مـــن أقـــوال الســـيد سجــيمــان

كيف تدقس زوجتك

تدقس لها معنين....... دقس يعني دقا... ضرب ودقس يعني غفل.. شيل القفة........انا حاوريكم الاخيرة ...الاولى ما دايرة فلسفة وفلهمة كتيرة.....بقت مراقب الزوجة لزوجها... ساهلة وتستعمل فيها وسائل الاتصالات الحديثة وزي الانترنت......... ما عليها الا تخلي راجلها يدخل في الانترنت وتديهو زي نص ساعة لحدي ما يغرق فيهو تب.... وتجي تدبا واراهو....وتقيف وتقعد تقرا وتشوف كل ما يكتبو.. وما يطلع عليهو......وخاصة الشات....لكي تدقّس زوجتك في هذا المجال..... اولا خلي... برنامج التسالي شغال في حالة التصغير....وخاصة الكشتينة....... ومرن عيونك على النظرات الركنية......يعني دايما خلي عين على الجهاز والتانية للاستكشاف.....وحاجة مهمة خلي باب الغرفة الفيها الجهاز في حالة اغلاق دائما....وبعدين الباب لازم يكون النوع المفاصلو تعبانة وبسكسك...عند الفتح والاغلاق .... يعني يعمل سيييييك...سييييييك......استغل هذه الميزة كجهاز انزار......وحاجة ايضا مهمة.... كشتت كرعين المرا... لابد ان تكون مرهف... لكي تستطيع ان تميز كشتت كرعين المرا من كشتت كرعين الشفع...... خلي لمبة في نهاية الجدار الفي ضهرك... لمبة حمرا.. فلوروسنت عشان الضل.... تعرف بو الوراك منو.....والجهاز خليهو قريب من الحيطة عشان انعكاس الضل على الحيطة...لابد ان تكون دايما رابط الجأش.... متماسك... يعني لو المرا جات وانت في حالة شات غرامية.... ما تطرطش..وتتبهدل.... طوالي ارفع الكشتينة واقعد جدع فيها.....ولازم يكون عندك ويندو من انترنت اكسبلورور فاتح وجاهز........اوعى تخلي شافع من شفعك البيعرفو القراية معاك في الاوضة....شفع الزمن دا... الحبة ما تتبل في خشمو.. يكلم امو باي حاجة...انهرو طوالي ..وقولو يا ولد امش ذاكر مذاكرة تنفعك.....
اما لو المرا النوع اللايوق... واللصقة داك...... كتر لها المراسيل.... مرة ...موية ...ومرة شاي...ومرة قهوة .....كل ما تجيب حاجة.. حاول رجعها تاني...لكن ما طوالي....... بعد فترة... الحذر ثم الحذز يا اخوان....ان كيدهن لعظيم........بعدين لابد من التطمئن والاطمئنان....... يعني توريها انو ما في واحدة في الدنيا دي بتبدلها بيها......وكتر من الغزل والتغزل فيها.... وحاول تدلعها... يعني لو اسمها سعاد قول ليها يا سوسو...نوال..نونو.....واي اسم ما بتلاقي ليهو دلع مناسب معاهو....اتوكل على الله وقول ليها ياماما ......وذكرها ايام الخطوبة وايام الزواج الاولى...وقول ليها والله لكن تصوري بالرغم من انو متزوجين لينا عشرة سنوات اصلو ما اتغيرتي.... سبحان الله... وادعك ايديك زي البردان وارفعن للسماء وقول احمدك يا الله.....والله انا حظي....في اللحظة دي هي حتشغل بنفسها...وتشد ضهرها...وتعاين لكرشها... وتحاول تصغرها...بقدر الامكان...وتقعد ترمش في عويناتها بلا سبب.... وطوالي قول ليها نفسي في شاي بلبن مقنن...ولقيمات....واتأكد انو ....حتمشي وتقعد فترة طويلة في سواة الشاي... وحتتقطع عشان يطلع سمح.....
او ممكن تقول ليها والله شامي لي ريحة طلح مولع.....بس دي مشكلة وخاصة لو عندها شافع صغير لانها حتمسكك ليهو...وحيقعد يصرخ ويحميك .... المصاورة في الانترنت........لابد ان تتأكد انو الشافع نام...........والله ولي التوفيق


