|
Re: بيان تاريخي لتجمع المهنيين بلغة شبابية لت (Re: عبدالعظيم عثمان)
|
تحياتي عبد العظيم، لاقاني في الواتس لكن بصراحة لم يتسنى لي الرجوع لصفحتهم الرسمية للتأكد، لكن ردود الفعل كما ذكرت الناس مندهشة ومعجبة باللغة
Quote:
*يلاكم نكون لجان مقاومتنا* 💪🏾 شبابنا وشاباتنا الواعين المثقفين الليلة عايزين ندخل توش وبدون رتوش، ايوه عايزين نجيب الزيت البطلع زيت الحيكومة الدمها فاير وحيلها خاير عايزنكم كلكم تعملوا لجان الاحياء ( ما اللجنة الشعبية حقتهم ديك ) المثقفين بسموها لجان المقاومة وقع ليك؟ المهم انحنا نعمل حاجتنا في حدود معرفتنا وبالشي البحقق طموحاتنا وامالنا ولو سألتوني لجان المقاومة دي تكوينها كيف ؟؟؟ اها بسم الله نخش في المحشي يلا نحنا عشان نكون لجان لا فيها طق ولا شق نركز كلنا مع بعض كدة، ونعرف لجنة مقاومة يعني شنو ؟؟ .لجنة مقاومة يعني جماعة من الناس بتفقوا علي هدف معين ويحاولوا يعملوه بعد المشاورة والاتفاق والإقتناع ويبدوا تنفيذ ويحاولوا لحدي ما ينجزوا مهمتم.
اها ننجز كيف؟ لجان المقاومة بتاعت الأحياء بتعملو ليكم قروب واتس وانتو متكلين في العمود وكلكم فرد وواثقين في بعض وبيوتكم كلها واحد، بعد تظبطوه فلان داك زول كويس ياخ نضيفو وعلان داك اصلي بعزنا، كربتو الشغلة؟ تمام. نمشي نشوف ناس من الحي الجنبنا ونطلع مننا اتنين بمثلونا في قروب لامي كل الاحياء القريبة لحد مانقفلها مدينة كاملة زط الا خط. والمهنيين الفي مكان العمل والمدارس وربات البيوت والمواطنين ممكن يساعدوا في الرصة دي برضوا ماتقول لي دي بت مابتنفع في الغلش ده، البت قدااام انت الورا.
لجان المقاومة ما بتكون مربوطه بأي حزب سياسي حقتكم انتو وبتعبر عنكم انتو وعن رأيكم ..ولجنة المقاومة بتتكون من كل واحد ليهو مصلحه فى اسقاط النظام والفارات ديل يشتتو ،، وده طبعا الهدف بتاعنا كلنا الافراد العندهم القدرات منكم ممكن يساهموا بيها فى العمل البتقررو اللجنه وبصب في خدمة هدفنا الأساسي اها نحنا ديل نقوم نتواصل معاهم ونساعدهم وهم بوجهونا وممكن نحنا زاتنا نوجههم زي ما قلنا العمل جماعي والحلم اجتماعي والهدف واحد عشان كدة ضروري نشارك مع بعض.
اها الشغلة كربناها وبقت مؤسسة والناس تقول يمين نمشي يمين شمال تقع شمال الخطوة الجاية شنو؟ الخطوة سهر جداد وبشتنة ورقاد واطة وقع ليك؟ بس قرض على كده. تاني في بيان بتاع غلش طلع من المهنيين نستلم الزيت ونبدا ننفذ.
في قزقزة كده بتجي من الملل وعدم الموضوع نقوم نعمل شنو؟ نشخبط نملاهم فقر بس اي حيطة تسقط بس وكمان لو بقت فيها قروش وشيرنق دي العزة زاتها هاك يابوسترات وملصقات ( اعمل حسابك الفارات ماينقشوك بطير ليك ولينا )
المهم خالص يا شبابنا المهنيين وغيرهم من المواطنين عشان ماتقول لي انا بعثي وخاين وعميل لايمكن اشتغل مع اتحادي مرتزقة وبتاع لجان المقاومه فى الاحياء ما بتكون على مستوى تنظيمات يعنى على المستوى الفردى بغض النظر عن انتماء الشخص الحزبى يعنى صاحبى لو عندو مصلحه فى التغيير وما بضر الشغل أهلاً بيهو حتي لو كان موجود في حزب ولو اختلفنا في بعض التفاصيل يعني الحصة وطن. في النهاية اختلاف الرأي لا يفسد للود قضية زي ما بقولو ما دام متفقين على هدف اساسي واحد هو اسقاط النظام ✌🏾✌🏾 ونعمل تحت المظلة دي وهيلاهوب مع بعض بنلقى لجان مقاومتنا اتشكلت وماشايفين قدامنا غير #تسقط_بس
اها الغلش ده لمتين يامعلمين؟ لحد مانصل لمرحلة قفل واحتفل. موضوع منهتي
#موكب8فبراير #مدن_السودان_تنتفض |
|
|
|
|
|
|
|
العنوان |
الكاتب |
Date |
بيان تاريخي لتجمع المهنيين بلغة شبابية لتكوين لجان المقاومة | عبدالعظيم عثمان | 02-08-19, 05:09 PM |
Re: بيان تاريخي لتجمع المهنيين بلغة شبابية لت | محمد البشرى الخضر | 02-08-19, 05:37 PM |
Re: بيان تاريخي لتجمع المهنيين بلغة شبابية لت | Asim Ali | 02-08-19, 05:51 PM |
Re: بيان تاريخي لتجمع المهنيين بلغة شبابية لت | Yasir Elsharif | 02-08-19, 06:37 PM |
Re: بيان تاريخي لتجمع المهنيين بلغة شبابية لت | عبدالعظيم عثمان | 02-08-19, 07:16 PM |
Re: بيان تاريخي لتجمع المهنيين بلغة شبابية لت | Kostawi | 02-08-19, 07:52 PM |
Re: بيان تاريخي لتجمع المهنيين بلغة شبابية لت | Gasim Alnoor Aly | 02-08-19, 08:08 PM |
Re: بيان تاريخي لتجمع المهنيين بلغة شبابية لت | Gasim Alnoor Aly | 02-08-19, 10:29 PM |
Re: بيان تاريخي لتجمع المهنيين بلغة شبابية لت | احمد حمودى | 02-09-19, 00:32 AM |
Re: بيان تاريخي لتجمع المهنيين بلغة شبابية لت | عبدالعظيم عثمان | 02-09-19, 06:44 AM |
|
تعليقات قراء سودانيزاونلاين دوت كم على هذا الموضوع:
at FaceBook
|
|