لمن جدنا الكبير مات، خلى ثروة كبيرة، وكان عندو زوجتين، والجماعة اختلفوا: اخواني وأعمامي وخوالي. اخوي جون قال هم اولاد المرة الاولي ياخدوا النص او على الاقل التلت، والجماعة كلهم رفضوا
جانا عسكري قال هو ح يشرف على الورثة اشراف محايد، أها عمنا منصور راجل قانوني، قال والله نشوف الزول دا امكن كلامه ينفع، قام رسم معاه الصيغة القانونية للاشراف على الورثة، أها العسكري طلع حرامي وكذاب، عمنا منصور قام طوالي في وشه قال ليه دا ما الكلام الاتفقنا علهو، كتب الكلام في جريدة رسمية اسمها الايام سنة 77 تحت عنوان ه"لا خير فينا ان لم نقلها"ه
أها الجماعة في خلافاتهم ديك، جاهم واحد ناطي ما معروف من وين، حتي ان عمي الطيب تساءل قائلا: من اين اتى هؤلاء؟؟ والحرامي المرَّة دي جا عديل حرامي، من اول يوم بدا في الجماعة كتل وتعذيب وضرب وصلب من خلاف وجلد واهانة وحرمان من الرزق والمعاش وكل شئ، أها عمي الصادق وعمي الميرغني وعمي نقد كلهم قالوا: انا وابن عمي على الغريب ووحدوا كلمتهم، واخوي جون قال تمام، نحن زاتنا معاكم، برضو انتو اعمامي رغم الخلاف، لكن دا كلام بطن بيت هسي نخليه شوية
أها جابوا حكم من برة، قال ليهم، للحرامية يعني، تدوا جون النص او التلت، والحرامي وافق لانه الحكم خوفو عديل كده، وجون زاتو ما ساهل، خوف الحرامي عديل كده، اصلها عالم ما تجي الا بالعين الحمرا، والله نحن واعمامي وكلهم قالوا: والله تلتوا ولا كتلتو، نحن البتجي لي ولدنا جون دي، زي الجاتنا نحن، كدي أحسن نضمن دي وبعدين نشوف، يا ريت لو أدوه المال كلو، يا ريت لو نحن أديناه ليهو كلو من زمان، ما هو لحمنا ودمنا، مننا وفينا، برضو كان جعنا بدينا وكان مرضنا بعالجنا، نحن دايرين بالمال شنو، اريتو المال طاير، اهو دا بسببو الحرامي كتل مليونين من اولادنا، أها كان أدوهو لي جون، والله عافين ليهو منو. جون زاتو صالحنا من زمان واتفق معانا ، لو الورثة طلعت من ايد الحرامي، تاني ما في مشكلة بيناتنا في تقسيمها أها هسع كلنا راجين جون ياخد حقه، ناكل معاه لمن ربنا يقدرنا نقلع الباقي
اريت المال طاير المهم ولدنا يرجع لينا، والمهم المحبة الكانت في البيت الكبير ترجع لينا، واولادنا ما يموتو ولا ينسجنوا ولا يتعذبوا، المهم الحرامي ما يجي تاني المهم الحياة، مش المال
ولك التحية أخي، والتحية لعم منصور ولجون والميرغني والصادق ونقد وكل اهل الورثة الحقيقيين، حتى لو اختلفنا على النسب
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة