أسوأ شيء أن تكون إجازتك السنوية ثلاثون يوماً والأسواء من كل ذلك أن تكون من أهل العوض !! فهم على طريقة دخلت نملة وأكلت حبة وخرجت يصعب عليك التفاهم مع من تحب ياتونك بكل بساطتهم وبراءتهم المعهودة وبعضهم ينام معك حتى الصباح والبعض الآخر يفتح خشمه بكل أعجوبة ليسألك عملت شنو ؟؟ خمسة ايام امضيتها مع ست النفر وصاحباتها وقريباتها وخمسة أخرى فواتح ووفيات ومناسبات وفي كل مرة يسقط يوم من الإجازة وتسقط ورقة ويسقط حلم ويذبل نصف التفاحة !!! ولو امضيت إجازتي بهذه الطريقة مع أهل العوض فإنني سأخرج من { المولد بدون حمص } المولد وعرفناه 00 لكن الحمص دا يطلع شنو ؟؟؟ حملنا حقائبنا وسألونا الف سؤال فضولي ماشين وين ؟؟ حاتقعدوا كم يوم ؟؟ الماشي معاكم منو ؟؟؟ قلت لهم لدي صديق عنده زواج في الدمازين لكننا بالطبع ذهبنا للخرطوم واستأجرنا شقة هناك وشعرنا بقيمة الحياة في الساعات الأولى لدخولنا الجنة 00 اقصد الشقة وكم قلت ما اجمل سكان الخرطوم فهؤلاء يعيشون في نعيم !!!! أما أهل العوض ففي كل وادٍ يهيمون هنا في الخرطوم 00 لا أحد يتلصص عليك ولا حتى صاحبة الشقة لاتسألك اين ذهبت ومتى تخرج ؟ المشكلة عند دخولنا الشقة ذات ال 70 الف في اليوم لم يسألوننا عن أوراقنا الثبوتية وقلت لست النفر وقتها لو كنت أعرف ذلك لأتيت بواحدة أخرى من السوق العربي !!!! كما أن التفاوض في السعر كله تم مع صاحبة الشقة الجميلة جداً بالمناسبة رغم أن عمرها قد تجاوز الأربعين ولكن عندما تنظر اليها فهي مابين ال 19 وال 23 عاماً وعندنا في أهل العوض عندما تصل المراة هذا العمر عليها العوض ومنها العوض !! تكون مدة صلاحيتها قد انتهت وكأنها مصابة بأنفلونزا الطيور !!! وكل ذلك نتيجة زوجها الديك الذي من النادر أن يمنحها جرعات عاطفية فاوضتنا هذه المراة الجميلة على كل التفاصيل بينما الراجل عليك امان الله ولايهمه راقد بعيد ويقرأ في جريدة قووووووووووون يوم واحد في هذه الشقة يساوي 30 يوم عندنا هنا كل شيء بمزاجك وهنا بإمكانك أن تشحن موبايلك في أي وقت تشاء !!!!!!!!!!!!!!!!! مش زي عندنا هناك الكهرباء قاطعة كل مرة !!!!!!!!!!!!!!!!!!!!!!!! قال تشحن موبايلك قال !!!! أها فتكم بي عافية حاولوا تستأجروا شقق يامغتربين وأنتم ذاهبون لملاقاة أعز ماتملكون زوجاتكم بالطبع !!!
الحبيب الغالي تفاحة البورد ابوحراز تحياتي وسلامي مشتاقييييين عديل كده والله ضحكتني لمن قربت اقع وبالمناسبة انا نفس الفيلم بتاعك دا حصل معاي ولا كن ما مع أهل العوض من ناس الخرطوم راحة مافي نقة خاصة مافي دا داخل دا مارق دي عاينها جايبنها وووووو وامسك الخشب بس شهر مر كانو يوم وشقتك دي ما تكون شقتي النزلت فيها في بحري برضو ستها متشوببا يعني فوق الاربعين وتعاين ليها تقول في العشرين بس ايجارك انت غالي شوية يكون معها خدمات تانية خمس نجوم عليك الله شفت الخرطوم بقت كيف ؟؟؟؟
02-23-2006, 04:09 AM
ابوحراز
ابوحراز
تاريخ التسجيل: 06-27-2002
مجموع المشاركات: 5515
اخي ابراهيم علي لك التحية وأنت ترشقني بكلماتك العطرة الخرطوم جميلة جداً وأجمل فيها عدم الفضول الذي لمسته كثيراً فعلاً صاحبة الشقة جميلة جداً ويبدو لي أن الراحة لها دور كبير في تغذية هذا الجمال وهناك بالطبع مقومات أخرى تجعل من ذات الأربعين في العشرينات من عمرها في رأيي المتواضع أن الرجل له دور كبير في ذلك وهذه الجرعات العاطفية البسيطة تعمل عمل السحر في المراة المراة تحتاج للروح وتحتاج للجسد وتحتاج للأنفاس وتحتاج لمزيد من الحب هذه هي الأشياء التي تغذيها وتجعلها مليئة بالرحيق طوال عمرها شفت الجرسة دي كيف لكن صراحة حافظت على ست النفر برفع معنوياتها أمنحها المزيد من الألق كل يوم ورغم كل هذا فأحياناً تتكرفس وتقبل على الحيطة وهنا نحتاج لناس المطافيء لحل المشكلة
02-22-2006, 03:09 PM
sharnobi
sharnobi
تاريخ التسجيل: 02-05-2002
مجموع المشاركات: 4414
شرنوبي قبلك وقبالك هل يعقل إنو واحد يقعد في شقة لوحده ؟؟ قال خارطة قال والله نحن مع الطيور المابتعرف ليها خرطة ولا في ايدا جواز سفر والله لو دا أنا كان اي زول قابلني في اليوم دا الا اعضيه ياخي بتستحمل الأشياء دي كيف سيدنا آدم أتى لحواء من الهند مشياً على الأقدام وبرضو انت قاعد براك
02-22-2006, 03:21 PM
عبد الله عقيد
عبد الله عقيد
تاريخ التسجيل: 09-20-2005
مجموع المشاركات: 3728
