل الروحية- ان لا اترك شخصا ما, عشان يفكر لي بالإنابة وفي نفس الوقت انا ماعايز زول يقتنع بكلام انا قلته اذا اصلو هو ما مقنع ليهو.!! يبقي.. يجب ان لانجعل كلام الاديان مبرر عشان يشيل عنا مسئولية البحث والتمحيص في ماهية تلك الماوراآيات!! وعليه.. مفهومي للملائكة لايعدوا من كونهم ناس ماتوا وحققوا تطورهم الروحي بالمستوي الذي تقبله الطبيعة لتطوير نفسها... لأن الكون ليس كونا واحدا وهذه الاكوان ليس كما ترصدها عقولنا وباقي حواسنا(ارجع لنظرية الكوانتم) وارد جدا ان يعيش الكائن الواحد في عدد لامتناهي من الأكون وتباعا لذلك ممكن ننحت عقلي واقول ان الشياطين ماهي إلا ناس ماتوا ولم يحققوا تطورهم الروحي الذي تنشده الطبيعة فتحاول الطبيعة بكل وسعها اعادتهم للحياة مره اخري حتي يتجتازوا مرحلة الحياة والموت عشان كده تجدهم يظهروا لبعض الناس في الحالات الغير عاديه بأشكال لاتألفها الحواس من قبل.
ياشنتير هل حصل وجدت ليك شخص كان قريب من ساعات الموت وعمال يهلوس ويذكر في معارفه الماتوا من زمااان ويناديهم بالإسم ويتفاعل معهم بكل صدق كأنما يراهم رأي العين. ذلك لأنهم قريبين منه من حيث التطور الروحي عشان كده قدر يدخل علي برزخهم(الأكثر من اربعة ابعاد) وبنفس القدر هم برضو قاعدين يدخلوا في كونه وفي أكوان اخري لانهم في زمرة واحده من حيث التطور الروحي فهو يشوف شبحهم يلوح ليه في اكثر من مكان وفي اكثر من آن واحد.. ..عشان كدة سموه شيطان لانه بيزوغ وبيظهر هو ونقيضعو في وكت وزمن واحد(زي تجربة شنودر علي القطة)!!
كذلك هل تعلم ان هنالك عدة إحتمالات ممكنه خارج مفهوم الكتب المقدسة, العقول ممكن تبحث وتتحرك فيها لمعرفة ظواهر بعض الأشياء التي نهت عن معرفتها تلك الكتب وانا أشك في أن كتاب منزل من الله يقوم يغمط العقل من التفكير والتدبير في هذا الكون!! العقل الجمعي بتاع الناس دائما متخازل ودائما تجده في حوجة لزول كبير عشان يمسك بناصيتو ليفتح ليهو الطريق عشان مايقوم يتوهه في دياجين المجهول. بمعني آخر, العقل بتاع القطيع عقل خائر إتكالي لا يعتمد علي فطرته بل يعتمد علي غيرو من الأبوين,الأسرة,الشارع, المدرسة , الهيئآات الدينية واعانة الدولة!! هذه السلطه الصارمة هي سبب مباشر في تكبيل العقول وسجنها حتي لا تعمل خارج الأطر المرسومه ليها!! شيء يدعو للتأمل لما الدين يقول للعقل توقف يقوم يقيف ولما يقول ليهو فكر يقوم يفكر ولما يقول ليهو في عذاب ابدي او في نعيم ابدي علي طول تلقاهو يقبل ويقفل كل نوافذه عليه!! يبقي ليش زودتنا الطبيعة بهذه العقول!!! عشان نركنها ونلغيها ثم نترك عقل زول تاني يقوم يفكر ليها بالإنابة!! هل تلك كل مهمتها التي وجدت من اجلها!! لو فعلا تلك مهمتها يكون الامر عايز ليهو حل سريع والا سيتأخر التطور الإنساني لملايين السنين للوراء !
تذكرت محاوراتك مع صاحبك بشاشا 2003 _ 2004 الله يطراهو بالخير.
Post: #148 Title: Re: هل بيننا سودانيين نباتيين او vegan ؟ Author: muntasir Date: 11-07-2019, 02:42 AM Parent: #147
انتو الهندوس ديل ما بياكلوا لحم يكون جابوا الطاقة السلبية من الشطة
Post: #149 Title: Re: هل بيننا سودانيين نباتيين او vegan ؟ Author: النصرى أمين Date: 11-07-2019, 02:45 AM Parent: #147
يلا يا شنتير الدور عليك . فكرة الأكوان المتاوزية دى عاملة لى قلق.
