حميدتى ما عندو ثكنة يمشي ليها

10:39 PM May, 24 2019

سودانيز اون لاين
Mahjob Abdalla-
مكتبتى
رابط مختصر

كدا نعمل مقارنة بين المجلس العسكرى و تجمع المهنيين.
عشان نكون منصفين المعادلة لابد و ان تكون بين المجلس العسكرى و تجمع المهنيين.
قوى الحرية و التغيير تعادل احزاب الفكة و التي توالت مع المجلس العسكرى.
بمعني اخر لو ناس المهنيين مصرين يشيلو معاهم كل الاحزاب, المجلس العسكرى برضو بجيب احزاب الفكة و بقول ليكم انتو ما بتمثلو كل الشعب السوداني.

انا ما عارف لو تجمع المهنيين انتبهو للحتة دي و قالو كدا بس و الحاجات تمشي ام لم ينتبهو و لكن ده الواقع و دي الحتة القاعد يتكلم بيها حميدتي الذي لا يقرأ و لا يكتب و راعي الابل و راعي الحمير و كل ادبيات الكتابة الموجودة هنا.
في لقائه بقادة المدرعات (تقريبا في الاسبوع الاول من استلام السلطة) قالها بالحرف الواحد ما بنسلمها الا لما الشعب السوداني كلو يتفق.

و في لقاء اخر جمع الادارة الاهلية و قال ليهم فيما معناه بوجود الفراغ الدستورى انتو يا ناس الادارة الاهلية البتمثلو السودان و العاقل ما يقرأ بين السطور في كلا اللقائين.
اما لقاءه الثالث بالمساحين فقال واضحه بدون رتوش انو اي شئ النص بالنص (مجلس السيادة و مجلس الوزراء) و هو ما راجع الثكنات لانو ما عندو ثكنة.

المهنيين في الاريعين يوم و لا حتي فكرو انو يبرزو وجوه بتمثل كل الشعب السوداني رغم انو حميدتي او المجلس العسكرى قاعد يقول ليهم انتو ما بتمثلو الشعب السوداني كلو.
ايوى ممكن كلنا نقول المهنيين بمثل الثوار المعتصمين و لكن ذلك لا يكفى يا جماعة الخير.
خلونا نكون صريحين.

بالمقابل, المجلس العسكرى مشى جاب لواءات خلا و حركات تحرير الام و ناس الشريعة كلهم عشان عايز يقول ليكم يا جماعة في ناس هناك غير ممثلين في تجمع المهنيين.
اذا اين دور تجمع المهنيين في انو يصل لكل سوداني في كل بقعة و يبين ليهم بالعمل انه يمثلهم. تتكلم لغة العامة.
هل نرجسية؟

يا جماعة الوضع في السودان الاستحمل 63 سنة ده بقي بينظر لكل شئ بالمجهر و ما ممكن تتوقع او نتوقع الاشياء كما تبدو.

لماذا سكت معظمنا؟
لاننا رأيناها فرصة لبناء سودان موحد و صفحة جديدة رغم المرارات التي حصلت و لم نكن نتصور ان في 40 يوم تتدهور الامور الي هذا الحد.
الان لا احد يتكلم عن السودان. خلاص.

حميدتي فهم لعبة الـ 63 سنة الفاتو ديل و عملية شيل ده و اضرب ب ده و لما الدور ينتهي تقول ليهو امشى الخلا ده ما اظن حيمشي عليهو.
و لو عايز تحارب برضو هو جاهز. عندك ضباط و ما عندك جنود او عندك جنود و ضباط خلاء.
لعبة الـ 63 سنة دى كلها ربما وصلت الي نقطة النهاية و لو دورت حرب تاني, ربما حتي الكنداكات يضطرن لحمل السلاح.
ما في زول حيكون افندى.

و الله يستر.

نتكلم بعد يومين
بعد حميدتي يعرف الفرق بين الاضراب الحايفصل فيهو الناس
والعصيان المدني
ومبروك عليهو احزاب الفكة

Quote: نتكلم بعد يومين بعد حميدتي يعرف الفرق بين الاضراب الحايفصل فيهو الناس والعصيان المدني ومبروك عليهو احزاب الفكة

سلام جعفر
الحكاية ماشية نحو الفوضي و لما يكون في فوضي ما اظن بهم العصيان من غيرو.
اتمني ان اكون مخطئا.

محجوب يا هبيب نديكم الخرطوم والجماعة الفي سجن كوبر والألمي بتاع النيل مناصفة بينكم وبين ناس سمعة أدونا جبل عامر وعبدالواحد طقة بي طقة 😂

Quote: محجوب يا هبيب نديكم الخرطوم والجماعة الفي سجن كوبر والألمي بتاع النيل مناصفة بينكم وبين ناس سمعة أدونا جبل عامر وعبدالواحد طقة بي طقة 😂

سلام معتصم
يا ريت لو نلحق نقسم حاجة و يبقي عندنا سودان.
تعرف قبل اسبوعين وصلني تقرير من حلتنا و الحلال المجاورة. عندهم جبل صغير (دهب) و دافنين دقن قالو ما في زول يعرف.
جوهم جنجويد حميدتي (كانو دافنين سلاحهم لانو حميدتي كان طلع قرار بمنع اي سلاح في دارفور). اها رجعت ليهم السلطة و طلعو سلاحهم. هاجمو ناسنا المساكين ديلك و قالو ليهم تاني لو شفنا واحد بهوب بهنا حيشوف القيامة.