والله يا ابحراز ياخي موضوع الشقق دا كلنا فكرنا فيهو بس ياخي الإيجار الغالي دا ما بيقدرو عليهو إلا المغتربين القدام الزيكم كدي.. عشان كدي الإجازة بنعديها مع الجماعة النهار كلو، وبعض من الليل نقضيهو في الديوان وبعد داك يجيك النوم.. إنت تعال الواحد هناك بينعس خبارو مشيتك لا جوة شهقتك يسمعوها الجيران شفت الفضايح دي بالله (هييييييييييييييييييه) بأعلى صوت.. شقة؟
02-23-2006, 04:18 AM
ابوحراز
ابوحراز
تاريخ التسجيل: 06-27-2002
مجموع المشاركات: 5515
أستاذنا عقيد تعرف الواحد لو قعد بالقروش مع اهل العوض والله كلها ياكلوها دي حملت ودي ولدت ودي عاوزين يعرسوها عمك يقول ليك الحيطة وقعت واحد يجيك يقول ليك البقر الليلة ما أكل اها عشان الأمور دي الواحد بيمشي يغير شوية بعدين انت بتكون غائب عن من تحب مدة طويلة ولابد من تعويضهم فترة هذه الغياب فعلاً النوم هناك بسرعة ثلاثة ايام نمت بعد الساعة السابعة مساءاً مباشرة لكن بالإمكان تعويض كل شيء بعد الساعة 12 فالقرى بعد الساعة 12 مليئة بالهدوء
02-23-2006, 04:57 AM
wadalzain
wadalzain
تاريخ التسجيل: 06-16-2002
مجموع المشاركات: 4701
عقيد مرة ثانية بالمناسبة أسوأ شريحة مادياً من المغتربين هم قدامى المغتربين لأن هؤلاء قد ضحوا بالكثير وحلحلوا جميع المشاكل أو معظمها كما أنهم جميعاً لم تكن لديهم خطط مدروسة ولم تكن لهم أهداف ورؤى واضحة وكانت كل طموحاتهم تتمثل في الخطوبة والزواج وشراء ارض في سوق أم دفسو انا شخصياً اشتريت أرض جوار كبري حنتوب منذ 17 سنة ب 6 الف ريال والآن سعرها 4 الف ريال أما ذهابنا للشقق فهذا مجرد بوبار واستعراض عضلات فحينما تكون فاشلاً وظهرك منحنياً فلا بد أن تبحث عن مخارج أخرى كما أن هذه الفترة التي سوف تمضيها في الشقة ستكون مادة ونسة دسمة مع أهل العوض ولأن فاقد الشيء لايعطيه لهذا تمسكهم بهذه الونسة في الشقة فتجعل كثيرون منهم لعابهم سائل !!!
02-23-2006, 05:10 AM
almulaomar
almulaomar
تاريخ التسجيل: 07-08-2002
مجموع المشاركات: 6485
الرائع أب حراز الدخول مع ست النفر في شقة مفروشة أو غير مفروشة هو خلوة غير شرعية إذا كانت العلاقة لا تتعدي دبلة الحب والخطوبة ، والحمد لله لم يلم فيك عسس أمن المجتمع والنظام العام وكشات ناس قلة الحياء لأنه كنت وقتها وست النفر سوف تصفدان ومن ثم تحال للتحقيق ويتهمك القضاة بالشروع أو أنك ههمت بها وهمت بك لمن طب عليكم العسكر. ولا أعرف لماذا يحاكم إنسان بشروعه في الرذيلة ويترك آخر ونحن نقول عليهو فلان داك رذيلة رذالة. لا عليك أخي أب حراز ست البيت تفاوض عملاً بمبدأ من حكم في مالو ما ظلم والراجل يقرأ في جريدة قون لأنو ما عندو هم لا وإيه بي زوجة على شاكلة زوجته يكون جاب الدوري والكأس خاصة وأنك شهدت للمرأة بالجمال وكمان مقرشة يعني يكون باقي ليهو كأس العالم. أهل العوض حلوين وقنوعين وحياتهم صعبة وبسيطة وهي نتاج للتهميش فربما تقسو الطبيعة عليهم مرة غير أن ناس السلطة والقرار يقسون عليهم آلاف المرات. صحيح أن طيبة وبساطة أهل العوض في التعامل ربما تصل بكل حد الضجر في بعض الأحيان لكن صدقني هي في مجملها تعاملات صادقة لا زيف فيها ولا نفاق إذا إبتسم لك العوضي يعني ذلك بكل صدق وأمانه ، لا يجبره شئ على ان يتلون أو يداهن. نساء أهل العوض كغيرهن من نساء العالمين واقع عليهن ضيم وظلم كبير فالمرأة عندنا تقوم بالكثير من شئون الحياة بدء من القومة من النوم والناس نيام لعمل الشاي واللقيمات وحلب الغنم وعواسة الكسرة على صاج تحت راكوبة تستنشق ما يسمح لها أنفها أن تستنشق من ثاني أكسيد الكربون وهي تعوس في صاج قد تصل درجة حرارته الخمسون درجة مئوية ناهيثك عن درجة حرارة الجو وما أن تفرغ من ذلك حتى تقوم بعمل الملاح أياً كان شكله أو لونه ومن ثم تذهب لشارك في الحقل وتربي الأغنام وترعي الأطفال بعد أن تلدهم مشاركة مع زوجها وبعد ده كلو عاوزه تكون محافظة على شبابها ، دي بتستحم بي صابون عده وتتمسح بي زيت ملاح وبتنوم بعد أن يهدها التعب من الشغل لتصحي عشان تواصل الشغل حتى لا تتوقف عجلة الحياة ، وبرضو تقول شقة والله يا أب حراز هنا إلا نشق النيل سباحة وعكس التيار أو نشق لينا بطيخه نصين أو نخلي نسوان الفريق يشقن شعر رأسهن بعد أن يقمن بعملية محاربة القمل يعني واحدة تفلي التانية ومن ثم تشق ليها شعرها وآخر الشقوق عندنا بعد شقوق كرعين النساء والرجال على السواء هي شقوق الأرض وما أخطرها.