للمتزوجات فقط

الراجل السوداني عاطفي شديد.... كلمة توديهو..وكلمة تجيبو.... عشان كدا انا لو كنت مرا.. حاستغل النقطة دي واوظفها لمصلحتي..........يعني اكون عارفة متين اعكنن عليهو ومتين افرحو... والله كنت العب بيهو لعب...الا نسوانا نحن ولله الحمد عارفات حاجة واحدة ... متين يعكنن عليهو وبس....
يعني كنت... اول ما هو يصحا من النوم.. ولو انا عايزة حاجة... ا نشحط قدامو.. وهو بيجقم في الشاي... واقول له.. يا سيد اللهيج السكري.....ويعجبوني الجعلين الفي شرابهم للشاي ما بيخافو الا من الله.....يا جمل الشيل يا الخاتي الميل.....يا ابضراع...بلا ضراع المارسيدس الشبح ما عندو متيل.....كر.... كدي... يا مقنع الكاشفات... ابعد ما اتأكد انو اتنفخ... ادخل في الموضوع طوالي...واكيد بعد المديح دا والشكر دا حيقول حاضر....وانا ازغرد بطول حسي زغردتين طوال..... لتأكيد الطلب وزيادة في النفخ........اما لو ما عايزة منو حاجة... اجيب لو كباية الشاي ...ارزعها ليهو قدامو...واخد لي شهقتين كبار... ومغية جامدة...وافتح نار... والله البنية الصغيرة دي الليل كلو ما خلتني انوم.. تبكي في جنس بكاء..وعليها جنس حمى.... زي النار... وما معروف حسي ترجاك والله ما ترجاك؟.... بعد تجي من الشغل؟.....طبعا هو حيعاين لي بقعر عينو...وبعد ما تأكد انو خلاس .. الجرعة الاولى جابت مفعولها.... ابدا في البعدها.....".هووي وانت جايي... سيد البيت دا ما تنسى تديهو الايجار... الراجل نابحنا ليهو كم يوم."...المرة دي ما حيقدر يرفع عينو يعاين لي.... اديهو التالتة طوالي... اطرق الحديد وهوساخن...".حسي الولد دا يمشي المدرسة بشبطو المقطع دا؟...والله بقى فضيحة وسط... اخوانو.."...........
لكن لو انا عايزة منو حاجة وهو جايي من الشغل... قبل مواعيدو بخمس دقايق ادخل اشطّف... واجلّط وشي بشوية كريمات.. واضرب شلاليفي ورموش عيوني شوية بوهية...والملم شعيراتي.. واجبدن جبدتين بالمشط.... واهجّرن بالفرشة... عشان مافي واحدة فيهن ترفع راسها في اثناء الاستقبال...واجري علي الدولاب واشوف قزازة الخومرة وين...وجبغ جبغ.. امسح رقبتي وايديا.....واتحكّر في العنقريب المواجه باب الشارع والله الشقة...واول ما اسمع كشتت نعلاتو استعد..ودخلتو .افتح خشمي قدر ما اقدر..و ابتسم بسمة عرييضة..واقولو..... نور بيتنا شارع بيتنا....واعاين لو وهو ماشي وداخل لجوه ...وانا بوراهو ادندن ب....اسد الله البضرع......والله غنية .... الرايق النعسان الدلال غاريهو... البيكاوي الناس خطوة خطوة مشيهو....وادخل معاهو الاوضة..واساعدو في مليص هدومو زي المسلسلات المصرية.... واقول لو اخوت الغدا.؟. والله تاخد لك نومة.؟.. ان قال خوتيهو ... اجري جري وكلفت كلفت اجيب الغدا..وهو ياكل وانا اونسو.....واخد لي ضحكة..وكع.. اديهو ضربة في ضراعو...واقول لو والله غايتو انت يا احمد؟ وقرقرقر...وكع في الضراع تاني....واطلب طلبي بعد مازولي يتخدر خلاص......
اما لو ما عاوزة منو حاجة....... قبال مواعيد جيتو بساعة.... اجر توبي واتجبد فيهو. واخت بنيتي في سدري.. وانوم.. لما هو يجي يلقاني غرقانة في النوم...و الريالة سايلة... والشطر برا... والبنية.. قابضة فيهو بخشمها وبرضها نايمة...والشعر منكوش... اعاين لو بعين مفتحة وعين مغمدة....واقول الملاح في التلاجة سخنو...والله الليلة عندي جنس وجع راس..عينة.... وهو يكون لا عندي ولا حاجة واكون شديدة زي الحصانة..... لكن دي وسيلة من وسائل الدفاع الوقائي.........




