|
Re: لماذا تنق المرأة ؟ (Re: zola123)
|
كبر ده الكلام ولا بلاش, بس منو اليقتنع
شيري مفخرة النسوة النقناقات واولى دفعة سنة أولى نقة كيف حالك سلام مستطيل استطالة ردك الجميل الكل ما القاكي كاتبة حاجة امشي اشرب موية وارجع عشان اقدر آخد نفسي وانا اتابع افكارك المتسلسلة بانسيابية بعدين مالكم على السريلانكيات, قالوا الفلبينيات ما بينقن لوول
ورورووك وروروووك يا ورورووك, ده كلام شنو, تقوم علينا جمعيات الرفق بالنسوان قلتا لي حبل؟ اها طيب وبتمشي كيف والحبل ده منسدل من خشمها ولمن تطلع في الشارع تتمشى, كان زول وراها داس على الحبل تقوم المسكينةتتشنقل و تقع؟ وكان شافع فضولي قال قبضوا جرى منو ساعتا البينجدها هل فكروا في العواقب؟ ولمذا هم بهذه القسوة اسئلة تحتاج لاجابة على طريقة فيصل القاسم السقيل مش احسن يسمعها ويرتاح؟
تونة مسائك كله عجرفة وحب تصوري انا زاتي ما بدور نقة النسوان دي بس خجلتا وقلتا مادام هي أمر واقع كدي النفسرها ونحللها للأخوة في الطرف الآخر عشان يعرفوا يتعايشوا معاها ودي خمسة نقة مني ليكي
ما باكره شي قدر ما ينادوني أقدم العصير للنسوان وتمسكني واحددة فيهم اسالة, بعدين الوالدة تعاين لي كدة عشان أفهم انو أقعد شوية أجامل الحضور لأنو معروف عني باقدم البارد وباجري , مريحة روحي أخر مرة قعدتا فيها كانت الونسة عن الملايات الجديدة في محلات فلان, وعن فلانة الجابت طقم فناجين مبالغة واتساقلت ابت توري النسوان جابتهم من وين قامت اسمها منو ديك ما خلتها, قالت ديل من محلات فلان, الدرزن بي 20 درهم, بعدها نشرة الأخبار الاجتماعية, اسمها منو دي قاالوا ولدها عرس فلبينية, اولاد الزمن ده بقوا كدة أخير انا طابقة على عيالي ديل وما بيمشو بدون شوري ما البعيد حسي ولد التانية ده يكون عرس هو زاتو بنجلاديشية لووول هي الراجل الما يختشي ما عرس في فلانة, ما باسألوا العاقلة الرزينة أم العيال الله يجازي الحاج متولي كنا نقصينوا احنا؟ بعدين النشرة السياسية وما أدراك ما السياسة عند أولائك النسوة كل واحدة تقتطع جملة سمعتها من خشم راجلها في ونسة الغداء ظهر اليوم وتتشدق بيها ولمن العبارات تكتر عليها او زول يسألها سؤال ما تقدر تجمع وترتبك وترجع كأنها اتزكرت مكان المفارش الكطرزة السألتهم منها فلانة قبييل وتمشي ترد عليها
عايني كدة كفاية ما يقوموا يقولوا علي انا نقناقة كمان
تحياتي زولة123
|
|
|
|
|
|
|
العنوان |
الكاتب |
Date |
لماذا تنق المرأة ؟ | zola123 | 01-25-03, 08:52 PM |
Re: لماذا تنق المرأة ؟ | مهاجر | 01-25-03, 10:53 PM |
Re: لماذا تنق المرأة ؟ | Elkhawad | 01-27-03, 02:42 AM |
Re: لماذا تنق المرأة ؟ | woroorrook | 01-27-03, 09:39 AM |
Re: لماذا تنق المرأة ؟ | abas | 01-27-03, 10:26 AM |
Re: لماذا تنق المرأة ؟ | zola123 | 01-27-03, 11:38 AM |
Re: لماذا تنق المرأة ؟ | مهاجر | 01-28-03, 07:48 AM |
Re: لماذا تنق المرأة ؟ | Kabar | 01-28-03, 09:48 AM |
Re: لماذا تنق المرأة ؟ | shiry | 01-29-03, 00:22 AM |
Re: لماذا تنق المرأة ؟ | woroorrook | 01-29-03, 00:36 AM |
Re: لماذا تنق المرأة ؟ | toona | 01-29-03, 01:30 AM |
Re: لماذا تنق المرأة ؟ | toona | 01-29-03, 03:28 AM |
Re: لماذا تنق المرأة ؟ | WAD ELGAALI#4 | 01-29-03, 03:39 AM |
Re: لماذا تنق المرأة ؟ | مهاجر | 01-29-03, 11:37 AM |
Re: لماذا تنق المرأة ؟ | zola123 | 01-29-03, 01:42 PM |
Re: لماذا تنق المرأة ؟ | zola123 | 01-29-03, 01:55 PM |
Re: لماذا تنق المرأة ؟ | مهاجر | 01-29-03, 02:09 PM |
|
|
|