02-25-2006, 03:43 AM
ابوحراز
ابوحراز
تاريخ التسجيل: 06-27-2002
مجموع المشاركات: 5515
الملا عمر شكراً لهذه المساهمة الجميلة والتي هزمت النص الأصلي 10/صفر الدخول مع ست النفر لم يتم الا بعد أن أذن مؤذن في الناس تصدق المأذون بتاعنا كان لابس بنطلون وقميص وربطة عنق !!! والغريب يقال أن هذا الماذون كل من عقد له فإنه من النادر أن يطلق زوجته وله رواج كبير الآن يعني أول ماتتزوج تاني الا المقابر كمان مافي مثنى وثلاث ورباع والله فعلاً التعامل صادق مع أهل العوض لدرجة ساذجة جداً ولديهم براءة غير عادية وكل شيء عندهم بالنية اذكر ذهبت مرة لاستقبال والدتي في شهر رمضان بجدة تصدق وجدتها في الباخرة قد تعرفت على 15 واحدة واضطررت لتأجير ثلاثة ليموزين غير سيارتي كل ذلك من أجل نقل هذه { الحلة الراحلة } ووالدي عندما جاء الخرطوم للعلاج بدأ يوزع في كل القروش التي معه كلما رأى شحاذ خمش خمشة من جيبه وأعطاه وأخيراً قلعت منه القروش يعني كان حق العيادة مالقيناه !!! سنرجع مرة أخرى لنساء أهل العوض المناضلات جداً
02-26-2006, 01:55 PM
Munir
Munir
تاريخ التسجيل: 02-11-2002
مجموع المشاركات: 10496
Quote: الدخول مع ست النفر لم يتم الا بعد أن أذن مؤذن في الناس تصدق المأذون بتاعنا كان لابس بنطلون وقميص وربطة عنق !!!
يا ابوحراز ياخي دا شنو القلتو دا ــ يعني فاكي لينا المعلومة الخطيرة دي عااااادي كده وكأن ما حصلت حاجة ــ
يازول انت مصنف في البورد دا عزابي والشباب كلهم قافلين علي كده .. تجي تنزغم بالراحة كده وسط الناس الكبار وتفك المعلومة غمتي كده ولا من شاف ولا من دري !!! ــ
حقو الواحد ما يبارك ليك زاتو ! ـ لكين نسوي شنو.. مليون مبروك و Welcome to the club
02-27-2006, 04:46 AM
ابوحراز
ابوحراز
تاريخ التسجيل: 06-27-2002
مجموع المشاركات: 5515
منير ياتو شباب ديل ؟؟ ما تقول لي الرجال ؟؟ طبعامشيت السودان ولقيت للأسف كل المعجبين بابوحراز رجال كمان البورد دا لينا فيه أكثر من اربع سنوات ماشفنا اي شيء من الجنس الناعم مرات يعني تحب واحدة عديل كدا من نسوان البورد وتبكي معاها وتحكي ليها عن كل شيء في حياتك فجأة تلقاها بتحب { 26 } غيرك حتى هناك قارئات فقط للمنتدى بعضهن يرسلن بعض رسائل الإعجاب ومما نجي ندخل في الجد تقول ليك عاوزة أكمل قرايتي عشان كدا قلنا الواحد يغمض ويقع أهل العوض والخرطوم دي مابعرس فيها نهائي الشاي بالملعقة والحليب بالملعقة وكل شيء بمقدار وموازين والغريب قالوا عندما ياتي المساء ياويلك لو ماكنت معاها كويس توريك نجوم الليل والنهار قال قافلين عليك قال
احد اصدقائنا عادلامريكا من اجازه قضاها في السودان بعد طول انقطاع بعد اختفاءه لمده يوميين ظهر علينا سالناه وين يازول فرد والله قافل نفسي في الاوضه اليومين كلهم فسالنه باندهاش ليه ان شاء الله خير رد والله مشتاق لPrivacy ساكت ثم اضاف واله يا حنين السودان في الادبخانه مافي Privacy
02-25-2006, 03:45 AM
ابوحراز
ابوحراز
تاريخ التسجيل: 06-27-2002
مجموع المشاركات: 5515
عمر دا محظوظ جداً أنا مشيت قرية في الشرق عجيبة جداً الأدبخانة عندهم بها حيطة قصيرة جداً يعني لمن تقعد راسك ونص جسمك كل الناس شايفنه الغريبة لمن يجي واحد من ناس القرية ويشوفك قاعد بكل براءة يسلم عليك كيف حالك يا الضيف !!!!! انا ماعارف الحكمة من كدا شنو ؟؟ بعدين عندنا في أهل العوض الأدبخانة غريبة خالص يعملوها ليك بعيدة في زاوية الحوش يعني لمن تشيل ابريقك وتمشي زي كانك ماشي ترفع كورنر !!!! قال مافي {Privacy} قال
02-23-2006, 06:06 AM
قرشـــو
قرشـــو
تاريخ التسجيل: 02-05-2002
مجموع المشاركات: 11385
والله ياقرشو عاوزين لم شمل لكن الظروف هنا صعبة جداً وهناك مائة مشكلة لكن بصراحة سعيد من كانت زوجته معه يعني شوف قبل شهر أصابتني حمى ونزلة برد وكنت ارجف كل اليوم يعني ولا واحد من { العزابة } ما جاء لمسني ولا واحد يخت يده في راسك بس يقولوا ليك أصبحت كيف وحدث معي نفس الموقف في السودان وكان 90% من علاجي نفسي بحت ست النفر تخت يدها في جبهتك واخواتك كذلك وكل حد لازم يلمس جسمك حتى هناك صغيرات في السن وجميلات يأتين بكل براءة لتضع كل واحدة منهن يدها على جسدك تريد ان تعرف مقدار الحمى فيدق قلبي لحظتها مائة مرة في الدقيقة وحينما تسألك كيف الآن ؟؟؟ تنظر في عينيها فيأتيك منها ما هو شفاء ورحمة !!!! والأهم من كل ذلك عندما تنظر تحت المخدة تجدها مليئة بالجنيهات فكل من يأتي يضع لك شيئاً تحتها أما هنا فعندما تنظر للمخدة لاتجد تحتها الا الملاية !!!!!