ممنوع من النشر


اتمنى اكون........ ود الصادق المهدي.....واربي لي حصين....ويوم عيد الفطر اركب احسن فرس عندي ..والناس يباروني ..من ودنوباوي للابيض..... عشان نصل ...
صباح عيد الضحية... واقعد ادوبي ليهم لحدي ما نصل الابيض.........

انا المهدي ود المهدي وجدي المهدي
ان ود البيسوطها ويجوطها..وانا ود البيهدي
البلد بلدي من حلفا لنمولي
شنو الدينكاوي؟ وشنو الجعلي؟
طز فيك يا منوال وطزين فيك يا علي

اتمنى اكون ود الترابي....واسوي لي مسدس.....والبد جنب مدارس وكليات البنات....وكل ما تجي مجموعة مارقة... اضرب لي خمسة طلقات في الهواء ..... والبنات يسرخن ...... وانا اقر قر واضحك لمن اقع علي قفاي.....واقول لهن ارشكن.؟.... ويقولن لي الرسول فوقك..........واقولهن الرسول عزيز وغالي....واخت.. ايدي.. اليمين.. فوق اضاني.. الشمال واقعد ادوبي.....


انا جنى الجايطها... وخلاها كترابا
انا ود الكل ما تتعدل...يتعدل لخرابا
خيلي تسعه..وملياراتي تسعه.. وعماراتي تسعه
وناس سجيمان ان شاء الله يسكنو في خرابه

واتمنى اكون... سفير ... وام وليداتي تبقى مرة السفير..ويعزمنا السفير.. الياباني حفلة شاي.. مع باقي السفراء ونسوانهم...ونمشي....
ويكبو الشاي ويجيبوالبسكويت..... وتتوكل على الله السيدة حرمنا... وتعمّط البسكويت في كباية الشاي وتقعد تاكل....وتتلفت علي مرت السفير الامريكي... وتقولها خسمتك بالرسول كان ما مديتي ايدك....وتقولها نو.... نو كيفين يا بت امي ؟ الاكل رااااااااااقد..


واتمنى اكون مذيع... في التلفزيون...واستضيف اجعص فنان...واسالو واجاوب انا... واطلب منو نسمع غنية.... واقعد اغني معاهو بطول حسي.... واكان ما عجبو اليبلع المكرفون الشايلو دا............

اتمنى اكون.....في الامن.... اجيب سجيمان واعلقو...من كرعيهو في مروحة السقف...واخليهو يصلي صلاة التراويح مع صلاة القيام... وهو معلق...وفي كل ركعة يقرا سورة البقرة

واتمنى ان يغيرو اسم السودان.... طالما هو في الحالة دي....من اسم السودان الي اسم.... باركين و فاسو....وتكون عاصمتها مبيريكة باسمها القديم......

واتمنى ان اكون بنغلاديشي... واجدد جوازي كل خمسة سنوات.... وبخمسة وعشرين ريال بس كمان....كية علي ناس ضرائب المغتربين....واغشى السفارة السودانية وادخل علي القنصل .....واقول لو صديق:- انت في مسكين..........

.


