|
|
 وعادة حليمه الى عادتها القديمه
|
السلام عليكم شباب الحلوين
بعد دا الواحد يففض ويتكلم شويه
الصراحه انا عايز اتكلم عن حتجه حصلت وانتهت باخيرا وشرها انتهت و الحمد لله ، احتفالات الملتقى السوداني
في اللحظه دي انا ح اتكلم عن الاجابيات و السلبيات المريت بها انا ( ايهاب نميري كفنان ) انا فقط .
من الاجابيات ( هي كتيره و الله لكن ح احاول اتذكر منها ، صراحه انا لمن كلمني الاستاذ ميرغني الشايب واتصل علي تلفونيا وكلمني بالحاصل ومكان البروفات ، مشيت طبعا لقيت الوضوع مازي الصورة الكنته راسما في راسي ماشاء الله لقيت الاطفال مالين الاستراحه و الاخوات والشاي اللقيمات حايم في الاستراحه وووووا الى اخره ) فا طوالي اول ما بديت مع الاخت حياة ما عارف حصل شنو فجأة لقيت نفسي انا والاخ ياسر و الاخ وليد لقينا نفسنا ما سكين امل السودان واصلنا في امل السودان حتى اخر يوم ، الصراحه انااعترف انو الملتقى افادني جدا من عدة نواحي منها انو دخلني في المجتمع السوداني اللي منه مده طويله كنته مقاطعه ، الملتقى عرفني على اسر رائعه ومحترمه انا لي عظيم الشرف انو اتعرف عليها ، الملتقى \خلني مع ناس كانت علاقتي معاهم شبه سطحيه والحمد لله بالملقتى بقت علاقتنا اكتر من اخوان ، ساعد في نشر اسم الفنان ايهاب نميري ، الملتقى وراني الناس وطباع الناس اول مره اعرف مع احترامي للجاليه الجنوبيه ( اول مره اعرف انو في العدد الكبير دا من الاخوه الجنوبين و الجنوبيات ) وكان لي عظيم الشرف انو اتعرف عليهم ، منها بشكر ( الاخ حسن احمد حسن ، الاستاذه ست البنات ) في امل السودان الاادونا فرصه انو نحنا نكون احد اعضاء اسرة امل السودان ، بشكر ايضا اسرة الحمر وبقول ليهم عضوية الحمر بالنسبة شرف وا يشرفني انو اكون واحد من اسرة الحمر ، بشكر الملتقى لانه هو السبب ( بعد الله ) في وجودي الان في ملتقى سودانيزاونلاين وانو اتعرف على اسرة سودانيز اون لاين والناس المفروض اشكرم كتار بس على اساس ما انسا اي انسان فا الشكر لى كل اسرة الملتقى من رئيس الى اصغر طفل في الملتقى
بعض السلبيات التي واجهتني او مريت بيها (برضو انا بتكلم عن نفسي انا )
الحاصل انو في ببعض الاخوه العازفين للأسف الشديد جو الملتقى على حس انو الملقتى دا عباره عن ماسورة بتاعت قروش وفي واحد من الاخوان العازفين ( بدون زكر اسماء ) قال لي ناس الملقتى ديل والله ما ينفع معاهم الا العين الحمرا ) وفعلا ليقت س من الناس جايب فاتورة با مبلغ 3000 ريال و ع من الناس جايب فاتورة با مبلغ 1500 ريال ود من الناس جايب فاتورة با مبلغ 2000 ريال وللأسف جو في اخر اللحظات مطالبين أ. عبد المنعم عبد العال نظام لوي زراع وكدا ،،، وبعد دا استلموا القروش ,, وقال مع السلامه يا الملتقى بتذكر في اليوم الختامي واحد من العازفين وهو عارف انو الليله يوم مهم جدا قام صاحبنا مشى ربط الاورغن بتاعه لى مناسبة وجا الحلفه متأخر جدا علما بان الزول دا عنده ارتباط مع احد الفرق قام صاحبنا جا الساعه 12 وقعد 10 دقايق واتخارج مما ادى الى انو الفرقه دي اعتذرت في البدايه لكن بعد ما تداخل بعض اعضاء الملتقى وتم حل المشكله
والله في لحظة من اللحطات اتوقعته انا وزميلي ( ياسر الحلفايا ولااخ وليد ادم ) كلمه صغيره وهي كلمة شكرا الكلمه والله كنته محتاج ليها جدا على اساس الواحد كان عايز يحس فعلا انو عمل حاجه ( كنا بنخلص من الدوام وانا شغال دوام واحد ( من الصباح لحدي الساعه 7 مساء وجري من العليا الى مخرج 18 قاربة الشهر نحنا في الحاله دي ) ولكن الحصل حصل ، الملتقى دا عباره عن حاجه نحنا بنقدمى للسودان على هذا الاساس استحملان التعب و الجري ووووا
للأسف الشديد كانت مسألة ما جميله وهي مسألة الغيره ( لى يختاروا فلان وليه فلان يعملوا ليه كدا ) انت هيا فلان بدل تزعل وتطلع شمارات في الناس اثبت وجودك وري الناس انك انته بزلته جهد لكن تقوم تألف كلام لا صحه له من الوجود الكلام دا ما صاح ..... الكلام في الموضوع دا كتير ما عايز اخش فيها او اتطرق اليها
نجي يوم الخميس اليوم الاخير واليوم الذي تم فيه التكريم
الصراحه كان يوم جميل بس الحصل انو وزي ما قلته للجنه انو استحاله البرنامج يبدأ الساعه 8 مساء البرانمج بدا الساعه 11 مساء الصراحه حسن اختيار القاعه بعدين عدد الحضور كان معقول جدا / بس كان في ملاحظات بسيطه انا سمعتها بحكم انو انا كنته لافي في الصاله وبسسلم على الاسو وبستقبل في الحضور قالو كان ح يحصل شنو لو ختو في كل طربيزه علبه بتاعت مويه ام نص ريال معقول الكرتون كله با 7 ريال 20 كرتون والكرتون فيه 40 حبه كانت غطة وزادة بعدين كميه الكلام وكمية الشعر الاتقال اكتر من الازم ليه ... و الظريف في الموضوع انو واحد من الاطفال لمن استلم الشهاده او شهادة الشكر جا يكورك شوف الناس ديل ولا هلله ورقه ناشفه نحنا قعدنا ننضحك الصراحه فا لمن قلت ليه منو القال ليك انو في قروش قال يوم حفله الحمر ادوهم قروش وقال ح يدونا يوم التكريم قلت ليه ناس الحمر التكريم و القروش من نفس المجموعه يعني من ناس الحمر اب بيكرم ولده او بته قال لي لالالا مش هم مشاركين معانا في الملتقى معناها القروش دي من الملتقى ...على كل حال اسف انو انا طولته في الموضوع دا بس حبيت اوضح بعض الحاجات التي مرة علينا في الملتقى
الحاجه الاخيره بتمنى انو اي انسان ما عمل حاجه في المنتدى غير التنظير ما ينسب الجهد و التعب الى شخصه ،
من هنا ومن سودانيزاونلاين بشكر شكر خاص (اخوتي ) ياسر الحلفايا و وليد ادم لانهم وقفوا معاي ومع الملتقى دون كلل او مل واشكرهم اشد الشكر وبتمنى من الله العظيم انو يجلعنا احبه واخوان مدى الحياة
و السلام عليكم
اخوكم / ايهاب نميري
|
|
 
|
|
|
|
|
| |
ايهاب نميري
saif massad ali
فيس بوك
تويتر
انستقرام
يوتيوب
بنتيريست