02-23-2006, 07:01 AM
مشتاق
مشتاق
تاريخ التسجيل: 02-19-2002
مجموع المشاركات: 579
طبعاً هسي لو كتبت تفاحة البورد كان ماحاتكون وقعت في الخطأالمطبعي دا بالمناسبة قرات كتاب لجهاد الخازن كله عن الأخطاء المطبعية وهو شيق ورائع جداً عكس طبعاً الأخطاء النحوية والإملائية التي ترفع الضغط عشرين مرة وقبل فترة أوقعت مديري في حرج كبير جداً وذلك بعد أن قام بتوقيع خطاب به خطأ مطبعي والمدير من النادر أن يراجع ما أكتب فهو يثق كثيرا في شخصي الضعيف العبارة كانت كالتالي { وعندما وصلنا طلب سعادتكم } كتبت العبارة كالتالي { وعندما وصلنا كلب سعادتكم } ففي لوحة المفاتيح يوجد حرف الطاء بجوار حرف الكاف طبعاً المدير المتغطرس اتصل على رئيسي هنا وقامت شكلة كبيرة جدا لكن تم تهدئة صاحب الكلب وانتهت المشكلة
02-23-2006, 07:58 AM
انعام عبد الحفيظ
انعام عبد الحفيظ
تاريخ التسجيل: 12-07-2005
مجموع المشاركات: 8738
Quote: حملنا حقائبنا وسألونا الف سؤال فضولي ماشين وين ؟؟ حاتقعدوا كم يوم ؟؟ الماشي معاكم منو ؟؟؟ قلت لهم لدي صديق عنده زواج في الدمازين لكننا بالطبع ذهبنا للخرطوم واستأجرنا شقة هناك وشعرنا بقيمة الحياة في الساعات الأولى لدخولنا الجنة 00 اقصد الشقة وكم قلت ما اجمل سكان الخرطوم فهؤلاء يعيشون في نعيم !!!!
والله يا ابو حراز فكرت فيها صاح عارف لو باريت اهل العوض ديل كان جابو الباقة بتاعت العسل
زول ساكت حكى لي احد الأخوان قبل يومين قصة حدثت عندكم بتعرف يوسف عبد الماجد طبعاً دا اليوم كله علي بالحرام وعلي بالطلاق أها مشى اتزوج عندكم والجماعة عارفين طلاقو وحرامو بالجملة يقال أن { السيرة } بعد أن وصلت عندكم قالوا نص ناس الحلة وقفوا للعريس في الباب أها العريس كان مفتكر الجماعة عاوزين حق الباب أو حق الحفلة والفنانين اها قاموا قالوا ليه : اسمع ياعريس هووووووووي أديناك من عندنا 150 طلاق و50 حرام دي مجان سااااااااكت وتاني كان زدت منها بنقلع زولتنا منك
02-27-2006, 06:02 AM
ابوحراز
ابوحراز
تاريخ التسجيل: 06-27-2002
مجموع المشاركات: 5515
نادية عثمان اها زي ماشايفة مشينا الشقة وتغيرت حياتنا تماماً بقدم ليك دعوة تزورينا في أهل العوض خليك من بحري وتعالي اشربي ليك معانا جغمة لبن سمعتي بي ضيف العمارات الذي زار اهل العوض الشاي بي لبن الفطور كسرة بي ملاح لبن الغداء عصيدة بي لبن العشاء عاملين فيها قشروا شوية 00 قراصة بي لبن جاء عاوز ينوم جابوا ليهو كباية بتاعت لبن قدر يوم القيامة وأدوه بطانية ريحتها كلها لبن لبن والصباح كالعادة عشرة براريد شاي لبن وقال عاوز يسافر مفتكر بص الحسيني حايجي عندهم قال ليهم عاوز أسافر قالوا ليهو أنتظر { بكسي اللبن } أها ركب ليك وسط { التمن } بتاعت اللبن والبكسي بعد شوية انقلب والراجل اتملأ باللبن وقام شاف أهل العوض واقفين بتفرجوا فيه ويضحكوا قام قال ليهم : بتعاينو مالكم 00 ماشفتوا ليكم زول بي لبن قبل كده ؟؟
02-27-2006, 04:54 AM
ابوحراز
ابوحراز
تاريخ التسجيل: 06-27-2002
مجموع المشاركات: 5515
انعام عبد الحفيظ والله جد بصراحةأهلنا مايزعلوا يعني ناس الخرطوم تعبانين شديد من أهل العوض طبعا لأن أهل العوض عندهم الزيارات عادي وممكن تأتي في أي وقت يرحبوا بيك بعكس المدن الكبيرة مثل الخرطوم فالناس هناك أغلبهم مرتبطون بأعمال لهذا وقتهم ضيق جداً والله أخوي مرة لقيت معاه 18 أهل الزوجة وأهلنا نحن طبعاً والمشكلة أهلنا نحن مشرورين مابين كاب الجداد وام ضريوة يعني في كل أنحاء السودان ياخي ديل يوم وجدتهم نايمين ليهم في تربيزة وبعد دا كلو جابو ليهم { ولد } سبحان الله له في خلقه شئون
02-25-2006, 00:15 AM
Al-Shaygi
Al-Shaygi
تاريخ التسجيل: 11-16-2002
مجموع المشاركات: 7904
أبو حراز سكر المنتدى فكرتك حلوة بس مكلفة جداً ما عندكم مصطلح اسمه (دنقلا باللفة)؟؟؟؟؟ احكي ليك قصة دنقلا باللفة منطقتنا وقرانا في الشمال لا تختلف كثيرا عن معسكرات أهل العوض في الوسط وجنوب الوسط. نفس الفضول ونفس العادات والتقاليد ونفس المزاحمة في كل الاوقات من الصباح حتى صباح اليوم التالي. لذا تجد من يريد راحة نفسه والانفراد والتمتع بلحظات حميمة مع ست النفر دون تطفل المتطفلين لا بد أن يشتري راحته ويختار فندق أو شقة مفروشة وبكل اسف اهل العوض لا يمتلكون فنادق ولا شقق مفروشة ولا تتوفر الا في المدن ودي ما بيقدر عليها الا المغتربين الجيوبهم مليانة زي أخونا ابو حراز لذا ابتكرت (دنقلا باللفة) ... دنقلا اقرب المدن لمنطقتنا ويمكن أن تجد فيها فنادق تصلح لقضاء شهر العسل ولكن مع ضيق الظروف وقلة الحيلة تجد العرسان يعلنون انهم ذاهبون لدنقلا لقضاء شهر العسل وتأتي سيارة اجرة لتحملهم وسط وداع الاهل والامنيات بقضاء شهر عسل سعيد وفي نفس الوقت يتم الترتيب على تجهيز بيت لأحد المغتربين او بيت فاضي ويتم تجهيزه بالضروريات ويتم الاتفاق مع أحدى قريبات العروس وأحد أصدقاء العريس بتوفير المستلزمات خلال هذه الفترة لكي لا يفضح أمرهم ويعلم الفضولين بمكانهم. تنطلق السيارة وبعد ان تختفي من الانظار تعود بطريق مختلف او تحت جنح الليل الى البيت الذي تم تجهيزه كما اسلفت والذي يسمى إصطلاحاب(دنقلا باللفة) وبي كده تكون وفرت حق الشقة المفروشة أو الفندق وفي نفس الوقت تخلصت من الفضوليين. جرب الحكاية دي الاجازة الجاية وتكون عندكم (خرطوم باللفة).
