|
Re: كان الأفضل أن يبقى الســودان جزءا من مصـر (Re: AMNA MUKHTAR)
|
ألبينو . أخوى . لا حولا ...... دا كلو منك بس؟!!. عندك حمى ولا ملاريا بسيطة او كبيسة ؟!!. انت كلو كلو ما سمعت بزول اسمو محمد عثمان الملقب ب( أبو الريش) .
الزول دا من شرق السودان ومن بورتسودان . كان ممكن بالمنطق بتاعك دا يبقى لو إريترى أو اثيوبى؟!!.
وناس غرب يبقوا فى تشاد اوكده. وما ضرورى ناس جنوب السودان يبقو من يوغندا او جزء من يوغندا ( انت من قبيلة بوغندا) !!.
تعرف كثير من قبائل يوغندا ليس اصلهم من جنوب السودان ولا اصول ثقافتهم موصول بالجنوب فكيف تبقوا جزء من يوغندا!. يعنى القبائل الكبيرة لو سميناها تجاوزا بالمهيمنة فى جنوب السودان ليس لها جذور فى يوغندا مثل الدينكا او (النوير) او الشلك وكده, صح ولا انا كداب؟.
هل سبق ان غزا ملك بوغندا جنوب السودان او كنتم جزء من مملكته؟؟.
وافيدك يا ايها المسيحى الملتزم !. ان اجمل وحدة على التراضى مع وجود التنوع جاءتنا من البلاد التى تدين بالمسيحية , وهم الذين صاغوا مواثيق التعايش السلمى والديمقراطية وإرساء دعائم الوحدة والتركيز على مفاهيم ما الذى نقدمه لبلادنا ؟؟ ومنهج كيف نحكم لا من يحكمنا؟!!.
وتفصيل الحقوق دستورا وتثبيت الواجبات فيه ايضا.
وان لم يكن لك سابق معرفة بالاستاذ: ابوالريش فهو الذكى العقل وزكى النفس لماح فطن يركن الى مناقشة المواضيع التى تدور فى الساعة بإيراد فقرة او جزئية هامة تخص الواقع السودانى ليدلو الناس برأيهم حيال المسألة .
وما قاله فى فقرته تلك فى الواقع كلام الارهابى ( أسامة بن لادن)
ولم ينسبها إليه لكأنه يريد ان يعرف المتابعين للاحداث ممن هم بمنأى عنها؟!!.
ولو تأنيت قليلا لاستلهمت من كلام العزيزة: آمنة مختار. ما يرمى إليه الرجل.
هذا ما لزم التوضيح والتنويه حتى ترجع الى نقطة البداية , وتناقش المسألة من جديد .
أما مسألة الوحدة بالغش ولعوامل واغراض مائية لصالح مصر وانتفاء مبررات الوحدة مع الشمال لان الجنوب كدا وكدا ...!؟ والله بالطريقة دى يا البينو اخوى إلا تخشوا تنزانيا عديل . وتعملوا بنظرية ( وننقص الارض من اطرافها ) ؟!. انت سمعت بنظرية الاسرائيليين ( الانسحاب فى الاراضى المحتلة ) وليس من الاراضى !!؟؟.
انت ما شايف ان الافارقة منذ مئات او الالاف السنوات ينسحبون من اراضيهم حتى كادوا يخلون من خط الاستواء الى الجنوب منها بفعل ماذا يا البينو اخوى؟!. أذن لابد من ايجاد وسيلة للتعاون والتعايش والوحدة والحفاظ على البلاد التى ورثناها من ؟
ونضغط بكل الوسائل الممكنة والمتاحة حتى نصل الى النقطة المطلوبة وهى : كبف نحكم ؟؟!!. ونعمل بأفضل دستور يناسب واقعنا المتنوع دينيا وثقافياوتأريخيا . وإلا ستجد ان الرزيقات والمسيرية يطالبون بعد كم سنة بحكم جنوب السودان او الانفصال فتضطرون الى إقتطاع جزء من الارض لاقامة الدولة الجديدة؟؟.
يا زول ها خليك فى سودانك الحدادى المدادى وقاوم الظلم والاستعمار الداخلى وسوف نقيم صرح العدالة التى تستوعب الكل فى واحد؟!!.
بدل نظرية ننقص الارض من اطرافها دى خليها قلع وخلع واماتة بؤر الظلم والقضاء على ثقافةالاقصاء الاخر؟.
تجرى تجرى جرى الوحوش برضوا ما تسبقهم بطريقتك دى بالعكس يدخلوك فى ركن قصى ويسهل لكمك وركلك حتى تستسلم او يقضى عليك؟!1؟.
وشكرا لاتاحتك هذه الساحنة للتحاور معك . مع خالص محبتى وتقديرى لشخصك الكريم.
|
|
|
|
|
|
|
|
|