وفاة سجيمان


الناس تحلم بحاجات كويسة.... وانا احلم إني متا. توفيت... لكن الكويس انو دخلت الجنة........وشدر كتير.. وسراير... وقدر ما كست لعنقريب.. ما لقيت......وبنات حور بالكوم... وموية جارية... مختلفة الالوان.. ابيض واصفر واحمر.. . لقيت واحدة ست شاي تحت شدرة... جريت لي بنبر وقعدت جنبها...كبت كباية.. شاي.... الغريبة ست الشاي خواجية.......والناس الحايمين كلهم خواجات.....جا واحد قعد جنبي... خواجة برضو... اتلفت عليهو سالتو ...... انت منو؟ قال لي انا جرهام.... جرهام بل......قدر ما حاولت اتذكر جرهام دا منو ما عرفت....... فجأة الموبايل حقو ضرب....وطق انا اتذكرتو... دا بتاع التلفونات..كملت كباية الشاي....وهبشت جيوبي كايس... لكيس الصعوط... ما لقيتو....قلت اقوم احوم شوية.... في الدرب لاقاني برضو خواجة..... شايل كدوس.....ومدنقر في كتاب يقرأ.. اصلو ما رفع راسو عاين لي...وانا اعين ليهو .... وطوالي اتذكرتو.....دا لويس باستير...الله ينعل ابو القراية... حتى في الجنة تقرو.. عالم نكد....وبعدين كايس لشنو في الجنة... هنا لا في بكتيريا لافي مرض.....وبعيد مني شوية شايف زول راقد تحت شدرة... قربت منو.... ضحك وعاين لي وقال لي اقعد.... دا عرفتو طوالي..... نيوتن....من قصرتو دي......قلت لو لا مستعجل...احترت الجنة دي كلها خواجات الحكاية شنو؟ طيب الفي النار منو يا ربي؟....... انا لازم افتش للجماعة .. انا متأكد حيكونو هنا.. ديل ناس الاسنبوتنق بتاعهم ما بيجلي اصلو...اقدر ما الف بشارع يلاقيني خواجة.... لكن في ركن كدي شايف لي شوية ناس ملمومين.... قربت منهم....... عرفتهم ... الخوارزمي .... بن سيناء....بن البيطار...ومعاهم شوية ناس ما عرفتهم...........
لا ناسي ديل يكونو مشو وين؟يا ربي؟ يكونو في درجة اعلى من دي؟.... المهم قلبت الجنة دي سما واطا...........لا لقيت بن لادن ولا لقيت... ملا ...ولا ترابي... ولا كل الجماعة.....الكنت قايل نفسي بلقاهم هنا مية في المية........ قلت يا ربي النا س دي معقول كلهم قادين دين؟