02-26-2006, 02:42 AM
يازولyazoalيازول
يازولyazoalيازول
تاريخ التسجيل: 02-05-2002
مجموع المشاركات: 10210
شوف يا أب حراز، بي حمتك ونزلتك دي أختانا الأيام دي ما تكون عندك أنفلونزا تعادينا بيها. قلت الأدبخانة عندكم الواحد لمن يمشي ليها كأنوا ماشي يرفع "كورنر" !! انحنا نفس الحكاية، واحد قريبي مشى الخرطوم زيارة، وطبعا هناك "الحمامات" في نص الغرف، وأخونا متعود على "الراحة الكاملة" في أدبخانات القولد، وعلى حظه السيء، طقاهو اسهال سيّح ركبو، والمشكلة إنو الاسهال كان النوع البترافقو (أصوات مدافع). صاحبنا دخل الحمام، وقدر ما حاول إنو الأصوات تكون مكتومة، انطلقت زي (الألعاب النارية). من حمامو داك وعلى القولد دغري.
02-26-2006, 12:36 PM
ابوحراز
ابوحراز
تاريخ التسجيل: 06-27-2002
مجموع المشاركات: 5515
والله ياهشام ماقادر أمسك نفسي من الضحك ياخي دا عريس عوير جداً وغلب زولنا 10 صفر عندنا عريس الريالة سايلة ماشاء الله لكن اتزوج كالعادة بنت عمه زي هيفاء وهبي وقال يا يعرسها يا يقع في البحر وياريت لو وقع في البحر اها الجماعة قالوا ليهو حجزنا ليك في فندق أمبريال مدني قام قال ليهم أنا عاوز اقضي على اليابس والأخضر في بيتي دا أها المهم العروس زعلانة ومادة بوزا مترين دخل معاها البيت وماعارف طريقة يتكلم بيها ويبدأ بيها الحوار الخاص قومي يا الجدادة أدخلي البيت اها زولنا ماصدق لقى ليهو موضوع قام بعوارتو دي قال ليها بتقومي تنهري الجدادة دي وللا أقفل عليك الباب دا ؟؟ قالت ليهو : تنهرا انت ياحيوان وتقفل الباب معاك
03-01-2006, 00:51 AM
ابوحراز
ابوحراز
تاريخ التسجيل: 06-27-2002
مجموع المشاركات: 5515
حبيب بلدو زمان العريس يكون صادق مع زوجته حتى لو عاش معاها 100 سنة هسي اصبحتوا تكذبوا عليهن في شهر العسل قال دنقلا باللفة قال بعدين الشيء الماقادر افهمه حتى اللحظة إنو العروس عندنا في السودان تتمنى هذه اللحظة وهي مغادرة البيت لشهر العسل بالله عندما تأتي لتأخذها البيت كله ينقلب بكاء حتى أم العريس تلقاها تبكي معاهم أول ماتمشي بيها 500 متر تقلبوا ليك ضحك !! وتشيل المناديل عشان تقش دموعها وأول ماتصل الفندق دا العروس ياكافي البلاء كأنها بتعرفك قبل 50 سنة عادية خالص شوف النسوان زمان الواحدة تلقها مليئة بالحياء والعجب النسيبة قالوا 5 سنوات ما بتاكل مع عريس بنتها هسي تقول ليك أديني موبايلك دا عاوزة أعمل لي مس كول عينها قوية أكثر من بنتها أعوذ بالله !!!
02-28-2006, 02:41 AM
ابوحراز
ابوحراز
تاريخ التسجيل: 06-27-2002
مجموع المشاركات: 5515
الشايقي بعضهم يذهب للسوق العربي من أجل ألاستثمار واقلهم يذهب لشرب العرديب الجميل الرائع الطعم لكنني أذهب لأتفرج في خلق الله وكثيراً ما أجلس بجوار بائع أحذية طبعاً أحذية نسائية من النادر أن ترى في هذا السوق إمراة مشلخة !!! جميعهن 19 عاماً وكثيرات منهن حور عين تغير السودان تملماً ودخلته افكار جديدة تشاهد كثيراً بعضهن قد تأثر بهيفاء وهبي وأليسا لدرجة غير عادية لكن الإحتشام أيضا مازال يفرض نفسه بقوة إلا أن هناك منافسة غير عاديةمابين الأصالة والتحضر لكن رغم ذلك فغن معظم المغتربين لايجيدون التعامل مع هذا الجيل وعندما تمر واحدة بجوارك من النوع الذي يلهب المشاعر فإنك تتدثر وتتزمل وترتجف وكأنك سقطت عارياً في جبال الاسكيمو تجد بتاع الأورنيش يتحدث معها بكل طلاقة في حين أن المغترب مثل { النعجة } لايعرف كيف يدخل لهذه الآنسة الرائعة هناك فجوة كبيرة بيننا وبين الجيل الذي صعد الآن صدقني رغم هذه الفصاحة ولكن عندما تكون لدينا مناسبة تجدني كالشاة القاصية أجلس وحيداً وبعيداً لأنني لا أعرف المصطلحات التي يتحدثون بها بعضهم يقول أنني مغرور والبعض الآخر يقول ليك دا بتاع قروش والبعض يقول شايف نفسه وهم لايدرون أن ذلك خوف من أن تسقط منك درابة فجأة فيضحكون عليك دون أن تعرف أنهم يضحكون
كوستاوي شكراً جزيلاً على شعورك الطيب قلت لي الشرق الأوسط مرة واحدة نحن ياخي مازلنا في روضة البورد حتى اللحظة وان كان هناك من شيء جميل فهو منكم وبدعمكم لو عاوزني أبدع اكثر من اللازم شوف لي طريقة أجيكم في امريكا حيث الابداع يمكن ان يتولد في أي لحظة برؤية منظر جميل أو إنسان جميل والأهم من كل ذلك إمراة جميلة 000
03-05-2006, 00:54 AM
ابوحراز
ابوحراز
تاريخ التسجيل: 06-27-2002
مجموع المشاركات: 5515
عبد العزيز برضو كويس ان البوست جابك لينا كيف أحوالك وأحوال الأولاد أخبارك شنو مع الفريزيان الهولندي قالوا بقركم يتحاوم ساكت في أمستردام بجيك صادي أكاويك لكن المدام شوف ليها طريقة ماتدخل البوست بتاعي دا
03-04-2006, 05:53 AM
ابوحراز
ابوحراز
تاريخ التسجيل: 06-27-2002
مجموع المشاركات: 5515
أخي عادل شكراً على هذه الشفافية والكلمات الجميلة وهي كلمات تحمل الكثير من الألق في حق أهل العوض وكم يسعدني أن أكون منهم وسعدت اكثر بأن أجد مثلك ينتمي لهذه القبيلة العريقة القبيلة المليئة بالتسامح والسماحة أهل العوض 00 قطاع الطرق كما اسموهم ذات مرة يقطعون طريق مدني الخرطوم ليس من أجل السلب والنهب بل من أجل افطار شهر رمضان لكل القادمين بهذا الطريق ما أجمل هؤلاء القوم بساطتهم تقودك الى قلوبهم وسذاجتهم المفرطة هي سر لم استطع استيعابه حتى اللحظة أنا أشاغبهم كثيراً لأنني منهم واليهم صدقني 00 أجمل لحظاتي هي التي أمضيها معهم أحس فعلاً ببساطة الحياة عندهم البراءة تلمسها في أي مكان والطيبة بلا حدود يعني الناس ديل صراحة لم يبشروا بالجنة ولكن لديهم الكثير من المقومات لذلك !!!!
