|
|
 Re: لوح الشرف ثورة الشعب السوداني #شهداء_السود� (Re: احمد حمودى)
|
عبدالعظيم
عبدالعظيم
عبدالعظيم
سامعني صاح؟؟؟
سامعني والله العظيم
سقطت رويسات الفقُر
يللاك تعال
سقطت حكومات الجحيم
...
يا بابكر
يا بابكر
هاك عالج الوطن الفِتِر
اديهو من ريحة الجنان
اديهو من مسك الخِضِر
سقطت خلاص
سقطت تعال يا بابكر
...
يا عم معاوية سلام كتير
والله مشتاقين شديد
لي لمة في البيت الكبير
لي بري ما فاقدين شهيد
سقطت خلاص يا عم تعال
جايين نزورك يومنا عيد
...
محجوب تعال يا ود حشاي
اخواتك القُت ما يدقوهن خلاس
مرقن علي دربك جناي
سقطت تمام ياود ابوي
سقطت تعال
سقطت تعال
قول ليا جاي
...
استاذ خلاص
سقطت خلاص
شايلين نتيجتنا (القصاص)
ونجحنا في آخر الدرب
دايرين نوريكا الخلاص
لا تاني تسمع بي حرِب
لا طالب يسمع بي رصاص
كل الفصول راجياك تعال
يللاك تعال
...
يا عبدالرحمن الأمين
راجينك احنا ومخلصين
فتشنا كل النيل عليك
حالف يقول ما شفتو حين
حجزوهو بي دافع التُهم
فاض في تحدي المجرمين
والليلة لمان انتصر
جانا بيكوس عنك حزين
يللاك تعال
سقطت خلاص
فتحا مبين
...
الفاتح آلشهم الهمام
عينك لعلها في عوافي
وطابت ان شا الله وتمام؟؟
(شيماء؟؟؟)
والله زاتا تهاتي بيك
يللاك تعال
سقطت تعال
لاقيها واقلدها بالسلام
...
حذيفة عثمان وين ابوي؟؟؟
طولنا ما شفناكا هوي
قول للي نشّن فيك رصاص
انت (المَخَدَّر) ما عدوي
لكن مطالبنا القصاص
يتحاكم اليقتل اخوي
يللاك تعال سقطت خلاص
يللاك نبني ودا الخلاص
...
دكتور حسن
تخريجك العام اللي جاي
يللاك تعال
واصل كفاحك للعمل
راجيكا تتكاتف معاي
سقطت خلاص
يللاك نعمرها قول وراي
يللاك تعال
...
قوم يااااا لؤي
التاتشر الدهسك خلاص
بقى في القصاص حين مافي غي
قوم احضر الحاصل الخلاص
ما يفوتك النصر الأبي
سقطت تعال
نتشارك الفرحة العلي
...
صالح تعال شوف البلد
حال السرور حال البلد
جدعت بواقي الخوف هناك
وصيتها انتَ علي الجَلَد
شمت بداية الانتصار
سقطت حكومتها يوم احد
...
دقينا صيوان العزاء
سقطت حكومات الأذى
نادينا جيراننا الزمان
نادينا اخوانا المشوا
مشوار شنو الما رجعوا منو ولا نفر؟؟
جاوبني صاحب في نحيب
قال ليا غادروا في سفر
شان خاطر الوطن الحبيب
طيب إذا رجع الوطن؟؟؟
مين البيرجع لينا اخوانا ويجيب؟!!
تبت حكومات الأذى
تبت حكومات اللهيب
#مرفأ
#تسقط_بس
February 23, 2019
(منقول)
|
|
 
|
|
|
|
Nasser Amin
فيس بوك
تويتر
انستقرام
يوتيوب
بنتيريست