يا رب لا تحرم بيت من الاطفال

وحم نسوان المغتربين عينة... وخاصة لو كانت الولدة الاولي...الواحدة تقول دايرة دوم....والله قنقليس...والله حمبق....واكان جاملة راجلها تقول دايرة بطيخ في عز الشتاء....وطول النهار راقدة ...والراجل يشيل ويجيب في الاكل من المطعم...وشوفتها لراجلها جاء داخل....... عوع وجري علي الحمام عشان تطرش........ومسيكين هو يسوي الاكل الجابو في صينية ويجيبو يختو ليها قدامها...ويا سوس ما توقمي تاكلي...لا ما دايرة ما عندي نفس... لكن يا سوسو كدا حتموتي....تغتى بتوبها وتقولو كان جعت باكل بعدين..تنضم من تحت التوب....تمر فترة الوحم بملاوة...وقرف شديد....والجنى يكبر.... والمغتربين ..... الغريبة نصهم عبطاء... الواحد يخت اضانو في بطن المرا ويقعد يسمع........ والله يا سوسو قاعد يفرفر...والله يا سوسو بيلعب دافوري....والله يا سوسو قلب الهوبا........قاعد يغني...وسوسو ..متكيفة ومبسوطة لفرفرة الجنى وعوارة الابو....سوسو تلد وربنا يحلها بالسلامة.... ويجو البيت .ولد سموهو محمد... أي مغترب في السعودية بالمناسبة عندو ولد والله اتنين اسمهم محمد....ويدلعوهو بحمادة.....والله تلوشة ...والله ... عسول... والله أي حاجة تدل على الدلع المابيشبة دلع الناس التانين.....تبقى ما عندهم شغلة غير حمادة...الحليب ستة وعشرين.. البزز اربعة... اللعب قبال ما عيونو يشوفن كويس.... البامبرز الحفاضات ...ودي موال تاني...ولازم يكون اغلى نوع... ويطلع في الدعايات بتاعة التلفزيون...والسرير لحمادة...والبطانية لحمادة ..حمادة بال...حمادة ضحك..حمادة قال ويييق حمادة قال مييييييغ....حمادة اتقلب.... اللهاية لحمادة.. طول اليوم محشورة في خشمو... ولو بنشرت يجيبو احدة تانية...والوليد حمادة مسيكين كل ساعة امو تقلبو علي بطنو... وتجدع حفاض وتكرب التاني...وهاك يا النضمي المع حمادة...طول اليوم...انتي زعلتي.... انتي بكيتي.... مالك يا عسل مالك...وبري بري برية...ويكبر يسوي لو عربية.... وطق طق طقطق..طقطقطقطق...ويستحيل تشوف لك وليد والله بنية ... ما محزمنو بحفاض..الشافع يجيك ماشي من بعيد بحفاضو زي البطة...وجاري علي امو ويصرخ واععععععععععع..واععععععععععع.... الكريعات متنيات.... من عدم الشمس... وقعاد الشقق..القدوم.... يكبر من اللهاية الديمة قافلنها بيهو زي غتاية الزير...مشتح من الحفاضات الما تختا صلبو....الغريب بعض المغتربين من عباطتهم يشيلو معاهم البامبرز السودان.... وتلقاهم هناك ساكنين في بيت زبالة...فلهمة وقرضمة.......يكبر الولد...والبزة في خشمو...و البامبرز في صلبو مكروب.. ولو دخلت علي أي واحدة في المطبخ تلقى الشافع .. تحت كرعيها...واقف...وماسكة البزة في خشمو بايد .... واليد التانية يصوط في صرتو...والله يدعك في عيونو........
لو اتلمو المغتربين بشفعهم في شقة زول واحد...... اول حاجة صريخ الشفع يجيب الضهبان.....وكل مرة اتنين والله تلاتة كابسين باب الشقة دايرين يمرقو...والله تلاقى اتنين يتلاو ويجابدو في لعبة والله ملعقة والله نعلات واحدة من اماتهم....والله تلاتة طالعين في سرير وينططو ويصرخو باعلى صوت عندهم.. وتلاقي واحد دخل الحمام... وقدر مافي ماسورة تحت ايدو فتحها... وفي عينة هوايتها اكل الصابون ومعجون الاسنان....والله واحد جرى علي محل الرجال وكايس لابوهو... بابا وععععععععععع بابا وععععععععععع....ويتحكر فوق ابوهو.. وابوهو مستلم الناس نضمي....والولد يقيف علي حيلو ويقعد يصوط ويخمش في نخرين ابوهو......والله يمسك النضارات...والله العمه.....والابو يزحزح في ايدين الولد وبرضو مستمر ينضم.......ويحكي..... البشير وقرنق... وقرنق والبشير....
واي شافع عندو سنون ... تلقاهن مسوسات..من البزة واكل الحلاوة...وشراب العصاير.. والحشي البلا جيهة و صوب
اليكبر منهم وهو في الغربة تلقاهو بومة.. دلاهة...حمادة ازيك... يرد عليك ويقولك حمادة ازيك برضو....انت ود منو؟ انا ود سعاد....وختت صينة العشاء تلاقي كل واحد من الرجال زح لشافعو وقعدو جنبو....والشفع يصوطو في الاكل ...ولو في ضيف عندو دم ياخد لقمتين ويقوم ...ويتم عشاهو ساندوتشات...

(عدل بواسطة ود شاموق on 02-20-2003, 08:52 AM)