02-28-2006, 11:45 AM
ود العجمى
ود العجمى
تاريخ التسجيل: 09-21-2002
مجموع المشاركات: 1595
الشاي بي لبن الفطور كسرة بي ملاح لبن الغداء عصيدة بي لبن تعرف يا ابو حراز قالو واحد من جماعتكم ديل زاتن جاتو بواسير وداسى الكلام ده من ناس الحلة الا ست النفر ومشو الاتنين لشيخ الحلة وقال ليه بالليل تقعد(ام فكو) فى لبن دافئ وطبعا بالليل ست النفر تعجبك سخنته شوية ولما قعد فيه نط وقال احححح قالت ليه حار؟؟؟ قال ليها لا ... مسيخ
03-05-2006, 04:44 AM
ابوحراز
ابوحراز
تاريخ التسجيل: 06-27-2002
مجموع المشاركات: 5515
ود العجمي الله يجازيك 00 الظاهر زولك المسيخ دا جعلي مفروض كان يبردوه ليهو كان لدي أحد الأعمام يترك اللبن حتى يبرد والغبيان كان ينام قليلاً ثم يصحو بعد ذلك كثيراً آخذ منه جغمة أو أثنين ويومياً كان يسخط على الكديسة التي بالبيت ويتهمها بانها شربت اللبن تذكرت الآن نكتة الجعلي العوير الذي سقط في البير بالمناسبة والدي جعلي لكن تايوان !!! يقال أن هذا الجعلي سقط في البير وشافوه الشايقية وكان الجعلي مسيخ جداً حيث أن لديه دكان بالقرية فاشترط الشايقية على عمدة القرية بأنهم سوف يخرجوا الجعلي من البير ولكن بشرط 00 فقال لهم العمدة شرطكم شنو ؟؟ قالوا ليه بعد ما يطلع { يدينا بضائعنا بالدين } يعني { يطلق ليهم } فأوصل العمدة هذا اشرط للجعلي وناداه وهو في البير وقال ليه الجماعة قالوا ليك { تطلق لينا } لو طلعناك قام الجعلي قال ليهو : والله حاضر ما أبيع ليهم 0
للكلام بقية
03-05-2006, 04:46 AM
ابوحراز
ابوحراز
تاريخ التسجيل: 06-27-2002
مجموع المشاركات: 5515
كذلك لدينا جد مغرم باللبن وهو صعب جداً وعكازه مضبب 24 ساعة وياويلك لو لقاك قاعد مع النسوان والله لو لقاك مع أمك العكاز ياكل راسك وهو متخصص { يفرتق الحفلات } أول ما الفنان يفتح خشمه زولنا دا يشيل عكازه ويمشي النسوان مما يشوفن جدنا تصدق بينطن بأقرب حيطة والله بيعملن عمايل ناس الاكروبات ما يعملوها تاني شيء بيمشي على الرتينة بلفخها بالعكاز والغريب لو شاف زينة اضاءة كل لمبة بيديها عكاز أها بعد كده بيمشي على الدلوكة بجيب خبرها في الحال والله خمسة دقائق تلقى الحفلة دي مافيها ولازول وناس يوسف الموصلي محل غتسوا ماتعرفهم
03-05-2006, 04:48 AM
ابوحراز
ابوحراز
تاريخ التسجيل: 06-27-2002
مجموع المشاركات: 5515
طبعاً مرة عندنا حفلة والناس الفيها كلهم حناكيش من الخرطوم والجماعة جاهزين موية ونور لكن أكيد لو اتعملت الحفلة حايحرج الجماعة كلهم ونروح في خبر كان اها مافي طريقة الا اللبن دا جابوه ليهو الجماعة { كورة } مليااااااااااااااااااااااااااااااانة ورموا ليهو فيها {3 حبات فاليوم } لأنه واحدة والله ماتعمل ليهو أي شيء لأنو دا { فتيل } المضاد الحيوي بشفطوا في مرة واحدة أها شرب الكورة بما فيها عليك أمان الله ما صحى الا بكرة صلاة العصر قال عكاز مضبب قال !!!!
03-01-2006, 10:53 AM
almulaomar
almulaomar
تاريخ التسجيل: 07-08-2002
مجموع المشاركات: 6485
أخي الفاضل أب حراز أيده الله إذا كانت المرأة التي سوف تلج معك الشقة المفروشة بتشبه واحدة من الثلاث صور أدناه يجب أن يقيموا عليك حد الحرابة حتى لو كانت المرأة زوجتك ومعك جيش من الشهود العدول.
