|
|
 الارهــــــــاب...........ورا.........الــــــدولاب
|
زمان وانا طفل في المدرسة الابتدائية...... كان في واحد حاقر بي حقارة شديدة خلاص...يقاسم معاي سندوتش الفطور...ويقعد في قعر النيمة في المدرسة ويرسلني اجيب لو موية من مزيرة المدرسة.... مرة عشان يغسل ايدو ومرة عشان يشرب....ومن المدرسة للبيت انا اشيل ليهو شنظة الكتب حقتو...لحدي خشم بابهم......والصباح لازم اغشاهو وانتظرو لحدي ما يلبس.. ونمشي المدرسة سوى......اكتشفت صدفة انو اخونا دا اكبر خواف في الدنيا....وبخاف من الكدايس..جنو وجن الكدايس...ماشين... بعند الحيطة نص النهار وكالعادة انا شايل الشنط وهو ينطط ويتمختر قدامي..مرة يجري ومرة يقدل... فجأة جات كديسة ناطة من الحيطة وما تنط الا فوق زولي دا..... وزولي يصرخ باعلى صوت عندو .....ويقوم جاري.. جري شديد ...وهو يعاين وراهو ويصرخ..كديسة كديسة.....وصل بيتهم...ووصلت انا وراهو شايل شنطتو..دخلت... بيتهم لقيت زولي مدسي ورا ضهر امو ...امو تعاين لي وتضحك وتقول لي انت ما عارف الزول دا بيخاف من الكدايس؟..............يخاف من الكدايس وعامل لي فيها... داموك..... طيب
واروح اكوس لكديسة عشان اربيها..واجيبها..... ويجيني هو في البيت...واجي انا علي غفلة شايل الكديسة..واجدعها فوقو..... ويصرخ ويجري....وتاني يوم..... ونحن راجعين من المدرسة...هو شايل الشنط...وانا اتمختر واقدل قدامو ....وكل ما يحاول يتمرد عليّ اذكرو...بالكديسة اللابدة ورا دولابنا الكبير.......وكيف انها كبرت......وبقت قدر الضربة......وهو الغبيان ما عارف انو انا بخاف من الجندب..........
تفتكرو في علاقة بين الكديسة بتاعتي وبين.. بن لادن..؟
|
|
 
|
|
|
|
|
| |
سجيمان
فيس بوك
تويتر
انستقرام
يوتيوب
بنتيريست