|
استراحة مهداء لمذيعة الجزيرة لونة الشبل+ جعفر عباس
|
لونة العاجبني بي قليبها كاتلاني و بي رموش عينيها جارحاني و بي سهام عينيها صايداني اللهم أحفظها كي أقول الله أدني لونة الشبل . . مزيعة قناة الجزيرة . . النجاضة . . مراة ذي المنقة . . تاكلها تحت بطانية و تقش خشمك و تحمد ربك . . لونة الشبل حورية و ضلت طريقها إلى الجنة. . و جاتنا في الدنيا أم عوارض دي عشان تشقيها علينا . . الله أداها أي شيء بالهوبلي . . اللون و العيون و الجسم الما خمج و الوجه الحسن . . و أنعم علي مذيعاتنا بالقباحة و الشنا المرة و الفلهم الما خايلة فوقهم . . انتو سمعتو بالمذيعة السودانية أم جلحات القالت دايرة تبقى راجل؟؟؟؟ . . كضباً كاضب ما كوثر بيومي . . دي واحدة تاني . . كوثر بيومي حلوة لكن عيونها منططات و حسها مقروش . . التقول قاعدين يخنقوها قبل ما تجي تهرينا . . قدر ما تنطق ليها كلمة فيها حرف القاف تقعد تقحقح . . كدي سيبونا من بت بيومي أم حساً مقروش . . خلونا مع لونة الشبل. . صاحبي بدوي راجل حاقد . . قال لي بعد ما لوى لي بوزو . . يا فيفيد لونة دي سورية . . شوفو ليكم عوارة و حقد . . نان ذي دي يا بدوي بتتلقي في السودان!!! . . لونة دي عذاب الله في الأرض . . كانت عجباني من زمان . . عجبتني من أول نظرة كحلتها فيها في التلفزيون . . و الشيطان وزاني . . قال لي . . لونة دي هي زولتك . . هيّ دي الراح تسعدك . . و من اليوم داك مافي شيتن قاعد يسهرني في الدنيا دي عيلا الباعوض و لونة الشبل . . الباعوض نهايتو ملاريا. . لكن لونة الشبل نهايتها التجاني الماحي و البهدلة و الشحططة و الوقوف في اشارات المرور . . يعلم الله قلبي من يشوفها في التلفزيون يقعد يسوي دل دل دل . . و جسمي النتاحة تنطلق فوقو . . بدور احكيلها عن حبي . . بدور أرويلها عن ريدي . . بدور أعبر ليها عن مشاعري الدفيقة . . داير أقول ليها . . وحاااات أبوي أنا حبيت قناة الجزيرة عشانك انتي بس . . أنا من ما قمت بكجن الأخبار . . لكن عشانك أنا حبيت قناة الجزيرة . . و حبيت مزيعين الجزيرة . . حبيت فيصل قاسم النضام أبو خشماً بليلة . . يحنفش في ضيوفو و يقعد يحجز فيهم . . نان انت جايبهم لي شنو . . و حبيت جميل عازر البقعد في الكرسي بي جمبة . . و يخت فردة صلبو في الكرسي و فردتو التانية مدلدلة برة الكرسي. . عمر الجزلي قاعد يعمل زيو لكن هو قصيروني و الفلهمة كاتلاهو . . و هسي أنا اليومين ديل بشحد في الله يشغلوني في قناة الجزيرة انشاء الله غفير حراسة لمدة يوم . . عشان أشوف لونة الشبل على الطبيعة . . بعد داك انشاء الله يودوني قوانتنامو و يلحقوني . . سامي الحاج . . حبيت برنامج للنساء فقط . . عشان بتقدمو لونة الشبل . . حبيتو عشان لونة . . و عيون لونة . . و حلاة لونة . . و بلاوي لونة . . ظنيتني أنا الراجل الوحيد القاعد يحضر برنامج للنساء فقط . . حبيت الحلقة بتاعت اضطهاد الرجال للنساء . . برضو عشان لونة . . الحلقة دي ذكرتني بالنوباوية ست الشاي القاعدين يجيبوها تسوي الشاي في خيمة برنامج شوارد بتاع كوثر بيومي أم حساً مقروش . . يا ربي النوباوية دي ناس التلفزيون بدوها ماهية كم؟؟؟ . . كمان ملبسنها دهب . . يكون دهبها دا فالصو و الا حقيقي . . اليوم داك و أنا فاتح قناة الجزيرة . . و بحضر في برنامج للنساء فقط . . رسلت لي لونة رسالة خاصة . . نعلت فيها الرجال لي حدهم . . بعدين اتغزلت فيها . . قلت ليها . . يسلمولي ها العيون . . و يسلمن النسوان كلهن و انتي أولهن . . و حريقة تحرق الرجال و سنين الرجال . . و مضيت اسمي تحت الرسال . . من معجب . . الشيء المزعلني و داير يجيب أجلي . . سمعت أمريكا قالت دايرة تضرب قناة الجزيرة . . لي شنو يضربوها و لونة فيها . . أمريكا دي دايرة تقطع راسي دا مالها . . دايرة تحيرني في لونتي دي مالها . . يا أمريكا أمشي أضربي تلفزيون أمدرمان . . أضربو كمال حامض و عمر الجزلي . . أضربوا المذيعة القالت دايرة تبقى راجل. اللهم أحفظ قناة الجزيرة من شر المعتدين . . اللهم أحفظ لينا لونة . . اللهم خليني أشوف يوم في راجلها . . انشاء الله يتعولق . . و تقوم ليهو كوكا . . و يتشلهت فوق عيشتو . . حسادة كدي بس . . تلقاهو هسي عندو اضنين كباااار . . و عندو كرش وراء و كرش قدام . . باقي زي ناس لونة دي البقعوا فوقا كلهم شتر . . الواجعني و هارد مصاريني . . أنو وكتين كانت لونة الشبل في القمة العربية في السودان . . السودانيين الاستضافتهما كلهم من ذوي الشلاليف أم صفقاً عراض . . شلاليف طابقين . . قايتو نحنا السودانيين ديل شينين جنس شنا. فيفيد في 10/04/2006م المصدر الرئيسي http://www.albahala.com/html/module...order=1&thold=0
|
|
|
|
|
|