أما إذا كانت المرأة الداخله معاك بتشبه أى من الحاجتين المبينتين أدناه أكيد الموضوع عادي يا فرده بل يجب أن يعطوك جائزة نوبل للتصالح مع الطبيعة والرضا بالقضاء والقدر
خلي عندك شجاعة أدبية وأنا منتظرك في الماسنجر لأن السكون من علامات الرضا
03-01-2006, 11:32 AM
Tragie Mustafa
Tragie Mustafa
تاريخ التسجيل: 03-29-2005
مجموع المشاركات: 49964
بعدين عندنا في أهل العوض الأدبخانة غريبة خالص يعملوها ليك بعيدة في زاوية الحوش يعني لمن تشيل ابريقك وتمشي زي كانك ماشي ترفع كورنر !!!! قال مافي {Privacy} قال .
الجميل أبو حراز الكتابة بنكهة الفضحك، ضرب لا يجيده إلا القلة، وأشهد أنك أحد هؤلاء القلة. وأتساءل من اين لك هذا. أكتب أكتب ....وما تطول الغيبات، فأنا وقرشو ويازول يازول ومن جايلهم مفاخرين بك الأجيال التالية من البورداب.
03-11-2006, 12:35 PM
ابوحراز
ابوحراز
تاريخ التسجيل: 06-27-2002
مجموع المشاركات: 5515
أخي نادوس صاحب القلم الجميل لك التحية على كلماتك الرائعة الجميلة وأتمنى أن لا أفشلكم مع الأجيال القادمة في المنتدى لا أدري يا استاذي لماذا إخترت أنا فن السخرية وهو من الفنون الصعبة جداً والطريق فيه شائك وطويل وأتمنى أن لاندمن فيه كثيراً مثل ذلك العريس الذي أدمن عمله وكان مهندساً للطرق والجسور وكل الونسة مع الخطيبة كانت عن الطرق والكباري وحتى يوم الزواج كان يقرا في تاريخ إنشاء كبري سان فرانسسكو العروس طبعاً مدت بوزها 3 أمتار وزهجانه لدرجة ماعادية المهم مشوا مثل ناس ابوحراز المساكين ذهبوا لشقة مفروشة وبعد أن بدأت تجهز في نفسها للقاء المحتوم قال ليها ياسلام على كبري الفتيحاب رايك شنو نسجل زيارة له فقامت بتغيير ملابسها وقالت له 00 هيا بنا وذهبوا الى الكبري وقالوا قالت ليه واحد أتنين تلاتة وهوووووووب رمت العروس عريسها من فوق الكبري للنيل مباشرة
03-07-2006, 05:11 AM
ابوحراز
ابوحراز
تاريخ التسجيل: 06-27-2002
مجموع المشاركات: 5515
استاذتنا تراجي عندما قرات اسمك بدأ قلبي يدق كثيراً وقلت لابد أنها ستقول لي هذه هجمة شرسة على المراة فالتعامل مع الجندريات يحتاج للكثير من الدبلوماسية لكنني عندما قرات ردك وجدتك انسانة مرهفة وشاعرية ومليئة بالرومانسية المغلفة بالمزح الجميل لا أدري يا استاذة فإنني أكره اسم تراجي كثيراً وربما ذلك لحالة نفسية منذ طفولتي حيث ان لدينا جارة تحمل نفس هذا الاسم وكانت كثيراً ما تقلع حذاءها لتضرب زوجها المغلوب على أمره وكان يأتينا كل يوم حافياً حيث يبيت معنا بالمنزل الغريبة ابن اللذين دا لمن يزعل بياكل أكل كتير جداً أها اليوم داك مما نسمع الكواريك ضربت بنتعشى من الساعة 7 { لكن التسويه كريت في القرض تلقاهو في جلدها} فقد تطلقت من الطرطور الأول وتزوجت آخر شرس جداً والآن تأتينا كل فترة لتبيت عندنا حيث تقول أن زوجها يضربها بسبب وبدون سبب الغريب كل ما أمر بجوارها أجدها تلعن الرجال !!! تقول أنا قلعت مركوبي ودقيتها قال جندريات قال !!!!
03-05-2006, 01:36 PM
ابوحراز
ابوحراز
تاريخ التسجيل: 06-27-2002
مجموع المشاركات: 5515
الرائع الملا عمر أول شيء نبدأ ليك بالأخيرة دي والله خشمها الكبير دا ما ينفع الا في طراش الملاريا عووووووووووع مرة واحدة تريحك وترتاح بعدين رغم شناتها دي لكن عندها شعر ماتستاهلو وتذكرني حبوبتي ذات ال 110 أعوام لكنها رغم ذلك محتفظة بسنونها كاملة وكانت كل أخواتي يغيرن منها ويحسدنها على هذه السنون البيضاء هذه الأخيرة لو أعطوني معاها مليون دولار فلن أتزوجها انا أريد شيئاً رومانسياً مثل الصورة الثالثة ومسئول يا اخوي من الخير الصورة التانية دي باقيها مشى وين ؟؟؟ قرأت بوست قبل فترة به فتوى تحرم التعري في الحياة الزوجية وكنت استغرب لهذا المعتوه الذي اصدر هذه الفتوى لكن الآن ومع الصورة الأخيرة الراجل عنده حق !!!
