|
Re: حميدتي، جزار وضحية.. (Re: عمر التاج)
|
الاستاذ عمر التاج السلام عليكم وحمدلله علي السلامة.. الكلام عن الجنجويد في (ذات نفسها) كقوة ومفروض يتعامل معاها ك مكون أمني مشكلة , وقائدها (الفريق و أول كمان) اللي ما دخل مدرسة ولا قعد في فصل للعسكرية دي مشكلة كبيرة. أما ترأسه لكل المنظومة الامنية في البلد آمر وناهي دي هي ثالثة الاثافي. نجي ل مجزرة فض الاعتصام وجريمة العصر. فريق الخلا يا عمر التاج حاول يطبق فينا ال (Perfect Murder) فاكر الناس غشم وجايين من الخلا وحاصلين علي رتب أو وظائف علي طريقته وطريقة مليشيته من الخلا. قصة أنه صور فض الاعتصام بإعتبار إنه هو فعلا شارك فيه بس بالعصي والهراوات والخراطيش لكن جرائم القتل ما حقته مردود عليه وفي رأسنا مافي قنابير.
Quote: .فكل عمليات القتل تقوم بها مليشيات الكيزان الامنية ...وهي مدربة على القنص ...ومعظم قتلى الاعتصام تم بواسطة قناصة من اعلى المباني القريبة من الساحة ولا اعتقد ان اطفال الجنجويد يعرفون كيف الطريق اليها وهي مناطقة مشبعة بالامن ومنذ سنوات طويلة ويوم 9/6 تم قتل وجرح اثنين في المزاد بحري بواسطة قناصة ... وحميدتي قد سحب المؤتمرين بامرة الي مناطق طرفية في العاصمة ....فمن هم القتلة |
لو سَلّمنا بكلام كاتب المقال دا إنه القناصة هم من قاموا بالقتل وديل هم مليشيات الكيزان (لبسوا الكاكي والرصاص في الرأس) لكن كمان فض الاعتصام كان فيه حرق خيام وإغتصابات واسر وكوووولو موثق ودا معروووووف ناسه منووو والمدربين علي الشغل دا في خلاهم.. صح؟ موضوع كولومبيا دا وحشروا وربطوا بمجزرة القيادة العامة هو محاولة بائسة وفكر وضيع بل مكابرة من المدافعين عن فريق الخلا , لعلمهم بأنه دولة الاعتصام تم محاولة فضها أكثر من مرة وبنفس الطريقة التمت!! فريق الخلا يعلم بأنه مليشيات الكيزان موجودة وتاكل لسه في حق الناس وحايمة في نص (المواكب) والاسواق ومتربصة بالثوار وهو المستفيد. ما فائدة فض الاعتصام أو استفزاز الشارع بالنسبة ليه دا سؤال مردود لانه الاعتصام كان دوله حرية سلام وعدالة داخل دولة تغبيش ومكائد وخداع والاهم لانه الاعتصام هدم وهدّ معبد مشروع الافك الحضاري , اللي بناهوا اسياده وأربابه في 30 سنه تمكين وتسويف أنتهي في 3 شهور. الاعتصام كان المدينة الفاضلة والحج الاصغر. حج اليه كل السودانين من مدنهم وقراهم وحلاّلهم وحتي إغترابهم ومن كل فج عميق. دولة الاعتصام كان فيها كنوز محبة وبحور حنان وكانت فيها الريدة فاردة جناحها وسعت كل أبناء الوطن. دولة الاعتصام أهديناها عيوننا وسقيناها من اوردتنا. الاعتصام ما كان فقط مهدد أمني لفريق الخلا بل كانت ولم تزل مهدد لطيش أحلامه ومراهقته بحكم الوطن. الكيزان بفريق خلاهم ومجلس جنجويدهم إتربوا علي مشروعهم الحضاري اللي هو مغاير لكل ثقافة وعادة وإرث سوداني أصيل , ومدينة الاعتصام أعادة الروح وبعثت الانسان السوداني من جديد. أخيرا.. لو مطبلي حميدتي عاوزين الناس يقتنعوا بأنه فريق الخلا و جنجويده لم يقتلوا الثوار أو يرموهم في النيل أحياء وأرتقوا ورفعوا لربنا شهداء للحرية وللدين والوطن ح نقول ليهم فريق الخلا ومليشيا جنجويده حرقت الخيام وإغتصبت حرائرنا وأسرت ثوارنا وعذبتهم وديل بموتوا في اليوم مليون مرة اذي جسدي ونفسي ولانها حصلت قداام بوابات قواتنا المشلعة الاذي بكبر ويبقي معاه حنق وغبن وغضب عندهم وأكيد عندنا لانه إحساسنا وهمنا وااااااحد.. تحياتي يا عمر التاج.
|
|
|
|
|
|
|
تعليقات قراء سودانيزاونلاين دوت كم على هذا الموضوع:
at FaceBook
|
|