__________
يعني في جبال كثيرة فيها دهب يا مان.

الله يستر يا محجوب

الحاجة البعمل فيها المجلس العسكري دي
ما نهايتها خير ابدا

Quote: لماذا سكت معظمنا؟

خايفين من لغة الابتزاز الحايمة اليومين ديل!
كالوصم بالكوز وما شابه
اليومين ديل قالوا أي واحد يعطل عقلو
وما يشغلو في الشأن العام!
وأي تشغيل للمخ في الشأن العام يعتبر خيانة عظمى
فقط العواطف خاصة العواطف المريضة بمرض التحزب!

الهبيب محجوب..حبابك يا صديقي
كل سنة وانت طيب..

كتر خيرك على هذا الحديث الطيب..وجيد يا صديقي ان هناك زول متذكر حكاية الـ63 سنة دي..
هي ليست نرجسية فقط يا صديقي من قبل تجمع المهنيين وقوى الحرية والتغيير ، وانما هي عقلية الحق السماوي..يعني نفس الشباب ديل عندهم عقلية النظام السابق والنظام الأسبق لغاية خروج الإنجليز..
التحاور والتفاوض الآن هو يا صديقي: الخرطوم تفاوض الخرطوم (كما قالها شاب في شهادة وردت في مقال نشرته الواشنطون بوست قبل يومين عن الوضع في السودان وانفضاض شهر عسل الثورة)..!

حميدتي قبل السفر للسعودية ادلي بتصريحين غريبين:
الأول: قال لن نسلم السلطة لمن يسعى لتصفية الحسابات (يعني قفل باب العدالة الإنتقالية بالضبة والمفتاح ) ،
الثاني: قال طالبنا بوضع شاشات كبيرة في ميدان الإعتصام عشان الناس تشوف سير التفاوض بين المجلس العسكري وقوى الحرية والتغيير مباشرة..ولكن هناك جهات (حسب قوله) اعترضت على هذا الإقتراح..يعني ناس الخرطوم دايرين الموضوع دغمسة صوالين وغرف بعيدة عن ارادة الشعب..!
اتفق معك..الوضع مقبل على تطورات عصيبة..والحرب ستكون هي الأخف..!

اللــه يستر يا قريبي..

كبر

Quote: التحاور والتفاوض الآن هو يا صديقي: الخرطوم تفاوض الخرطوم

سلام كبر
تعبير الحق السماوى هذا اصدق تعبير عن حال السودان و رغم مرور 63 عاما و لكن يبدو لي ان البعض ما زال يعتقد باستمرار الحق السماوى هذا.
و لو نظرنا للتحاور الخرطومي بنلقي انو المجلس العسكري متقدم قليلا علي تجمع المهنيين, فنجد المجلس العسكري مكون من الخرطوم + سمش الدين + حميدتي و لكن تجمع المهنيين فقط مكون من الخرطوم و لا احد غيرهم.

___________
لكن للصراحة و عشان ما نظلم هل ممكن واحد يجيب لينا اسماء اعضاء تجمع المهنيين بالكامل؟

Quote: خايفين من لغة الابتزاز الحايمة اليومين ديل! كالوصم بالكوز وما شابه اليومين ديل قالوا أي واحد يعطل عقلو وما يشغلو في الشأن العام! وأي تشغيل للمخ في الشأن العام يعتبر خيانة عظمى فقط العواطف خاصة العواطف المريضة بمرض التحزب!

و عليكم السلام منتصر الاخر
بعد الاربعين يوم بدأت تطفح علي السطح معالم خلاف كبير بين مكونات التحالف العريض.
شخصيا منذ البداية قلت المسألة لازم تكون تكنوقراط و في ذلك لا استثناء لاحد (الاحزاب السياسية و الحركات المسلحة سواء) و الكل ينتظر الانتخابات.
موقف السيد الصادق المهدى كان سليما و لا ادرى لماذا اصرت بقية الاحزاب المواصلة في هذا الدرب.

علي كل حال اتمني ان يتداركو الموقف و لا يصح الا الصحيح.

Quote: لماذا سكت معظمنا؟ لاننا رأيناها فرصة لبناء سودان موحد و صفحة جديدة رغم المرارات التي حصلت و لم نكن نتصور ان في 40 يوم تتدهور الامور الي هذا الحد. الان لا احد يتكلم عن السودان. خلاص

سكتنا لأننا كنا فاكرنهم حا ينجزوا ..علشان كدا مشيناها ليهم .
لكنهم لم ينجزوا..بل يخاطرون الآن بمصائر شعب كامل وتضحياته .

ممثلين شرعيين الوحيدين للثورة قال ..

Quote: سكتنا لأننا كنا فاكرنهم حا ينجزوا ..علشان كدا مشيناها ليهم

و عليكم السلام امنه.
الغريبة في اليوم الاول بعد سقوط البشير اطلعت علي ليستة الناس المشو قابلو المجلس العسكرى فقلت ربما لانو الموضوع حدث فجأة, الناس ما قدرت ترتب امورها و تكون وفد يمثل السودان كلو و لكن ان ظل هذا التجمع بنفس الاسماء لاكثر من اربعين يوما و لم نرى تمثيل نسبي سواء علي المستوى الجندرى او الجغرافي فهذا علي انهم لم يدركو حجم مأساة الوطن.

__________
بالمناسبة في احد البوستات وجهتي سؤال معين و جاوبتك عليه في ذات البوست. ما عارف مريتي عليهو ام لا. علي كل حال في اي اسألة اضافية جاهزين للاجابة.