|
|
|
 Re: حميدتي بعد شويه بفك حمارو وبفوت (Re: Mohamed Adam)
|
في قصة قال ليك، كان في بيت بكا في القرية وكان في راجل عربي مالي هدومه راكب حمارو مسافر.. وفي الطريق جا ماري ليك علي بيت بكا .. قال احسن اغشاهو أعزي الناس ديل فوق دربي وعلي عدلي امشي.. فقام وقف في بيت البكا وقال للجماعة بالصيوان الفاتحة الفاتحة.. الفاتحة.. قاموا ليهو نفرين بتثاقل شديد، وبعدم اهتمام كدا شالوا ليك معاهو الفاتحة والامر دا استفزاهو ليك وعرف الناس ديل رمتالة ساي!
بس صاحبك قام كفكف ليك يدين جلابيتو وربط ليك صلبو بعميته(من التقاليد القديمة في بيت البكا) ويالله صاحبك دور ليك في الجماعة مسك ليك اول واحد قال ليهو قوم... قوم يارمة علي حيلك .. قوم جيب ليك حزمة قصب للحمار دا(الحمار الجا راكبو) قمز ليك واحد تاني بعصاه قال ليهو قوم.. قوم ياكحيان سريع امشي جيب ليك مويه..وقمز الثالث قال ليهو قوم امشي حرك النسوان ديل يعملن ليك صينية غدا ثم.قمز واحد رابع قال ليهو الضهر قرب امشي املي الاباريق موية.. .صاحبك دور ليك ناس البكا كلهم وهم يعاينو ليه ساكت ماعارفين الراجل دا جنسو شنو ولا علاقتو شنو ببيت البكا..
بعد شوية شاف ليك لوري مليان ناس جو لبيت البكا..شبكهم ليك الفاتحة الفاتحة اتفضلوا.. اقعدو في الضل خش لي جوا ادخل لي جوا ..جيب المويه لي دا جيبها لي دا.. زح ده وتعال اقعد انت .. صاحبك عاين ليك لزريبة بتاعت غنم جنب بيت البكا مشي تلب ليك فيها شال منها اكبر واسمح خروف، مسكو ضبحو ..قال لبعض الجماعة قوموا تموا سلخ الخروف دا بسرعة عشان تلحقوا الناس ديل المرارة .. الجماعة بتاعين اللوري عارفين ناس الحلة وعارفين مافيها راجلا كريم بسوي كدا .. قالوا ليهو والله نحن جايين ماكلين وشبعانين..صاحبك قال ليهم لا حرم يجيبوا ليكم المرارة هسع دي.. قوم ياولد قول للنسوان ديل يعملن الخروف دا شية بس .. لابصله لازيت حرم شية بس..
يازول صاحبك اكل ليك الناس شواشو وشبعهم لحم وبسطهم ليك قرش ونص..قوم انت جيب الصابونة وقوم انت امسك الإبريق وغسل للناس، قوم انت جيب الشاي وقوم انت جيب الجبنة دور ليك بيت البكا زي الترتيب... لحدي قريب المغرب كدا صاحبك قام قال ليهم مع السلامة ومشي فكه حمارو ودور فات..
قام واحد من اهل المرحوم قال والله كان نعرف الزول دا منو وعلاقتو شنو بالمرحوم بتاعنا .. قام وصلو قال ليهو ياشيخ سلام عليك وجزاك الله خير الجزاء والله ماقصرت ان شاءالله في ميزان حسناتك، بالله قولي بتعرف المرحوم ولا علاقتك شنو بيهو!!..
قال ليهو والله ماعندي اي علاقة لكن شوفتكم ناسا ميتين ورمتالة ومافيكم فايدة قت والله ياخوانا المرحوم دا وكت رحل من الدنيا لازم نعزو فأنا جيت عشان أحرر ليكم رقابكم ديا .. فدا يخيل لي حميدتي لما جاء لساحة الإعتصام لقي ليك ناس الجيش رمم ميتة فقام مسكهم ودورهم ليك زي الترتيب.. مسك دور ليك ابن عوف ودور ليك برهان وجابو ختاهو ... وصار في الجماعة شغلب مغلب.. شال ده ختاهو في محل ده وشال داك خناهو في محل ده ..ودور ليك كل بيت البكا وهسع صايل وجايل في امانتي الله.... يالله بعد شوية بفك ليك حمارو وبيفوت!!!
| |
  
|
|
|
|
|
|
|
|
Re: حميدتي بعد شويه بفك حمارو وبفوت (Re: Mohamed Adam)
|
| Quote: بفك ليك حمارو وبيفوت!!! |
يفوت يمشي وين ودم الشهداء في رقبتو ...
يمشي وين وهو جايي ويدينيه ملطخة بالدماء والابادة والاغتصاب والحريق والقتل والنهب والسلب
يمشي وين واسيادو ناس المحور قالو ليهو اصلو ما تطلع من بيت البكاء ده الا تندفن مع الميت
| |
|
|
|
|
|
|
تعليقات قراء سودانيزاونلاين دوت كم على هذا الموضوع:
at FaceBook
| |
Mohamed Adam
فيس بوك
تويتر
انستقرام
يوتيوب
بنتيريست