03-06-2006, 10:47 AM
almulaomar
almulaomar
تاريخ التسجيل: 07-08-2002
مجموع المشاركات: 6485
الأخ العزيز أب حراز مسئول من يا تو خير يا أخوي ، شوف يا مان باقي الصورة التانية يمكن تلاقيهو تحت الصورة التالته يعني أرفع الصورة التالته وحا تلقى الباقي وكان غلبة حيله أعمل لي مس كول بقوم بعمل ليك أب ليفت وبعزمك في أب حمد سفن أب يا أب حراز
03-07-2006, 05:42 AM
ابوحراز
ابوحراز
تاريخ التسجيل: 06-27-2002
مجموع المشاركات: 5515
كتب لي أحد الأصدقاء رسالة لطيفة جداً بالماسنجر والراجل الظاهر زوجته معانا في المنتدى وماعايزها تعرف كمان ذكر انه عجوز وأسوأ شيء جرسة العجايز عشان كده سنقول الأحرف الأولى من اسمه أ 00 س 00 د الغريبة الأحرف مجتمعة تدينا كلمة اسد لكن لا اسد امام النساء اللبوات !!! عشان ماتفوتني المعلومة فقد قرات أن اللبوة كثيراً هي التي تصطاد بينما صاحبنا الأسد عليك أمان الله لايحرك ساكناً يدوه ليهو مشوي !!!! هسي تشيل قفة الملاح وتقد جيبك وتجيب كل شيء في القفة بعد دا كله الغداء ما يطلع الا الساعة 7 مساءاً دا طبعاً لو ما قالوا ليك حش البصل !!!! نرجع لأخونا صاحب النكته حيث قال ان زميلته شيطانة جداً مش من أهل العوض 00 ناس بحري والمنشية وعلى التسودها عليها اتزوجت واحد قريبها من أهل العوض وشدة ما بتكرهو كل ماتشوفه بتستفرغ فجأة وجد نفسه معاها في غرفة واحدة قامت قالت ليهو 00 أقلع !!!!! صاحبنا ريالته سالت وما صدق وقال ليها آآآآآآآآآآآآآآآآآي بس قامت قلعت ليك الشبشب ولمت فيهو والله زولنا كان مرقنه كرعيهو تاني تجوا بحري ؟؟؟؟ !!! قال أهل العوض قال
03-05-2006, 03:11 AM
عزالدين آدم علي
عزالدين آدم علي
تاريخ التسجيل: 01-29-2006
مجموع المشاركات: 591
يا أخوي أنني أقترح أنه وقبل الإجازة بثلاثة أشهر فلابد من أن تستقدم الحرمة بصفة الزيارة فتمكث معك هذه الثلاثة أشهر وتنزلوا مع بعض، فإذا الحظ كان حليفك شحنت البدك ياه وإن لم يحالفك فعبيء البطارية للعام الذي يليه. وعشان كده أنحن جبناهم معانا.
تحياتي ،،،،
03-07-2006, 05:46 AM
ابوحراز
ابوحراز
تاريخ التسجيل: 06-27-2002
مجموع المشاركات: 5515
أخي عز الدين قبل شحن البطارية والعفش وهلمجرا فلا بد أن اقول ياجماعة لايعقل واحد يكون مغترب وغاب عن زوجته أكثر من ثلاثة أعوام يعني صراحة لابد ان يتفرغ لها ليعوضها سنين الحرمان والبؤس والشقاء قابلت ثلاثة نساء من أقربائي والله لم أعرفهن لأن أزواج هؤلاء النسوة مغتربون معنا بالسعودية 4 سنوات و3 سنوات واقلهم سنتين يعني بشتنه ماعادية وغبشة الواحد مايقدر يتكلم فيها واحدة قعدت وكشفت عن ساقها والله مافرزت ساقها من كراع العنقريب 00 كله زي بعضو وحضر أثنان من هؤلاء الأزواج والله عندما قابلت هؤلاء النسوة تغيرن تماماً وعادت لهن نضارتهن وجمالهن والدي الله يرحمه لم يغادر البيت نهائياً ولم يبيت خارج البيت لأن كل شيء كان متوفر هسي الله يستر 00 ماتجيب { الضحاكات } المدام نفسها تطردك وتقول ليك القاعد ليها شنو !!!! ست النفر لديها حكمة غريبة جداً أظنها جايباها من الصين تقول الحكمة { اذا توفرت المعاني السامية في الحب وقف الحب على قدميه } اها جاء آخر الشهر وما أرسلت ليها المصاريف قلنا نشوف المعاني ؟؟ بالله اليوم التاني الاتصالات يمين وشمال عشان قروش اللبن والرغيف واللحمة قلت ليها رايك شنو الشهر دا نشوف المعاني السامية دي كيف قال قدميه قال !!!!!
03-05-2006, 02:06 PM
مجدى محمد مصطفى
مجدى محمد مصطفى
تاريخ التسجيل: 11-06-2005
مجموع المشاركات: 1700
والله ياخى ما كنت متخيل ان الواحد لسه لديه مقدره على الضحك بهذه الصوره ، لقد اخلت السرور الينا ،بالمناسبه (ست نفرى من عندكم). تمنياتى لك بحياه سعيدة ، والله يخلي ليك ست النفر والوليدات.
أخي مجدي لك التحية على كلماتك الجميلة الضحك هنا مجان وملح زي ما يقول ناس السودان هناك عاوز تدخل مسرحية الا تملأ جيبك قروش أتمنى ان يكون المنتدى مليئا بالكلمات التي تخفف عنا وعثاء الغربة
03-14-2006, 00:47 AM
ابوحراز
ابوحراز
تاريخ التسجيل: 06-27-2002
مجموع المشاركات: 5515
أخب الملا عمر بمناسبة الصور دي حتى حضورنا للسعودية كنت وزملائي العزابة نحتفظ بالصور الجميلة صور الفنانات والممثلات وهلمجرا كان كل ذلك يتم تحت المخدة حيث أننا جميعاً في الصباح لابد أن تنظر لهذه الصور قبل الذهاب للعمل وبجانب الصور الخاصة توجد لدينا صور عامة معلقة بالجدار مثل سميرة سعيد وماجدة الرومي وفيفي عبدو لدينا أبناء من القرية يعملون بالمدينة المنورة اتصلوا علينا يوماً وقلبوا حياتنا رأساً على عقب وذكروا لنا أن أحد أبناء القرية يريد الحضور للعمل معنا بالطائف وهو شخص متشدد لو مسكك يبدأ ليك من ابوتيمية وما يقيف الا في أبوحنيفة وابن عبدو ربو أها مما سمعنا بدينا نخبيء في الصور ونزلنا الصور العامة والراجل وصل وتحول البيت الى كابوس لاونسة ولا ضحك ولا تعليقات وضوء وصلاة ومحاضرات حتى الأكل لو ما قلت ليك حديث حديثين ماتقدر تاكل افلام مافي تلفزيون مافي فيديو مافي يعني شغلة أخير منها الطهووووور يوم قلنا الراجل دا لازم يمشي على حسب مانحن عاوزين أو يرجع الحرم النبوي المهم قلنا اليوم لازم نشغل الفيدو ويكون فيلم هندي راقص فعلاً الجماعة كلهم اجتمعوا في غرفة أنصاري السنة دا وشغلنا الفيديو وصاحبك كان متغطي بالملاية أها لمن تجي موسيقي ورقص هندي يفتح الملاية يعاين بدون الناس ماتشعر بيه اها أنا لمن شفت الراجل كتر الشغلانية قمت شلت الملاية وقلت ليهو ياشيخنا عاين عديييييييييييل زيك وزي الناس ومن يومها الماسورة اتفتحت لقينا زولنا مرضان أفلام هندية قال تهتدون قال
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة